Fakamalolō ha kua Omoi he Fakaalofa
Fakamalolō ha kua Omoi he Fakaalofa
‘Ko e mena nakai foaki mai he Atua kia tautolu e agaaga ke matakutaku ai, ka kia fakamalolo ai, mo e fakaalofa ai, mo e akonaki atu ai.’—2 TIMOTEO 1:7.
1, 2. (a) Ko e heigoa ne fakaohooho he fakaalofa ke taute he tagata? (e) Ko e ha e fakamalolō ha Iesu ne kehe lahi ai?
HANE ukuuku e hoa mau foou he fakaaoga e tau fua kese kua tata atu ke he taone he faahi uta ha Ausetalia. He amanaki a laua ke fakaea hake ki luga he vai ne oho atu e magō tea makimaki ke he fifine. He fakatoatoa, ne poka he taane e hoana haana ke he mafoa ti kai he magō e taane. “Ne foaki e ia e moui haana ke lata mo au,” he talahau he hoana nukua takape he lauga mauku.
2 E, maeke e fakaalofa ke omoi e tau tagata ke fakakite e fakamalolō kehe lahi. Ne talahau e Iesu Keriso: “Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga.” (Ioane 15:13) Ne nakaila 24 e tulā he mole e talahau e Iesu e tau kupu nei, ne foaki e ia haana moui, nakai ke he taha ni e tagata, ka ke he tau tagata oti. (Mataio 20:28) Lafi ki ai, ne nakai foaki e Iesu haana moui he magaaho ia ni. Ne iloa tuai e ia to vaiga mo e ekefakakelea, fakahala nakai tonu, mo e tamate ai ke he akau fakakikiveka. Ne tauteute foki e ia e tau tutaki haana ke lata mo e mena nei, he pehē: “Kitiala, ko e o hake ha ne fai a tautolu ki Ierusalema, ti tuku atu ai e Tama he tagata ke he tau ekepoa ne mua, mo e tau tohikupu, to fakahala e lautolu a ia ke mate; to tuku atu foki e ia ke he tau tagata he motu kehe. To fefeua foki e lautolu a ia, to fahi e lautolu a ia, to tauanu kia ia, mo e kelipopo a ia.”—Mareko 10:33, 34.
3. Ko e heigoa ne lafi ke he fakamalolō lahi a Iesu?
3 Ko e heigoa ne lafi ke he fakamalolō lahi ue atu ha Iesu? Ne lahi ue atu e mena ne taute he tua mo e matakutaku Atua. (Heperu 5:7; 12:2) Mua atu, ne puna mai e fakamalolō ha Iesu he fakaalofa haana ke he Atua mo e ke he tau tagata. (1 Ioane 3:16) Ka feaki e tautolu e fakaalofa pihia he lafi ke he tua mo e matakutaku Atua, to maeke foki a tautolu ke fakatātā e fakamalolō tuga he Keriso. (Efeso 5:2) Maeke fēfē ia tautolu ke feaki e fakaalofa pihia? Kua lata ia tautolu ke mailoga e haana Punaaga.
“Mai he Atua e Fakaalofa”
4. Ko e ha ne pehē ai ko Iehova e Punaaga he fakaalofa?
4 Ko e fakataiaga a Iehova he fakaalofa mo e ko e Punaaga he fakaalofa ia. “Ko e tau tagata fakahelehele na e,” he tohi he aposetolo ko Ioane, “kia feofanaki a tautolu, ha ko e mena mai he Atua e fakaalofa; ko lautolu auloa foki kua fakaalofa, kua fanau mai a lautolu mai he Atua, kua iloa foki e lautolu e Atua. Ko e tagata kua nakai fakaalofa, kua nakai iloa e ia e Atua; ha ko e Atua ko e fakaalofa a ia.” (1 Ioane 4:7, 8) Ti ko e fakaalofa tuga he Atua, kua maeke ke feaki he tagata kaeke ni ke fakatata a ia ki a Iehova ke he iloilo tonu mo e fakagahua e iloilo ia he omaoma mai he loto.—Filipi 1:9; Iakopo 4:8; 1 Ioane 5:3.
5, 6. Ko e heigoa ne lagomatai e tau tutaki fakamua atu ha Iesu ke feaki e fakaalofa tuga he Keriso?
5 Ke he liogi fakahiku haana mo e tau aposetolo fakamooli ne 11, ne fakakite e Iesu e matutakiaga he vahāloto he iloa e Atua mo e tupu e fakaalofa, he talahau: “Ne fakailoa atu foki e au hau a higoa kia lautolu, to fakailoa atu ai foki e au; kia nofo i loto kia lautolu e fakaalofa ne fakaalofa mai ai a koe kia au, ko au foki ha i loto ia lautolu.” (Ioane 17:26) Ne lagomatai e Iesu e tau tutaki haana ke feaki e vahega fakaalofa he vahāloto haana mo e Matua haana, he fakakite ke he tau kupu mo e fakafifitakiaga e kakano he higoa he Atua—ko e tau mahani homo ue atu he Atua. Ti, maeke a Iesu ke talahau: “Ko ia kua kitia au, kua kitia foki e ia e Matua.”—Ioane 14:9, 10; 17:8.
6 Ko e fakaalofa tuga he Keriso ko e fua he agaaga tapu he Atua. (Kalatia 5:22) He moua he tau Kerisiano fakamua atu e agaaga tapu ne mavehe he Penetekoso 33 V.N., ne nakai ni manatu e lautolu e tau mena loga ne fakaako e Iesu ki a lautolu ka e maama lahi foki e kakano he tau Tohiaga Tapu. Fakahiku ai, ko e maamaaga hokulo lahi nei ne atihake e fakaalofa ha lautolu ma e Atua. (Ioane 14:26; 15:26) Ko e fua? Pete foki e hagahagakelea e tau momoui ha lautolu, ne fakamatala fakamalolō mo e fakamakai e lautolu e tala mitaki.—Gahua 5:28, 29.
Fakakite e Fakamalolō mo e Fakaalofa
7. Ko e heigoa ne fakauka ki ai a Paulo mo Panapa he fenoga misionare ha laua?
7 Ne tohia he aposetolo ko Paulo: ‘Ha ko e mena nakai foaki mai he Atua kia tautolu e agaaga ke matakutaku ai, ka kia fakamalolo ai, mo e fakaalofa ai, mo e akonaki atu ai.’ (2 Timoteo 1:7) Ne tutala mai a Paulo he mena ne tupu ki a ia. Manamanatu ke he mena ne tupu ki a ia mo Panapa he fenoga misionare ha laua. Ne fakamatala a laua ke he tau taone loga, ne putoia a Anetioka, Ikonio, mo Luseta. He tau maaga takitaha, ne eke e falu tagata mo tau tagata talitonu, ka e eke falu mo tau tagata vale mo e totoko. (Gahua 13:2, 14, 45, 50; 14:1, 5) I Luseta ne ha ha ai e matakau vale ti taulitimaka e lautolu a Paulo, ti toka a ia ke mate! “Kua agaagai a ia he tau tutaki, ti tu ai a ia ki luga, kua fano ke he māga; ko e pogipogi foki, kua o atu ai a laua mo Panapa ki Terepe.”—Gahua 14:6, 19, 20.
8. Fakaata fēfē he fakamalolō ne fakakite e Paulo mo Panapa e fakaalofa hokulo ha laua ma e tau tagata?
8 Ko e laliaga nei kia ke keli a Paulo kua fakamatakutaku a ia mo Panapa ke oti e fakamatala? Mamao ligo! He mole e “eke ai e tokologa mo tutaki” i Terepe, kua “liliu ai foki a laua ki Luseta, mo Ikonio, mo Anetioka.” Ko e ha? Ke atihake a lautolu ne foou ke tumau e malolō ke he tua. “Ko e tau matematekelea ne loga kua lata ke hao atu ai a tautolu ke he kautu he Atua,” he talahau e Paulo mo Panapa. Maaliali ai, ko e fakamalolō ha laua kua hau he fakaalofa hokulo ma e “tau punua mamoe” he Keriso. (Gahua 14:21-23; Ioane 21:15-17) Mole atu e kotofa e tau motua he tau fakapotopotoaga takitaha ne fakatū foou, ne liogi e tau matakainaga taane tokoua “ati tuku atu ai e laua a lautolu [ki a Iehova] ne tua a lautolu ki ai.”
9. Ko e puhala fe ne tali he tau motua i Efeso e fakaalofa ha Paulo ki a lautolu?
9 Ko e tagata ofania mo e fakamalolō a Paulo ti tokologa e Kerisiano fakamua atu ne hokulo e fakaalofa ki a ia. Manatu e mena ne tupu he matakavi ne feleveia a Paulo mo e tau motua i Efeso, kavi ke he tolu e tau ne ha ha i ai mo e lauia ai a ia ke he totokoaga lahi. (Gahua 20:17-31) He mole e atihake ha lautolu ke leveki e fuifui mamoe he Atua ne tuku age ki a lautolu, ne fakatokotui a Paulo mo lautolu ti liogi. Ati, “tagi lahi a lautolu oti kana, mo e peka kia Paulo, mo e taufigita kia ia. Kua mua foki he hukia a lautolu ke he kupu ne tala atu ai a ia, nakai tuai kitia e lautolu hana mata.” Kua fakaalofa mooli e tau matakainaga taane nei ki a Paulo! Ti ko e magaaho ke mavehe ai, ko Paulo mo e tau tagata ne fakatauo mo ia ne ‘taaki kehe mai ia lautolu,’ ne kua fakauaua e tau motua he matakavi ia ke fakatoka a lautolu ke o.—Gahua 20:36–21:1.
10. Fakatātā fēfē he Tau Fakamoli a Iehova he vahā nei e fakaalofa fakamalolō ke he taha mo e taha?
10 He vahā nei, ko e tau leveki faifano, tau motua he fakapotopotoaga, mo e tokologa atu foki ne fakaalofa hokulo ki ai ha ko e fakamalolō ne fakakite e lautolu ke lata mo e tau mamoe ha Iehova. Ma e fakatai, he tau motu ne matematekelea he felakutaki fakamatakau po ke matakavi ne pā e gahua fakamatala, ne fakahagahagakelea e tau momoui mo e tokanoaaga he tau leveki faifano mo e tau hoana ha lautolu ke aahi atu ke he tau fakapotopotoaga. Pihia foki, tokologa e Fakamoli ne matematekelea he tau lima he tau pule favale mo e tau kau ha lautolu ha kua nakai hokotaki e tau matakainaga Fakamoli po ke fakakite e matakavi ne moua e lautolu e tau mena kai fakaagaaga. Totou afe e falu ne favale, fakakikiveka, ti tamate foki ha kua nakai oti e fakamatala ha lautolu he tala mitaki po ke fakamamutu e fio mo e tau matakainaga he tau feleveiaaga Kerisiano. (Gahua 5:28, 29; Heperu 10:24, 25) Kia fifitaki e tautolu e tua mo e fakaalofa he tau matakainaga fakamalolō ia!—1 Tesalonia 1:6.
Ua Fakagalo e Fakaalofa Haau
11. Ko e heigoa e tau puhala ne tau fakaagaaga a Satani ke he tau fekafekau ha Iehova, ti ko e heigoa ne manako ke taute e lautolu?
11 He magaaho ne liti hifo a Satani ke he lalolagi, ne mauokafua a ia ke fakakite e ita haana ke he tau fekafekau a Iehova ha “ko lautolu kua omaoma ke he tau poaki he Atua, mo e taofi e talahauaga kia Iesu Keriso.” (Fakakiteaga 12:9, 17) Ko e taha he tau lagatau he Tiapolo ko e favaleaga. Ka e, nakai gahuahua e favaleaga nei ha kua fakatata fakalahi atu he mena nei e tau tagata he Atua he pipi ke he fakaalofa faka-Kerisiano mo e fakalagalaga e tokologa ha lautolu ke fakamakutu fakalahi. Ko e taha lagatau ha Satani ko e futia ke he tau agahala he tagata. He totoko e lagatau nei kua lata ke fakamalolō ke he taha puhala ha ko e felakutaki kua mai i loto, ko e totoko ke he tau manako kelea he ‘fakavai mo e gagao lahi’ he tau loto ni ha tautolu.—Ieremia 17:9; Iakopo 1:14, 15.
12. Fakaaoga fēfē e Satani e “agaga he lalolagi nai” he lali a ia ke fakalolelole e fakaalofa ha tautolu ma e Atua?
12 Ne ha ha i ai foki he taha lagatau ha Satani e kanavaakau malolō lahi—“ko e agaga he lalolagi nai,” ko e hihiga po ke fakalagalaga malolō haia, ne totoko fakahako ke he agaaga tapu he Atua. (1 Korinito 2:12) Kua fakatupu ki mua he agaaga he lalolagi e lotokai mo e velevelekoloa—ko e “manako lahi he tau mata.” (1 Ioane 2:16; 1 Timoteo 6:9, 10) Pete ni e nakai fakamamahi e tau koloa he tino mo e tau tupe, kaeke ke tanumia he fakaalofa ha tautolu ki ai e fakaalofa ha tautolu ke he Atua, to kautū a Satani. Ko e malolō, po ke “pule” he lalolagi nei kua futiaki ke he agahala he tino, ke he eke lagatau, ke he favale, kua tuga ai e matagi kelea muitui. Ua toka e agaaga he lalolagi ke pikitia e loto haau!—Efeso 2:2, 3; Tau Fakatai 4:23.
13. Liga kamatamata fēfē e fakamalolō ha tautolu ke fakatumau e mahani mitaki?
13 Ke totoko mo e nakai talia e agaaga kelea he lalolagi, mogoia, kia fakamalolō ke he mahani meā. Ma e fakatai, kua lata ke fakamalolō ke matike ti fano ki fafo he fale kifaga po ke tamate e komopiuta po ke televisoni ka kitia e tau fakatino fakalialia. Kua lata ma e fakamalolō ke tiaki e tau lafiaga nakai mitaki he tau kapitiga mo e fakamamutu e tau feoakiaga kelea. Ti pihia foki, kua lata ke fakamalolō he fakatokoluga tumau e tau fakatufono mo e tau matapatu fakaakoaga he Atua he fehagai mo e va, ka puhala mai he tau kapitiga aoga, tau kapitiga gahua, tau tuutakaina, po ke tau magafaoa.—1 Korinito 15:33; 1 Ioane 5:19.
14. Ko e heigoa ha tautolu kua lata ke taute ka pikitia he agaaga he lalolagi?
14 Ti kua aoga mooli mogoia ke fakamalolō ha tautolu a fakaalofa ma e Atua mo e tau matakainaga fakaagaaga ha tautolu! Fakatoka taha magaaho ke kumikumi e tau foliaga mo e puhala moui ha mutolu ke mailoga neke pikitia ke he ha puhala he agaaga he lalolagi. Ka pikitia—pete he tote—ti liogi ki a Iehova ma e fakamalolō ke huo mo e toka kehe tumau. To nakai fakaheu e Iehova e tau ole fakamooli pihia. (Salamo 51:17) Lafi ki ai, kua mua atu e malolō he agaaga haana ke he agaaga he lalolagi.—1 Ioane 4:4.
Fakamalolō he Fehagai mo e Tau Kamatamata Fakatagata
15, 16. Maeke fēfē he fakaalofa tuga he Keriso ke lagomatai a tautolu ke kautu mai he tau kamatamata fakatagata? Talahau e fakafifitakiaga.
15 Ko e falu paleko ne fehagai ki ai e tau fekafekau a Iehova kua putoia e tau lauiaaga he nakai mitaki katoatoa mo e fuakau, ne fa fua mai he gagao, kulikuli, gagao fakaagitau, mo e falu lekua loga. (Roma 8:22) Maeke he fakaalofa tuga he Keriso ke lagomatai a tautolu ke fahia ke he tau kamatamata nei. Manamanatu ke he fakafifitakiaga ha Namangolwa, ne feaki he magafaoa Kerisiano i Samipia. He ua e tau haana he moui, ne kulikuli a ia. “Ne maimainā au,” he talahau e ia, “he manamanatu to ofo e tau tagata ke he foliga haaku. Ka e lagomatai he tau matakainaga fakaagaaga haaku au ke kitia ke he taha puhala foki. Ti ko e fua, ne kautū au he maimainā haaku, ti nakai leva mo e papatiso.”
16 Pete kua fai nofoa fakataveli a Namangolwa, ne fa fano a ia he tau lima mo e tau matatuli haana ka hoko ke he tau puhalatu efu. Ka e, kua fakalataha a ia ke he fekafekauaga ko e paionia fakakū ke ua e mahina he tau tau takitaha. Ne tagi e taha tagata he kaina he magaaho ne fakamatala a Namangolwa ki ai. Ko e ha? Ha kua aamotia a ia he tua mo e fakamalolō he matakainaga fifine ha tautolu. He fakamooli e monuina lahi a Iehova, tokolima he tau tagata fakaako Tohi Tapu ha Namangolwa ne papatiso, ti taha ne fekafekau ko e motua he fakapotopotoaga. “Ne mamahi lahi e tau hui haaku falu magaaho,” he talahau e ia, “ka e nakai taofi he mena ia au.” Ko e taha matakainaga fifine ni anei he Tau Fakamoli tokologa he lalolagi katoa ne lolelole e tino ka e malolō e agaaga ha ko e ha lautolu a fakaalofa ma e Atua mo e katofia. Ko e mitaki ha ia ha lautolu oti ia ke he fofoga a Iehova!—Hakai 2:7.
17, 18. Ko e heigoa ne lagomatai e tokologa ke fakauka he gagao mo e falu kamatamata? Foaki falu fakafifitakiaga he matakavi.
17 Kua fakalolelole foki e tau tatalu hololoa, ti fakaagitau foki. “He matakau fakaako tohi ne fano au ki ai,” he talahau he motua he fakapotopotoaga, “taha e matakainaga fifine ne matematekelea he gagao suka mo e lolelole e tau fuaifi, taha ne kenesā, tokoua ne kelea lahi e gagao gugu, ti taha ne moua he lupus mo e fibromyalgia. Ne fakalolelole a lautolu falu magaaho. Ka e, galo ni a lautolu he tau feleveiaaga ka gagao lahi po ke haia he fale gagao. Ne fakalataha tumau a lautolu oti he gahua ke he fonua. Ne fakamanatu e lautolu ki a au a Paulo, ne pehē: ‘Ka lolelole au, ti malolo ai au.’ Ne nava lahi au ke he fakaalofa ha lautolu mo e fakamalolō ha lautolu. Liga ko e tuaga ha lautolu ne foaki ki a lautolu e kitiaaga maaliali he moui mo e mena ne aoga mooli.”—2 Korinito 12:10.
18 Ka taufetului a koe mo e matematekelea, gagao, po ke falu lekua, “kia liogi nakai noa” ma e lagomatai ke maeke ia koe ke nakai eke mo tagata kua lolelole. (1 Tesalonia 5:14, 17) Mooli, to liga ha ha ia koe e hake hifo he manamanatuaga, ka e lali ke kitia tonu e tau mena fakaagaaga atihake, mua atu ke he amaamanakiaga uho he Kautu. “Ko e tuluiaga ki a au e fekafekauaga he fonua,” he talahau he taha matakainaga fifine. He folafola e tala mitaki ke he falu kua lagomatai a ia ke fakatumau e onoonoaga atihake.
Lagomatai he Fakaalofa e Tau Tagata Mahani Kelea ke Liliu Mai ki a Iehova
19, 20. (a) Ko e heigoa ka liga lagomatai a lautolu ne mokulu ke he agahala ke eketaha ke fakamalolō ke liliu ki a Iehova? (e) Ko e heigoa ka manamanatu ki ai he vala tala ka mui mai?
19 Tokologa ne lolelole fakaagaaga po kua hufia lahi he agahala ne nakai mukamuka ke liliu mai ki a Iehova. Ka e to moua e lautolu e fakamalolō ne lata kaeke ke fakatokihala mooli a lautolu mo e liu fakamoui e fakaalofa ha lautolu ma Iehova. Manamanatu ki a Mario, * ne nofo he tau Faahi Kaufakalataha. Ne toka e Mario e fakapotopotoaga Kerisiano, ti eke mo tagata konahia mo e hufia ke he tulaki, ti mole e 20 e tau, ne tuku a ia he fale pouli. “Ne kamata au ke manamanatu fakahokulo hagaao ke he vahā anoiha haaku ti liu ke totou e Tohi Tapu,” he talahau e Mario. “Nakai leva, ne liu au loto fakaaue ke he tau mahani a Iehova, mua atu ke he fakaalofa noa haana, ne liogi tumau au ki ai. He mole e fakatoka mai au he fale pouli, ne tiaki e au e tau kapitiga tuai haaku, fano he tau feleveiaaga Kerisiano, ti fakahiku ke liu talia mai ke he fakapotopotoaga. Kua helehele e au e tau fua mamahi ke he tino, ka e moua e au mogonei e amaamanakiaga homo ue atu. Ne fakaaue lahi mahaki au ki a Iehova ma e fakaalofa hofihofi noa mo e fakamagaloaga haana.”—Salamo 103:9-13; 130:3, 4; Kalatia 6:7, 8.
20 Mooli, ko lautolu he tau tutuaga tuga ha Mario kua lata ke gahua malolō ke liliu ki a Iehova. Ka ko e ha lautolu a fakaalofa ne liu fakamoui—ko e fua he fakaako Tohi Tapu, liogi, mo e manamanatu hokulo—ka foaki ki a lautolu e fakamalolō mo e mauokafua kua lata. Kua fakamalolō foki a Mario ha ko e amaamanakiaga he Kautu. E, fakalataha mo e fakaalofa, tua, mo e matakutaku Atua, maeke he amaamanakiaga ke eke mo omoiaga malolō lahi ma e mitaki he tau momoui ha tautolu. He vala tala ka mui mai, to kitekite fakamakutu a tautolu ke he mena fakaalofa uho nei.
[Matahui Tala]
^ para. 19 Kua hiki e higoa.
Maeke Nakai Ia Koe ke Tali?
• Lafi fēfē e fakaalofa ke he fakamalolō kehe lahi a Iesu?
• Maeke fēfē he fakaalofa ke he tau matakainaga ke foaki ki a Paulo mo Panapa e fakamalolō kehe lahi?
• Ko e heigoa e tau puhala ne lali a Satani ke moumou e fakaalofa faka-Kerisiano?
• Maeke he fakaalofa ma Iehova ke foaki ki a tautolu e fakamalolō ke fakauka ke he tau kamatamata fe?
[Tau Hūhū he Fakaakoaga]
[Fakatino he lau 19]
Ko e fakaalofa a Paulo ma e tau tagata kua foaki ki a ia e fakamalolō ke fakauka
[Fakatino he lau 20]
Kua lata ke fakamalolō ke fakatokoluga e tau tutuaga he Atua
[Fakatino he lau 20]
Namangolwa Sututu