Ke ka Baka La’ng o Swanetše go Phema go Feteletša Dilo?

JEHOFA ke mohlala wa teka-tekano. “Ké . . . yo tirô-phethexi,” gomme toka ya gagwe ga se e šoro le ka mohla, ka ge ka mehla e e-na le kgaugelo. (Doiteronomio 32:4) Lerato la gagwe le na le melao ya motheo, ka gobane o dira dilo ka go dumelelana le melao e phethagetšego. (Psalme 89:14; 103:13, 14) Batswadi ba rena ba pele ba be ba bopilwe ba e-na le teka-tekano ka ditsela tšohle. Ba be ba se na tshekamelo ya go feteletša selo le ge e le sefe. Lega go le bjalo, go tsena ga sebe go ile gwa tliša ‘bofokodi’—go se phethagale—bjo bo feleleditšego ka go lahlegelwa ke teka-tekano.—Doiteronomio 32:5, NW.

Ka mohlala: Na o kile wa namela koloi goba paesekela e nago le leotwana la go ba le nkokoma e kgolo? Ka ntle le pelaelo bogole bjoo bo dirile gore monamedi wa yona a se ke a iketla le go kwa a se a šireletšega. Leotwana le bjalo le swanetše go lokišwa pele nkokoma yeo e gola goba le e-tšwa moya. Ka mo go swanago, re dira diphošo gantši ka baka la dimelo tša rena tše sa phethagalago. Ge e ba re dumelela dilo tšeo di swanago le dinkokoma di gola, tsela ya rena ya bophelo e ka dira gore re se ke ra iketla, gaešita le go ba e kotsi.

Le dika tša rena tše dibotse e lego bokgoni bja rena, ka dinako tše dingwe di ka feteletšwa. Ka mohlala, gaešita le ge Molao wa Moše o be o nyaka gore Baisiraele ba dire merumo diaparong tša bona, Bafarisei ba mehleng ya Jesu, ka bomponeng, ‘ba ile ba lelefatša merumo ya diaparo tša bona’ ka mo go feteletšego. Maikemišetšo a bona e be e le gore ba bonagale e le ba bakgethwa go feta batho ba gabo bona.—Mateo 23:5; Numeri 15:38-40.

Lehono batho ba bangwe ba nyaka go goga tlhokomelo ya ba bangwe ka tsela le ge e le efe e kgonegago, gaešita le ka go makatša ba bangwe. Ge e le gabotse ba ka be ba lla ka gore: “Mponeng! Le nna ke motho!” Eupša go feteletša moaparong, boitshwarong le ditirong go ka se ke gwa kgotsofatša dinyakwa tša kgonthe tša Mokriste.

Boemo bjo bo Leka-lekanego bja Kgopolo ka Mošomo

Go sa šetšwe gore re bomang goba gore re dula kae, mošomo o agago ke selo seo se re thušago go phela bophelo bjo bo nago le morero. Re be re bopetšwe go kgotsofatšwa ke mošomo o bjalo. (Genesi 2:15) Ka baka leo, Beibele e lwa le bobodu. Moapostola Paulo o ile a bolela ka go lebanya gore: “Ge e ba motho a sa nyake go šoma le go ja a se ke a ja.” (2 Bathesalonika 3:10) Ee, go ba sebodu mošomong go ka se tliše feela bodiidi le go se kgotsofale eupša gape go tla tliša go se amogelwe ke Modimo.

Ba bantši ba feteletša dilo ka tsela e fapanego, ka go šoma ka tsela e feteletšego, e lego go ithapela go ba makgoba a mošomo wa bona. Ge ba tloga e sa le mesong kudu le go boa bošego, ba bolela gore mošomo wa bona o tla hola malapa a bona. Lega go le bjalo, malapa a bona a ka tlaišwa ke go ineelela mošomong mo go bjalo. Mosadi yo mongwe wa lapa yoo monna wa gagwe gantši a fetšago diiri tše di oketšegilego a le mošomong o  re: “Nka ananya dilo ka moka tše di lego ka mo ngwakong wo wa manobonobo e le gore ke hwetše sebaka sa go ba le monna wa-ka mo gotee le bana ba rena.” Bao ba kgethago go šoma ka mo go feteletšego ba swanetše go naganišiša ka mo go tseneletšego ka phihlelo ya Kgoši Salomo ge a be a re: “Xe ke xalalêla medirô ye e dirilwexo ke diatla tša-ka, le ’tapišô tša mola kè e dira, ke hwetša è le lefêla, è le xo phuthêla phefô ka kobô.”—Mmoledi 2:11.

Ee, ge e le mabapi le mošomo, re swanetše go phema go feteletša dilo ka ditsela tše tše pedi. Re ka šoma ka thata, le ge re gopola gore go ba lekgoba la mošomo go tla re amoga lethabo mohlomongwe go feta ka mo re naganago.—Mmoledi 4:5, 6.

Phema Dipono tše Feteletšego ka Boithabišo

Beibele e boletše e sa le pele ka mehla ya rena gore: “Batho e tla ba . . . ba ratago maipshino go e-na le go rata Modimo.” (2 Timotheo 3:2, 4) Go phegelela maipshino ke sedirišwa se se šomago kudu sa Sathane sa go goketša batho gore ba tlogele Modimo. Go lemalela boitapološo le boithabišo, bjalo ka dipapadi tše kotsi, go a ata. Dipapadi tše bjalo di a ata go no swana le ge go ata palo ya batho bao ba di bapalago. Ke ka baka la’ng di ratwa ke batho ka tsela ye? Batho ba bantši, ka go se kgotsofalele maphelo a bona a letšatši le letšatši, ba tsoma boithabišo bjo bo oketšegilego kudu. Eupša bakeng sa go hwetša boithabišo bjo bo bjalo go nyaka gore motho a ipee kotsing leboelela. Bakriste ba šetšago ba phema dipapadi tše kotsi ka gobane ba hlompha mpho ya bophelo le Monei wa bjona.—Psalme 36:9.

Ge Modimo a be a bopa batho ba babedi ba pele, o ile a ba bea kae? O ile a ba bea tšhemong ya Edene, yeo lelemeng la mathomo e bolelago “boipshino” goba “lethabo.” (Genesi 2:8) Go molaleng gore karolo ya morero wa Jehofa e be e le gore batho ba phele ba ipshina e bile ba thabile.

Jesu o re beetše mohlala o phethagetšego wa pono e leka-lekanego ka boipshino. O be a ineetše ka mo go feletšego go phethagatšeng thato ya Jehofa, e bile ga se a ka a kgaotša go phela ka melao ya Modimo le melao ya gagwe ya motheo. O ile a ipha nako ya go ba le bao ba nyakago thušo gaešita le ge a be a lapile. (Mateo 14:13, 14) Ee, Jesu o ile a ya moo ba bego ba mo laleditše dijong a ba a ipha le nako ya go khutša le go itapološa. Ke therešo gore o be a lemoga gore manaba a mangwe a be a mo swaya diphošo ka baka la dilo tše tšeo a bego a di dira. A ile a bolela ka yena a re: “Bonang! motho wa sejagobe le yo a lemaletšego beine.” (Luka 7:34; 10:38; 11:37) Eupša Jesu o be a sa dumele gore boineelo bja kgonthe ga bo akaretše boipshino ka moka bophelong.

Go molaleng gore re swanetše go phema go feteletša le ga e le gofe mabapi le boitapološo. Go dira gore boipshino le boithabišo di tle pele bophelong go ka se tsoge go tlišitše lethabo la kgonthe. Go ka feleletša ka go dira gore re hlokomologe dilo tše bohlokwa kudu, go akaretša le tswalano ya rena le Modimo. Lega go le bjalo, ga ra swanela go ikona boipshino ka moka goba go kwera ba bangwe bao ba thabelago bophelo ka tsela e leka-lekanego.—Mmoledi 2:24; 3:1-4.

Hwetša Lethabo ka go Phela ka Tsela e Leka-lekanego

Morutiwa Jakobo o ngwadile gore: “Ka moka ga rena re kgopša gantši.” (Jakobo 3:2) Re ka bona se gabotse ge re katanela go phema go feteletša dilo. Ke’ng seo se kago re thuša go dula re e-na le teka-tekano? Ge e le gabotse, re swanetše go tseba bokgoni bja rena le mafokodi a rena. Go ba le maikemišetšo a bjalo ga go bonolo. Re ka ba bao ba feteletšago dilo ka tsela e itšego re sa lemoge. Ka gona, re dira gabotse ge re dula re batamelane le Bakriste ba godilego ka tsebo le go theetša keletšo e leka-lekanego. (Bagalatia 6:1) Re ka kgopela keletšo e bjalo go mogwera yo a botegago goba mogolo yo a nago le phihlelo ka phuthegong. Keletšo e bjalo e theilwego Beibeleng, gotee le Mangwalo, e ka ba bjalo ka ‘seipone’ seo re kago itebelela go sona go bona kamoo Jehofa a re bonago ka gona.—Jakobo 1:22-25.

Seo se thabišago ke gore ga ra swanela go phela bophelo bjoo bo tletšego ka go feteletša dilo mo go sa phemegego. Ka go phegelela maitekong le ka tšhegofatšo ya Jehofa, re ka ba le teka-tekano gomme ka go rialo ra ba batho ba thabilego. Ditswalano tša rena le bana babo rena ba Bakriste le dikgaetšedi di ka kaonefala, gape re ka ba mehlala e mebotse ya bao re dirago boboledi go bona. Go feta tšohle, re tla latela kgaufsi kudu mohlala wa Modimo wa rena yo a nago le teka-tekano le lerato, Jehofa.—Baefeso 5:1.

[Mothopo wa Seswantšho go letlakala 28]

©Greg Epperson/age fotostock