Kaisog nga Ginpabakod sang Gugma
Kaisog nga Ginpabakod sang Gugma
“Ang Dios wala maghatag sa aton sang espiritu sang katalaw, kundi sang gahom kag gugma kag kaligdong sang hunahuna.”—2 TIMOTEO 1:7.
1, 2. (a) Ano ang sarang mahimo sang isa ka tawo bangod sa gugma? (b) Ngaa pinasahi gid ang kaisog nga ginpakita ni Jesus?
ISA ka bag-ong kasal ang nag-scuba diving malapit sa isa ka banwa sa sidlangan nga baybayon sang Australia. Sang manugbutwa na sila, isa ka daku nga puti nga bagis ang hinali nga nagsalakay sa babayi. Maisugon nga gintiklod sang lalaki ang iya asawa kag sia ang nagpakaon sa bagis. “Ginhatag niya ang iya kabuhi para sa akon,” siling sang nabalo nga babayi sa tion sang lubong.
2 Huo, ang gugma makahatag gid sing tumalagsahon nga kaisog sa mga tawo. Si Jesucristo mismo nagsiling: “Wala sing isa nga may gugma nga daku pa sa sini, nga ihatag sang isa ang iya kalag para sa iya mga abyan.” (Juan 15:13) Wala maligaran sing 24 oras pagkatapos mamitlang ni Jesus ining mga pulong, ginhatag niya ang iya kaugalingon nga kabuhi, indi lamang para sa isa ka tawo, kundi para sa bug-os nga katawhan. (Mateo 20:28) Dugang pa, wala ni Jesus ginhatag ang iya kabuhi sa hinali lamang nga maisugon nga buhat. Nahibaluan na niya nga daan nga yagutaon sia kag pintasan, pamatbatan sing di-makatarunganon, kag patyon sa usok sang pag-antos. Ginhanda pa gani niya ang iya mga disipulo sa sini, nga nagasiling: “Yari karon, nagataklad kita sa Jerusalem, kag ang Anak sang tawo itugyan sa puno nga mga saserdote kag mga escriba, kag pamatbatan nila sia sing kamatayon kag itugyan sia sa mga tawo sang mga pungsod, kag uligyaton nila sia kag duplaan kag bunalon kag patyon.”—Marcos 10:33, 34.
3. Ano ang naghatag kay Jesus sing daku nga kaisog?
3 Ano ang naghatag sing pinasahi nga kaisog kay Jesus? Daku ang nabulig sang pagtuo kag diosnon nga kahadlok. (Hebreo 5:7; 12:2) Apang, labaw sa tanan, ang kaisog ni Jesus naghalin sa iya gugma, para sa Dios kag para sa iya isigkatawo. (1 Juan 3:16) Kon palambuon naton ini nga sahi sang gugma dugang pa sa pagtuo kag diosnon nga kahadlok, makapakita man kita sing tulad-Cristo nga kaisog. (Efeso 5:2) Paano naton palambuon ini nga sahi sang gugma? Dapat naton kilalahon ang Tuburan sini.
“Ang Gugma Gikan sa Dios”
4. Ngaa masiling naton nga si Jehova amo ang Tuburan sang gugma?
4 Si Jehova amo ang personipikasyon sang gugma kag ang Tuburan sini. “Mga hinigugma,” sulat ni apostol Juan, “padayon kita nga maghigugmaanay, kay ang gugma gikan sa Dios, kag ang tagsatagsa nga nagahigugma natawo sa Dios kag nagatigayon sing ihibalo sang Dios. Sia nga wala nagahigugma wala makakilala sa Dios, bangod ang Dios gugma.” (1 Juan 4:7, 8) Busa, ang gugma nga gikan sa Dios magalambo lamang sa isa ka tawo kon magsuod sia kay Jehova paagi sa sibu nga ihibalo kag magpanghikot nahisanto sa sinang ihibalo bilang tinagipusuon nga pagtuman.—Filipos 1:9; Santiago 4:8; 1 Juan 5:3.
5, 6. Ano ang nakabulig sa una nga mga sumulunod ni Jesus nga mapalambo ang tulad-Cristo nga gugma?
5 Sa iya katapusan nga pangamuyo upod sa iya 11 ka matutom nga apostoles, ginpakita ni Jesus ang kaangtanan sa ulot sang pagkilala sa Dios kag sa pagtubo sa gugma, nga nagasiling: “Ginpakilala ko ang imo ngalan sa ila kag ipakilala ko ini, agod ang gugma nga imo ginhigugma sa akon mangin yara sa ila kag ako mahiusa sa ila.” (Juan 17:26) Ginbuligan ni Jesus ang iya mga disipulo nga mapalambo ang sahi sang gugma nga kaangay sang gugma sa ulot niya kag sang iya Amay kag ginapahayag paagi sa pulong kag halimbawa kon ano ang ginarepresentar sang ngalan sang Dios—ang dalayawon nga mga kinaiya sang Dios. Busa, nakasiling si Jesus: “Sia nga nakakita sa akon nakakita man sa Amay.”—Juan 14:9, 10; 17:8.
6 Ang tulad-Cristo nga gugma isa ka bunga sang balaan nga espiritu sang Dios. (Galacia 5:22) Sang ginbaton sang una nga mga Cristiano ang ginsaad nga balaan nga espiritu sang Pentecostes 33 C.E., wala lamang nila nadumduman ang madamo nga butang nga gintudlo sa ila ni Jesus kundi nahangpan man nila sing bug-os ang kahulugan sang Kasulatan. Ining madalom nga paghantop maathag nga nagpatudok sang ila gugma sa Dios. (Juan 14:26; 15:26) Ang resulta? Bisan pa nabutang sa katalagman ang ila kabuhi, maisugon kag makugihon nila nga ginbantala ang maayong balita.—Binuhatan 5:28, 29.
Kon Paano Ginpakita ang Kaisog kag Gugma
7. Ano ang ginbatas nanday Pablo kag Bernabe sa ila magkaupod nga paglakbay subong mga misyonero?
7 Si apostol Pablo nagsulat: “Ang Dios wala maghatag sa aton sang espiritu sang katalaw, kundi sang gahom kag gugma kag kaligdong sang hunahuna.” (2 Timoteo 1:7) Nagpamulong si Pablo suno sa iya personal nga eksperiensia. Binagbinaga kon ano ang ila naeksperiensiahan ni Bernabe sang magkaupod sila nga naglakbay subong mga misyonero. Nagbantala sila sa madamo nga siudad, lakip na sa Antioquia, Iconio, kag Listra. Sa tagsa ka siudad, ang pila ka tawo nangin mga tumuluo, apang ang iban nangin masupog nga mga manugpamatok. (Binuhatan 13:2, 14, 45, 50; 14:1, 5) Sa Listra, ginbato pa gani si Pablo sang isa ka akig nga guban kag ginbiyaan sa pagdumdom nga patay na sia! “Apang, sang nagtipon sa palibot niya ang mga disipulo, nagtindog sia kag nagsulod sa siudad. Kag sang masunod nga adlaw nagkadto sia sa Derbe upod kay Bernabe.”—Binuhatan 14:6, 19, 20.
8. Paano ang kaisog nga ginpakita ni Pablo kag ni Bernabe nagapabanaag sang ila tudok nga gugma sa mga tawo?
8 Sang gintinguhaan nga patyon si Pablo, nag-untat bala sila ni Bernabe sa pagbantala bangod sa kahadlok? Wala gid! Pagkatapos “nakahimo sing madamo nga disipulo” sa Derbe, “nagbalik [sila nga duha] sa Listra kag sa Iconio kag sa Antioquia.” Ngaa? Agod palig-unon ang mga bag-uhan nga magpabilin nga mabakod sa pagtuo. “Dapat kita magsulod sa ginharian sang Dios paagi sa madamo nga kapipit-an,” siling ni Pablo kag ni Bernabe. Maathag nga ang ila kaisog naggikan sa ila tudok nga gugma para sa “gamay nga mga karnero” ni Cristo. (Binuhatan 4:21-23; Juan 21:15-17) Pagkatapos magtangdo sing mga gulang sa kada bag-o natukod nga mga kongregasyon, ining duha ka utod nga lalaki nangamuyo kag “gintugyan nila sila kay Jehova nga ila gintuuhan.”
9. Ano ang reaksion sang mga gulang sa Efeso sa gugma nga ginpakita ni Pablo sa ila?
9 Si Pablo isa gid ka mahigugmaon kag maisugon nga tawo amo nga madamo sa una nga mga Cristiano ang nagpalangga gid sa iya. Dumduma kon ano ang natabo sang ginpatawag ni Pablo ang mga gulang sa Efeso, diin nagtener sia sing tatlo ka tuig kag nakaeksperiensia sing madamo nga pagpamatok. (Binuhatan 20:17-31) Pagkatapos sila mapalig-on nga bantayan ang panong sang Dios nga gintugyan sa ila, si Pablo nagluhod upod sa ila kag nangamuyo. Nian, “sila tanan naghibi sing tuman, kag nagsubsob sila sa liog ni Pablo kag mapinalanggaon nga ginhalukan sia, bangod nasubuan gid sila sa pulong nga ginhambal niya nga indi na nila makita ang iya nawong.” Palangga gid sining mga utod nga lalaki si Pablo! Sa pagkamatuod, sang mag-abot ang tion nga kinahanglan na magbiya ni Pablo kag sang iya mga kaupdanan sa paglakbay, indi gid kuntani luyag sang mga gulang didto nga palakton sila.—Binuhatan 20:36–21:1.
10. Paano ang modernong-adlaw nga mga Saksi nagpakita sing kaisog bangod sang ila gugma sa isa kag isa?
10 Sa karon, ang mga nagalakbay nga manugtatap, mga gulang sa kongregasyon, kag ang madamo pa ginapalangga gid bangod sa kaisog nga ginapakita nila para sa mga karnero ni Jehova. Halimbawa, sa mga pungsod nga may inaway sibil ukon diin ginadumilian ang pagbantala, ginaduaw sang mga nagalakbay nga manugtatap kag sang ila mga asawa ang mga kongregasyon bisan pa posible sila mapatay ukon mabilanggo. Subong man, madamo nga Saksi ang nag-antos sa kamot sang mapintas nga mga manuggahom kag sang ila mga kaupod bangod indi sila manugid kon sin-o ang ila mga masigkatumuluo ukon kon diin nila ginkuha ang espirituwal nga pagkaon. Linibo ang ginhingabot, ginsakit, kag ginpatay pa gani bangod indi sila mag-untat sa pagbantala sing maayong balita ukon mag-untat sa pakig-upod sa ila masigkatumuluo sa Cristianong mga miting. (Binuhatan 5:28, 29; Hebreo 10:24, 25) Kabay nga ilugon naton ang pagtuo kag gugma sining maisugon nga mga kauturan!—1 Tesalonica 1:6.
Indi Pagtuguti nga Magbugnaw ang Imo Gugma
11. Sa ano nga mga paagi nagapakig-away sa espirituwal si Satanas batok sa mga alagad ni Jehova, kag ano ang kinahanglan nila himuon?
11 Sang gintagbong si Satanas sa duta, determinado sia nga ipaupok ang iya kaakig sa mga alagad ni Jehova bangod “nagatuman [sila] sa mga sugo sang Dios kag [nagapanaksi] tuhoy kay Jesus.” (Bugna 12:9, 17) Ang isa sa mga taktika ni Satanas amo ang paghingabot. Apang, sa masami ining estratehiya nagabalandra kay labi ini nga nagapasuod sa katawhan sang Dios kag nagapahulag sa madamo sa ila nga mangin makugi pa gid. Ang isa pa ka taktika ni Satanas amo ang pagganyat sang aton makasasala nga mga huyog. Kinahanglan ang tuhay nga sahi sang kaisog agod mabatuan ining pahito bangod ang pagpakig-away yara sa sulod naton, batok sa sayop nga mga handum sa sulod sang aton ‘malimbungon kag makatalagam’ nga tagipusuon.—Jeremias 17:9; Santiago 1:14, 15.
12. Paano ginagamit ni Satanas “ang espiritu sang kalibutan” agod paluyahon ang aton gugma sa Dios?
12 May isa pa ka gamhanan nga hinganiban si Satanas—“ang espiritu sang kalibutan,” nga amo ang nagapangibabaw nga huyog ukon motibasyon, nga direkta gid nga supak sa balaan nga espiritu sang Dios. (1 Corinto 2:12) Ang espiritu sang kalibutan nagapasanyog sang kakagod kag materyalismo—“ang kailigbon sang mga mata.” (1 Juan 2:16; 1 Timoteo 6:9, 10) Bisan pa ang materyal nga mga butang kag kuarta indi gid man makahalalit, kon ang aton gugma sa sini maglabaw sangsa aton gugma sa Dios, nian magadaug sa aton si Satanas. Ang gahom, ukon “awtoridad,” sang espiritu sang kalibutan nagadepende sa ganyat sini sa makasasala nga unod, sa pagkamalimbungon sini, sa pagkadalayon sini kag, kaangay sang hangin, sa pagkalapnag sini. Indi pagtuguti ang espiritu sang kalibutan sa pagdagta sang imo tagipusuon!—Efeso 2:2, 3; Hulubaton 4:23.
13. Paano mahimo matilawan ang aton kaisog nga huptan ang katinlo sa moral?
13 Apang agod mapamatukan kag masikway ang malaut nga espiritu sang kalibutan kag mahuptan ang katinlo sa moral, kinahanglan man ang kaisog. Halimbawa, nagakinahanglan sing kaisog agod maggua sa sinehan ukon patyon ang kompyuter ukon TV kon may ginapakita na nga malaw-ay nga palaguaon. Nagakinahanglan sing kaisog agod mapangindian ang pag-ipit sang mga katubotubo kag agod mauntat ang pagpakig-upod sa malain nga mga kaupdanan. Subong man, nagakinahanglan sing kaisog agod matuman ang mga kasuguan kag mga prinsipio sang Dios walay sapayan sang pagyaguta, gikan man sa mga kaeskwela, mga katrabaho, mga kaingod, ukon mga paryente.—1 Corinto 15:33; 1 Juan 5:19.
14. Ano ang dapat naton himuon kon nadagtaan na kita sang espiritu sang kalibutan?
14 Busa, daw ano gid ka importante nga pabakuron naton ang aton gugma sa Dios kag ang aton gugma sa aton espirituwal nga mga kauturan! Hatagi sing tion ang pag-usisa sang imo mga tulumuron kag estilo sang pagkabuhi agod tan-awon kon bala nadagtaan ka na sang espiritu sang kalibutan sa pila ka paagi. Kon nadagtaan ka na—bisan diutay lang—nian mangamuyo kay Jehova sing kaisog agod makakas ini kag malikawan. Wala ginapabungulan ni Jehova inang hanuot nga mga pakitluoy. (Salmo 51:17) Isa pa, ang iya espiritu mas gamhanan sangsa espiritu sang kalibutan.—1 Juan 4:4.
Maisugon nga Pag-atubang sa Personal nga mga Pagtilaw
15, 16. Paano ang tulad-Cristo nga gugma makabulig sa aton nga malandas ang personal nga mga pagtilaw? Maghatag sing halimbawa.
15 Ang iban pa nga mga hangkat nga kinahanglan atubangon sang mga alagad ni Jehova amo ang mga epekto sang pagkadihimpit kag pagtigulang, nga masami nagaresulta sa balatian, pagkabaldado, kapung-aw, kag iban pa nga mga problema. (Roma 8:22) Ang tulad-Cristo nga gugma makabulig sa aton nga malandas ining mga pagtilaw. Binagbinaga ang halimbawa ni Namangolwa, nga ginpadaku sa isa ka Cristianong pamilya sa Zambia. Sang duha pa lang ka tuig si Namangolwa, nangin baldado sia. “Mahuluy-on anay ako,” siling niya, “kay ginapensar ko nga basi mahadlok ang mga tawo sa akon hitsura. Apang ginbuligan ako sang akon espirituwal nga mga kauturan nga tamdon ang mga butang sing tuhay. Subong resulta, nadaug ko ang akon pagkamahuluy-on, kag sang ulihi, nabawtismuhan ako.”
16 Bisan pa may kaugalingon nga wheelchair si Namangolwa, masami nga kinahanglan sia magkamang kon mag-agi sa balasbalason nga duta. Apang, naga-auxiliary payunir sia sing di-magkubos duha ka bulan kada tuig. Isa ka tagbalay ang nakahibi sang nagpanaksi si Namangolwa sa iya. Ngaa? Bangod natandog gid sia sa pagtuo kag kaisog sining utod nga babayi. Subong pamatuod sang bugana nga pagpakamaayo ni Jehova, lima sa mga ginatun-an ni Namangolwa sa Biblia ang nabawtismuhan, kag ang isa nagaalagad subong gulang sa kongregasyon. “Masami nagasakit sing tuman ang akon mga batiis,” siling niya, “apang wala ko ini gintugutan nga magpauntat sa akon.” Ining utod isa lamang sa madamo nga Saksi sa bug-os nga kalibutan nga maluya sing panglawas apang gamhanan sa espiritu bangod sang ila gugma sa Dios kag sa ila isigkatawo. Daw ano gid ka kalahamut-an ining mga kauturan sa mga mata ni Jehova!—Hageo 2:7.
17, 18. Ano ang nakabulig sa madamo nga mabatas ang mga balatian kag iban pa nga mga pagtilaw? Maghatag sing lokal nga mga halimbawa.
17 Ang nagalukmatlukmat nga balatian makapaluya man sing buot, makapulung-aw pa gani. “Sa grupo sang pagtinuon sa libro nga ginatambungan ko,” siling sang isa ka gulang sa kongregasyon, “ang isa ka utod nga babayi may diabetes kag balatian sa batobato, ang isa may kanser, ang duha may malala nga arthritis, kag ang isa may lupus kag fibromyalgia. Kon kaisa naluyahan sila sing buot. Apang, nagapalya lamang sila sa miting kon maglain na gid ang ila pamatyag ukon maospital. Regular sila tanan sa pag-alagad sa latagon. Nagapahanumdom sila sa akon kay Pablo, nga nagsiling: ‘Kon san-o nga maluya ako, nian mabaskog ako.’ Bilib ako sa ila gugma kag kaisog. Mahimo nga ang ila panglawas nagahatag sa ila sing mas maathag nga katuyuan sa kabuhi kag sa kon ano gid ang matuod nga importante.”—2 Corinto 12:10.
18 Kon nagapakig-away ka sa balatian, sakit, ukon iban pa nga problema, “indi mag-untat sa pagpangamuyo” agod indi ka maluyahan sing buot. (1 Tesalonica 5:14, 17) Sa pagkamatuod, mahimo ka makabatyag sing kasadya kag kaluya sing buot, apang tinguhai nga magkonsentrar sa positibo, espirituwal nga mga butang, ilabi na sa aton hamili nga paglaum sang Ginharian. “Para sa akon, ang ministeryo sa latagon isa ka bulong,” siling sang isa ka utod nga babayi. Ang pagbantala sing maayong balita sa iban nagabulig sa iya sa paghupot sing positibo nga pagtamod sa kabuhi.
Ang Gugma Nagabulig sa mga Nakasala nga Manumbalik kay Jehova
19, 20. (a) Ano ang makabulig sa mga nakasala nga magtipon sing kaisog agod magpanumbalik kay Jehova? (b) Ano ang pagabinagbinagon sa masunod nga artikulo?
19 Madamo sang mga nagluya sa espirituwal ukon nakasala ang nabudlayan sa pagpanumbalik kay Jehova. Apang kon maghinulsol gid sila kag magpasag-uli sang ila gugma sa Dios, matigayon nila ang kinahanglanon nga kaisog. Binagbinaga si Mario, * nga nagapuyo sa Estados Unidos. Nagbiya si Mario sa Cristianong kongregasyon, nangin alkoholiko kag adik sa droga kag, pagligad sang 20 ka tuig, nabilanggo. “Naghunahuna ako sing madalom tuhoy sa akon palaabuton kag ginbasa ko liwat ang Biblia,” siling ni Mario. “Sang ulihi, naapresyar ko ang mga kinaiya ni Jehova, ilabi na ang iya kaluoy, nga masami ko nga ginapangamuyo. Sang makagua ako sa prisuhan, ginlikawan ko ang akon anay mga kaupdanan, nagtambong ako sa Cristianong mga miting, kag sang ulihi, nakapanumbalik ako. May ginabatyag na ako karon bangod sang akon anay bisyo, apang walay sapayan sini may dalayawon ako nga paglaum. Nagapasalamat gid ako sing daku kay Jehova bangod sang iya kaluoy kag pagpatawad.”—Salmo 103:9-13; 130:3, 4; Galacia 6:7, 8.
20 Sa pagkamatuod, ang mga tawo nga may kahimtangan kaangay sang kay Mario kinahanglan nga manikasog sing lakas agod makapanumbalik kay Jehova. Apang ang ila nagbaskog liwat nga gugma—subong resulta sang ila pagtuon sa Biblia, pagpangamuyo, kag pagpamalandong, magahatag sa ila sang kinahanglanon nga kaisog kag determinasyon. Si Mario napalig-on man sang paglaum sang Ginharian. Huo, upod sang gugma, pagtuo, kag diosnon nga kahadlok, ang paglaum makahatag man sing mabaskog nga puersa para sa kaayuhan sa aton kabuhi. Sa masunod nga artikulo, usisaon naton sing maayo ining hamili nga espirituwal nga dulot.
[Nota]
^ par. 19 Gin-islan ang ngalan.
Masabat Mo Bala?
• Paano ang gugma nakahatag kay Jesus sing daku nga kaisog?
• Paano ang gugma ni Pablo kag ni Bernabe sa mga kauturan naghatag sa ila sing pinasahi nga kaisog?
• Sa anong paagi ginatinguhaan ni Satanas nga paluyahon ang Cristianong gugma?
• Ang gugma kay Jehova makahatag sa aton sing kaisog sa pagbatas sa anong mga pagtilaw?
[Mga Pamangkot sa Pagtinuon]
[Retrato sa pahina 23]
Ang gugma ni Pablo sa mga tawo naghatag sa iya sing kaisog sa pagbatas
[Retrato sa pahina 24]
Kinahanglan ang kaisog agod matuman ang mga talaksan sang Dios
[Retrato sa pahina 24]
Si Namangolwa Sututu
