Butuku Bo Butuna Bo Bu Sa Feli

CWANOÑU fa, mutu yo muñwi n’a sweli ku batisisa ku ba ba shwezwi ki bahabo bona kuli a utwe mo ba ikutwela hamulaho wa lilimo-limo. N’a ñolezi mañolo bashemi ba bañwi ba ne ba shwezwi ki bana ba bona lilimo li sikai kwamulaho. Ba bañwi kwa bashemi bao ne ba si ka alaba. Ndate yo muñwi ya bizwa Vladimir, ya n’a shwezwi ki mwan’a hae lilimo ze ketalizoho kwamulaho, n’a talusize kuli ku sa li t’ata ku yena ku bulela za mwan’a hae. *

Bashemi ba bañata ba ba shwezwi ki bana ba bona ba na ni masitapilu a’ cwalo a sa feli. Lilimo ze lishumi ze felile, bo William ne ba latehezwi ki mwan’a bona wa lilimo ze 18 ya n’a shwezi mwa mezi. Bo William ne ba ñozi kuli: “Pilu ya ka i sa utwa butuku ni ka nako ye, mi ki butuku bo ni ka shwa ni bona.” Hamulaho wa lilimo ze ketalizoho ku zwa fa shwela mwan’a bona ya n’a bituzwi ki butuku bo ne bu si ka libelelwa, bo Lucy ne ba ñozi kuli: “Kwa makalelo, ne ni nahana kuli ha si ka shwa luli. Ne ni ikutwa kuli ne ni lola fela tolo ye maswe. Kono na fita fa ku lemuha kuli kanti u shwile luli. Mwan’a ka n’a shwile lilimo ze ketalizoho ze felile, kono ni ka nako ye fokuñwi, ha ni inzi ni nosi, ni sa lotisanga myoko.”

Ki kabakalañi bashemi ba ba shwezwi ki bana ba bona, ba ba cwale ka bo Vladimir, bo William, ni bo Lucy, ha ba sa utwa butuku bo butuna? Ha lu nyakisiseñi mabaka a mañwi a tisa cwalo.

Libaka Bashemi Ha Ba Tomohanga Pilu

Mwana ha pepwa fa lapa, bashemi ku na ni mo ba ikutwelanga mo ba sa ikutwelangi batu kaufela. Ba banga ni tabo ye tuna ha ba swala fela mbututu ya bona kamba ha ba i bona i lobezi ni ha i menya. Bashemi ba bande ba lata hahulu bana ba bona. Ba ba lutanga bupilo ni ku bonisa likute ku ba bahulu. (1 Matesalonika 2:7, 11) Bana ha ba latelela litaelo za bashemi ba bona, bashemi ba talanga tabo mwa lipilu za bona mi ba libelelanga ku bona ze ñata kwa bana ba bona.

Bashemi ba bande ba belekanga ka t’ata ku uta bana ba bona. Ba kana ba bulukela bana ba bona mali kamba lika kuli ite ba itusise zona ha ba ka ba ni mabasi a bona beñi. (2 Makorinte 12:14) Buikatazo b’o kaufela bu bonisa nto i liñwi: bu bonisa kuli bashemi ha ba  latangi kuli bana ba bona ba shwe. Mwana ha timela, buikatazo bwa bashemi bu pumelwanga fahali, mi bashemi ba byangulwanga sepo kaufela ye ne ba na ni yona. Lilato la bona kaufela ku yena la kaulezwa ni ku tibelwa ki lifu. Ha ba sa kona ku ikutwa mo ne ba ikutwelanga ka za mwan’a bona. Bashemi ba banga ni masitapilu a matuna a sa felangi kapili.

Bibele i paka kuli bashemi ba ba shwezwi ki bana ba bona ba utwanga butuku bo butuna, mi butuku b’o ha bu felangi. Ha i talusa mwa n’a ikutwezi Jakobo ha n’a utwile kuli mwan’a hae Josefa u bulailwe, Bibele i li: “Jakobo a pazula liapalo za hae, a itama lisila la saka mwa teka, a lila mwan’a hae mazazi a mañata. Bana ba hae kaufela ba bashimani ni ba basizana ba taha ku t’o mu omba-omba; kono a hana ku wiswa pilu, a li: Ni ka shetumukela mwa sibaka sa ba ba shwile ku mwan’a ka, ni nze ni lila.” Niha se ku fitile lilimo-limo, Jakobo n’a sa lila mwan’a hae ya n’a nahana kuli u shwile. (Genese 37:34, 35; 42:36-38) Mutala o muñwi hape o ñozwi mwa Bibele ki wa musali ya sepahala ya bizwa Naomi, ya n’a shwezwi ki bana ba hae ba babeli. Bakeñisa pilu butuku, n’a batile ku cinca libizo la hae kuli a si ke a bizwanga Naomi ku talusa “Ya Tabisa” kono a bizwange Mara ku talusa “Ku baba.”—Ruti 1:3-5, 20, 21.

Nihakulicwalo, Bibele ha i bonisi fela kuli bashemi ba utwanga butuku bo butuna ha ba shwelwa ki bana ba bona. I bonisa hape ni m’o Jehova a tiisezanga batu ba ba lila. Mwa taba ye tatama, lu ka nyakisisa mwa omba-ombelanga Mulimu batu ba ba lila.

[Litaluso za kwatasi]