Chineñi Cheneni Nawa Chahaya Nyaka

CHAKATATAKA, iyala wumu wakeñeleña kwiluka chatiyañawu antu afwishahu dehi nawa achidi kudila kufuma hampinji yafwishiluwu ayawu akeñawu. Wasonekeli malwihu kudi anvwali atanu nasatu afwishahu dehi anyanawu hayaka yayivulu yinahituhu. Bayi neyi anvwali ejima akwiluku. Nvwali wumu wejina daVladimir, wafwishili mwanindi yaaka yitanu yinahituhu, walumbulwili nindi chichidi chamukalila kuhosha hadi mwanindi. *

Anvwali afwishahu dehi ekalaña nachineñi chamuchidiwu chahaya nyaka. Yaaka ikumi yinahitihu mwana kaWilliam weyala wadiña nayaaka 18 wafwili mumenji. William wasonekeli nindi, “Nichidi nachineñi chakufwa kwamwanami nawa nakekala nachu mukuhanda kwami.” Yaaka yitanu yahitilihu kufuma hafwili mwana kaLucy weyala nayikatu yakubula kukuhwelela, Lucy wasonekeli nindi: “Hamafuku antesha ahitiluhu, natoñojokeleña nami ‘nafwi wanyi.’ Natiyileña neyi nakulota chilota chatama nawa natoñojokeleña nami keña yasañuki. Mukuhita kwampinji nelukili nami nafwi, nawa hakufunta kwitalaku. Kufuma hafwili mwanami munahiti dehi yaaka yitanu, dichi neyi nidi nkawami nadilaña.”

Muloñadi anvwali afwishahu dehi adi neyi Vladimir, niWilliam, niLucy chiyekalilañawu nachineñi cheneni nawa chahaya nyaka? Lekenu tushinshiki nyiloña yimu yaleteshaña chineñi.

Muloñadi Chineñi Chichinaswejeli?

Neyi mukeki navwaliki muchisaka, anvwali ekalaña namuzañalu waweni wakubula kwesekeja namuzañalu wekala hakachi kawubwambu namuntu wudi wejima. Chidi neyi kwakata mwanawu wanyanya, kumubanjila neyi nakami, hela kumutala chinakumwemwetayi chayileñelaña kwikala amuzañalu chikupu. Anvwali akweti kukeña ahembaña anyanawu chiwahi. Ayidizishaña kwikala namaana amawahi nikwikala ovwahila. (1 Atesalonika 2:7, 11) Neyi anyana akula nayililu yeniyi, anvwali atiyaña kuwaha nawa atachikaña kuyikuhwelela.

Anvwali akamenaña azataña nañovu kulonda kwakamena anyanawu. Mpinji yejima ahembaña mali hela yuma yakumujimba kulonda kukwasha nachu anyanawu kutachika nachu chihandilu chawu kumpinji yakumbidi. (2 Akorinda 12:14) Yuma yayivulu yazatishañawu yidi neyi yitoñojoka, mpinji, ñovu nimali, yamwekeshaña walala wakwila nawu—anvwali alelaña anyanawu kulonda atwalekuhu kuhanda bayi kufwaku. Neyi  mwana yafwa, mudimu wakumukulisha hiwatwalekañahu hela kumukuhwelela cheñi kudi anvwaluku. Dichi kukeña kwasweja kwamwekeshañawu anvwali kudi anyanawu kwamanaña, nawa akwijikililaña kudi kufwa. Yitoñojoka yekalaña nawanvwali kumuchima hadi mwanawu weyala hela wamumbanda yamanaña. Anvwali ekalaña nachineñi cheneni chabulaña kumana swayi.

Bayibolu yashimuna nawu neyi anvwali afwisha, ekalaña nachineñi cheneni nawa chahaya nyaka. Kulumbulula hachuma chamwekeni hampinji yatiyiliyi nkakulula Yakoba nindi mwanindi Yosefu anamujahi, Bayibolu yahosha nawu: “Yakoba hakutabula nimahinindi, bwechi bwechi, hakuvwala chikeleyi mumayindi [hela mumbunda yindi], hakumudila mwanindi mafuku amavulu. Anyanindi ejima niamayala nawambanda anyamukili, nawu amukundeji, ilaña yena kwindi kwonti kwindi kumukundeja. Nindi, Ami kwami nakakunkumuka mukaluña mudi mwanami nakudila hohu.” Yaaka yahiñiluhu Yakoba watwalekeluhu nakudila mwanindi weyala watoñojokeleñayi nindi wafwa dehi. (Kutachika 37:34, 35; 42:36-38) Chakutalilahu chikwawu chamuBayibolu chabombelamu mumbanda washinshika wejina daNyawomi wafwishili anyanindi ayedi. Hamuloña wakusweja kudishona, wakeñeleña kuhimpa ijina dindi daNyawomi dalumbuluka nawu, muzañalu wami, nakudinka ijina daMara dalumbuluka nawu chineñi.—Luti 1:3-5, 20, 21.

Hela chochu, Bayibolu hiyahosha hohu hakudishona kwatiyañawu anvwaluku. Yalumbulula cheñi hanochu Yehova chahanañayi ñovu kudowu anakudila. Muchibaba chinahiñuhu tukushinshika hajinjila mwakundejelañayi Nzambi antu anakudila.

[Tumazu twaheshina]