Fu san ede wi musu sabi san fiti?

YEHOVAH na a moro bun eksempre fu wan sma di e tyari ensrefi na wan yoisti fasi. „Den sani di a e du bun dorodoro”, èn a no e krutu sani na wan ogri-ati fasi fu di a abi sari-ati ala ten (Deuteronomium 32:4). Ala ten a e sori lobi na wan yoisti fasi, fu di a e handri akruderi den wet fu en di bun dorodoro (Psalm 89:14; 103:13, 14). Di Gado ben meki a fosi papa nanga mama fu wi, dan den ben e du ala sani na wan yoisti fasi. Den no ben e prakseri fu du sani di no fiti. Ma fu di den sondu meki den kon abi wan „mankeri”, èn na so den no ben e du ala sani na wan yoisti fasi moro.—Deuteronomium 32:5.

Fu eksempre: Oiti yu rèi wan wagi noso wan baisigri di ben abi wan bigi kundu na wan fu den banti? A no de fu taki dati yu no ben man rèi bun, èn yu ben kan kisi wan mankeri srefi. Te so wan sani pasa nanga a banti fu yu, dan yu musu meki en fosi a kon moro ogri, noso fosi a boro. Na so a de tu taki wi kan kon kisi takru fasi fu di wi na sondusma. Efu wi e gi pasi taki den takru fasi dati di de leki „kundu” e kon moro ogri, dan wi kan kisi furu problema na ini a libi, èn ogri kan miti wi tu.

Son leisi a kan pasa srefi taki wi e sori den bun fasi fu wi na wan fasi di no fiti. Fu eksempre, a Wet di Gado ben gi Moses ben taki dati den Israelsma ben musu poti franya na den krosi fu den. Ma den Fariseiman di ben e libi na ini a ten fu Yesus ben wani sori taki den bun moro tra sma, èn fu dati ede den „meki den franya fu den krosi kon moro langa” leki san a wet ben taki. Den ben du dati fu di den ben wani sori taki den santa moro ala tra sma.—Mateyus 23:5; Numeri 15:38-40.

Na ini a ten disi son sma e du ala sortu sani fu hari a prakseri fu trawan, iya, den e du sani srefi di e meki sma skreki. Fu taki en leti a kan de so taki den e angri fu sma poti prakseri na den, iya, a de neleki den e bari: „Luku mi! Mi na wan libisma tu!” Ma te wan Kresten e weri krosi na wan fasi di no fiti, te a e denki èn e tyari ensrefi na wan fasi di no fiti, dan a no sa de koloku trutru.

Abi wan yoisti denki fu a wroko di yu e du

Awansi suma na wi èn awansi pe wi e libi, te wi e du bun wroko, dan dati e gi wi wan moro bun marki na ini a libi. Gado meki wi fu kisi prisiri fu den sortu wroko dati (Genesis 2:15). Fu dati ede, Bijbel e sori taki a no bun te wan sma lesi. Na apostel Paulus ben taki krin: „Efu wan sma no wani wroko, dan a no musu nyan tu” (2 Tesalonikasma 3:10). Iya, wan sma di lesi fu wroko sa pina, a no sa de koloku, èn Gado no sa feni en bun tu.

Ma heri tra fasi leki den lesi sma dati, yu abi sma tu di abi wrokobakru, iya, den sma disi e tron srafu fu a wroko fu den, sondro taki sma dwengi den. Den sma disi di e komoto frukufruku mamanten na oso èn e kon baka latilati na neti, kan abi a denki taki a wroko di den e du na fu a bun fu na osofamiri fu den. Ma te yu e luku en bun, dan a wrokobakru fu den sma disi, kan meki taki na osofamiri fu den e pina. Wan wefi abi wan masra di e wroko moro yuru wan dei leki san de fanowdu, èn a wefi disi e taki: „Mi no ben o abi trobi fu lasi ala den diri sani di mi abi na ini na oso disi, efu mi masra ben kan de na oso nanga mi èn nanga den pikin fu wi.” Den  sma di e bosroiti fu wroko moro yuru wan dei, musu poti bun prakseri na a sani di Kownu Salomo srefi ben ondrofeni. A kownu disi ben taki: „Mi, iya mi, drai luku ala den sani di mi anu ben du èn a hebi wroko di mi ben meki tranga muiti fu klari, èn luku! ala sani ben de fu soso èn a ben de neleki mi ben e feti fu kisi a winti.”—Preikiman 2:11.

Iya, te a abi fu du nanga wroko, dan wi no musu lesi, ma wi no musu abi wan wrokobakru tu. Wi kan de fayafaya wrokoman, ma wi musu hori na prakseri taki te wi e tron wan srafu fu a wroko fu wi, dan wi no sa de koloku èn kande wi sa abi moro problema srefi.—Preikiman 4:5, 6.

Abi a yoisti denki fu prisiriten

Bijbel e taki fu a ten fu wi: „Sma sa . . . lobi prisiri na presi taki den lobi Gado” (2 Timoteyus 3:2, 4). A suku di sma e suku fu abi prisiriten, kon tron wan fu den moro prenspari fasi fa Satan e kori sma fu drai baka gi Gado. Na ini a ten disi, moro nanga moro sma abi prisiriten, èn wan fasi fa den e du dati na taki den no e frede fu du sport di kan gi den bigi mankeri, soso fu kan firi switi fu wan syatu pisi ten. Moro nanga moro fu den sortu sport disi e kon de, èn moro nanga moro sma e du den sport disi tu. Fu san ede den sortu sport disi pôpi so? Furu sma di feni taki a libi fu den soi, e tan suku fasi fu abi moro nanga moro prisiri. Ma wan sma di e suku a prisiri disi ibri tron baka, sa du moro nanga moro sani di kan meki a kisi bigi mankeri. Kresten di abi warderi gi a libi no e du den sport disi, fu di den abi lespeki gi a libi èn gi a Sma di gi den libi.—Psalm 36:9.

Di Gado meki den fosi tu libisma, dan pe a poti den? A poti den na ini a dyari fu Eden, èn a nen disi wani taki „Prisiri” (Genesis 2:8). A de krin taki Yehovah ben wani taki libisma abi prisiri na ini a libi, èn taki den de koloku.

Yesus sori wi krin fa wi musu abi prisiriten na wan yoisti fasi. A ben e du ala san a man fu du a wani fu Yehovah, èn noiti a tapu fu libi akruderi den wet nanga den gronprakseri fu Gado. A ben e poti prakseri na sma di de na nowtu, èn a ben e du dati srefi te a ben weri (Mateyus 14:13, 14). Iya, Yesus ben e go te sma ben e kari en fu kon nyan na den oso, èn a ben e teki ten fu rostu èn fu kisi krakti baka. A no de fu taki dati a ben sabi taki sonwan fu den feanti fu en no ben feni en bun taki a ben e du den sani disi. Den ben taki: „Luku! A sma dati na wan gridiman èn a lobi dringi furu win” (Lukas 7:34; 10:38; 11:37). Ma soleki fa Yesus ben si en, dan te wan sma de getrow trutru, dan disi no wani taki dati a no mag abi prisiriten kwetikweti.

A de krin fu si taki a bun te wi no abi prisiriten di no fiti. Te wi e si prisiriten leki a moro prenspari sani na ini wi libi, dan noiti wi sa de koloku trutru. A sani disi kan meki taki wi no e poti prakseri na sani di de moro prenspari, èn na a banti di wi abi nanga Gado. Ma toku, wi no musu libi na wan fasi di no e gi wi prisiri kwetikweti, èn wi no musu krutu trawan di abi prisiriten na wan fasi di fiti.—Preikiman 2:24; 3:1-4.

Kon de koloku fu di yu e libi na wan fasi di fiti

A disipel Yakobus ben skrifi: „Wi alamala e sondu furu tron” (Yakobus 3:2). Kande wi sa si taki a sani disi tru te wi e meki muiti fu libi na wan fasi di fiti. San kan yepi wi fu libi na wan fasi di fiti? We, wi musu sabi san na den bun fasi èn san na den swakifasi fu wi. A sani disi no makriki. Sondro fu wi sabi, a kan pasa taki den bun fasi fu wi e kon tron swakifasi. Fu dati ede a bun te wi abi wan bun banti nanga lepi Kresten èn te wi e arki a bun rai fu den (Galasiasma 6:1). Te wi abi a rai disi fanowdu, dan wi kan go na wan bun mati noso na wan lepi owruman na ini a gemeente. Te wi e kisi a rai dati di e komoto fu Bijbel èn te wi e studeri Bijbel, dan dati kan de leki „wan spikri” di e sori wi fa Yehovah e si wi trutru.—Yakobus 1:22-25.

Koloku taki wi man libi na wan fasi di fiti. A tranga muiti di wi e tan meki èn a yepi di Yehovah e gi wi, kan abi leki bakapisi taki wi e libi na wan fasi di fiti èn taki wi e tron koloku sma. Na so fasi wi kan kisi wan moro bun banti nanga wi Kresten brada nanga sisa, èn wi kan tron moro bun eksempre srefi gi den sma di wi e preiki gi. Ma san de moro prenspari, na taki wi kan teki na eksempre fu Yehovah, a lobi-ati Gado fu wi, di sabi san fiti.—Efeisesma 5:1.

[Sma di abi a reti fu a prenki na tapu bladzijde 28]

©Greg Epperson/age fotostock