Espirituwal nga Buruhaton ha “Balay nga Bato”

An ngaran hini nga nasud ha Aprika nangangahulogan hin “Balay nga Bato.” Kilala ito nga nasud tungod han Victoria Falls ngan han magkalain-lain nga ihalas nga linarang. Kondi, may-ada ito han gidadakui nga hinimo han mga tawo nga mga istraktura ha sur han Sahara. Ha butnga hito may-ada granito nga bungtod nga patag an igbaw. Tungod han maopay nga klima dida hito, an mga tanom matambok ngan marabong. Ini nga nasud amo an Zimbabwe, nga inuukyan hin mga 12 ka milyon nga tawo.

KAY ano nga ginngaranan ito hin Balay nga Bato? Han 1867 nakita han parapanganop ngan eksplorador nga hi Adam Renders an daku hinduro nga bato nga 720 ektarya an kahilapad. Nagbiniyahe na hiya ha banwaon nga kapatagan han Aprika, diin kadam-an han balay hinimo tikang ha lapok, poste, ngan kogon. Katapos dinangat hiya ha kagubaan nga bato han usa nga haluag nga syudad, nga tinatawag yana nga Great Zimbabwe.

Ini nga kagubaan nahimumutang ha sur nga bahin han lugar nga tinatawag yana nga Masvingo. An iba han mga pader sobra 30 piye an kahitaas—nakaasintar nga granito nga mga bato nga waray ipalitada. Ha sulod han mga kagubaan, may-ada naiiba nga porma-hin-apa nga torre nga mga 35 piye tikang ha pundasyon nga 20 piye an diyametro. Diri pa gihapon hinbabaroan an katuyoan hini. Gintukod ito han ikawalo ka siglo K.P. pa, kondi may-ada ebidensya nga may nakaukoy na hito nga lugar ginatos ka tuig na antes pa hito.

Han 1980 an nasud nga tinatawag hadto nga  Rhodesia nagin independente tikang ha Britanya ngan ginsaliwnan an ngaran hin Zimbabwe. An mga umurukoy hito nag-uupod hin duha nga dagku nga etniko nga grupo—an Shona, nga nagkukompwesto han mas daku nga bahin han populasyon, ngan an Ndebele. Maabiabihon an mga tawo, sugad han agsob maobserbahan han mga Saksi ni Jehova ha ira pagsangyaw. Usahay bisan ha tuktok la ha purtahan ngan antes pa makilala kon hin-o an bisita, hibabatian na an “Kadi, uswag” ngan “Alayon lingkod.” Tinatahod gud han kadam-an nga taga-Zimbabwe an Biblia ngan kasagaran nga gin-oobligar nga lumingkod ngan mamati an ira mga anak durante han pag-uroistorya mahitungod ha Kasuratan.

Pagsumat hin Makaparig-on nga Mensahe han Pagliaw

An “AIDS” ngan “huraw” mga pulong nga agsob gamiton han media kon ginhihisgotan an Zimbabwe. An pagsarang han AIDS nagkaada daku hinduro nga epekto ha mga umurukoy ngan ha ekonomiya han mga lugar ha Sahara nga Aprika. Dinhi, agsob nga may kalabotan ha HIV an sakit han mga nahohospital. Nakadaot ito han damu nga pamilya.

Basi mabuligan an mga tawo ha Zimbabwe, sagipo an mga Saksi ni Jehova ha pagpasamwak nga an gimaopayi nga pagkinabuhi amo an may giya han suruklan han Dios nga aada ha Biblia. Pananglitan, nagtututdo an Pulong han Dios nga an Iya regalo nga pakighilawas sadang buhaton han mag-asawa la, nga an homoseksuwalidad kinangangalasan han Dios, ngan an pag-abuno han dugo ngan paggamit han nakakagiyan nga mga droga igindidiri han balaud ni Jehova. (Buhat 15:28, 29; Roma 1:24-27; 1 Korinto 7:2-5; 2 Korinto 7:1) Iginpapasamwak liwat han mga Saksi an mensahe han paglaom nga may marig-on nga basihan, nga nagpapabug-at nga ha hirani nga tidaraon, pagwawad-on na han Ginhadian han Dios an ngatanan nga sakit.—Isaias 33:24.

Paghatag hin Bulig

Nakadaot gud an huraw ha Zimbabwe ha naglabay nga dekada. Nagkadidismayo an mga ihalas nga hayop tungod ha gutom ngan kaubusi hin tubig ha lawas. Ginatos ka yukot nga baka an nagkamatay. Damu ka ektarya nga kagurangan an nasunog. Damu nga kabataan ngan kalagasan an nagkamatay tungod han malnutrisyon. Bisan an tubig han daku hinduro nga Salog Zambezi naghamabaw nga posible makaapekto han pag-andar han mga planta han elektrisidad.

Tungod hito, nag-organisa an mga Saksi ni Jehova hin walo nga komite ha pagbulig ha magkalain-lain nga bahin han nasud. Ginbisita han nagbibiyahe nga mga paramangno an mga kongregasyon basi hibaroan an aktuwal nga mga ginkikinahanglan. Ini nga impormasyon iginrireport ha angayan nga komite. Usa nga nagbibiyahe nga paramangno nagsiring: “Ha naglabay nga lima ka tuig, nanhatag kami hin sobra usa ka yukot ka tonilada nga mais, napulo ka tonilada nga bulad, ngan pariho kadamu nga pula nga ginbulad nga balatong. Naghimo an aton kabugtoan hin duha ka tonilada nga mufushwa [gin-uga nga utanon]. Nanhatag liwat kami hin damu hinduro nga igindonar nga bado sugad man han ginkikinahanglan nga kwarta.” Usa pa nga nagbibiyahe nga paramangno an nakaobserba: “Kon akon ginhuhunahuna an kakurian nga amon naeksperyensyahan ha pagkuha hin permiso nga gin-aaro han Zimbabwe ngan Aprika del Sur basi maisulod ini nga suplay ngan an nagpapadayon nga kakulangan hin krudo nga ginkikinahanglan ha pagdara hinin importante hinduro nga suplay, an masisiring ko la nga an aton kalamposan dugang nga ebidensya han pasarig ni Jesus nga maaram an aton langitnon nga Amay nga kinahanglan naton ini nga mga butang.”—Mateo 6:32.

 Paonan-o nakakalampos an mga nagbibiyahe nga paramangno kon nag-aalagad hira ha mga lugar nga may huraw? An iba nagdadara hin pagkaon para ha ira ngan ha mga pamilya nga ira uukyan. Usa ha ira an nagreport nga an pipira nga kabugtoan nga kababayin-an nagpinakiana kon diri la anay hira masangyaw hito nga adlaw basi hira makapila para han ayuda han gobyerno. Nagdesisyon hira nga sumarig kan Jehova pinaagi ha pagsentro han ira hunahuna ha pagsangyaw ngan paghulat kon paonan-o masusulbad an mga problema. Waray ayuda han gobyerno nga inabot hito nga adlaw.

Usa nga Kristiano nga katirok an nakaeskedyol kinabuwasan, ngan kinahanglan na liwat magdesisyon ini nga kabugtoan nga kababayin-an. Matambong ba hira ha katirok, o maghuhulat han pag-abot han ayuda? Tinambong hira ha katirok ha Kingdom Hall, tungod kay ginhunahuna nira an angay unahon. (Mateo 6:33) Samtang nagkakanta hira han kataposan nga kanta, nakabati hira hin tiabot nga trak. Inabot an suplay didto mismo, ngan an nagdara an ira kabugtoan nga kaapi han komite han pagbulig. Daku hinduro an kalipay ngan pagpasalamat han magtinumanon nga Saksi nga tinambong hito nga katirok.

An Gugma Nagdadasig

An pagkabuotan han mga membro han Kristiano nga kongregasyon ha iba nag-abri han mga higayon ha pagsangyaw. Samtang nagsasangyaw an usa nga nagbibiyahe nga paramangno ha Masvingo upod an pipira nga Saksi hito nga lugar, nakakita hiya hin babayihay ha ligid han dalan. Naobserbahan han mga Saksi nga masakit hinduro hiya, ngan diri hiya nakakayakan hin maopay ngan nagkukurog an iya tingog. Hamunyari an ngaran han bata, ngan ha Shona nga pinulongan nangangahulogan ito hin “Diri Ka ba Naaawod?” Nahibaro an kabugtoan nga ginbayaan hiya han iya mga karelihiyon nga tikadto ha kabukiran tungod hin relihiyoso nga buruhaton. Mahigugmaon nga ginbuligan han mga Saksi an bata, gindara hiya ha hirani nga barangay.

Dida hito nga barangay, an iba nakilala kan Hamunyari, salit ginhangyo nira an iya mga paryente nga panginanoon hiya. May kalabotan ha mga Saksi, an mga tawo didto nagsiring: “Ini an totoo nga relihiyon. Ini an gugma nga sadang ipakita han mga Kristiano.” (Juan 13:35) Antes lumakat, gintagan han kabugtoan hi Hamunyari han tract nga Karuyag Mo ba Mahibaro hin Dugang Pa Mahitungod han Biblia? *

Han sunod nga semana binisita an nagbibiyahe nga paramangno ha kongregasyon diin naukoy hi Hamunyari. Karuyag niya hibaroan kon talwas nga nakauli hiya. Nalipay hinduro an bug-os nga pamilya han bata ngan an kabugtoan hito nga lugar nga makita hiya. An iya kag-anak nagsiring: “Kamo an nagbubuhat han totoo nga relihiyon. Ginluwas niyo an amon anak, nga ginbayaan basi mamatay ha kalsada.” Ira ginpakianhan an iya mga karelihiyon: “Waray ba kamo kaawod, sugad han iginpapasabot han ngaran nga Hamunyari, nga bayaan hiya nga tipatay?” An mga Saksi nakiistorya ha pamilya may kalabotan ha Biblia ngan nagbilin hin mga literatura ha ira, ngan gin-imbitar nira an kabugtoan nga bumalik ngan dumarahan hira hin pag-aram ha Biblia. Nagbag-o an panhunahuna han pipira nga membro han pamilya nga nakontra ha mga Saksi. Usa ha ira—an bayaw ni Hamunyari—lider han usa nga relihiyon hito nga lugar. Kinarawat hiya hin pag-aram ha Biblia.

Pagtukod hin mga Katirokan ha Pagsingba

Usa nga giniyahan nga parasiday hadto an nagsurat: “O Dios, . . . an akon kalag inuuhaw ha imo. . . . Ha tuna nga mamara ngan inuuhaw, nga waray gud tubig.” (Salmo 63:1) Totoo gud  ini ha damu nga tawo ha Zimbabwe! Ha pisikal naiilob nira an huraw, kondi ha espirituwal sugad hin nauuhaw hira ha Dios ngan ha iya pagkamaopay. Makikita mo ini ha mga resulta han Kristiano nga ministeryo han mga Saksi ni Jehova. Han nagin independente an Zimbabwe han 1980, mga 10,000 nga Saksi an nag-alagad ha 476 nga kongregasyon. Yana, paglabay hin 27 ka tuig, nagtriple an kadamu han aktibo nga Saksi ngan haros nadoble an kadamu han kongregasyon.

Gutiay la hini nga kongregasyon an may-ada kalugaringon nga katirokan ha pagsingba. Han Enero 2001, 98 la han sobra 800 nga kongregasyon ha Zimbabwe an may-ada Kingdom Hall. Damu han kongregasyon an nagkakatirok ha ilarom han mga puno o ha mga payag nga hinimo ha kahoy, nga an bungbong pinalitadahan hin lapok ngan banwa an atop.

Sugad nga resulta han hura nga donasyon ngan maduruto nga pagboluntaryo han ira Kristiano nga kabugtoan tikang ha magkalain-lain nga bahin han kalibotan, gintikangan han mga Saksi ha Zimbabwe an programa nga nakabulig ha damu pa nga kongregasyon nga magkaada simple kondi may dignidad nga mga Kingdom Hall. Nag-organisa an damu nga langyawanon nga Saksi nga may kahibaro ha konstruksyon ha pagkadto ha Zimbabwe ngan pagtrabaho didto upod han lokal nga mga boluntaryo. Usa han mga Saksi didto an nagsurat: “Sinsero nga ginpapasalamatan namon an ngatanan nga kabugtoan tikang ha damu hinduro nga nasud nga kinanhi ha Zimbabwe basi bumulig ha pagtukod hin mag-opay nga Kingdom Hall. Ngan ginpapasalamatan namon kamo ngatanan tungod han iyo mga donasyon ha Kingdom Hall Fund nga nakabulig nga magin posible ini.”

Ha este nga bahin han nasud, an kabugtoan nagkakatirok ha landong han daku nga baobab nga kahoy ha sulod hin 50 ka tuig. Han ginsumatan an mga tigurang nga magtutukod hin tinuod nga katirokan ha pagsingba, may nakatangis ha ira. Ha kahirani nga kongregasyon, usa nga 91-anyos nga tigurang an nagsiring: “Maiha na gud an akon pagpinangaraba kan Jehova nga mahitabo ini!”

Damu an nagkomento mahitungod han kalaksi han pagtukod hinin mag-opay nga katirokan. Usa nga nakaobserba an nagsiring: “Nagtatrabaho kamo ha adlaw, kondi sigurado nga an Dios nagtatrabaho ha gab-i!” Nakita liwat an pagkaurosa ngan kalipay han mga nagtatrabaho. Yana, sobra 350 nga bag-o nga Kingdom Hall an natapos ha bug-os nga nasud. Tungod hini, nagin posible ha 534 nga kongregasyon an pagkatirok ha mga Kingdom Hall nga hinimo tikang ha adobe.

An importante nga espirituwal nga buruhaton nagpapadayon ha Zimbabwe. Samtang aton ginpapamalandong an mga nahimo na, napapagios kita ha pagdayaw kan Jehova, an surok han sugad nga mga bendisyon. Oo, ‘kon hi Jehova diri magtutukod han balay, kawang la an pagbuhat han mga magtirindog hito.’—Salmo 127:1.

[Footnote]

[Mga Mapa ha pahina 9]

(Para ha aktuwal nga format, kitaa an publikasyon)

ZIMBABWE

HARARE

Masvingo

Great Zimbabwe

[Retrato ha pahina 9]

Naiiba nga torre

[Retrato ha pahina 12]

Bag-o nga Kingdom Hall, Kongregasyon han Concession

[Retrato ha pahina 12]

Mga kaapi han Kongregasyon han Lyndale ha gawas han ira bag-o nga Kingdom Hall

[Ginkuhaan han mga Retrato ha pahina 9]

Kagubaan nga may hagdan: ©Chris van der Merwe/AAI Fotostock/age fotostock; torre: ©Ingrid van den Berg/AAI Fotostock/age fotostock