Dibungama dikole

MATUKU mashale aa, mukebuludi kampanda uvua musue kumanya mushindu utu bantu badiumvua bidimu bia bungi panyima pa lufu lua muntu uvuabu banange. Wakatumina bamue baledi bavua bafuishe bana kukadi bidimu bia bungi nkonko ivuabu ne bua kuandamuna. Baledi bonso kabavua bandamune to. Kadi tatu mukuabu diende Vladimir, uvua mufuishe muanende wa balume kukadi bidimu bitanu, wakamba ne: utshivua umvua bibi bua kuakula bua muanende. *

Baledi ba bungi batu bafuisha bana, batu bashala babungame munkatshi mua bidimu bia bungi. Tshilejilu, William uvua mujimije muanende wa balume wa bidimu 18 uvua mufuile mu mâyi kukadi bidimu dikumi, wakafunda ne: “Ntshidi ne dibungama dikole bua lufu lua muananyi, ne nengikale nadi matuku anyi onso a muoyo.” Lucy wakafunda bidimu bitanu panyima pa yeye mumane kujimija muanende wa balume bua disama dia matuku makese ne: “Ku ntuadijilu, mvua ndiambila ne: ‘Bualu ebu ki mbulelela to!’ Mvua mmona anu bu se: mvua ndotakana ne mvua mua kubika. Kadi kunyima kua matuku, ngakabanga kumona ne: bivua bia bushuwa; muananyi kakupingana kabidi kumbelu to. Muananyi mmufue kukadi bidimu bitanu, kadi imue misangu pantu nkayanyi, ntu anu ndila.”

Bua tshinyi baledi badi bafuishe, bu mudi Vladimir, William ne Lucy batu bumvua dibungama dikole nunku? Tumonayi bua tshinyi.

Bua tshinyi badi babungama bikole nunku?

Padi muana uledibua mu dîku, baledi badi bumvua disanka didi bantu bakuabu kabayi mua kumvua to. Padibu bamuambula, bamutangila mudiye mulale, anyi bamona mudiye useka, badi bumvua disanka dia bungi menemene. Baledi bimpe mbanange bana babu. Badi babalongesha bua kuikala ne bikadilu bimpe ne bukalanga. (1 Tesalonike 2:7, 11) Padi bana bakola mudibu basue, baledi badi badiumvua bimpe ne batuadija kutekemena malu a bungi bua bana babu aba.

Baledi bimpe badi benza mudimu mukole bua kukumbaja majinga a bana babu. Tshilejilu, badi mua kuikala ne tshibidilu tshia kulama makuta anyi bintu kampanda bua kuambuluisha bana babu pabuelabu pabu mu dibaka. (2 Kolinto 12:14) Disanka didi nadi baledi dîba didibu basomba ne bana babu, mudimu udibu benza ne makuta adibu balama, bionso ebi bidi bileja ne: badi bakolesha bana bua bikale ne muoyo, ki mbua bafue to. Padi muana ufua, mudimu wa kumukolesha udi  ushikila mu njila, ne malu onso avua baledi batekemena adi aya mu mâyi. Lufu ludi luimanyika dinanga dionso divua nadi baledi kudi muana. Muaba uvua muana muikale nawu mu mioyo yabu udi ushala munda mutupu. Baledi badi bumvua dibungama dikole didi kadiyi mua kujika lukasa to.

Mukanda wa Nzambi udi uleja pawu ne: baledi badi bafuisha batu ne dibungama dikole ditu kadiyi dijika lukasa to. Tshilejilu, Bible udi uleja tshivua tshienzeke pavua Yakoba mumvue ne: muanende Yosefe uvua mufue. Udi wamba ne: ‘Yakoba wakapanda bilamba biende, wakaluata tshilamba tshikayabale mu tshimono, wakajinga muanende matuku a bungi. Bana bende ba balume bonso ne bana bende ba bakaji bonso bakabika bua kumusamba; kadi yeye wakapidia bamusambe, wakamba ne: Nenye bianyi mu Muaba wa Lufu, njinga muananyi.’ Bidimu bia bungi panyima, Yakoba utshivua ujinga muanende, uvuaye wela meji ne: mmufue. (Genese 37:34, 35; 42:36-38) Tshilejilu tshikuabu ntshia Naomi mamu muimpe uvua mufuishe bana bende ba balume babidi. Bua mushindu uvuaye mubungame, wakajinga kushintulula dîna diende dia Naomi (didi diumvuija “Disanka dianyi”) bua kuangata dia Mara (didi diumvuija “Bululu”).​—Luta 1:3-5, 20, 21.

Kadi Mukanda wa Nzambi kawena wakula anu bua dibungama ditu baledi bapeta padibu bafuisha to. Udi uleja kabidi mudi Yehowa ukolesha bantu badi babungama. Mu tshiena-bualu tshidi tshilonda, netumone imue mishindu idi Nzambi usamba bantu badi bafuishe.

[Mêyi adi kuinshi]