Espirituwal nga Pagpanukod sa “Balay nga Bato”

Ang ngalan sining pungsod sa Aprika nagakahulugan sing “Balay nga Bato.” Pungsod ini nga kilala bangod sang Victoria Falls kag sang nanuhaytuhay nga ilahas nga kasapatan. Apang, masapwan sa sini ang labing daku nga mga tinukod nga ginhimo sang tawo sang una sa bagatnan sang Sahara. Sa tunga sini may yara granito nga bakulod. Ang hustuhan nga klima sa sining bakulod nagapatubas sang isa ka matambok kag malagtom nga palibot. Amo ini ang Zimbabwe, nga ginapuy-an sang mga 12 milyones ka tawo.

NGAA gintawag ini nga Balay nga Bato? Sang 1867 nakita sang mangangayam kag manuglagulad nga si Adam Renders ang dalagku nga mga tinukod nga human sa bato nga nahamtang sa duog nga 720 ektaryas ang kalaparon. Nagalakbay sia sadto sa Aprika, diin ang mga puluy-an masami nga human sa daga, kahoy, kag kugon. Nian, nakalab-ot sia sa mga kagulub-an nga bato sang isa ka daku nga siudad, nga ginatawag karon nga Great Zimbabwe.

Ini nga mga kagulub-an nahamtang sa bagatnan nayon sang duog nga kilala karon nga Masvingo. Ang iban nga pader nagataas sing kapin sa 9 metros, kag human sa granito nga mga bato nga ginsampawsampaw lang. Sa sini nga kagulub-an, may di-kinaandan nga korte kono nga torre nga nagataas sing mga 11 metros halin sa sadsaran sini nga 6 metros ang diametro. Wala gihapon mahibaluan kon para sa ano ining tinukod. Ini nga kagulub-an nagluntad sugod pa sang  ikawalo nga siglo C.E., apang may pamatuod nga ini nga duog ginpuy-an na sing ginatos ka tuig antes sini.

Sang 1980 ang pungsod nga nakilal-an sang ulihi nga Rhodesia nangin independiente sa Britanya kag ginhingadlan liwat nga Zimbabwe. Ang mga pumuluyo sini nagalakip sang duha ka dalagku nga etniko nga grupo—ang Shona, nga amo ang grupo sang kalabanan nga pumuluyo, kag ang Ndebele. Maabiabihon ang mga tawo kag natalupangdan ini sang mga Saksi ni Jehova kon magbantala sila sa pamalay. Kon kaisa bisan indi pa nila kilala ang nagpanuktok nga bisita, ginapasulod kag ginapapungko nila ini. Kalabanan sang mga taga-Zimbabwe nagatahod gid sa Biblia kag pirme nagapamilit nga sa paghambalanay sa Kasulatan, ang ila kabataan mapungko kag mamati.

Pagtanyag sing Makapalig-on nga Mensahe sang Paglugpay

Ang “AIDS” kag “tigpalamangag” amo ang mga tinaga nga pirme ginagamit sang media kon Zimbabwe ang ginahinun-anunan. Ang paglapnag sang AIDS may daku gid nga epekto sa populasyon kag sa ekonomiya sang mga kadutaan nga sakop sang Sahara sa Aprika. Sa sini nga duog, masami nga ang mga nagapaospital may HIV/AIDS. Ini nga balatian naghalit sa madamo nga pamilya.

Agod mabuligan ang mga tawo sa Zimbabwe, masako nga ginabantala sang mga Saksi ni Jehova nga ang labing maayo nga dalanon sang pagkabuhi amo ang kabuhi nga ginatuytuyan sang mga talaksan sang Dios nga ginpahamtang sa Biblia. Halimbawa, ang Pulong sang Dios nagatudlo nga ang dulot sang Dios nga pagpakighirop dapat himuon lamang sang mag-asawa, nga ang homoseksuwalidad ginapakamalaut sang Dios, kag ang pagpatughong sang dugo kag ang paggamit sang mga droga, ginadilian sang kasuguan ni Jehova. (Binuhatan 15:28, 29; Roma 1:24-27; 1 Corinto 7:2-5; 2 Corinto 7:1) Ginabantala man sang mga Saksi ang isa ka masaligan nga paglaum nga sa malapit nga palaabuton dulaon sang Ginharian sang Dios ang tanan nga balatian.—Isaias 33:24.

Pag-aman sing Ayuda

Ang tigpalamangag sang nagligad nga dekada naghalit gid sing daku sa Zimbabwe. Naghalalaplay lang ang ilahas nga mga kasapatan bangod sang kagutom kag kakulang sing tubig. Ginatos ka libo ka baka ang nagkalamatay. Inektarya nga kagulangan ang nasunog. Madamo nga kabataan kag tigulang ang napatay bangod sa malnutrisyon. Bisan ang tubig sang daku nga Zambezi River nagkunta amo nga diutayan lang mag-untat sa pagpanghikot ang mga planta sang koryente.

Bilang pagbulig sa sining kahalitan, nagtukod ang mga Saksi ni Jehova sing walo ka komite sa pag-ayuda sa nagkalainlain nga bahin sang pungsod. Ginduaw sang nagalakbay nga mga manugtatap ang mga kongregasyon agod hibaluon kon ano gid ang mga kinahanglanon. Ini nga impormasyon ginpaliton sa komite sang pag-ayuda nga nagatatap sini. Ang isa ka nagalakbay nga manugtatap nagreport: “Sang nagligad nga lima ka tuig, nakapanagtag kami sing kapin sa isa ka libo ka tonelada nga mais, napulo ka tonelada nga uga, kag amo man kadamo nga patani. Ang aton espirituwal nga mga kauturan naghimo sing duha ka tonelada nga mufushwa [binulad nga utan]. Nagpanagtag man kami sing madamo nga panapton nga gindonar subong man sang kinahanglanon nga kuarta.” Ang isa pa ka nagalakbay nga manugtatap nagsiling: “Kon hunahunaon ko ang mga kabudlayan nga naeksperiensiahan namon sa pagkuha sing mga permiso nga ginapatuman sang Zimbabwe kag Bagatnan nga Aprika agod madala ini nga mga suplay, kag ang pirme nga pagkaubos sang gasolina nga kinahanglanon agod madala ining mga ayuda, makahinakop gid ako nga ang amon kadalag-an  dugang nga pamatuod sang pasalig ni Jesus nga nahibaluan sang aton langitnon nga Amay nga kinahanglan naton ini tanan nga butang.”—Mateo 6:32.

Paano nagpanghikot ang mga nagalakbay nga manugtatap sa sining mga duog nga may tigpalamangag? Ang pila nagadala sing pagkaon para sa ila kaugalingon kag sa mga pamilya nga ila ginadayunan. Ang isa sa ila nagreport nga ang pila ka Cristianong utod nga babayi nagapamangkutanay kon bala indi lang sila anay magbantala sina nga adlaw agod magpila sa ginapaabot nga ayuda sang gobierno. Namat-od sila nga magsalig kay Jehova paagi sa pagsentro sang ila igtalupangod sa pagbantala kag hulaton kon ano ang matabo. Wala sing nag-abot nga ayuda sang gobierno sina nga adlaw.

May nakaiskedyul nga Cristianong miting sa masunod nga adlaw, kag ining mga kauturan nga babayi dapat magdesisyon liwat. Matambong bala sila sa miting ukon mahulat sang ayuda? Nagpahamtang sila sing husto nga prioridad kag nagtambong sa miting sa Kingdom Hall. (Mateo 6:33) Samtang nagaamba sang katapusan nga ambahanon, nabatian nila ang nagapadulong nga trak. Nag-abot ang ayuda didto mismo, nga dala sang ila espirituwal nga mga kauturan nga nagapanghikot sa komite sang pag-ayuda! Daku gid ang kalipay kag pagpasalamat sang matutom nga mga Saksi nga nagtambong sa sinang miting.

Ang Gugma Nagapalig-on

Ang pagbuhat sing kaayo sa indi katapo sang Cristianong kongregasyon nagbukas sing mga kahigayunan nga makapanaksi sing maayo. Isa ka nagalakbay nga manugtatap sa duog sang Masvingo, ang nagbantala upod sa pila ka Saksi didto. May nakita sia nga isa ka bata nga babayi nga nagahigda sa dalan. Narealisar sang mga Saksi nga grabe ang bata, kay indi sia makahambal sing maayo kag nagakurog ang iya tingog. Si Hamunyari ang ngalan sang bata, nga sa Shona nagakahulugan sing “Wala Ka Bala Nahuya?” Nahibaluan sang mga kauturan nga ginbiyaan gali sia sang mga katapo sang iya relihion nga nagsimba sa bukid. Gin-atipan sang mga Saksi ang bata kag gindala sia sa malapit nga minuro.

Sa sina nga minuro, nakilal-an sang pila ka pumuluyo si Hamunyari, gani ginpangabay nila ang iya mga kaparyentehan nga kuhaon sia didto. Tuhoy sa mga Saksi, ang mga pumuluyo nagsiling: “Matuod ini nga relihion. Amo ini ang gugma nga dapat ipakita sang mga Cristiano.” (Juan 13:35) Antes magbiya, ginhatagan sang mga kauturan si Hamunyari sing tract nga Luyag Mo Bala Madugangan ang Imo Nahibaluan sa Biblia? *

Sang masunod nga semana nagduaw ang nagalakbay nga manugtatap sa kongregasyon sa duog nga ginapuy-an ni Hamunyari. Luyag niya mahibaluan kon nakapauli ang bata. Nalipay gid ang bug-os nga pamilya nga makita ang manugtatap kag ang mga kauturan. Ang iya mga ginikanan nagsiling: “Kamo ang matuod nga relihion. Ginluwas ninyo ang kabuhi sang amon bata, nga ginbiyaan agod mapatay sa dalan.” Ginpamangkot nila ang mga katapo sang iya relihion: “Wala bala kamo mahuya, subong sang ginapahangop sang ngalan ni Hamunyari, nga biyaan sia nga nagatagumatayon?” Ginsugdan sang mga Saksi ang paghinun-anon sa Biblia kag ginbilinan sing pasad sa Biblia nga mga literatura ang pamilya ni Hamunyari. Ginpabalik nila ang mga kauturan agod tun-an sila sa Biblia. Nagbag-o ang pagtamod sang pila ka katapo sini nga pamilya nga nagapamatok anay sa mga Saksi. Ang isa sa ila, ang bayaw ni Hamunyari, nga lider sang isa ka simbahan sa ila duog nagtuon sing Biblia.

Pagtukod sing mga Balay sang Pagsimba

Ang isa ka inspirado nga mamalaybay sang una nagsulat: “O Dios, . . . ginauhaw ang akon kalag para sa imo. . . . Sa duta nga mamaIa kag kigas,  nga wala sing tubig.” (Salmo 63:1) Matuod ini sa madamo nga katawhan sa Zimbabwe! Naantos nila sa pisikal ang tigpalamangag, apang sa espirituwal ginauhaw sila para sa Dios kag sa iya kaayo. Makita mo ini sa resulta sang Cristianong ministeryo sang mga Saksi ni Jehova. Sang nangin independiente ang Zimbabwe sang 1980, mga 10,000 ka Saksi ang nagaalagad sa 476 ka kongregasyon. Karon, mga 27 ka tuig sang ulihi, nagtatlo ka pilo ang kadamuon sang aktibo nga mga Saksi kag nagdoble ang kadamuon sang kongregasyon.

Pila lamang sining kongregasyon ang may ila kaugalingon nga duog sa pagsimba. Sang Enero 2001, 98 lamang sa kapin sa 800 ka kongregasyon sa Zimbabwe ang may ginatipunan nga balay sang pagsimba ukon Kingdom Hall. Madamo sang kongregasyon ang nagahiwat sang ila miting sa idalom sang kahoy ukon sa simple nga mga payag nga human sa kahoy, nga daga ang dingding kag kugon ang atop.

Bangod sang maalwan nga mga amot kag makugi nga pagboluntaryo sang Cristianong mga kauturan gikan sa bug-os kalibutan, ang mga Saksi sa Zimbabwe naghimo sing isa ka programa agod makatigayon ang madamo pa nga kongregasyon sing kasarangan apang talahuron nga mga Kingdom Hall. Madamo nga Saksi sa iban nga pungsod nga may kalantip sa pagtukod ang nagpasibu sang ila kabuhi agod magkadto sa Zimbabwe kag magtrabaho upod sa mga kauturan didto. Ang isa ka Saksi didto nagsulat: “Hanuot gid namon nga ginapasalamatan ang tanan nga kauturan halin sa madamo nga pungsod nga nagkadto sa Zimbabwe agod magbulig sa pagtukod sang matahom nga mga Kingdom Hall. Kag ginapasalamatan man namon kamo tanan sa inyo amot sa Kingdom Hall Fund agod matapos ini.”

Sa nasidlangan nga bahin sang pungsod, ang mga kauturan naghiwat sang ila miting sa idalom sang isa ka daku nga kahoy nga baobab sa sulod sang 50 ka tuig. Sang ginsilingan ang Cristianong mga gulang nga patindugan sila sang isa ka balay sang pagsimba, may naghibi. Sa kaingod nga kongregasyon, ang isa ka 91 anyos nga gulang, nagsiling: “Dugay na gid ako nagapangamuyo kay Jehova nga matabo ini!”

Madamo ang komento tuhoy sa kadasigon sang pagtukod sining matahom nga mga bilding. Ang isa ka lalaki nagsiling: “Mahimo nga kamo ang nagatukod kon adlaw, apang mahimo nga Dios naman ang nagatukod kon gab-i!” Talalupangdon man ang paghiusa kag kalipay sang mga manugpangabudlay. Sa karon, kapin sa 350 ka bag-o nga Kingdom Hall ang natapos sa bug-os nga pungsod. Sarang na makatipon ang 534 ka kongregasyon sa mga Kingdom Hall nga human sa tisa.

Padayon nga ginahimo ang espirituwal nga pagtukod sa Zimbabwe. Samtang ginapamalandungan naton ang tanan nga butang nga nahimo, mapahulag kita nga dayawon si Jehova, ang tuburan sining mga pagpakamaayo. Huo, “kon indi si Jehova ang magpatindog sang balay, nagapangabudlay sa wala sing pulos ang mga nagapatindog sini.”—Salmo 127:1.

[Footnote]

[Mapa sa pahina 9]

(Para sa aktual nga pormat, tan-awa ang publikasyon)

ZIMBABWE

HARARE

Masvingo

Great Zimbabwe

[Piktyur sa pahina 9]

Ang korte kono nga torre

[Piktyur sa pahina 12]

Ang bag-o nga Kingdom Hall, Kongregasyon sang Concession

[Piktyur sa pahina 12]

Ang mga katapo sang Kongregasyon sang Lyndale sa gua sang ila bag-o nga Kingdom Hall

[Credit Line sang piktyur sa pahina 9]

Ruins with steps: ©Chris van der Merwe/AAI Fotostock/age fotostock; tower inset: ©Ingrid van den Berg/AAI Fotostock/age fotostock