Na te Aroa e Akaketaketa i te Mataku Kore
Na te Aroa e Akaketaketa i te Mataku Kore
“Kare oki i te ngakau kopē ta te Atua i oronga mai no tatou; te ngakau maroiroi ra, e te aroa, e te ngakau akono meitaki.”—2 TIMOTEO 1:7.
1, 2. (a) Ka akakeu te aroa i tetai tangata kia rave i teaa? (e) Eaa ra i tuke roa ai to Iesu mataku kore?
VAITATA atu ki tetai taoni i te pae tai i te itinga o Autireria te ruku tai ra tetai nga tokorua akaipoipo ou. Kua vaitata raua i te aranga mai ki runga i te akatano anga mai tetai mango teatea maatamaata ki te vaine. Ma te tu mataku kore, kua opara atu te tane i tana vaine kia aere tika mai te mango kiaia. “Kua oronga aia i tona uaorai oraanga noku,” i tuatua ai te vaine takaua i te ngai tanu anga mate.
2 Ae, ka rauka i te aroa i te akakeu i te au tangata kia akaari i te tu mataku kore. Kua akakite a Iesu Karaiti e: “Kia oronga te tangata i tona uaorai ora no tona au [“oa,” NW], kare rava e tangata aroa maata atu i te reira.” (Ioane 15:13) I raro ua mai i te 24 ora i muri ake i te tuatua anga a Iesu i teia au tuatua, kua oronga aia i tona uaorai ora, kare e no te tangata okotai ra, mari ra no te tangata ravarai. (Mataio 20:28) Tei maata atu, kare a Iesu i oronga viviki ua i tona ora ei ravenga no te mataku kore. Kua kite takere ana aia e ka aviriia e ka akakinoia aia, ka akautunga tau koreia, e ka tamateia i runga i tetai rakau tamamae anga. Kua akapapa katoa aia i tana au pipi no teia turanga nei, te karanga anga e: “I na, te aere nei tatou ki Ierusalema; e e tukuia te Tamaiti a te tangata nei ki te kau taunga nunui ra, e te au tata tuatua; e e akaapa mai ratou iaia kia mate, e tukuia atu oki ki te etene ra: E e taitoito mai ratou iaia, e e pāpā mai, e tutua mai oki i te uavare, e tamate rava mai oki.”—Mareko 10:33, 34.
3. Eaa tetai au tumu tei akatupu i to Iesu mataku kore maata?
3 Eaa tetai au tumu tei akatupu i to Iesu mataku kore akaaite koreia? E tuanga maata te akarongo e te mataku i te Atua. (Ebera 5:7; 12:2) Inara, te mea puapinga maata roa atu, kua akamata mai to Iesu mataku kore no tona aroa i te Atua e tona aroa i te au taeake tangata. (1 Ioane 3:16) Me tatanu tatou i taua aroa te kapiti anga mai i te akarongo e te mataku i te Atua, ka rauka ia tatou katoa i te akaari i te mataku kore mei ia Karaiti rai. (Ephesia 5:2) Akapeea tatou i te akatupu anga i taua aroa ra? Te anoanoia ra tatou kia kite i tona Tumu.
“No ko Mai oki te Aroa i te Atua”
4. Eaa ra i karangaia ai e ko Iehova te Tumu o te aroa?
4 Ko Iehova oki te tu tikai o te aroa e te Tumu no te reira. “E aku au akaperepere e, e aroa tatou ia tatou uaorai, no ko mai oki te aroa i te Atua ra; e ko tei aroa ra, kua akaanau anakeia ïa e te Atua, e kua kite oki aia i te Atua. Ko tei kore e aroa ra, kare ïa i kite i te Atua; ko te Atua oki te aroa,” ta te apotetoro ko Ioane i tata. (1 Ioane 4:7, 8) No reira, ka tupu mai te aroa mei to te Atua rai i roto i tetai tangata me akavaitata atu aia iaia kia Iehova na roto i te kite tika tikai e te taangaanga anga i taua kite na roto i te akarongo ngakau tae.—Philipi 1:9; NW; Iakobo 4:8; 1 Ioane 5:3.
5, 6. Eaa tei tauturu i ta Iesu au pipi mua kia akatupu i te aroa mei ia Karaiti rai?
5 I roto i tana pure openga ki tana apotetoro akarongo mou e 11, kua akaari a Iesu i te pirianga i rotopu i te kite anga i te Atua e te tupu anga i roto i te aroa, te karanga anga e: “E kua akakite atu oki au kia ratou, e e akakite atu rai au, i toou ingoa: e ei roto ia ratou te akaperepere taau i akaperepere mai iaku ra, e ei roto au ia ratou.” (Ioane 17:26) Kua tauturu a Iesu i tana au pipi kia akatupu i te tu o te aroa te vai ra i rotopu iaia e tona Metua, i te akaari anga mai i te reira na roto i te tuatua e te akaraanga eaa te akatutuia maira e te ingoa o te Atua—te au tu umere ra o te Atua. No reira i rauka ai ia Iesu i te tuatua e: “Ko te akara mai iaku nei, kua akara ïa i te Metua.”—Ioane 14:9, 10; 17:8.
6 E ua no te vaerua tapu o te Atua te aroa mei to Karaiti rai. (Galatia 5:22) Te rauka anga mai i te au Kerititiano mua te vaerua tapu tei taputouia mai i te Penetekote 33 T.N., kare e te maara ua ra ia ratou te au mea e manganui ta Iesu i apii mai ana kia ratou, mari ra te marama tikai anga i te aite anga o te au Tuatua Tapu. Kare e ekokoanga e kua akaketaketa teia kite oonu nei i to ratou aroa no te Atua. (Ioane 14:26; 15:26) Eaa tei tupu mai? Noatu e ka takinokinoia mai to ratou uaorai oraanga, kua tutu aere ratou i te tuatua meitaki ma te mataku kore e ma te maroiroi.—Angaanga 5:28, 29.
Angaanga Kapiti ra te Aroa e te Mataku Kore
7. Eaa ta Paulo raua ko Banaba i akakoromaki ana i roto i ta raua teretere anga mitinari?
7 Kua tata te apotetoro ko Paulo e: “Kare oki i te ngakau kopē ta te Atua i oronga mai no tatou; te ngakau maroiroi ra, e te aroa, e te ngakau akono meitaki.” (2 Timoteo 1:7) Te tuatua nei a Paulo mei tana uaorai i kite ana. E akamanako ana e eaa tei tupu ana kia raua ko Banaba i roto i ta raua teretere anga mitinari. E maata te au oire ta raua i tutu aere ana, kapiti anga mai ia Anetioka, Ikonia, e Lusetera. I roto i te oire takitai, kua riro tetai au tangata ei aronga irinaki, inara kua riro tetai papaki ei aronga patoitoi tikai. (Angaanga 13:2, 14, 45, 50; 14:1, 5) I Lusetera kua pepei katoaia a Paulo ki te toka e tetai urupu tangata makitakita, akaruke atura iaia i te manako anga e kua mate aia! “Kia takako maira te au pipi iaia ra, kua tu ua maira aia ki runga, e kua aere maira ki roto i te oire: e ao akera, ririro atura raua ko Banaba ki Derebe.”—Angaanga 14:6, 19, 20.
8. Akapeea te mataku kore tei akaariia mai e Paulo raua ko Banaba i te akaata anga mai i te oonu o to raua aroa no te au tangata ra?
8 Kua tamataku ainei teia tauta anga kia taia atu a Paulo raua ko Banaba kia akamutu ua i ta raua tutu aere anga? Kare rava! “E manganui oki tei apiiia” i muri mai i Derebe, e “kua ooki akaou maira [nga tangata ra] ki Lusetera, e Ikonio, e ki Anetioka.” No teaa ra? Kia akamaroiroi i te aronga ou kia mou piri tikai i roto i te akarongo. “Kia na roto tatou i te mate maata e tikaʼi ka o atu ei ki te basileia o te Atua ra,” i karanga ai a Paulo raua ko Banaba. Te taka meitaki ra e, kua rauka mai to raua mataku kore no te oonu o to raua aroa i te “au mamoe” a Karaiti. (Angaanga 14:21-23; Ioane 21:15-17) I muri ake i te iki anga i te au tangata pakari i roto i te au putuputuanga ou tataki tai, kua oronga teia nga taeake e rua i te pure e “kua tuku atura raua ia ratou ki te Atu [Iehova], i ta ratou i akarongo ra.”
9. Na roto i teea tu i ariu mai ei te aronga pakari no Ephesia mai ki to Paulo aroa no ratou ra?
9 No to Paulo tu aroa e te maroiroi e manganui te au Kerititiano mua tei akaueia kia aroa maata atu iaia. E akamaara ana eaa tei tupu ana i roto i tetai uipaanga ta Paulo i rave ana ma te aronga pakari no Ephesia mai, te ngai i noo ei aia e toru mataiti e te tupu maata anga mai te patoi anga. (Angaanga 20:17-31) I muri ake i te akamaroiroi anga ia ratou kia akono i te anana a te Atua tei orongaia mai kia ratou, kua tuturi iora a Paulo ki raro e kua pure iora e ratou katoa. E oti, “aue anake iora ratou ravarai, takave maira ki runga i te kaki o Paulo, kua ongi maira iaia: no te tuatua tana i tuatua ra e, kare rava ratou e kite akaou mai i tona mata, i maata ravaʼi to ratou aue.” Mei teaa ra te aroa to teia au taeake no Paulo! E tika rai, te tae anga ki te tuatau ka akaruke ei, kua ‘akataka ke mai a Paulo e tona au oa teretere ia ratou uaorai,’ no te mea kare te aronga pakari o reira e inangaro ana i te tuku ia ratou.—Angaanga 20:36–21:1.
10. Akapeea te Au Kite o Iehova i teia tuatau i te akaari anga i te aroa maroiroi ki tetai e tetai?
10 I teia tuatau, te akaariia ra te aroa maata ki te au akaaere tutaka, te aronga pakari o te putuputuanga, e ki tetai ke e manganui no te mataku kore ta ratou e akaari ra no te au mamoe a Iehova. Ei akaraanga, i roto i te au enua tei akakinoia e te tamaki a te tangata nei me kore i te ngai te araiia ra te angaanga tutu anga, kua tuku ua te au akaaere tutaka e ta ratou au vaine i to ratou oraanga e te tu rangatira ki roto i tetai turanga kino i te atoro atu anga i te au putuputuanga. Pera katoa, e manganui te Au Kite tei takinokinoia e te au tutara kino e to ratou aronga tauturu no te mea kare i pikikaa ana i to ratou au taeake Kite e kare katoa i akakite mai ana e noea te ngai i rauka mai ei ta ratou kai i te pae vaerua. Ko tetai papaki e tauatini ua atu kua takinokinoia, kua tamamaeia, e kua taiaia no te mea kare ratou i akamutu ana i te tutu aere i te tuatua meitaki me kore kare i akamutu ana i te taokotai atu ki te au taeake irinaki i ko i te au uipaanga Kerititiano. (Angaanga 5:28, 29; Ebera 10:24, 25) Kia aru tatou i te akarongo e te aroa o taua au taeake e te au tuaine maroiroi!—1 Tesalonia 1:6.
Auraka Toou Aroa e Akameangitiia Mai
11. Na roto i teea au tu te tamaki anga a Satani i te tamaki i te pae vaerua ki te au tavini o Iehova, e eaa te umuumuia maira kia rave ratou?
11 Te titiriia anga mai a Satani ki te enua nei, kua akakoro tikai aia i te tuku pakari mai i tona riri ki runga i te au tavini o Iehova no te mea te “akono [ra ratou] i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:9, 17) Ko te takinokino anga tetai au ravenga a te Tiaporo. Inara, e maata te au taime ka puapinga kore ua teia ravenga nei no te mea te akapiri vaitata ra te reira i te au tangata o te Atua i roto i te au tatua anga o te aroa Kerititiano e e manganui ia ratou te akakeuia ra kia maroiroi maata atu. Ko tetai ravenga a Satani koia oki i te akamareka anga i te au manako tangata ara ua. I te patoi anga i teia ravenga nei te umuumuia ra te mataku kore na roto i tetai mataara ke no te mea teia tamaki anga no roto roa mai, i te patoi anga i te au anoano tau kore i roto i to tatou uaorai ngakau ‘pikikaa e te kino takiri.’—Ieremia 17:9; Iakobo 1:14, 15.
12. Akapeea a Satani i te taangaanga anga i ‘te vaerua o teianei ao’ na roto i tana tauta anga kia akaparuparu i to tatou aroa no te Atua?
12 Ko tetai apinga tamaki ririnui a Satani e taangaanga ana—‘te vaerua o teianei ao,’ koia oki, tona akakoroanga me kore te akakeuanga maata, e tuke tikai ki to te Atua vaerua tapu. (1 Korinetia 2:12) Te akatupu ra te vaerua o teianei ao i te noinoi e te apinga materia—“te anoano tika kore o te mata nei.” (1 Ioane 2:16; 1 Timoteo 6:9, 10) Noatu e kare te au apinga materia e te moni e kino ana, me maata atu ra to tatou anoano i te reira i to tatou anoano i te Atua ra, kua peke ia Satani i reira te re. Te vai nei te “mana” o te vaerua o teianei ao i roto i tona tu akamareka anga i te tu kopapa ara, tona tu kikite, tona tu tapupu kore, e mei te reva rai, te kiteaia ra te reira i te au ngai ravarai. Auraka e tuku i te vaerua o teianei ao kia taviivii i toou ngakau!—Ephesia 2:2, 3; Maseli 4:23.
13. Akapeea e timataia ai to tatou tu mataku kore no te akono tau?
13 Kia patoi e kia kopae i te vaerua kino o teianei ao, te umuumuia ra te tu mataku kore no te akono tau. Ei akaraanga, te umuumuia ra te tu mataku kore kia tu ki runga e kia aere atu ki vao mei roto mai i tetai are teata me kare kia tamate i te komupiuta me kore i te tivi me akaariia mai te teata tau kore. Te umuumuia ra te mataku kore kia patoi atu i te au taomianga kino a te au oa e kia akaatea mai mei te au kapitianga kino. Pera katoa, te umuumuia ra te mataku kore kia mou piri tikai i te au ture e te au kaveinga a te Atua me tupu mai te aviri anga, me no ko mai i te au oa apii, te au oa angaanga, te tangata tupu, me kore te kopu tangata.—1 Korinetia 15:33; 1 Ioane 5:19.
14. Eaa ta tatou ka rave me kua taviiviiia tatou e te vaerua o teianei ao?
14 E mea puapinga tikai no tatou i reira, kia akaketaketa tatou i to tatou aroa no te Atua e no to tatou au taeake e te au tuaine i te pae vaerua! E akara marie i taau au akakoroanga e te tu o te oraanga na te akara anga e me kua taviiviiia mai koe e te vaerua o teianei ao i roto i tetai ua atu tu. Me kua taviiviiia mai koe—noatu e manga ua—e pure kia Iehova no te tu mataku kore kia kiriti tumuia mai te reira e kia akaatea ravaia ki vao. Kare a Iehova e kopae ke i taua au pati anga ngakau tae. (Salamo 51:17) Tei maata atu, e ririnui atu tona vaerua i to teianei ao.—1 Ioane 4:4.
Aro Atu Anga i te Au Timata Anga ma te Mataku Kore
15, 16. Akapeea te aroa mei to Karaiti rai i te tauturu anga ia tatou kia akakoromaki ua i to tatou uaorai au timata anga? E oronga mai i tetai akaraanga.
15 Ko tetai au akaaoanga ta te au tavini o Iehova ka akakoromaki atu, te kapiti maira i te au tupu anga no te tu apa e te ruaine anga, te maata anga o te taime kua tupu mai no te maki, te pakipakitai, te taitaia, e tetai ua atu au manamanata e manganui. (Roma 8:22) Ka tauturu mai te aroa mei to Karaiti rai kia akakoromaki ua tatou i teia au timata anga. E akamanako ana i te akaraanga o Namangolwa, tei utuutuia i roto i tetai ngutuare Kerititiano i Tamapia. Tona rua mataiti anga, kua pirikokiia a Namangolwa. “E akama ana au i te akamanakoanga i toku tu,” i karanga ai aia, “i te manako anga e ka poitirere te au tangata me kite mai i toku tu. Inara kua tauturu mai toku au taeake i te pae vaerua iaku kia akara tuke atu i te au mea. Tei tupu mai, kare au e akama akaou ana i toku tu, e kare i roa ana kua papetitoia au.”
16 Noatu e e pereoo oparapara aere to Namangolwa, e aere putuputu ana aia na runga i tona nga rima e te turi i runga i te mataara oneone e te reporepo. Inara, e piri mai ana aia ki roto i te angaanga orometua ei painia tauturu e rua marama i te au mataiti ravarai. Kua aue tetai vaine ngutuare te tuatua atu anga a Namangolwa kiaia. No teaa ra? No te mea kua akakeu oonuia aia no te akarongo e te mataku kore o to tatou tuaine. Ei akapapu anga i ta Iehova akameitakianga maata, e rima a Namangolwa aronga apiipii Pipiria tei papetitoia, e e tai te tavini ra ei tangata pakari i roto i te putuputuanga. “E kino ua ana te mamae o toku nga vaevae,” i karanga ai aia, “inara kare au e tukutuku ana i te reira kia tapu iaku.” Ko teia tuaine tetai o te Au Kite e manganui i te ao katoa e kopapa paruparu to ratou inara te maroiroi ra i te pae vaerua no to ratou aroa i te Atua e to ratou aroa i te tangata tupu. E mea inangaroia taua aronga katoatoa ra i roto i to Iehova nga mata!—Hagai 2:7.
17, 18. Eaa tei tauturu i te manganui kia akakoromaki ua i te au maki e tetai ua atu au timata anga? E oronga mai i tetai au akaraanga i toou ngai.
17 Ka riro katoa te maki kua roa te tuatau ei akamaromaroa, e te taitaia katoa. “I roto i tetai pupu apii puka taku e aere ana,” i karanga ai tetai tangata pakari o te putuputuanga, “e tai tuaine te mamae ra no te toto vene e e kino te kitini (kidney), e tai e maki akakakai tona, e rua e maki akaea i roto i te ivi to raua, e ko tetai e maki akape e te maki mei te rumatiki rai tona. I tetai au taime kua manako taitaia ratou. Inara, kare ratou e tae mai ana ki te au uipaanga me kua makiia ratou me kare tei roto ratou i te are maki. E aere putuputu pouroa mai ana ratou ki te angaanga tutu anga. E akamaara ana au ia Paulo no to ratou tu, tei karanga e: ‘Kia paruparu oki au ra, te maroiroi ra au i reira.’ E rekareka tikai au i to ratou aroa e to ratou mataku kore. Penei no to ratou turanga te oronga maira kia ratou tetai akara anga papu no runga i te oraanga e no runga i te mea puapinga maata atu.”—2 Korinetia 12:10.
18 Me te putoto ra koe i te tu apikepike, te maki, me kare i tetai ua atu manamanata, “auraka e tukutuku i te pure” no te tauturu kia kore koe e riro mai ko tetai tangata tei akaparuparuia. (1 Tesalonia 5:14, 17) Ae, penei ka tupu mai kia koe te tuatau meitaki e tetai tuatau kino i te pae manako, inara e tauta ua atu i te akara mou ki runga i te au mea akamaroiroi anga e te au mea i te pae vaerua, tera tikai to tatou manakonakoanga akaperepere anga no te Patireia. “Kiaku nei, e vairakau rapakau anga te angaanga orometua,” i na tetai tuaine ei. Te akakiteanga i te tuatua meitaki ki tetai ke i tauturu ei iaia kia akono tamou i tetai akara anga papu atu.
Tauturu te Aroa i Tei Tarevake kia Oki kia Iehova
19, 20. (a) Eaa te ka tauturu i te aronga tei topa atu ki roto i te ara kia akamaroiroiia e te mataku kore kia oki mai kia Iehova? (e) Eaa te ka uriuriia i roto i te atikara ka aru mai?
19 E mea ngata ki te manganui tei paruparu i te pae vaerua me kore tei rave i te ara i te oki mai kia Iehova. Inara ka tupu mai te mataku kore te anoanoia ra me te tataraara tikai ra taua aronga e te akaoraora akaou i to ratou aroa no te Atua. E akamanako ana ia Mario, * te noo ra i Marike. Kua akaruke ana a Mario i te putuputuanga Kerititiano, kua riro mai aia ei tangata kai kava e te kai tita, e i muri ake i te 20 mataiti, kua apainaia atu aia ki roto i te are auri. “Kua akamata au i te akamanako akaou no runga i toku oraanga no te tuatau ki mua e kua tatau akaou i te Pipiria,” i karanga ai a Mario. “Kare i roa ana, kua ariki au i to Iehova au tu, tona tu akaaroa tikai, ko taku ia i pure putuputu ana. I muri ake i te tukuna angaia mai au mei te are auri, kua kopae au i toku au oa taito, kua aere atu ki te au uipaanga Kerititiano, e kare i roa ana i muri mai kua akaoki akaouia mai au. Te kokoti nei au i taku kino i rave ana ki toku kopapa, inara e manakonakoanga umere toku i teianei. Te akameitaki maata nei au ia Iehova no tona tangi aroa e te akakore anga mai i te ara.”—Salamo 103:9-13; 130:3, 4; Galatia 6:7, 8.
20 E mea papu e, te angaanga pakari ra te aronga e au turanga aiteite to ratou mei to Mario rai kia oki mai kia Iehova. Inara ka oronga mai to ratou aroa tei akaoraora akaouia—no te apii Pipiria, te pure, e te akamanako anga oonu—i te mataku kore e te tu ngaueue kore te anoanoia ra. Kua akaketaketa katoaia a Mario e te manakonakoanga no te Patireia. Ae, kapiti mai ki te aroa, te akarongo, e te mataku i te Atua, e mana ririnui te manakonakoanga ei akapuapinga anga i to tatou oraanga. I roto i te atikara ka aru mai, ka akara vaitata atu tatou i teia apinga aroa akaperepereia i te pae vaerua.
[Tataanga Rikiriki i Raro]
^ para. 19 Kua tauiia te ingoa.
Ka Rauka Ainei ia Koe te Pau?
• Akapeea te aroa i riro ei e tuanga maata i roto i to Iesu tu mataku kore?
• Akapeea te aroa no te au taeake i te oronga anga i te tu mataku kore tikai kia Paulo raua ko Banaba?
• Na roto i teea au ravenga te tauta nei a Satani i te akakino i te aroa Kerititiano?
• No te aroa ia Iehova te oronga maira kia tatou i te mataku kore kia akakoromaki i teea au timata anga?
[Au Uianga Apii]
[Tutu i te kapi 23]
No to Paulo aroa i te au tangata kua orongaia kiaia te mataku kore kia tamou marie
[Tutu i te kapi 24]
Te anoanoia ra te mataku kore kia mou piri tikai i te au turanga a te Atua
[Tutu i te kapi 24]
Namangolwa Sututu