Kia Rekareka i to Tatou Enua Manea

KUA kite te aronga akarakara etu e e topata meangiti ua te kainga o te tangata i roto i te maata anga tikai o te ao kotinga koreia e pini ua ake. Kare atu e ngai ke i kiteaia te oraanga i roto i te ao katoa e pini ua ake. I runga ua i te paraneta Enua kua tano tikai te au turanga no te oraanga.

Tei maata atu, ka rauka ia tatou i te rekareka i te oraanga i runga i teia enua manea. Mei teaa ra te reka i te tamaanaanaia anga e te ra i tetai ra anuanu! Koai ia tatou kare i akakeuia e te manea o te iti anga o te ra me kore te opu anga o te ra? E tikai, e maata atu ta to tatou ra ka rave i te akarekareka ua i to tatou tu kopapa. E puapinga tikai te reira no to tatou oraanga tikai.

No te au mirioni ua atu mataiti, na te uuti anga ririnui o te ra e mou tinamou ana i te enua e tetai au paraneta i roto i te aerenga takapini anga i te mareva. E mei ta te au tamariki i apii ana i te apii, te neke aere ra te akatereanga ra i rotopu i to tatou Tarava vananga etu. Inara i roto i to tatou vananga etu ko te ra ua tetai o te au etu e tere atu i te 100 pirioni e neke taokotai aere ra.

Te mouia nei te Tarava vananga etu i roto i te akapupu anga mei te 35 vananga etu. E tauatini ua atu te au vananga etu i roto i te au akapupu anga vananga etu mamaata. Penei kare to tatou akatereanga ra e tinamou naringa e tei roto te reira i te au vananga etu mamaata roa atu e te akapupu anga maata o te au vananga etu. Inara, tokoiti ua te au ngai o te ao katoa e pini ua ake “kua tau ua ki te oraanga tukeke mei to tatou rai,” i akakite ei a Guillermo Gonzalez raua ko Jay W. Richards i roto i ta raua puka The Privileged Planet.

Te vai anga o te oraanga i runga i teia paraneta e mea tupu ua mai ainei, tei tupu mai no tetai tuanga o te “aruru maata”? Me kare te vai ra ainei tetai aiteanga tikai ki te ora i runga i teia paraneta Enua manea?

E manganui te au tangata tei manako taopenga e kua anga tikaiia to tatou kainga enua kia turu i te oraanga. * I te au anere mataiti i topa akenei, kua arataki te tangata Epera tata pee i te manako ki te enua e ki te au rangi. Kua tata aia: “Kia akara au i to au rangi i te angaanga a to maikao-rima na; te marama e te au etu taau i anga ra; Eaa te tangata nei?” (Salamo 8:3, 4) Kua irinaki teia tangata tata pee e te vai ra Tei Anga. E manako taopenga tau ainei te reira i to tatou tuatau manako taineti?

[Tataanga Rikiriki i Raro]

[Pia/​Tutu i te kapi 3]

“Mei te ngai mamao mai, e kanapanapa te Enua mei te poe auika rai i roto i te poiri o te mareva,” i akakite ei The Illustrated Science Encyclopedia ​—Amazing Planet Earth.

[Akameitakianga]

Globe: U.S. Fish & Wildlife Service, Washington, D.C./NASA