Nonglem paasda raoodo
Nonglem paasda raoodo
“Wẽnnaam ka kõ tõnd dabeem sɩɩg ye, yaa sɩɩg sẽn wat ne pãnga la nonglem la yam.”—2 TƖMOTE 1:7.
1, 2. a) Nonglem tõe n kɩtame tɩ ned sak n maan bõe? b) Bõe yĩng t’a Zezi sẽn tall raood ningã ka mak-n-taaga?
OSTRALI, rao a ye ne a pag sẽn nan kẽ kãadem paalem n da reemd koom mogrã noore. B sẽn lis koomẽ wã n wa pukdẽ, b yãa zĩm parwẽnd ning b sẽn boond ne farend tɩ rekẽ wã sẽn wat n na n vol pagã. Ne raoodo, raoã penga a pagã n lebs kɛɛng n bas tɩ zĩnfã yõk yẽ mengã. A kʋʋrã daare, a pagã yeela zãma wã taoor woto: “A kõo a vɩɩmã n fãag maam.”
2 Nonglem sɩd tõe n kɩtame tɩ ned tall raood sẽn ka mak-n-taaga. A Zezi Kirist meng yeela woto: “Nonglem ka be sẽn yɩɩd woto ye, tɩ ned sak kũum a zo-rãmb yĩnga.” (Zã 15:13) A Zezi sẽn gom woto wã, pa yã n maan lɛɛr 24 la a rɩk a vɩɩmã n kõ ye. La a Zezi nengẽ wã, a pa kõ a vɩɩmã nin-yɛng yĩng ye, yaa ãdem-biisã fãa yĩnga. (Matɩe 20:28) Sẽn paase, a sẽn na n kõ a vɩɩmã, pa yɩ bũmb n ling-a t’a tãoos raood zĩig pʋgẽ n sak ye. A ra reng n miime tɩ b na n yaal-a lame la b nams-a, tɩ b na n kaoa a bʋʋd kɛgr la b yaool n kʋ-a namsg ra-luk zugu. Sẽn na yɩl tɩ bũmb nins sẽn da na n wa paam-a wã ra ling a karen-biisã, a pʋd n yeel-b-la woto: “Tõnd dabda Zerizalɛm, la b na n ninga Ninsaal Biigã maan-kʋʋdbã kãsem dãmbã ne gʋlsdbã nusẽ. La b na n kaoo bãmb bʋʋd tɩ yɩ kũum n ning bãmb bu-zẽms nusẽ tɩ b yaal bãmba, la b tʋbs bãmb kolkoodo, la b pãb bãmb ne kalwaase, la b na n kʋʋ bãmba.”—Mark 10:33, 34.
3. Yaa bõe n sõng a Zezi t’a tall raood wʋsgo?
3 Yaa bõe n kɩt t’a Zezi tõog n tall raood woto? Yaa sɩd tɩ yaa a tẽebã la a wẽn-zoeerã yĩnga. (Hebre dãmba 5:7; 12:2) La sẽn yɩɩd fãa, yaa a Zezi sẽn nong Wẽnnaam la ãdem-biisã yĩng n kɩt t’a tall raood woto wã. (1 Zã 3:16) Tõnd me sã n nong Wẽnnaam la nebã, la d tar tẽeb la wẽn-zoeere, d na n tõog n talla Kiristã raoodã buudu. (Efɛɛz rãmba 5:2) La wãn-wãn la d tõe n paam nonglem kãng buudã? D segd n deng n bao n bãnga a sẽn yitẽ.
“Nonglem yita Wẽnnaam nengẽ”
4. Bõe yĩng tɩ d tõe n yeel tɩ nonglmã yita a Zeova nengẽ?
4 Wẽnnaam mengã yaa nonglem, nonglmã leb n yita yẽ nengẽ. Tʋm-tʋmd a Zã gʋlsa woto: “Mam kom-nongdse, tɩ d nong taaba, tɩ bõe, nonglem yita Wẽnnaam nengẽ, la ned ninga fãa sẽn tar nonglem, Wẽnnaam n dog yẽnda, la yẽ mii Wẽnnaam. Ned ninga sẽn ka tar nonglem ka mi Wẽnnaam ye, tɩ bõe Wẽnnaam yaa nonglem.” (1 Zã 4:7, 8) Dẽnd ned tõe n talla Wẽnnaam a Zeova nonglmã buudu. La yaa tɩlae t’a soab bao bãngr hakɩkã tɩ kɩt t’a pẽneg a Zeova, la a sak n tũ bãngr ning a sẽn paamã ne a sũur fãa.—Filip rãmba 1:9; Zak 4:8; 1 Zã 5:3.
5, 6. Bõe n sõng a Zezi Kirist pipi karen-biisã tɩ b tall a nonglmã buudu?
5 A Zezi wilga a yaoolem pʋʋsg ning a sẽn pʋʋs ne a tʋm-tʋmdb 11 wã sẽn yɩ kɩs-sɩd rãmbã pʋgẽ tɩ yaa ned sã n bãngd Wẽnnaam n paasdẽ la a na n nong-a n paasdẽ me. A yeela woto: “Mam wilga bãmb yãmb yʋʋre, la mam na n le wilg bãmba, tɩ yãmb sẽn nong maam ne nonglem ninga zĩnd bãmb pʋse, tɩ mam me pa ne bãmba.” (Zã 17:26) A Zezi sõnga a karen-biisã tɩ b tall yẽ ne a Ba wã sẽn da nong taab ne nonglem ningã buudu. A sõng-b-la ne a no-goamã la ne a manesmã tɩ b bãng tɩ Wẽnnaam yʋʋrã võor wilgdame t’a nonglmã, a pãngã, a tɩrlmã la a yamã pa tar to ye. Rẽ n so t’a Zezi tõog n yeel woto: “Ned ninga sẽn yã maam, a yãa m Ba.”—Zã 14:9, 10; 17:8.
6 Yaa Wẽnnaam vʋʋsem sõngã n kɩtd tɩ ned tall Kirist nonglmã buudu. (Galat dãmba 5:22) Yʋʋmd 33 Pãntekotã raare, pipi kiris-nebã sẽn paam vʋʋsem sõngã b sẽn da pʋlem-bã, sõng-b lame tɩ b tẽeg yɛl wʋsg a Zezi sẽn da zãms-ba, la sõng-b me tɩ b wʋm Gʋlsg Sõamyã võor sõma n paase. Yaa vẽeneg tɩ bãngr ning b sẽn paamã kɩtame tɩ b sẽn da nong Wẽnnaam to-to wã me paase. (Zã 14:26; 15:26) Rẽ woma bi-bʋse? B moona koe-noogã ne yẽesem la ne raood n pa zoe kũum meng ye.—Tʋʋma 5:28, 29.
B talla nonglem la raoodo
7. Bõe n paam a Poll ne a Barnabas b sẽn wa n gilgd n moond koɛɛgã?
7 Tʋm-tʋmd a Poll gʋlsa woto: “Tɩ bõe, Wẽnnaam ka kõ tõnd dabeem sɩɩg ye, yaa sɩɩg sẽn wat ne pãnga la nonglem la yam.” (2 Tɩmote 1:7) A Poll sẽn wa n yet woto wã, a ra tagsda yɛl sẽn paam yẽ mengã yelle. Ges-y bũmb ning sẽn paam yẽ ne a Barnabas b sẽn da wa n gilgd n moond koɛɛgã ne taabã. B moona tẽns wʋsg wala Ãntiose, Ikoniom, Listr la tẽns a taab pʋsẽ. Tẽn-kãensã fãa pʋsẽ, neb kẽer sak n lebga tẽedba, la sãnda yɩɩ koɛɛgã bɛɛb meng-menga. (Tʋʋma 13:2, 14, 45, 50; 14:1, 5) Listr tẽngã pʋgẽ, kʋʋng n kaoog zabr ne a Polle, n lob-a ne kuga, hal n wa tẽed meng t’a kiime tɩ b yaool n bas-a. “La karen-biisã gũbga a Polle, la yẽ yikame n leb n kẽ tẽnga pʋgẽ. La vẽkembeoogo, a Poll ne a Barnabas yiimi n kẽng Dɛrbe.”—Tʋʋma 14:6, 19, 20.
8. Wãn-wãn la a Poll ne a Barnabas sẽn tall raood ningã wilgd tɩ b sɩd ra nonga nebã hal wʋsgo?
8 Rẽ yĩnga sẽn da kellẽ bilf tɩ b kʋ a Pollã, yẽ ne a Barnabas yaeesame n bas koɛɛgã mooneg bɩ? Abada! B sẽn tɩ moon koɛɛgã Dɛrbe “n paam neb kẽer tɩ yɩ karen-biisi,” bãmb b yiibã “lebg n leba Listr ne Ikoniom ne Ãntios yɛsa.” Bõe yĩnga? Yaa sẽn na yɩl n tɩ keng karen-bi-paalsã tẽebo. A Poll ne a Barnabas yeela woto: “Yaa ne namsg wʋsgo la tõnd na n kẽ Wẽnnaam soolem pʋgẽ.” Vẽenega, yaa b sẽn da nong Kirist “pe-bi wã” ne b sũy fãa wã yĩng n kɩt tɩ b tall raood woto. (Tʋʋma 14:21-23; Zã 21:15-17) B sẽn yãk kãsem dãmb n gũnug tigims nins sẽn da nan lugl paalmã poore, b pʋʋsame “n bas bãmb Zusoaba bãmb sẽn tẽed a soaba nugẽ.”
9. Wãn-wãn la Efɛɛz kãsem dãmbã wilg a Poll tɩ bãmb me nong-a lame?
9 A Poll da yaa ned sẽn nong neb a taabã la a ra tar daoodo, hal tɩ pipi kiris-nebã wʋsg ra nong-a ne b sũy fãa. Tags-y bũmb ning sẽn maane, a Poll sẽn tall tigisg ne Efɛɛz kãsem dãmbã Mile wã yelle. Tẽeg-y t’a ra zĩnda Efɛɛz yʋʋm a tã tɩ b kɩɩs a koe-moonegã wʋsg beenẽ. (Tʋʋma 20:17-31) A Poll sẽn wa n sagl kãsem dãmbã tɩ b ges Wẽnnaam piisã yellã n sa, a yĩgimda ne bãmb n pʋʋse. Rẽ poore, “bãmb fãa yãba wʋsgo n mobg a Poll n mok yẽnda. La sẽn sãam bãmb sũyã n yɩɩda, yaa a Poll sẽn yeel tɩ bãmb ka na n le yã yẽ nengã.” Ad saam-bi-kãensã sɩd ra nong a Poll wʋsgo! Yaa vẽeneg t’a Poll ne neb nins sẽn da tũud-a n togd sorã sẽn wa n loogdẽ wã, kãsem dãmbã ra pa rat tɩ b loog ye.—Tʋʋma 20:36–21:1.
10. Wãn-wãn la a Zeova rũndã-rũndã Kaset rãmbã wilgd ne raood tɩ b nonga taaba?
10 Rũndã-rũndã, d nonga tigimsã pʋsẽ kãsem dãmbã la yel-gɛtb nins sẽn kaagd tigimsã hal wʋsgo, b sẽn tʋmd piisã neer yĩng ne raoodã yĩnga. Wala makre, yel-gɛtb kẽer ne b pagb sak n kẽnga tẽns zab sẽn gudg pʋsẽ, wall zĩis b sẽn gɩdg koɛɛgã mooneg n na n tɩ kaag tigimsi. B yaool n da miime tɩ b ra tõe n tɩ kẽes-b-la bãens beenẽ wall b kʋ-b menga. Kaset rãmb wʋsg me paama namsg na-toos ne b poorẽ dãmb nusẽ, b sẽn tõdg tɩ b kõn wilg Kaset rãmb yʋy ne b sẽn beẽ, bɩ tɩ b kõn wilg b tũudmã sɛb sẽn yitẽ wã yĩnga. B namsa Kaset rãmb a taab bãmb tusa me ne wẽnem wʋsg la b kʋ kẽer menga, b sẽn tõdg tɩ b kõn bas koɛɛgã mooneg wall tigissã kẽngr yĩnga. (Tʋʋma 5:28, 29; Hebre dãmba 10:24, 25) D rɩk saam-bi-kãens sẽn tall daood wʋsg woto wã tẽeb la b nonglmã togs-n-taare!—1 Tesalonik rãmba 1:6.
Ra bas-y tɩ y nonglmã maag ye
11. Wãn-wãn la a Sʋɩtãan zabd ne a Zeova sõgen dãmbã, la bõe la b segd n maane?
11 B sẽn dig a Sʋɩtãan saasẽ n sik dũniyã zugã, a sũurã yika ne a Zeova sõgen dãmbã b sẽn ‘sakd Wẽnnaam noor la b kõt kaset a Zezi zugã yĩnga.’ (Wilgri 12:9, 17) Bũmb a ye a Sʋɩtãan sẽn maand n zabd ne Wẽnnaam sõgen dãmbã yaa a sẽn kɩtd tɩ b namsd-b b tẽebã yĩngã. La naoor wʋsgo, rẽ wẽnegd n kɩtdame meng tɩ kiris-nebã nonglem ne taab paase, tɩ wʋsg yẽesem paas menga. A Sʋɩtãan tũnugda ne ninsaal yĩngã ratem wẽnsã me. La yɩl t’a ra tõog-d ne manesem kãngã, rẽnda d tall raood buud a to. Bõe yĩnga? Bala wakat kãnga wẽneg n yaa ne d mengã la d segd n zabe, rat n yeel tɩ ne ratem wẽnsã sẽn be tõnd sũurã sẽn yaa zãmb soabã pʋgẽ wã.—Zeremi 17:9; Zak 1:14, 15.
12. Wãn-wãn la a Sʋɩtãan tũnugd ne dũniyã yam n dat n boog tõnd sẽn nong Wẽnnaam ne nonglem ningã?
12 A Sʋɩtãan zab-teedã sʋka, a tara a ye sẽn yaa toaag wʋsgo. Yaa “dũniyã sɩɩgã” bɩ a yamã, sẽn dat n yeel tɩ yam ning sẽn be ne dũniyã neb n kɩt tɩ b manesmã kɩɩsd Wẽnnaam vʋʋsem sõngã. (1 Korẽnt dãmba 2:12) Dũniyã yam tusda nebã tɩ b baood “nin ratem wẽngã,” tɩ kɩt tɩ b yaa yão-be-rãmb la b nong laogo. (1 Zã 2:16; 1 Tɩmote 6:9, 10) Yaa sɩd tɩ laog la ligd pa wẽng ye. La tõnd sã n nong bõn-kãensã n yɩɩd d sẽn nong Wẽnnaamã, dẽnd a Sʋɩtãan tõog-d lame. Bũmb ning sẽn kɩt tɩ dũniyã yam tar pãng bɩ a so nebã vɩɩmã, yaa a sẽn kɩtd tɩ yĩngã ratem wẽngã be yamleoog wʋsgã yĩnga. Sẽn paase, a kẽed-f lame tɩ f pa bãnge, la a sã n paam n kẽ-fo, a soogd-f lame hal t’a yiisg lebg toogo. La wala pemsmã, dũniyã yamã yelgda tao-tao n tat zĩig zãnga. Ra bas-y tɩ dũniyã yamã kẽ y sũyã ye.—Efɛɛz rãmba 2:2, 3; Yelbũna 4:23.
13. Wãn-wãn la d tõe n paam makre, d sẽn maood n dat tɩ d yamã la d sũurã da rẽgmã?
13 La sẽn na yɩl n lak d meng ne dũniyã yam, rẽnda d tall raood n tõog tɩ d yamã la d sũurã kell n yɩ yɩlma. Wala makre, tõog n yik n loog n bas reem, bɩ n kiis f ordinatɛɛr bɩ f televiziõ sẽn wilgd yɛl f sẽn pa segd n ges baooda raoodo. F sã n zĩ ne f reem-n-taas tɩ b wa gomd gom-yood tɩ f segd n yik n toeem zĩiga, wall f sã n dat n lak f meng ne tũud-n-ta-wẽnse, rẽnda f tall raoodo. Sẽn paase, f sã n tũud Wẽnnaam noyã tɩ f karen-bi-taase, f tʋmd-n-taase, f yags wall f roagdb yaand-fo, yɩl n tõog n kell n pẽdg ne rẽ maaneg me baooda raoodo.—1 Korẽnt dãmba 15:33; 1 Zã 5:19.
14. Dũniyã yam sã n kẽ-d lame, bõe la d segd n maane?
14 Ad woto yĩng kɩtame tɩ tar yõod wʋsg tɩ d nong Wẽnnaam ne d tẽebã pʋgẽ saam-biisã la saam-bi-pogsã wʋsgo! Rɩk-y sẽk n bʋgs bũmb nins y sẽn dat n maanã la y sẽn vɩ y vɩɩmã to-to wã zug n ges dũniyã yam sã n pa kẽ-yã. A sã n kẽ-y-la baa yaa bilf bɩ y pʋʋs a Zeova t’a kõ-y raood tɩ y tõog n yiis-a, la y mao t’a ra leb n kẽ-y ye. Y sã n kos a Zeova t’a sõng-y rẽ wɛɛngẽ, a pa na n tõdg ye. (Yɩɩl Sõamyã 51:19) Sẽn paase, a Zeova vʋʋsem sõngã pãng yɩɩda yam ning sẽn be ne dũniyã rãmbã pãng zĩig sẽn zãre.—1 Zã 4:4.
D tall raood d zu-loeesã pʋgẽ
15, 16. Wãn to la Kirist nonglmã buud tõe n sõng-d tɩ d mao ne d zu-loeese? Kõ-y makre.
15 A Zeova sõgen dãmbã leb n segd n maoa ne zu-loees a taaba. Wala makre, ninsaal sẽn pa zems zãngã la kʋʋlmã sẽn mi n wat ne bãas ninsã, wala komslmã, yam-ka-m-mengã la yɛl a taaba. (Rom dãmba 8:22) La Kirist nonglmã buud tõe n sõng-d lame tɩ d tõog n mao ne zu-loe-kãensã. Ges-y saam-bi-poak a Namangolwa sẽn yit Zãmbi wã makre. B wuba a Namangolwa kiris-neb zakẽ. A sẽn wa n tar yʋʋm a yiibu, a lebga koamsa. Ad a sẽn yeele: “Mam da zoeta yãnde, n tagsdẽ tɩ m komslmã na n kɩtame tɩ nebã pa rat n pẽneg-ma, tɩ ra sãamd m sũuri. La m tẽed-n-taasã sõng-m lame tɩ m toeem yam. Woto kɩtame tɩ m yãn-zoeerã sa, tɩ m wa baas n deeg lisgu.”
16 Baa ne a Namangolwa sẽn tar põor weefã, naoor wʋsgo yaa tɩlae ne-a t’a sig n yĩgim tomã pʋgẽ. La baasg zãnga, yʋʋmd fãa, a rɩkda sõngr so-pakrã kiuug a yi bɩ sẽn yɩɩd woto. Daar a yembre, a kõo pag a ye kasetã t’a raag nintãm. Bõe yĩnga? Yaa a sẽn yã tõnd saam-bi-poakã tẽeb la a raoodã. Bũmb sẽn wilgd vẽeneg t’a Zeova ninga a Namangolwa bark wʋsgo, yaa t’a zãmsa neb a nu Biiblã tɩ b fãa reeg lisgu, tɩ b nin-yend yaa kãsem soab tiging a ye pʋgẽ. A Namangolwa yeela woto: “Naoor wʋsgo, mam naoã zabda hal kẽengo, la m pa basd tɩ toogã kɩt tɩ m bas koɛɛgã mooneg ye.” Dũniyã gill zugu, d tara saam-biis wʋsg sẽn yaa koms rãmb wa a Namangolwa, la b sẽn nong Wẽnnaam la b taabã yĩng kɩtame tɩ b moond koɛɛgã ne yẽesem la raoodo. Ad saam-bi-kãensã buudã fãa sɩd yaa “bõn-neeb” a Zeova nifẽ!—Aze 2:7.
17, 18. Bõe n sõngd neb wʋsg tɩ b maood ne bãas la yɛl a taab sẽn namsd-ba? Rɩk-y makr yãmb babgẽ wã.
17 Bãag sẽn tõt saab me tõe n komsa ned raoodo, hal n kɩt t’a yam yi a menga. Tiging a ye kãsem soab yeela woto: “Tõnd sebrã zãmsg sullẽ, saam-bi-poak a yembr la diabɛt ne se-zabr tara, t’a yembr tar kãnsɛɛre, t’a yiib tar nus-gõon sẽn zabd hal kẽengo, ta to bẽed kam-wers la yĩn-gãong bãaga. Yaa sɩd tɩ wakat ninga, b mi n komsa raoodo, la sã n pa wa n wɩng-b-la wʋsg wall b gãeyã logtor yiri, b zɩ n vaal tigissã ye. B fãa wae n yita koe-moonegã. Saam-bi-pog-kãensã tẽegda maam a Poll yelle. A ra yeela woto: ‘Mam sẽn wat n ka pãng wakate, yaa wakat kãng la mam paamd pãnga.’ B raoodã la b nonglmã nooma maam hal wʋsgo. Tõe tɩ b sẽn ka laafɩ wã, kɩtame tɩ b mi b sẽn baood bũmb ning vɩɩmã pʋgẽ wã la bũmb nins sẽn tar yõodã n yɩɩdã sõma.”—2 Korẽnt dãmba 12:10.
18 Y sã n maooda ne komslem, bãag wall zu-loɛɛg a to bɩ y “pʋʋs Wẽnnaam n da bas ye.” Kos-y t’a sõng-y tɩ y ra koms raood ye. (1 Tesalonik rãmba 5:14, 17) Yaa vẽeneg tɩ wakat ninga, y na n komsa raoodo, la modg-y n tagsd-y tẽebã yɛl sẽn kengd raoodã zutu. Sẽn yɩɩd fãa, tagsd-y bũmb nins d sẽn saagd ne d sũy fãa tɩ Wẽnnaam Rĩungã na n wa kõ-d lame wã yelle. Saam-bi-poak a yembr yeela woto: “Ne maam, koe-moonegã yaa tɩɩm.” A sã n taasd neb a taaba koe-noogã, sõngd-a lame t’a ket n saagdẽ tɩ yɛlã na n manegame.
Nonglmã kɩtdame tɩ yel-wẽn-maandbã lebgd n wat a Zeova nengẽ
19, 20. a) Bõe n tõe n sõng neb nins sẽn maan yel-wẽn n bas tigingã tɩ b tall raood n lebg n wa a Zeova nengẽ? b) Bõe yell la d na n gom sõsg ning sẽn pʋgdã pʋgẽ?
19 Neb wʋsg tẽeb sẽn maag bɩ sẽn maan yel-wẽn getame tɩ yaa toog ne-b tɩ b lebg n wa a Zeova nengẽ. La b sã n pelg b pʋs n kos b yel-wẽnã sugr la b lebs n vʋʋg nonglem ning b sẽn da tar ne Wẽndã, b na n talla raood n lebg n wa a nengẽ. D ges a Mario * sẽn yit Etazĩni wã makre. A Mario ra basa tigingã n lebg rã-yũud-kãag la a rɩkd dorge. Yʋʋm 20 poore, b kẽes-a-la bãense. A Mario yeela woto: “Mam sɩnga bũmb nins sẽn wat beoogã yell tagsg wʋsgo, la m lebs n sɩng Biiblã karengo. Kaoosg zugẽ, mam pʋʋsa a Zeova bark wʋsg a sõmblmã yĩnga, sẽn yɩɩd fãa, a nimbãan-zoeerã m sẽn da pʋʋsd naoor wʋsg n kotẽ wã yĩnga. Mam sẽn yi bãensã poore, m laka m meng ne m tũud-n-ta-wẽnsã la m sɩng tigissã kẽnde, tɩ b wa sak n ye reeg-m tigingã pʋgẽ. Yaa sɩd tɩ yɛl nins m sẽn da maanã biis namsd-m-la rũndã-rũndã, la m sẽn lebs n paam m saagrã sẽn yaa kãsengã, m sũur noomame. A Zeova sẽn zoe m nimbãaneg la a kõ-m sugrã, m pa tõe n pʋʋs-a bark n sa ye.”—Yɩɩl Sõamyã 103:9-13; 130:3, 4; Galat dãmba 6:7, 8.
20 Yaa vẽeneg tɩ neb nins sẽn bas tigingã n lebg wa a Mario sẽn da yaa to-to wã sã n dat n lebg n wa a Zeova nengẽ, b segd n maoa wʋsgo. La b sã n lebs n zãms Biiblã n pʋʋs la b bʋgs bũmb nins b sẽn zãmsã zugu, na n vʋʋga nonglem ning b sẽn da tar ne Wẽnnaamã, tɩ kɩt tɩ b lebg n wa a nengẽ. Wẽnnaam Rĩungã sẽn kõt saagr ningã me sõnga a Mario a zu-loɛɛgã pʋgẽ. Dẽnd vẽenega, nonglmã, tẽebã la wẽn-zoeerã toor sẽn ka be, tõnd tẽebã pidsg gũudum bɩ d saagrã me tõe n kõ-d-la pãn-kẽeng tɩ sõng-do. Sõsg ning sẽn pʋgdã pʋgẽ, d na n goma tõnd tẽebã pidsg gũudum sẽn yaa Wẽnnaam kũun sẽn tar yõod wʋsgã yelle.
[Tẽngr note]
^ sull 19 Pa a yʋʋrã meng la woto ye.
Y tõe n leokame bɩ?
• Wãn-wãn la nonglmã sõng a Zezi t’a tall raood sẽn pa tar mak-n-taaga?
• Wãn-wãn la a Poll ne a Barnabas sẽn da nong saam-biisã kɩt tɩ b tall raood wʋsgo?
• A Sʋɩtãan tũnugda ne bõe n dat n boog kiris-nebã nonglem?
• D sã n nong a Zeova, tõe n sõng-d lame tɩ d tõog zu-loe-bʋse?
[Zãmsgã sogsgã]
[Foto, seb-neng 21]
A Poll sẽn da nong nebã yĩnga, a talla raood n kell n pẽdg a tʋʋmdã pʋgẽ
[Foto, seb-neng 23]
Wẽnnaam noyã tũub baooda raoodo
[Foto, seb-neng 23]
A Namangolwa Sututu