Sakey a Regalo na Manamalsa a Mansiansia Lawas

AGTA makapakelkelaw lapud saray bengatlan papanisiaan na saray sientista a makanakana ed bilay ed dinanman a planeta et asalambit odino direktan sinaglawi diad primeron kapitulo na Biblia? Anto iratan?

Singa asalambit la ed Genesis 1:2, nepeg a wala so daakan a danum ta pian makapantultuloy so bilay. Nepeg a dugaruga so temperatura ed planeta ta pian ag-onkigtel so danum. Nakaukolan sirin a dugaruga met so distansia na planeta manlapud agew. Aminpigan impaimano na salaysay na Genesis so agew tan saray epekto na satan diad dalin.

Pian napanayaman na totoo so sakey a planeta, nakaukolan a walaan itan na sakey ya atmospera a walaay klase na nanlalaok iran gas. Sayan importantin aspekto so sinalambit ed Genesis 1:6-8. Say itutubo na saray tanaman, ya adeskribe ed Genesis 1:11, 12, so manunan panlalapuan na daakan a suplay na oksiheno. Pian say sakey a planeta et napambilayan na dakerakel a klase na ayep, nakaukolan iray kontinente na amaga tan mabunan dalin, unong ya adeskribe ed Genesis 1:9-12. Diad kaunoran, pian kabkaabigan so klima na sakey a planeta, nepeg ya akariking itan ed dugan anggulo tan mansiansia itan ed pasen to. Ontan so kipapasen na planeta tayo lapud epektoy grabidad na bulan. Say inkiwala na bulan tan saray gunggona ya iter na satan so nipabitar ed Genesis 1:14, 16.

Panon irayan nipabitar na kadaanan a managsulat a si Moises, ya anggapo so tulong na modernon siensia? Kasin sikatoy awalaan na nikaduman abilidad pian natalosan to so kaimportantian na saratan, anggaman ag-iratan amta na saray kapanaonan to? Say ebat et sikato so pinuyanan na Manamalsa na saray tawen tan dalin. Saya so makatantanda no ibase so inkasusto na salaysay na Genesis diad punto de bista na siensia.

Pruepruebaan na Biblia a wala so gagala na impamalsa ed sarayan makapakelkelaw a nanenengneng tayo ed uniberso. Unong ed inkuan na Salmo 115:16: “Saray tawen, salanti saray katawenan, kien ira nen Jehova. Bangbalet say dalin inter to ed saray anak na totoo.” Oniay inkuan na sakey nin salmista: “Sikato ya angipasen na saray angipaletnegan na dalin, pian aglawas nagalaw.” (Salmo 104:5) No say uniberso tan say marakdakep a planeta tayo et denesinyo tan pinawala na sakey a Manamalsa, makatunongan sirin a panisiaan a sikato so walaan na pakayarin manustuni ed saratan. Kabaliksan na saya a makapanmatalek kayo ed arapen nipaakar ed kasumpalan na alay abig a sipan to: “Say matunong tawiren to so dalin tan manayam diman lawas.” (Salmo 37:29) Bilang panamaseguro, say Dios et “pinalsa to [so dalin] ya aliwa a kibalatar” noagta “tinibukel to ta pian sikato so panayaman” ed andi-anggaan na saray maapresyan totoo a mamibidbir ed impamalsa to.​—Isaias 45:18.

Unong ed Biblia, si Jesus so linma diad dalin ta pian ibangat to ed sikatayo so nipaakar ed Dios tan say gagala To a mangiter na andi-anggaan a bilay ed matulok a katooan. (Juan 3:16) Napaseguroan itayo a magano lan “bagbagen [na Dios] so saray mamagbag ed dalin,” bangta makaliktar iramay maaro-ed-deen a totoo a manlalapud amin a nasyon ya angawat ed probisyon to parad kilalaban. (Apocalipsis 7:9, 14; 11:18) Agaylan dakep so bilay sano mantultuloy lawas a nadiskobre tan napanliketan na totoo iray makapakelkelaw a pinalsa na Dios!​—Eclesiastes 3:11; Roma 8:21.

[Picture Credit Line ed pahina 8]

Nilitrato na NASA