Usa ka Dumalayong Gasa Gikan sa Maglalalang

WALA ka ba mahingangha nga ang mga butang nga gituohan sa mga siyentipiko nga kinahanglanon sa kinabuhi diha sa bisan unsang planeta gipasumbingay o direktang gihisgotan diha sa unang kapitulo sa Bibliya? Unsa man kini?

Aron motunhay ang kinabuhi, kinahanglang adunay daghang tubig, ingon sa gihisgotan sa Genesis 1:2. Ang temperatura kinahanglang eksakto ra aron ang tubig diha sa planeta magpabiling likido. Nagkinahanglan kini nga ang planeta husto ug gilay-on gikan sa adlaw. Ang asoy sa Genesis subli-subling naghisgot sa adlaw ug sa epekto niini sa yuta.

Aron kapuy-an sa mga tawo, ang usa ka planeta nagkinahanglag atmospera nga adunay partikular nga kombinasyon sa mga gas. Kining hinungdanon nga bahin gihisgotan sa Genesis 1:6-8. Ang pagtubo sa mga tanom, nga gihubit sa Genesis 1:11, 12, maoy pangunang tuboran sa dagayang suplay sa oksiheno. Ang usa ka planeta nga makapatunhay sa kinabuhi sa nagkadaiyang mga mananap nagkinahanglag mga kontinente nga uga ug mabungahon, sumala sa gihubit sa Genesis 1:9-12. Sa kataposan, aron mahimong kasarangan ang klima, ang planeta kinahanglang maghirig sa eksaktong anggulo ug magpabilin kini sa maong posisyon—sa bahin sa yuta, namentinar kini tungod sa grabidad sa atong bulan. Ang paglungtad sa bulan ug sa pipila ka benepisyo niini gipasiugda sa Genesis 1:14, 16.

Sa unsang paagi ang karaang magsusulat nga si Moises, nga walay tabang sa modernong siyensiya, nakahisgot nianang mga butanga? May talagsaong abilidad ba si Moises sa pagsabot sa kahinungdanon niini? Ang tubag mao nga siya inspirado sa Maglalalang sa mga langit ug yuta. Makaiikag kana tungod sa siyentipikanhong pagkatukma sa asoy sa Genesis.

Gipamatud-an sa Bibliya nga adunay katuyoan sa paglalang sa kahibulongang mga butang nga atong nakita sa uniberso. “Kon bahin sa mga langit, iya ni Jehova ang mga langit,” nag-ingon ang Salmo 115:16, “apan ang yuta iyang gihatag sa mga anak sa mga tawo.” Ang laing salmo nag-ingon: “Gitukod niya ang yuta ibabaw sa pihong mga dapit niini; kini dili matarog hangtod sa panahong walay tino, o hangtod sa kahangtoran.” (Salmo 104:5) Kon ang uniberso ug ang atong matahom nga planeta gidisenyo ug gipatungha sa usa ka Maglalalang, seguradong makataronganon ang pagtuo nga siya may katakos usab sa pagpatunhay niini. Nagpasabot kini nga masaligon kang makalantaw sa katumanan sa kahibulongang saad: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Tino nga ‘wala lalanga sa Diyos ang yuta nga wala lamay kapuslanan’ kondili ‘giumol kini aron pagapuy-an’ sa walay kataposan sa mapasalamatong mga tawo nga miila sa iyang mga buhat.—Isaias 45:18.

Sumala sa Kasulatan, si Jesus mianhi sa yuta aron sa pagtudlo kanato bahin sa Diyos ug sa Iyang katuyoan nga hatagag walay-kataposang kinabuhi ang masinugtanong katawhan. (Juan 3:16) Gipasaligan kita nga sa dili madugay ang Diyos ‘magalaglag sa nagalaglag sa yuta,’ samtang ang mahigugmaon-sa-kalinaw nga mga tawo gikan sa tanang kanasoran nga modawat sa iyang tagana alang sa kaluwasan mamaluwas. (Pinadayag 7:9, 14; 11:18) Pagkaanindot unya sa kinabuhi samtang ang mga tawo magpadayon sa pagdiskobre ug pagkalipay sa kahibulongang mga linalang sa Diyos sa walay kataposan!—Ecclesiastes 3:11; Roma 8:21.

[Picture Credit Line sa panid 8]

NASA photo