Luibaku lua mu nyuma mu “nzubu wa dibue”

Dîna dia ditunga edi dia mu Afrike didi diumvuija “Nzubu wa dibue.” Nditunga didi dimanyike bimpe bua bibila bia Victoria ne bua bintu bia muoyo bia mishindu ne mishindu bidimu. Mu ditunga edi mudi kabidi nzubu ya kale mitambe bunene ivuabu bibake ku sud kua tshipela tshia Sahara. Mpata wa mabue udi upitshila munkatshi muadi. Munya utu utema mu mpata eu ne mvula itu ilokamu mbiambuluishe bua buloba budimu buikale ne bufuke bua bungi. Edi ke ditunga dia Zimbabwe, didibu basombele kudi bantu batue ku miliyo 12.

BUA TSHINYI dîna edi dia Nzubu wa dibue? Mu 1867, Adam Renders uvua tshilembi ne mukebuludi wakasangana nzubu minene ya mabue mitangalake mu tshipapu tshia hektare mipite pa 700. Uvua wendela mu bisuku bia mu Afrike, muvua misangu mivule nzubu mikale mimeta, mienza ne mitshi ne nsona. Pashishe yeye kufika mu bikulu bia mabue bia tshimenga tshinene, tshidibu babikila lelu ne: Zimbabwe Munene.

Bikulu ebi bidi dia ku sud kua muaba udibu babikila lelu ne: Masvingo. Bimue bimanu bidi bule bua metre mapite pa 9, bienza ne mabue makole matentekaja kakuyi bitotshi. Munda mua bikulu ebi mudi tshibumba tshidi tshikemesha tshia tshijengu tshikale bule bua metre matue ku 11 kubangila kuinshi ne nyunguluilu wa metre 6. Muntu nansha umue ki mmumanye tshivuabu bibakile tshibumba etshi to. Bikulu ebi mbia mu siekele wa muanda mukulu  kunyima kua Yezu, kadi kudi malu adi ajadika ne: bantu bavua basombele muaba eu bidimu nkama mivule kumpala.

Mu 1980 ditunga edi divua dimanyike dîba adi ku dîna dia Rhodesie diakumbuka ku bupika bua bena Grande-Bretagne ne kuluadi Zimbabwe. Mudi bisa binene bibidi: tshia bena Shona (bobu ke badi ba bungi mu ditunga) ne tshia bena Ndebele. Bantu ba mu ditunga edi mbakididianganyi, anu mukadi Bantemu ba Yehowa bamone patubu bayisha ku nzubu ne ku nzubu. Imue misangu patu muenyi ukokola ku tshibi, kabayi nansha banji kumumanya, batu bamuambila diakamue bua “abuele” ne “asombe.” Bena mu Zimbabwe ba bungi batu banemeka Mukanda wa Nzambi bikole ne patubu babalongesha malu adimu, batu misangu mivule benza bua bana babu bikale basombe bateleja.

Badi babayisha mukenji udi ukolesha ne usamba

“SIDA” ne “minanga” ke miaku itubu batela pa tshibidilu ku tudiomba ne mu bikandakanda patubu bakula bua Zimbabwe. Ditangalaka dia disama dia SIDA ndikebeshe lutatu mu bantu ne mu malu a mfranga mu matunga a mu Afrike wa kuinshi kua tshipela tshia Sahara. Mu matunga aa, masama adi bantu babuelela mu mpitadi atu misangu mivule mekebesha kudi SIDA. Disama edi ndibutuishe mêku a bungi.

Bua kuambuluisha bantu mu Zimbabwe, Bantemu ba Yehowa mbadifile mu dimanyisha ne: nsombelu mutambe buimpe ngua dilonda mikenji ya Nzambi idi mu Bible. Tshilejilu, Dîyi dia Nzambi didi dilongesha ne: disanka dia kusangila kua mulume ne mukaji Nzambi mmudipeshe anu bantu badi baselangane, nanku disangila dia balume ne balume ne bakaji ne bakaji ki ndianyishibue kudi Nzambi to, udi ukandika kabidi diedibua mashi ne dinua dia bintu bidi bikuata. (Bienzedi 15:28, 29; Lomo 1:24-27; 1 Kolinto 7:2-5; 2 Kolinto 7:1) Bantemu mbatangalaje kabidi mukenji udi ufila ditekemena dilelela, baleja ne: mu matuku makese kumpala eku, Bukalenge bua Nzambi nebumushe masama onso.​—Yeshaya 33:24.

Badi bambuluisha bantu ne bintu

Minanga mmikengeshe bena mu Zimbabwe bikole bidimu dikumi bidi bishale ebi. Nyama ya muitu mmifue bua nyota. Ngombe mmifue binunu nkama ne nkama. Kapia nkoshe metu a mitshi hektare ne hektare. Bana ba bungi ne bakulakaje mbafue bua didia dibi. Nansha mâyi a mu Musulu munene wa Zambèze akapueka bikole kakutshiyi mushindu wa kuendesha biamu bidi bipatula nzembu.

Pakamona Bantemu ba Yehowa lutatu lukole lua mushindu eu, bakenza tusumbu muanda mukulu tua bafidi ba diambuluisha mu bitupa bishilangane bia ditunga edi. Batangidi bena ngendu bavua benda bakumbula bisumbu bua kumanya bintu bivua nabi bana betu dijinga. Pavuabu bamanya majinga aa bavua baamanyisha kasumbu kakanyine ka bafidi ba diambuluisha. Mutangidi muena ngendu mukuabu wakafunda ne: “Mu bidimu bitanu bishale ebi, tudi babanye matala tone mipite pa tshinunu, mishipa miume tone dikumi ne nkunde tone dikumi kabidi. Bana betu bakenza tone ibidi ya mufushwa [bisekiseki biumisha]. Tuakabanya kabidi bilamba bia bungi me mfranga ivua ikengedibua.” Munga mutangidi muena ngendu wakamba pende ne: “Pandi ngela meji bua mushindu utudi bakenge bua kupeta mikanda ya dianyisha idibu balomba mu Zimbabwe ne mu Afrique du Sud bua kubuela ne bintu ebi bidi bantu bindile bikole ne bua dikepa dia kasolonyi kadi kakengedibua bua kubiambuisha, ndi mmona anu ne: patudi bakokeshe bua kubibueja mu ditunga bidi bileja mudi mêyi a Yezu aa malelela: Tatu wetu wa mu diulu mmumanye  ne: tudi dijinga ne bintu ebi bionso.”​—Matayo 6:32.

Ntshinyi tshidi batangidi bena ngendu benza padibu baya miaba idi minanga? Bamue batu bambula biakudia buabu bobu ne bua bena mu mêku mudibu baya kutudila. Umue wa kudibu wakamba ne: dimue dituku bamue bana betu ba bakaji bavua badiebeja ni bavua ne bua kuimanyika buambi bua dituku adi bua kudianjila kuya kuela mulongo bua kupeta bintu bivua mbulamatadi ulua kuabanya. Bakangata dipangadika dia kueyemena Yehowa ne kutungunuka ne buambi ne kushala bindile bua kumona muvua malu mua kuya. Kadi dituku adi mbulamatadi kakabanya kantu nansha kamue to.

Dituku diakalonda kuvua tshisangilu tshia bena Kristo, ne bana betu ba bakaji aba bavua kabidi ne bua kuangata dipangadika. Ntshinyi tshivuabu mua kuenza: kubuela mu tshisangilu atshi anyi kuya kuindila difika dia bintu bia diambuluisha? Bakateka malu a mushinga pa muaba wa kumpala ne kubuelabu mu tshisangilu ku Nzubu wa Bukalenge. (Matayo 6:33) Pakavuabu bimba musambu wa ndekelu, bakumvua muadi wa mashinyi enda alua. Bintu bia diambuluisha biakafika anu muaba au, ku diambuluisha dia bana babu ba mu nyuma bavua mu kasumbu ka bafidi ba diambuluisha! Disanka ne dianyisha dia Bantemu ba lulamatu bavua mu tshisangilu atshi kabivua kuamba.

Dinanga didi dikolesha

Malu mimpe menzela bantu badi kabayi mu tshisumbu tshia bena Kristo mmafile mushindu wa kubayisha bimpe. Mutangidi muena ngendu mukuabu wa mu tshitupa tshia Masvingo pamue ne Bantemu ba tshitupa atshi, bavua bayisha. Kumonaye nsongakaji mukuabu mulale ku mpenga kua njila. Bantemu aba bakamona ne: uvua usama bikole, bualu kavua wakula bimpe to ne dîyi diende divua dizakala. Dîna dia nsongakaji au divua Hamunyari, mu muakulu wa bena Shona didi diumvuija ne: “Kuenaku ne bundu anyi?” Bana betu bakumvua ne: bena tshitendelelu tshiabu bavua bamushiye pavuabu baya mu masangisha a ku mikuna. Bantemu bakambuluisha nsongakaji eu, kuyabu nende mu musoko uvua pabuipi apu.

Mu musoko au, bamue bantu bavua bamanye Hamunyari, ke bobu kumanyisha balela bende bua kulua kumuangata. Bena musoko au bakamba bua Bantemu ne: “Etshi ke tshitendelelu tshilelela. Edi ke dinanga didi bena Kristo ne bua kuikala nadi.” (Yone 13:35) Kumpala kua kumbuka, bana betu aba bakapesha Hamunyari kabeji kadi kamba ne: Aimeriez-vous en savoir plus sur la Bible? *

Lumingu luakalonda, mutangidi muena ngendu eu wakaya mu tshisumbu tshia muaba uvua Hamunyari musombele. Uvua musue kumanya bikala Hamunyari uvua mufike bimpe ku nzubu. Dîku dijima diakasanka bikole pakamumonabu yeye ne bana betu bakuabu ba tshitupa atshi. Baledi ba Hamunyari bakamba ne: “Nuenu nudi mu tshitendelelu tshilelela. Nudi bapandishe muanetu wa bakaji eu uvuabu bashiye bu mufue mu njila.” Baledi aba bakavua bakonke bena mu tshitendelelu tshia ba Hamunyari ne: “Nuenu kanuvuaku ne bundu bua kumushiya ufua nkayende mu njila anyi?” Bantemu bakatuadija kuyikila malu a mu Bible ne dîku dia ba Hamunyari ne bakabashila mikanda yabu, ne bena mu dîku edi kulombabu bana betu aba bua bapingane bua kubalongesha. Bamue bena mu dîku edi bavua babenga Bantemu kumpala bakashintulula meji. Tshilejilu, bukonde bua Hamunyari, uvua mpasata wa mu tshitanda tshia mu musoko au. Wakitaba bua kulonga Bible.

Badi bibaka nzubu ya ntendelelu

Munga mufundi wa Misambu ya mu Bible wakamba kukadi bidimu bivule ne: ‘Nzambi,  muoyo wanyi udi ne nyota bualu buebe mu buloba bume ne budi bukama, budi kabuyi mâyi.’ (Musambu 63:1) Mêyi aa mmakumbanyine bantu ba bungi ba mu Zimbabwe! Ku mubidi badi batantamena minanga, kadi mu nyuma badi ne nyota ya bualu bua Nzambi ne ya buimpe buende. Udi mua kumuena bualu ebu ku bipeta bia mudimu wa diyisha wa Bantemu ba Yehowa. Pakapeta Zimbabwe dipanda mu 1980, kuvua Bantemu batue ku 10 000 mu bisumbu 476. Mpindieu kunyima kua bidimu bitue ku 27, bungi bua Bantemu ba tshisumi mbuvule misangu isatu ne bungi bua bisumbu mbuvule misangu mitue ku ibidi.

Ku bisumbu bionso ebi anu bikese ke bivua ne miaba ya ntendelelu. Mu Tshiongo 2001, anu bisumbu 98 pa bisumbu bipite pa 800 bia mu Zimbabwe ke bivua ne nzubu wa ntendelelu anyi Nzubu wa Bukalenge wa kudisangishila. Bisumbu bia bungi bivua bienzela bisangilu muinshi mua mitshi anyi mu bitanda bia mitshi bishinguila ne buloba ne misaka ya nsona.

Mapa a kalolo ne mudimu wa bana babu badisuile ba pa buloba bujima mbiambuluishe Bantemu ba mu Zimbabwe bua kutuadija mudimu udi wambuluisha bisumbu bivule bua kupeta Nzubu ya Bukalenge miakanyine. Bantemu ba bungi ba mu matunga makuabu badi bamanye midimu ya luibaku bakaya mu Zimbabwe bua kuenza mudimu pamue ne badisuile ba mu ditunga edi. Umue wa ku Bantemu ba mu Zimbabwe wakafunda ne: “Tudi tunusakidila ne muoyo mujima nuenu bana betu bonso ba balume ne ba bakaji ba mu matunga mapite bungi badi balue mu Zimbabwe bua kutuibakila Nzubu ya Bukalenge. Ne tudi tunuela nuenu bakuabu bonso tuasakidila bua mapa anudi bafile bua kuibakisha Nzubu ya Bukalenge.”

Ku Est kua ditunga edi, bana betu bavua benze bidimu 50 badisangishila muinshi mua mutshi munene wa baobab. Pakambilabu bakulu ne: bavua ne bua kubibakila nzubu muena dîna wa ntendelelu, umue wa kudibu wakadila muadi. Mu tshimue tshisumbu tshia pabuipi apu, mukulu mukuabu mukulakaje wa bidimu 91 wakamba ne: “Ndi mudidile Yehowa mutantshi mule bua muanda wa buena eu wenzeke!”

Bantu mbambe malu a bungi bua mushindu udibu bibaka nzubu milenga eyi ne lukasa. Muntu mukuabu wakamba ne: “Nuenu nudi nuibaka mu munya, Nzambi pende wibaka butuku!” Buobumue ne disanka dia benji ba mudimu bidi bimueneka kabidi. Lelu bakadi bajikije Nzubu ya Bukalenge mipiamipia mipite pa 350 mu ditunga edi dijima. Ebi mbiambuluishe bisumbu 534 bua kudisangisha mu Nzubu ya Bukalenge mibaka bimpe ne madioto mashile.

Luibaku lua mushinga lua mu nyuma lutshidi luenzeka mu Zimbabwe. Patudi tuela meji bua malu akadi menzeke, tudi tupa Yehowa butumbi, bualu yeye ke mpokolo wa mabenesha onso aa. Bushuwa, ‘bikala Yehowa kayi wasa nzubu, badi bamuasa badi bakuata mudimu eu patupu.’​—Musambu 127:1.

[Mêyi adi kuinshi]

[Tuarte mu dibeji 9]

(Bua kumona malu bimpe, tangila mu mukanda)

ZIMBABWE

HARARE

Masvingo

Zimbabwe Munene

[Tshimfuanyi mu dibeji 9]

Tshibumba tshia tshijengu

[Tshimfuanyi mu dibeji 12]

Nzubu wa Bukalenge mupiamupia, Tshisumbu tshia Concession

[Tshimfuanyi mu dibeji 12]

Bena mu tshisumbu tshia Lyndale pambelu pa Nzubu wabu wa Bukalenge mupiamupia

[Mêyi a dianyisha bua bimfuanyi mu dibeji 9]

Bibundu bia bibandilu: © Chris van der Merwe/​AAI Fotostock/​age fotostock; tshibumba: © Ingrid van den Berg/​AAI Fotostock/​age fotostock