Espirituwal na Pagtogdok sa “Harong na Gapo”

An ngaran kan nasyon na ini sa Aprika nangangahulogan “Harong na Gapo.” Iyan sarong nasyon na midbid na marhay huli sa Busay nin Victoria asin sa laen-laen na mga hayop na layas. Pero, yaon dian an pinakadakulang suanoy na mga edipisyo na ginibo nin tawo sa timog kan Sahara. Sarong granitong buklod an nakabalandra sa tahaw kaiyan. An templadong klima sa buklod na iyan nagbubunga nin mataba asin matubang na daga. Ini an Zimbabwe, ineerokan nin mga 12 milyones katawo.

TAANO ta nginaranan iyan na Harong na Gapo? Kan 1867 an paraayam asin eksplorador na si Adam Renders nakanompong nin darakulang estrukturang gapo na nakawararak sa labing 720 ektarya. Haloy na siang nagbibiahe sa madoot na kapatagan sa Aprika, na an mga harong sa pangkagabsan gibo sa laboy, mga palo, asin gugon. Dangan nanompongan nia an kagabaan na gapo nin sarong mahiwason na siudad, na inaapod ngonyan na Gran Zimbabwe.

An kagabaan na ini nasa mismong timog kan lugar na midbid ngonyan bilang Masvingo. An nagkapira sa mga lanob labing 9 metros an langkaw, mga granitong gapo na pinagpatongpatong na mayo nin semento. Sa laog kan kagabaan, may sarong pambihirang torre na korteng imbudo na mga 11 metros an langkaw hale sa pinakaibaba kaiyan na 6 metros an diametro. Dai aram sagkod ngonyan an eksaktong katuyohan kan edipisyong ini. An kagabaan kaidto pang ikawalong siglo C.E., alagad may ebidensia na an lugar na iyan inistaran mga ginatos na taon bago kaiyan.

 Kan 1980 an nasyon kaidto na midbid bilang Rodesia nagin independiente sa Britania asin tinawan nin bagong ngaran na Zimbabwe. Kaiba sa mga nag-eerok dian an duwang pangenot na etnikong grupo—an Shona, na minakompuesto kan mas dakulang kabtang kan populasyon, asin an Ndebele. An mga tawo mapag-istimar, siring kan pirmeng naririsa kan mga Saksi ni Jehova sa saindang gibohon na pag-ebanghelyo sa harong-harong. Kun beses dawa bago mamidbid an bisita, an pagtuktok kaini sa pinto sisimbagon tolos nin “Dagos” asin “Tukaw tabi.” An kadaklan na taga Zimbabwe may hararom na paggalang sa Biblia asin sa parate mag-iinsistir na durante kan pag-orolay manongod sa Kasuratan, an saindang mga aki magtukaw asin maghinanyog.

Pagpaabot nin Nakakaparigon na Mensahe nin Karangahan

An “AIDS” asin “tigmara” mga tataramon na parateng ginagamit sa media kun napag-oolayan an Zimbabwe. An paglakop nin AIDS nagkaigwa nin grabeng epekto sa populasyon asin ekonomiya kan kadagaan sa parte nin Aprika sa timog kan Sahara. An mga naoospital digdi sa parate huli sa HIV. An helang nakalaglag sa buhay pampamilya kan dakol.

Tanganing tabangan an mga tawo sa Zimbabwe, an mga Saksi ni Jehova sibot sa pagpahayag na an pinakamarahay na paagi nin pamumuhay iyo an pamumuhay na ginigiyahan kan mga pamantayan nin Dios na sinasabi sa Biblia. Halimbawa, itinotokdo kan Tataramon nin Dios na an regalo nin Dios na seksuwal na relasyon maninigo sanang ikaogma sa laog nin pag-agoman, na an homoseksuwalidad dai maaako nin Dios, asin na an pag-ineksion nin dugo asin paggamit nin mga droga na pan-aling-aling ibinabawal kan ley ni Jehova. (Gibo 15:28, 29; Roma 1:24-27; 1 Corinto 7:2-5; 2 Corinto 7:1) An mga Saksi nagpapalakop man nin sarong mensahe nin paglaom na masarig an basehan, na idinodoon na sa dai na mahahaloy na ngapit, hahaleon kan Kahadean nin Dios an gabos na helang.—Isaias 33:24.

Pagtao nin Ayuda

An tigmara nagkaigwa nin grabeng epekto sa Zimbabwe sa nakaaging dekada. An mga hayop na layas nagkakapurukan huli sa gutom asin pagkawara kan tubig sa hawak. Ginatos na ribong baka an nagadan. Tinumtom nin kalayo an dakol na ektarya nin makahoy na kadlagan. Dakol na aki asin may edad na an nagadan sa malnutrisyon. Dawa an katubigan kan dakulang Salog nin Zambezi buminaba na marhay sa sokol na nagsasapeligro kan pagpunsionar kan mga planta nin koryente na hydroelectric.

Bilang reaksion sa siring na grabeng destroso, an mga Saksi ni Jehova nagbilog nin sagkod sa walong komite sa pag-ayuda sa manlaenlaen na parte kan nasyon. Dinalaw kan nagbibiaheng mga paraataman an mga kongregasyon tanganing ebalwaron an aktuwal na mga pangangaipo. An impormasyon na ini ipinaabot sa angay na komite sa pag-ayuda. An sarong nagbibiaheng paraataman nagreport: “Sa nakaaging limang taon, ikinadistribwir niamo an labing sangribong tonelada nin mais, sampulong tonelada nin sira na binadi, asin siring man kaiyan kadakol na patani. Prineserbar man kan satong espirituwal na mga tugang an duwang tonelada nin mufushwa [pinaalang na gulay]. Nagdistribwir man kami nin kadakol na idinonar na gubing siring man nin kinakaipuhan na pondo.” An saro pang nagbibiaheng paraataman nagsabi: “Kun hinohorophorop ko an mga kadepisilan na naeksperyensiahan niamo sa pagkua nin permiso na hinahagad kan Zimbabwe asin Aprika del Sur tanganing madara palaog an mga suplay na ini asin an dayaday na kakulangan sa gasolina na kaipuhan sa pagtransportar kan kinakaipuhan na marhay na ayudang ini, an ikakakonklusyon ko sana iyo na an samong kapangganahan dagdag na ebidensia kan pag-asegurar ni Jesus na aram kan satong langitnon na Ama na kaipuhan mi an gabos na bagay na ini.”—Mateo 6:32.

 Paano nakakapanggana an nagbibiaheng mga paraataman mismo kun naglilingkod sa mga lugar na may tigmara? An nagkapira nagdadara nin kakanon para sa saindang sadiri asin para sa mga pamilya na dinadagosan ninda. An saro sa sainda nagreport na an nagkapirang Kristiana nagdidiriskutiran kun baga maninigo sindang umontok sa paghuhulit sa aldaw na idto tanganing makapila sinda para sa linalaoman na ayuda hale sa gobyerno. Nagdesisyon sinda na magtiwala ki Jehova paagi sa pagkonsentrar sa paghuhulit asin paghalat kun paano mareresolberan an problema. Mayong nag-abot na ayuda hale sa gobyerno kan aldaw na idto.

Nakaiskedyul an Kristianong pagtiripon sa kasunod na aldaw, asin an mga tugang na babaeng ini kaipuhan giraray na magdesisyon. Maatender daw sinda sa pagtiripon, o mahalat sinda sa pag-abot kan ayuda? Ibinubugtak an tamang mga prioridad, nag-atender sinda sa pagtiripon sa Kingdom Hall. (Mateo 6:33) Mantang nag-aawit kan pangultimong kanta, nakadangog sinda nin sarong padangadang na trak. Nag-abot an ayuda sa lugar mismong idto, paagi sa saindang espirituwal na mga tugang na nasa komite sa pag-ayuda! Nangibabaw an labi-labing kagayagayahan asin pagpasalamat kan maimbod na mga Saksi na nag-atender sa pagtiripon na iyan.

An Pagkamoot Nagpaparigon

An mga akto nin kabootan sa mga nasa luwas kan Kristianong kongregasyon nagbukas nin mga oportunidad na makatao nin marahayon na patotoo. Sarong nagbibiaheng paraataman sa Masvingo, kaiba an nagkapirang lokal na Saksi, an nakikikabtang sa gibohon na pag-ebanghelyo. Nariparo nia an sarong daragita na nakahigda sa gilid kan tinampo. Naaraman kan mga Saksi na grabe an helang kaini, huling ini dai nakakataram na marhay asin an boses kaini nagtatakig. Hamunyari an ngaran kan daragita, na sa Shona nangangahulogan nin “Dai daw Kamo Nasusupog?” Naaraman kan mga tugang na binayaan sia kan mga miembro kan saiyang iglesia na pasiring sa relihiosong seremonya sa kabukidan. Mamomoton na tinabangan kan mga Saksi an daragita, na dinara ini sa sarong kaharaning baryo.

Sa baryong iyan, may mga nakakamidbid ki Hamunyari, kaya pinasabihan ninda an saiyang mga paryente na dumanan sia. Mapadapit sa mga Saksi, an mga taga baryo nagsabi: “Ini an tunay na relihion. Ini an pagkamoot na maninigong ipaheling kan mga Kristiano.” (Juan 13:35) Bago maghale, tinawan kan mga tugang si Hamunyari kan pulyetong Ano Gusto Nindong Makaaram Pa nin Orog Manongod sa Biblia? *

Kan suminunod na semana an nagbibiaheng paraataman naglingkod sa kongregasyon sa lugar na ineerokan ni Hamunyari. Gusto niang maaraman kun ini nakapuli nin ligtas. Ogmahon na marhay an bilog na pamilya na maheling sia asin an lokal na mga tugang. An mga magurang kaini nagsabi: “Isinasagibo nindo an tunay na relihion. Ilinigtas nindo an buhay kan samong aking babae, na binayaan na magadan sa tinampo.” Hinapot ninda an mga miembro kan iglesia kaini: “Dai daw kamo nasusupog, siring kan ipinapakahulogan kan ngaran na Hamunyari, na bayaan ining naghihingagdan?” Pinonan kan mga Saksi an pakikipag-olay sa Biblia asin nagwalat nin babasahon na basado sa Biblia sa pamilya ni Hamunyari, na nag-imbitar sa mga tugang na bumalik asin adalan sinda sa Biblia. An nagkapirang miembro kan pamilya na dati nagkokontra sa mga Saksi nagbago kan saindang punto de vista. An saro sa sainda, an bayaw ni Hamunyari, namomoon sa sarong iglesia sa lugar na idto. Nag-ako sia nin pag-adal sa Biblia.

Pagtogdok nin mga Harong nin Pagsamba

An sarong pinasabngan na poeta kan suanoy na panahon nagsurat: “O Dios, . . . an sakong kalag napapaha sa saimo. . . . Sa sarong daga na mara asin biyong alang, na mayo nin tubig.” (Salmo 63:1) Totoo nanggad ini sa dakol na tawo sa Zimbabwe! Sa  pisikal nagtatagal sinda sa tigmara, alagad sa espirituwal napapaha sinda sa Dios asin sa saiyang karahayan. Maheheling nindo ini sa mga resulta kan Kristianong ministeryo kan Mga Saksi ni Jehova. Kan an Zimbabwe magin independiente kan 1980, mga 10,000 na Saksi an naglilingkod sa 476 na kongregasyon. Ngonyan, mga 27 taon na an nakalihis, an kabilangan nin aktibong Saksi natriple asin an kabilangan kan mga kongregasyon haros nadoble.

Pira sana sa mga kongregasyon na ini an may sadiri nindang lugar nin pagsamba. Kan Enero 2001, sa labing 800 na kongregasyon sa Zimbabwe, 98 sana an may harong nin pagsamba—sarong Kingdom Hall—na mapagtitiriponan. Ginigibo kan dakol na kongregasyon an saindang mga pagtiripon sa limpoy nin mga kahoy o sa simple sanang mga kubo na gibo sa mga palo, na an lanob pinalitadahan nin laboy asin inatopan nin gugon.

Bilang resulta kan buka an palad na mga donasyon asin mahigos na pagboboluntaryo kan saindang pambilog na kinaban na Kristianong kasararoan nin magturugang, pinonan kan mga Saksi sa Zimbabwe an sarong programa na nagpangyari na an mas dakol na kongregasyon magkaigwa nin simple sana alagad may dignidad na mga Kingdom Hall. Dakol na Saksi hale sa ibang nasyon na may abilidad sa pagtogdok an naggibo nin mga areglo tanganing makaduman sinda sa Zimbabwe asin makikabtang sa gibohon kaiba kan lokal na mga boluntaryo. An saro sa lokal na mga Saksi nagsurat: “Odok niamong pinapasalamatan an gabos na tugang na lalaki asin babae hale sa kadakol na nasyon na nagdigdi sa Zimbabwe tanganing tumabang sa pagtogdok nin magayon na mga Kingdom Hall. Asin pinapasalamatan niamo kamo gabos sa saindong mga kontribusyon sa Pondo sa Kingdom Hall na nagpangyaring magin posible an gibohon na ini.”

Sa sirangan na parte kan nasyon, an mga tugang nagtitiripon sa sirong nin sarong dakulaon na poon nin baobab sa laog nin 50 taon. Kan sabihon sa Kristianong kamagurangan na itotogdok an sarong tunay na harong nin pagsamba, kisuerra saro sa sainda an dai napugolan na mapaluha. Sa sarong kaharaning kongregasyon, sinabi nin sarong 91 anyos na magurang sa kongregasyon: “Haloyon na akong nagngangayongayo ki Jehova na mangyari an siring kaini!”

Dakol an komento manongod sa rikas sa pagtogdok kan magayon na mga edipisyong ini. An sarong nagmamasid nagsabi: “Kamo nagtotogdok sa aldaw, alagad an Dios siertong nagtotogdok sa banggi!” Naririsa man an pagkasararo asin kaogmahan kan mga nagtatrabaho. Sagkod sa presente, labing 350 bagong Kingdom Hall an nahaman sa bilog na nasyon. Pinagin posible kaini para sa 534 kongregasyon na magtiripon sa mga Kingdom Hall na masarig an pagkatogdok na an ginamit mga adobe.

Nagpapadagos an mahalagang marhay na pagtogdok sa espirituwal sa Zimbabwe. Mantang hinohorophorop niato an nahaman, napapahiro kita na itao an kredito ki Jehova, an ginigikanan kan siring na mga bendisyon. Iyo, “sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan.”—Salmo 127:1.

[Nota sa Ibaba]

[Mga Mapa sa pahina 9]

(Para sa aktuwal na format, hilingon an publikasyon)

ZIMBABWE

HARARE

Masvingo

Great Zimbabwe

[Ritrato sa pahina 9]

Torre na korteng imbudo

[Ritrato sa pahina 12]

Bagong Kingdom Hall, Kongregasyon nin Concession

[Ritrato sa pahina 12]

Mga miembro kan Kongregasyon nin Lyndale sa luwas kan saindang bagong Kingdom Hall

[Picture Credit Lines sa pahina 9]

Mga kagabaan na may hagyanan: ©Chris van der Merwe/AAI Fotostock/age fotostock; torre na nasa retrato sa laog: ©Ingrid van den Berg/AAI Fotostock/age fotostock