Magkaada Kalipay ha Aton Maopay Hinduro nga Tuna

NAKITA han mga astronomo nga an urukyan han mga tawo gutiay la nga tuldok ha waray tubtoban an kahaluag nga uniberso. Waray iba nga lugar ha uniberso an may-ada kinabuhi. Ha planeta nga Tuna la naeksister an husto nga kahimtang.

Dugang pa, mahimo kita magkaada kalipay dinhi hinin maopay hinduro nga globo. Makalilipay gud nga masirakan durante han mahagkot nga panahon! Hin-o ha aton an diri nalilipay han makaruruyag pagkit-on nga pagsidlit o pagtunod han adlaw? Syempre, labaw pa ha pagpalipay la ha aton an nahihimo hito. Importante ito ha aton pag-eksister.

Ha diri maihap nga minilyon nga katuigan, an tuna ngan iba pa nga planeta nagpapabilin ha diri nagbabag-o nga mga orbit tungod han pwersa han grabidad han adlaw. Ngan, sugad han hinbabaroan han mga estudyante ha eskwelahan, an bug-os nga sistema solar natuyok ha sentro han aton Milky Way nga galaksi. Kondi ha aton galaksi an adlaw usa la han sobra 100 bilyon nga bitoon nga nalibot dida hito.

Tungod han grabidad, an Milky Way nga galaksi nagpapabilin nga kaupod ha usa nga grupo nga may mga 35 nga galaksi. An mas dagku nga grupo may-ada yinukot nga galaksi. An aton sistema solar posible nga diri gud magigin permanente an kahimtang kon nahimumutang ito ha mas daku, nagsusuruok nga mga galaksi. Kondi, pipira la nga lugar han uniberso “an angayan ha komplikado nga kinabuhi sugad han aton,” siring ni Guillermo Gonzalez ngan Jay W. Richards ha ira libro nga The Privileged Planet.

Basta na la ba nga iniksister an kinabuhi dinhi hini nga planeta? O may-ada ba mas daku nga katuyoan an kinabuhi dinhi hinin maopay hinduro nga planeta nga Tuna?

Damu an naghuhunahuna nga an aton urukyan nga tuna espisipiko nga gindesinyo ha pagsuporta han kinabuhi. * Mga siglo na an naglabay, usa nga Hebreo nga parasiday an naghisgot mahitungod han tuna ngan han mga langit. Hiya nagsurat: “Kon gintatan-aw ko an imo kalangitan, nga amo an binuhat han imo mga tudlo, an bulan ngan an mga bitoon nga imo ginpahimutang; ano la an tawo?” (Salmo 8:3, 4) Ini nga parasiday natoo nga may-ada gud Maglalarang. Makatadunganon ba ito nga konklusyon bisan yana nga nagkikinabuhi na kita ha panahon han syensya?

[Footnote]

[Kahon/Retrato ha pahina 3]

“Tikang ha hirayo, an Tuna nagraranggat pariho hin asul nga hiyas ha madulom nga kawanangan,” siring han The Illustrated Science Encyclopedia—Amazing Planet Earth.

[Ginkuhaan han Retrato]

Globo: U.S. Fish & Wildlife Service, Washington, D.C./NASA