Yehovah Kotoigi e preiki na ini na „Oso fu Ston”

A nen fu na Afrikan kondre disi wani taki „Oso fu Ston”. Disi na wan kondre di furu sma sabi fu di yu abi den Victoriawatervallen drape, nanga difrenti sortu busimeti. Ma na ini a kondre disi yu abi den moro bigi owruten gebow di sma meki na a zuidsei fu a Sahara. Na a mindri pisi fu a kondre yu abi wan langa pisi hei gron fu graniet-ston. Fu di a weer no faya tumusi, meki bon nanga prani e gro bun drape. Disi na Zimbabwe, wan kondre pe sowan 12 milyun sma e libi.

FU SAN EDE a kondre disi nen „Oso fu Ston”? Na ini 1867, ontiman èn ondrosukuman Adam Renders, doro na wan kontren pe wan lo bigi ston gebow ben de, èn a kontren disi bigi sowan 720 hectare. A man disi ben e teki waka na ini den opo presi fu Afrika pe furu fu den oso ben meki fu tokotoko nanga udu-postu, èn den ben abi tasi-daki. Ne a doro na wan brokopresi di ben de wan bigi foto fosi, èn now den kari a presi disi Bigi Zimbabwe.

A brokopresi disi de krosibei fu a kontren di sma sabi leki Masvingo. Sonwan fu den skotu fu a brokopresi hei moro leki neigi meter, èn den meki fu graniet-ston di sma seti na tapu makandra sondro fu mesre den. Na ini a brokopresi yu abi wan toren di hei sowan 11 meter èn a bradi sowan siksi meter. Sma no sabi soifri fu san ede a toren disi meki. A brokopresi disi na fu a di fu aiti yarihondro G.T., ma sma feni  sani di e sori taki hondrohondro yari bifo sma ben e libi drape kaba.

Na ini 1980, a kondre disi di ben nen Rodesia, kisi srefidensi fu Ingrisikondre èn a kisi a nyun nen Zimbabwe. Den tu moro bigi lo na ini a kondre, na a Shona-lo, nanga a Ndebele-lo. Moro furu fu den sma di e libi na ini a kondre, na fu a Shona-lo. A pipel abi switifasi, èn Yehovah Kotoigi si dati furu leisi na ini na oso-fu-oso preikiwroko di den e du. Son leisi, a e pasa srefi taki fosi na ososma sabi suma e naki na a doro, a e opo a doro kaba èn wantewante a e aksi a sma fu kon na inisei èn fu kon sidon. Furu sma fu Zimbabwe abi bigi lespeki gi Bijbel èn nofo tron den de nomonomo taki den pikin fu den e sidon arki te den Kotoigi kon taki nanga den fu Bijbel.

Den e tyari wan moi boskopu di e trowstu sma

Te radio nanga telefisi e bari nyunsu fu Zimbabwe, dan nofo tron yu sa yere den wortu „AIDS” nanga „dreiten”. AIDS panya na ala sei, èn a sani disi tyari takru bakapisi kon gi den sma di e libi na ini den Afrikan kondre na zuidsei fu a Sahara, èn na ekonomia na ini den kondre dati go na baka tu. Furu tron te sma e go didon na ati-oso, dan dati na fu di den abi AIDS.

Fu di Yehovah Kotoigi wani yepi sma na ini Zimbabwe, meki den e preiki fayafaya taki a moro bun fasi fu libi, na fu libi akruderi den markitiki fu Gado di de fu feni na ini Bijbel. Fu eksempre, Gado Wortu e leri taki trowpatna wawan mag abi seks demakandra, èn taki Gado no feni homo-sekslibi bun. Boiti dati, a wet fu Yehovah e krutu sma di e teki brudu èn sma di e gebroiki drugs (Tori fu den Apostel 15:28, 29; Romesma 1:24-27; 1 Korentesma 7:2-5; 2 Korentesma 7:1). Den Kotoigi e preiki wan boskopu tu di e gi trutru howpu, èn a boskopu dati e sori krin taki heri esi Gado Kownukondre sa tyari wan kaba kon na ala siki.—Yesaya 33:24.

Den e yepi sma di de na nowtu

Na ini den lasti tin yari, dreiten tyari takru bakapisi kon gi sma na ini Zimbabwe. Busimeti dede fu di den ben de nanga angri èn fu di den ben kon swaki. Dusundusun meti di sma ben kweki, dede. Bigi pisi busi bron gowe. Furu pikin nanga owrusma dede fu di den no ben e nyan gosontu nyanyan. Srefi a watra fu a bun bigi Zambezi-liba kon saka so te taki pikinmoro a dam no man meki stroom.

Fu di so wan bigi rampu pasa na ini a kondre, meki Yehovah Kotoigi seti aiti komte fu yepi sma na difrenti pisi fu a kondre. Kring-opziener ben e fisiti den gemeente fu luku san den abi fanowdu trutru. Baka dati, den ben e meki wan fu den komte kon sabi dati. Wan kring-opziener ben skrifi: „Na ini den feifi yari di pasa, wi prati moro leki 1.000.000 kilo karu, 10.000 kilo drei fisi, èn 10.000 kilo drei bonki. Den Kresten brada nanga sisa fu wi, sreka sowan 2000 kilo mufushwa [gruntu di sma drei]. Boiti dati, wi prati bun furu krosi di sma gi, èn wi prati moni tu te dati ben de fanowdu.” Wan tra kring-opziener ben taki: „A ben muilek srefisrefi fu kisi den papira di wi ben abi fanowdu fu tyari den sani disi kon na ini Zimbabwe nanga Zuid-Afrika, èn a ben muilek tu fu feni oli fu rèi den sani tyari go gi den sma di ben abi den tranga fanowdu. Te mi e prakseri den problema dati èn a bun bakapisi di wi ben abi, dan mi e si dati leki wan moro krin buweisi taki Yesus ben abi leti di a gi wi a dyaranti taki wi hemel Tata sabi trutru taki wi abi ala den sani disi fanowdu.”—Mateyus 6:32.

 Fa den kring-opziener e du te den e dini na ini kontren pe a dreiten tyari bun furu problema kon? Sonwan fu den kring-opziener e tyari nyanyan gi densrefi èn gi den famiri pe den e go tan. Wan fu den kring-opziener ben fruteri taki wan tu Kresten sisa ben e taki nanga makandra fu kon sabi efu den ben musu tapu nanga a preikiwroko fu a dei dati, so taki den ben kan go tanapu na ini a rèi pe sma ben e wakti fu kisi yepi fu lanti. Den sisa disi bosroiti fu frutrow tapu Yehovah. Den tan poti prakseri na a preikiwroko èn den wakti fu si fa a problema disi ben o lusu. A dei dati, lanti no seni nowan yepi.

Sani ben seti fu hori wan Kresten konmakandra a dei baka dati, èn den sisa disi ben musu teki wan bosroiti baka. Den ben o go na a konmakandra, noso den ben o wakti fu kisi yepi fu lanti? Fu di den ben sabi san moro prenspari, meki den go na a konmakandra na ini a Kownukondre zaal (Mateyus 6:33). Di den ben e singi a lasti singi, dan den yere fa wan bigi truck ben e kon. A yepi di den Kotoigi ben abi fanowdu ben doro leti drape na a zaal, fu di den tra Kresten brada fu a komte ben sorgu gi dati! A ben moi fu si fa den getrow Kotoigi di ben de na a konmakandra ben breiti srefisrefi, èn fa den ben de nanga tangi.

Lobi e gi deki-ati

Fu di den brada nanga sisa sori switifasi gi sma di no de memre fu a Kresten gemeente, meki den kisi na okasi fu gi wan moi kotoigi. Wan kring-opziener di ben de na ini a kontren fu Masvingo, ben de na ini a preikiwroko makandra nanga wan tu tra Kotoigi fu a kontren dati. Ne a si wan meisje e didon na sei pasi. Den Kotoigi kon si taki a meisje ben e siki srefisrefi, fu di a no ben man taki bun èn en sten ben e beifi. A meisje nen Hamunyari, èn na ini a Shonatongo disi wani taki „Yu no e syen?” Den brada kon sabi taki den sma fu a kerki fu a meisje ben libi en drape di den ben e go na wan kerki seremonia na ini a kontren pe den bergi de. Den Kotoigi yepi a meisje na wan lobi-ati fasi, èn den tyari en go na wan dorpu di de krosibei.

Na ini a dorpu dati, wan tu sma ben sabi Hamunyari, èn fu dati ede den aksi den famiri fu en fu kon teki en. Disi na san den sma fu a dorpu ben taki fu den Kotoigi: „Disi na a tru bribi. Disi na a lobi di Kresten musu abi” (Yohanes 13:35). Fosi den brada gowe, den gi Hamunyari a traktaat Yu Ben Sa Wani Sabi Moro fu Bijbel? *

A wiki baka dati, a kring-opziener fisiti a gemeente na ini a kontren pe Hamunyari e libi. A ben wani sabi efu a meisje ben doro bun na oso. A heri famiri ben breiti srefisrefi fu si en nanga den brada fu a kontren. Hamunyari en papa nanga mama taki: „Unu abi a tru anbegi. Un kibri a libi fu na umapikin fu wi di sma ben libi fu dede na sei pasi.” Den ben aksi den sma fu a kerki fu en: „Un no ben e syen fu libi a meisje fu dede na sei pasi?” Den Kotoigi bigin taki fu Bijbel nanga a famiri fu Hamunyari, èn den libi Bijbel publikâsi gi den. A famiri aksi den brada fu kon baka fu studeri Bijbel nanga den. Fosi, wan tu fu den famiriman fu Hamunyari ben e gens Kotoigi, ma now den kon kisi wan heri tra denki. Wán fu den, namku a swagri fu Hamunyari, ben de fesiman fu wan kerki na ini a kontren drape. A bigin studeri Bijbel.

Den e bow Kownukondre zaal

Wan puwema skrifiman fu fositen ben skrifi nanga yepi fu santa yeye: „O Gado, . . . misrefi  e angri fu feni yu. . . . Na ini wan drei kondre pe watra no de” (Psalm 63:1). Na so a de nanga furu sma na ini Zimbabwe! Den sma dati man horidoro na ini a dreiten, ma na yeye fasi den de leki sma di abi dreiwatra fu di den wani kon sabi Gado èn fu di den wani taki Gado sori bunfasi gi den. Yu kan si disi te yu e luku fa a Kresten diniwroko fu Yehovah Kotoigi e waka so bun. Di Zimbabwe kisi srefidensi na ini 1980, dan sowan 10.000 Kotoigi ben e dini na ini 476 gemeente. Now, sowan 27 yari baka dati, dan dri tron so furu Kotoigi de èn pikinmoro tu tron so furu gemeente.

Wan tu fu den gemeente disi nomo ben abi den eigi konmakandra presi. Na ini yanuari 2001, a ben de so taki fu den moro leki 800 gemeente na ini Zimbabwe, soso 98 fu den ben abi wan Kownukondre zaal pe den ben kan kon makandra. Furu fu den gemeente disi ben e hori den konmakandra na ondro bon, noso na ini kampu di ben meki fu postu nanga tokotoko, èn di ben abi tasi-daki.

Fu di den Kresten brada nanga sisa na heri grontapu ben gi furu moni èn ben wroko fayafaya, meki den Kotoigi na ini Zimbabwe bigin nanga wan programa di e sorgu taki moro gemeente man kisi wan bun Kownukondre zaal di no abi tumusi furu pranpran. Furu Kotoigi fu tra kondre, di man du bow-wroko, seti sani so taki den ben kan go na Zimbabwe fu wroko makandra nanga Kotoigi fu a kondre dati. Wan fu den Kotoigi fu Zimbabwe ben skrifi: „Wi e taki ala den brada nanga sisa tangi di ben komoto fu someni kondre fu kon yepi wi bow moi Kownukondre zaal. Èn wi e taki un alamala tangi gi a moni di unu gi a Kownukondre zaal fonsu, di e meki taki wi man du a wroko disi.”

Na a owstusei fu a kondre, yu abi wan bigi boabab-bon, èn 50 yari langa den Kotoigi ben e hori konmakandra na ondro a bon disi. Di den Kresten owruman kon sabi taki wan trutru konmakandra presi ben o bow, dan wán fu den krei. Wan owruman fu 91 yari di de fu wan gemeente krosibei, ben taki: „Mi begi Yehovah bun langa fu meki a sani disi pasa!”

Furu sma e taki fa den brada e bow den moi zaal disi so esi. Wan sma di ben e luku fa den ben e wroko, ben taki: „Unu e bow na dei ten, ma a musu de so taki Gado e bow na neti!” Sma e taki tu fa den brada e bow na ini wánfasi èn fa den e du dati nanga prisiri. Tide na a dei, den brada bow moro leki 350 nyun Kownukondre zaal na ini a heri kondre. Na so den 534 gemeente kan kon makandra na ini bun Kownukondre zaal di meki fu ston.

Den Kotoigi e tan tranga a bribi fu sma na ini Zimbabwe. Te wi luku ala sani di den du drape, dan wi musu gi grani na Yehovah, a Sma di e meki den bun sani disi pasa. Iya, „efu Yehovah srefi no bow na oso, dan na fu soso den wrokoman wroko tranga na en”.—Psalm 127:1.

[Futuwortu]

[Den karta na tapu bladzijde 9]

(Efu yu wani si pe den sani disi skrifi, luku a tijdschrift)

ZIMBABWE

HARARE

Masvingo

Bigi Zimbabwe

[Prenki na tapu bladzijde 9]

A toren

[Prenki na tapu bladzijde 12]

A nyun Kownukondre zaal fu Gemeente Concession

[Prenki na tapu bladzijde 12]

Sma fu a Gemeente Lyndale e tanapu na dorosei fu a nyun Kownukondre zaal fu den

[Sma di abi a reti fu den prenki na tapu bladzijde 9]

Ruins with steps: © Chris van der Merwe/AAI Fotostock/age fotostock; tower inset: © Ingrid van den Berg/AAI Fotostock/age fotostock