Asanninneq qanoq sapiinnerulersitsisartoq
Asanninneq qanoq sapiinnerulersitsisartoq
„Guutip tuninngilaatigut anersaamik qunutuumik, kisianni tunivaatigut anersaamik nakuussuseqartumik asannissuseqartumillu silatussuseqartumillu.“ — 2 TIMOTHEUSI 1:7.
1, 2. (a) Asanninneq inuup qanoq iliornissaminut kajumississutigisinnaavaa? (b) Sooq Jiisusip sapiissusia qaqutigoortuua?
KATERNGAAT illoqarfiup Australiap kangimut sineriaaniittup eqqaani aqqartartutut atortoqarlutik aqqarput. Immap qaavata tungaanukartillugit eqalussuaq qaqortaq tassanngaannaq sukkaqaluni arnap tungaanukalerpoq. Angutip nuliani sapiilluni ajappaa eqalussuarmullu imminut nerliulluni. Uillarneq eqqaaniaanermi ima oqarpoq: „Uanga pillunga inuunini pilliutigaa.“
2 Aap, inuit sapiissusermik qaqutigoortumik ersersitsinissamut asanninneq kajumississutigisinnaavaat. Jiisusi Kristusi nammineq ima oqarpoq: „Annerusumik asanninneqanngilaq ikinngutini pillugit inuunerminik akiginnittup asanninneranit.“ (Johannesi 15:13) Jiisusip taamatut oqareernermi kingorna ulloq ataaseq suli qaangiutinngitsoq inuunini pilliutigaa, inuk ataasiinnaq pinnagu, inuiaalli tamaasa pillugit. (Matthæusi 20:28) Aamma inuunini pilliutigeriataaginnanngilaa. Nalunngereerpaa mitaatigineqartussaalluni, naalliutsinneqartussaalluni, naapertuilluanngitsumik eqqartuunneqartussaalluni nappakkamilu anniartitaaffimmi toqutaasussaalluni. Allaat ajoqersukkani taamatut pisoqarnissaanut piareersarpai ima oqarluni: „Takuat, Jerusalemimut majuarpugut, Inuullu Ernera palasiunernut allakkanillu ilisimasunut pisinneqassaaq, taakkualu toqutassanngortissavaat Guutimillu nalusunut pisissallugu, mitaatigissavaallu qitserarlugulu, iperartorlugu toqullugulu.“ — Markusi 10:33, 34.
3. Suut pissutigalugit Jiisusi sapiissuseqangaarpa?
3 Suut pissutigalugit Jiisusi qaqutigoortumik sapiissuseqarpa? Ilaatigut uppernera Guutimillu mianerinnittuunera pissutaapput. (Hebræerit 5:7; 12:2) Pingaarnerpaamilli Jiisusip sapiissusia Guutimik inunnillu asanninneranik aallaaveqarpoq. (1 Johannesi 3:16) Uppernerup Guutimillu mianerinninnerup saniatigut asanninnermik taama ittumik ineriartortitsigutta Jiisusitut sapiitsigissinnaassaagut. (Efesosimiut 5:2) Qanormi ililluta asanninneq taama ittoq ineriartortissinnaagatsigu? Tamatumunnga kina pilerfiunersoq paasisariaqarparput.
’Asanninneq Guutimit pivoq’
4. Sooq oqartoqarsinnaava Jehova asanninnermut pilerfiusoq?
4 Jehova nammineq asannilluinnartuullunilu asanninnermut pilerfiuvoq. Apustili Johannesi ima allappoq: „Asasakka, asaqatigiinniarta asanninneq Guutimit pimmat; kinaluunniimmi asannittoq Guutimit erniusuuvoq Guutilu ilisimallugu. Asanninngitsup Guuti ilisimanngilaa, Guutimi tassaavoq asanninneq.“ (1 Johannesi 4:7, 8) Taamaammat inuk kristumiutut asanninnermik ineriartortitsisinnaavoq aatsaat eqqorluartumik ilisimasaqarnikkut Jehovamut palligukkuni qamanngalu pisumik naalalluni ilisimasani naapertorlugit iliuuseqaruni. — Filippimiut 1:9; Jaaku 4:8; 1 Johannesi 5:3.
5, 6. Ajoqersukkat siulliit asanninnermik Jiisusip asanninneratut ittumik ineriartortitsinissamut suna iluaqutigaat?
5 Jiisusip ajoqersukkani aalajaatsut aqqanillit naggammik qinoqatigigamigit Guutimik ilisarisimanninnerup asanninnermillu ineriartortitsinerup imminnut atassuteqarnerat ersersippaa ima oqarluni: „Aqqit taakkununnga ilisimalersippara ilisimalersikkumaarlugulu, asannissuseq uannut asannissuserisat taakkunaneeqqullugu uangalu taakkunaneeqqullunga.“ (Johannesi 17:26) Jiisusip ajoqersukkani asanninnermik nammineq Ataatamilu asaqatigiinnermissut ittumik ineriartortitsiniarneranni ikiorpai, Guutip aqqanut tunngasut, tassa Guutip pissusii nuanningaartut, oqaatsimigut iliuutsimigullu ersersillugit. Taamaammat Jiisusi ima oqarsinnaasimavoq: „Uannik takunnittup Ataataq takuaa.“ — Johannesi 14:9, 10; 17:8.
6 Asanninneq Jiisusip ersersitaa Guutip anersaavata inerititaasa ilagaat. (Galatiamiut 5:22) Ukiumi 33-mi piinsip ulluani kristumiut siulliit anersaamik illernartumik neriorsuutigineqartumik tunineqaramik, Jiisusip imminnut ilinniartitsissutigisimasarpassuinik eqqaasinneqaannanngillat, aammattaarli Allakkanik paasinninnerulerput. Guutip oqaasianik paasinninnerunertik Guutimik asanninnerulissutigaat. (Johannesi 14:26; 15:26) Tamanna qanoq kinguneqarpa? Allaat inuunertik navianartorsioraluartoq, nakimaallutik aallussilluarlutillu nutaarsiassaq nuannersoq oqaluussissutigaat. — Apustilit Suliaat 5:28, 29.
Sapiissuseq asanninnerlu iliuutsikkut ersersinneqartoq
7. Paulusip Barnaballu ajoqersuiartortitatut angalanerminni suut naammagalugit atortariaqarpaat?
7 Apustili Paulusi ima allappoq: „Guutip tuninngilaatigut anersaamik qunutuumik, kisianni tunivaatigut anersaamik nakuussuseqartumik asannissuseqartumillu silatussuseqartumillu.“ (2 Timotheusi 1:7) Paulusi nammineq misilittakkani naapertorlugit oqaluppoq. Eqqarsaatigeriaruk taanna Barnabalu ajoqersuiartortitatut angalaqatigiinnerminni sunik misigisaqarsimanersut. Illoqarfippaalunni oqaluussipput, ilaatigut Antiokiami, Ikonionimi Lystramilu. Illoqarfinni tamani uppertunngortoqarpoq, allalli assut akeqqersimaarput. (Apustilit Suliaat 13:2, 14, 45, 50; 14:1, 5) Allaat Paulusi Lystrami inupalaanit kamattorsuarnit ujaqqanik milloorneqarpoq, taakkualu Paulusi toqusimasorileramikku qimaannarpaat! „Ajoqersukkalli ungummanni nikuippoq illoqarfimmullu iserluni. Aqaguanilu Barnaba ilagalugu Derbemut aallarpoq.“ — Apustilit Suliaat 14:6, 19, 20.
8. Paulusip Barnaballu sapiissusiat inunnik allanik asanningaarnerannik qanoq ersersitsiva?
8 Paulusip Barnaballu Paulusip taamatut toqoriarneqaraluarnera ima annilaassutigitigaat uniinnarlutik? Naamerluinnaq! Angutit taakkua marluk Derbemi ’amerlasuunik ajoqersuganngortitsereerlutik’ „Lystramut, Ikonionimut Antiokiamullu uterput“. Sooq? Ajoqersuganngorlaat upperluartuarnissaannut kajumissaarniarlugit. Paulusi Barnabalu ima oqarput: „Naalliunnartorpassuit atoqqaarlugit Guutip naalagaaffianut isissaagut.“ Erseqqippoq sapiissusiat Jiisusip ’savaaraataanik’ asanningaarnerannik aallaaveqartoq. (Apustilit Suliaat 14:21-23; Johannesi 21:15-17) Ilagiinni pilersinneqarlaani utoqqaanertanik toqqaareerlutillu qinoreeramik, Paulusip Barnaballu taakku „[Jehovamut] upperfigilersimasaannut isumageqquaat“.
9. Utoqqaanertat Efesosimeersut asanninneq Paulusip imminnut ersersitaa qanoq periarfigaat?
9 Paulusi asanningaarpoq sapiitsupilussuullunilu, tamannalu pillugu kristumiut taamani inuusut ilarpassuisa asasupilussuanngorpaat. Misissoriartigu Paulusi ukiuni pingasuni ukiiffimmini assullu akerlilersorneqarfimmini Efesosimi utoqqaanertanik ataatsimeeqateqarmat qanoq pisoqarsimanersoq. (Apustilit Suliaat 20:17-31) Paulusip taakku Guutip savaataanik taakkununnga isumagisassanngortitaasunik paarsisooqqullugit kajumissaareerlugit, seeqqummeqatigai qinullunilu. Taava „tamarmik qissaserput, Paulusilu qungasiagut eqippaat kunillugulu. Anniaatiginerusaat tassaavoq oqarmat takoqqinnaveeritsik“. Qatanngutit taakkua Paulusimik asanningaaramik! Taanna angalaqatinilu aallartussanngoramik allaat ’ungagigaluarlugit avissaartariaqarsimavaat’, utoqqaanertat tassani najugaqartut ingerlaqqunngimmatik. — Apustilit Suliaat 20:36–21:1.
10. Nalitsinni Jehovap Nalunaajaasui ajornartorsiorfiusuni qanoq ilillutik sapiillutik asanninnermik ersersitsiveqatigiittarsimappat?
10 Ullumikkut nakkutilliisut angalasartut, ilagiinni utoqqaanertat allarpassuillu assut nuannarineqartarput Jehovap savaatai pillugit sapiillutik imminnut pilliutigisaramik. Assersuutigalugu nunani innuttaasut akornanni sorsuffiusuni oqaluussinermilluunniit inerteqquteqarfiusuni nakkutilliisut angalasartut taakkualu nuliaat ilagiit tikeraarniarlugit inuunerminnik navianartorsiortitsisarlutillu parnaarussaariaannaasarput. Aamma Jehovamut nalunaajaasorpassuit naalakkersuisunit akeqqersimaartunit taakkualu ikiortaannit naalliutsinneqartarsimapput, uppeqatitik killuutigerusunnginnamikkik imaluunniit anersaakkut inuussutissat sumit pisimanerlugit oqaatigerusunnginnamikku. Tusindillit malersorneqartarlutillu anniartinneqartarlutillu allaat toqutaasarput nutaarsiassaq nuannersoq oqaluussissutigiunnaarumannginnamikku uppeqatitilluunniit kristumiut ataatsimiinneranni katersuuteqatigisarunnaarumannginnamikkik. (Apustilit Suliaat 5:28, 29; Hebræerit 10:24, 25) Qatanngutit angutit arnallu sapiitsut taakkua uppernerat asanninnerallu ilaartigu! — 1 Thessalonikamiut 1:6.
Asanninnerit nillertunngorteqinagu
11. Periaatsit suut atorlugit Saatani Jehovap kiffaanut anersaakkut sorsuppa, taakkualu taassuma saassussineri qanoq akiorsinnaavaat?
11 Saatanip nunarsuarmut iginneqarami kamannermi Jehovap kiffaanut tutsinnissaa aalajangiusimavaa, taakkua ’Guutip inassutaanik Jiisusillu nalunaajaataanik aalajangiussimmata’. (Saqqummersitat 12:9, 17) Diaavulup periaasiisa ilaat tassaavoq malersuineq. Siunertaasorli anguneqanngitsoorajuttarpoq, malersorneqarnermi Guutip kiffaasa kristumiutut asaqatigiinnermikkut attaveqatigiilluarnerulissutigisarpaat ilarpassuisalu aallussilluarnerulissutigisarlugu. Saatanip periaaseq alla atortagaa tassaavoq inuit ajortulioqqajaasuunerannik atornerluiniarneq. Taamatut peqqusersiorluni ajortuliortitsiniarsarineq akiorniarlugu sapiissuseq allatut ittoq pisariaqarpoq, matumanimi pineqarpoq inuup qamuuna akiuunnera, nammineq uummatitsinni ’tatigisassaanngitsumi’ kissaatigisapilunnik akiuineq. — Jeremia 17:9; Jaaku 1:14, 15.
12. Saatanip Guutimik asanninnitsinnik sanngiillisitsiniarnermini „silarsuup anersaava“ qanoq atortarpaa?
12 Saatani aamma allamik sunniuteqartupilussuarmik sakkugisartagaqarpoq — tassa „silarsuup anersaava“, tassa imaappoq silarsuarmi kajungerineqarnerusoq imaluunniit kajumississutigineqarnerusartoq Guutip anersaavanut illernartumut akerliulluinnartoq. (1 Korinthimiut 2:12) Silarsuup anersaava piumatussusermik pigisaleritunermillu — ’isit pilerigisaannik’ — siuarsaavoq. (1 Johannesi 2:16; 1 Timotheusi 6:9, 10) Aningaasaateqarnermi pigisaqarnerlu imminni ajortuunngillat, taakkuninngali asanninnerput Guutimik asanninnitsinnit pingaarnerpaatilerutsigu Saatani ajugaasimassaaq. Silarsuup anersaava pissaaneqarpoq, imaluunniit oqartussaassuseqarpoq, imatut paasillugu uinimmik ajortiliusumik kajungilersitsisartoq, nakutitseriarsinnaasoq, uteriitsuusoq sunillu tamanik putoqquataarisinnaasoq. Uummatit silarsuup anersaavanit ’tunillanneqarteqinagu’! — Efesosimiut 2:2, 3; Ussatit 4:23.
13. Ileqqussatigut minguitsuujuarniarluta sapiitsuuniarnerput qanoq misilinneqarsinnaagami?
13 Ileqqussatigut minguitsuujuarniarluni pinertusaarniaraanni silarsuullu guutiitsup anersaavanik tamatuminnga itigartitsiniaraanni sapiitsuusariaqarpoq. Assersuutigalugu sapiitsuusariaqarpoq assinik kanngunartunik saqqummertoqaraangat filmertarfimmit anissagaanni imaluunniit qarasaasiamik tv-millu qamitsissagaanni. Sapiitsuusariaqarpoq qunusuitsuusariaqarlunilu tatineqarneq akiorniaraanni ikinngutipalaalluunniit ikinngutigiunnaarniaraanni. Aamma atuaqatinit, suleqatinit, sanilinit ilaquttanilluunniit mitaatigineqaraanni Guutip inatsisai najoqqutassiaalu aalajangiusimajumallugit sapiitsuusariaqarpoq. — 1 Korinthimiut 15:33; 1 Johannesi 5:19.
14. Silarsuup anersaavanit ’tunillanneqarsimagutta’ qanoq iliussaagut?
14 Guutimik anersaakkullu qatanngutitsinnik asanninnerulernissarput pingaaruteqangaarami! Sunik anguniagaqarnerpit qanorlu inooriaaseqarnerpit eqqarsaatiginissaat piffissaqarfigiuk, paasiniarlugu silarsuup anersaavanit arlaatigut ’tunillanneqarsimanerlutit’. ’Tunillanneqarsimaguit’ — ’tunillanneqalaaginnarsimagaluaruilluunniit’ — taava Jehova qinnuigiuk tamatuma akiornissaanut nigorsimanissaanullu sapiissusermik tuneqqullutit. Ilumoorluni qinnutit taamaattut Jehovap sumiginnarnavianngilai. (Tussiaat 51:19) Aammattaaq Guutip anersaava silarsuup anersaavanit pissaaneqarnerungaarpoq. — 1 Johannesi 4:4.
Inuttut misilinneqarnermi sapiissuseqarneq
15, 16. Asanninneq Jiisusip ersersitaatut ittoq inuttut misilinneqarnerit naammagalugit atornissaannut qanoq ililluta iluaqutigisinnaavarput? Assersuuteqarit.
15 Unamminiarnartut Jehovap kiffaasa akiortariaqagaat allat tassaapput nappaateqarneq, innarluuteqarneq, isumatsassimaneq ajornartorsiutillu allarpassuit naammalluinnanngitsuunermik utoqqalinermillu pissuteqartut. (Romamiut 8:22) Asanninneq Jiisusip ersersitaatut ittoq misilinneqarnerit taamaattut naammagalugit atornissaannut iluaqutigisinnaavarput. Namangolwa assersuutigeriartigu, Zambiami ilaqutariinni kristumiuusuni peroriartorsimasoq. Taanna marlunnik ukioqarluni innarluuteqalerpoq. Ima oqarpoq: „Ittoortupilussuuvunga eqqarsartarlungalu inuit allat isikkora tupannarissagaat. Anersaakkulli qatanngutima pissutsit allatut isiginissaannut ikiorpaannga. Ittoorunnaarpunga, naggataatigullu kuisippunga.“
16 Namangolwa kaassuartakkamik issiaveqaraluarluni asfalteqanngitsukkut aqqusinikkooraangami paarngortariaqartarpoq. Taamaakkaluartorli minnerpaamik ukiumut marloriarluni ikiorti-pioneriusarpoq. Arnaq Namangolwap oqaluussiffigimmani qialerpoq, qatanngutitta uppernera sapiissusialu killitsissutigingaaramigit. Namangolwap Jehovamit pilluaqquneqangaarneranut uppernarsaataasoq tassaavoq Biibilimik atuaqqissaaqatigisartagaanit tallimat kuisissimanerat, maannalu taakkua ilaat ataaseq utoqqaanertatut kiffartorpoq. „Nissukka annernartupilussuusarput,“ oqaluttuarpoq, „tamannali unissutigisanngilara.“ Qatanngut arnaq taanna nunarsuaq tamakkerlugu Jehovap Nalunaajaasorpassuisa timikkut sanngiitsut, Guutimilli tullerminnillu asanninnertik pissutigalugu anersaakkut nukittuut, ilagaat. Qularutissaanngilaq taakku tamarmik Jehovap isaani erlinnangaartuusut! — Haggaji 2:7.
17, 18. Nappaatit misilinneqarnerillu allat naammagalugit atornissaannut inuppassuit suut iluaqutigisarpaat? Ilagiissinneersumik assersuuteqarit.
17 Aamma katsorsarneqarsinnaanngitsumik nappaateqarneq sapiissuseerutitsisinnaallunilu isumatsassimalersitsisinnaavoq. Utoqqaanertaq ima oqaluttuarpoq: „Atuakkamik atuaqqissaaqatigiinni ilaaffigisartakkanni qatannguteqarpoq arnamik sukkorlunilu tartuluttumik, ataaseq kræfterpoq, marluk gigternertik pissutigalugu anniartupilussuusarput, ataaserlu lupuserlunilu fibromyalgeerpoq. Ilaannikkut nikallortarput. Aatsaalli napparsimarujussuaraangamik napparsimmavimmulluunniit unikkaangamik ataatsimiigianngitsoortarput. Tamarmik aalajangersimasumik oqaluusseqataasarput. Taakku Paulusip ima oqarneranik eqqaasittarpaannga: ’Sanngiittaraangama pissatsittarpunga.’ Asanninnerat sapiissusiallu pillugu nersortarpakka. Immaqa pissutsit atukkatik inuunermi pingaaruteqavissut isiginiarnerunissaannut iluaqutigisarpaat.“ — 2 Korinthimiut 12:10.
18 Innarluuteqaruit, nappaateqaruit allanilluunniit ajornartorsiuteqaruit, taava ikiorneqarnissat ’qinnutigiuaruk’ nikallortuunnginniassagavit. (1 Thessalonikamiut 5:14, 17) Qularnanngitsumik misigissutsikkut pitsaanerulertarlutillu ajornerulertassaatit, ajunngitsulli anersaakkullu ittut pingaartumillu Guutip naalagaaffia pillugu neriuuterput erlinnartoq eqqarsaatiginiarneruniarsarikkit. Qatanngut arnaq ima oqarpoq: „Oqaluussineq uannut katsorsaataavoq.“ Nutaarsiassamik nuannersumik oqaluussissutiginninneq inuunermut isumalluartumik isiginnittaaseqartuarnissaminut iluaqutigaa.
Unioqqutitsisut Jehovamut uternissaminnut asanninneq iluaqutigisarpaat
19, 20. (a) Ajortuliorsimasut Jehovamut uternissaminnut sapiissutsip pisariaqartitamik pinissaanut suna iluaqutigisinnaavaat? (b) Allaaserisami tulliuttumi suna sammineqassava?
19 Anersaakkut sanngiillisimasut ajortuliorsimasulluunniit ilarpassuisa Jehovamut uternissartik sapernartippaat. Ilumoorlutilli peqqissimillutillu allamik isumataarunik Guutimillu asanninnerminnik ineriartortitseqqilerunik sapiissuseq pisariaqartitartik pissavaat. Mario USA-mi najugaqartoq assersuutigeriartigu. * Mario ilagiinnit kristumiunit qimaguppoq imerajuttunngorlunilu ikiaroornartunillu atornerluisunngorluni. Ukiut 20-t tamatuma kingorna parnaarussaavoq. Mario ima oqaluttuarpoq: „Siunissara Biibilimillu atuartaqqilernissara pimoorullugu eqqarsaatigisalerpakka. Piffissap ingerlanerani Jehovap pissusii qujamasuutigilerpakka, ingammik nallittuisuunera, nallittuinissaalu qinnutigikulasarpara. Parnaarussivimmit iperagaagama kristumiut ataatsimiinnerinut najuuttalerpunga, naggataatigullu ilanngutiteqqinneqarpunga. Timinnut tunngatillugu siaruartikkakka katersorpakka, maannali nuanningaartumik neriuuteqarpunga. Jehova assorsuaq qujamasuffigaara nallittuinera isumakkeerfiginninneralu pillugit.“ — Tussiaat 103:9-13; 130:3, 4; Galatiamiut 6:7, 8.
20 Mariop atugarisimasaatut atugaqartut soorunalimi Jehovamut uterniarlutik tamaviaartariaqarput. Asanninnerli Biibilimik atuaqqissaarnikkut, qinunikkut eqqarsaatiginneqqissaarnikkullu ineriartortitartik pisariaqartitaminnik sapiissuseqalissutigalugulu aalajangersimalluinnalissutigissavaat. Aamma Mariop Guutip naalagaaffia pillugu neriuut nakussatsissutigaa. Aap, asanninnerup, uppernerup Guutimillu mianerinninnerup saniatigut neriuut ajunngitsuliornissamut kajumississutaangaarsinnaavoq. Allaaserisami tulliuttumi tunissut anersaakkut ittoq erlinnartoq tamanna sammissavarput.
[Quppernerup ataani ilanngussaq]
^ imm. 19 Ateq allanngortitaavoq.
Qanoq akissavit?
• Jiisusip qaqutigoortumik sapiissuseqarnissaminut asanninneq qanoq iluaqutigaa?
• Qatanngutinik asanninnertik pissutigalugu Paulusi Barnabalu qanoq sapiitsuliorpat?
• Kristumiutut asaqatigiinnermik aserorsaaniarluni Saatanip periaatsit suut atortarpai?
• Jehovamik asanninneq pissutigalugu misilinneqarnerit suut naammagalugit atornissaannut sapiissuseqalersinnaavugut?
[Atuaqqissaarnermi apeqqutit]
[Qupp. 15-mi assiliartaq]
Paulusip inunnik asanninnini pinertusaarnissaminut sapiissuseqalissutigaa
[Qupp. 16-mi assiliartaq]
Guutip najoqqutassiaanik maleruaajuassagaanni sapiitsuusariaqarpoq
[Qupp. 16-mi assiliartaq]
Namangolwa Sututu