Papa nanga mama di e sari fu wan langa pisi ten

NO SO LANGA PASA, wan ondrosukuman ben wani kon sabi efu sma di lasi wan lobiwan na ini dede, e sari ete baka wan langa pisi ten. A ben seni wan tu aksi gi aiti papa nanga mama di lasi den pikin fu den na ini dede wan tu yari pasa. A no ala den papa nanga mama ben gi piki tapu den aksi. Wan papa di nen Vladimir, ben taki dati aladi a boi fu en dede feifi yari pasa kaba, toku a e sari ete te a e taki fu a boi fu en. *

Nofo tron a de so taki papa nanga mama di lasi den pikin na ini dede, e sari fu wan langa pisi ten. Tin yari pasa a manpikin fu William dede na watra di a ben abi 18 yari. William skrifi: „Te now ete mi e sari srefisrefi, èn solanga mi de na libi mi sa firi sari.” Feifi yari baka di a boi fu Lucy dede fu di a ben kon siki wantronso, dan Lucy skrifi: „Den dei baka di a boi fu mi dede, mi ben e tan denki taki a sani disi no kan. A ben de neleki mi ben abi wan takru dren. Baka wan pisi ten mi ben e kon frustan taki a sani disi tru, èn taki a boi fu mi no ben o kon na oso moro. A boi fu mi dede feifi yari pasa, ma son leisi te mi de mi wawan, mi e krei ete fu di a no de moro.”

Fu san ede papa nanga mama soleki Vladimir, William, nanga Lucy di lasi den pikin fu den na ini dede, e sari fu so wan langa pisi ten? Meki wi go luku fu san ede disi de so.

Fu san ede den e sari so?

Nowan sani e gi papa nanga mama so furu prisiri leki te a beibi fu den gebore. Te den e hori a pikin fu den, te den e luku fa a pikin e sribi, noso te den e si fa a pikin e lafu, dan den sani dati wawan e gi den bigi prisiri èn a e meki den koloku. Papa nanga mama di lobi den pikin fu den, e sorgu bun gi den. Den e leri den pikin fu tyari densrefi bun èn fu abi maniri (1 Tesalonikasma 2:7, 11). Te den pikin e bigin du san den leri, dan dati e gi den papa nanga mama prisiri èn den e fruwakti taki sani o waka bun nanga den pikin.

Papa nanga mama di lobi den pikin, e wroko tranga fu sorgu gi den. Kande den e poti moni na wan sei, noso tra sani tu, fu yepi den pikin fu den te densrefi o seti den eigi osofamiri (2 Korentesma 12:14). Fu tru, papa nanga mama e sori lobi gi den pikin fu den, den e teki ten fu de nanga den, èn den e gebroiki a krakti nanga a moni fu den fu du sani gi den pikin. Wi kan frustan taki papa nanga mama e du ala den sani disi fu di den wani taki den pikin fu den musu libi, èn den no  wani taki den dede. Te wan pikin dede, dan a papa nanga mama no e kisi na okasi fu kweki en teleki a kon bigi, èn ala den bun sani di den ben e howpu gi so wan pikin, lasi gowe. A papa nanga mama no kan sori a pikin dati moro taki den lobi en, bika dede de neleki wan skotu fu ston di de na mindri den nanga a pikin. Fu di a manpikin noso umapikin fu den dede, meki den e firi leki den e misi wan sani na ini den libi. A sari di papa nanga mama e firi e tan fu wan langa pisi ten.

Bijbel e taki dati a tru taki papa nanga mama di lasi wan pikin na ini dede, e sari trutru fu wan langa pisi ten. A e fruteri wi san ben pasa di a famiri-edeman Yakob yere taki en manpikin Yosef dede. Bijbel e taki: „Yakob priti den dyakti fu en na en skin, èn a tai rowkrosi na en mindri. Dan a row gi en manpikin wan heri pisi ten. Ala den manpikin nanga umapikin fu en tan trowstu en, ma a no ben wani meki den trowstu en. A taki: ’Nanga sari mi o saka go na mi manpikin na ini a grebi.’” Wan tu yari baka dati, Yakob ben sari ete fu di a ben denki taki en manpikin ben dede (Genesis 37:34, 35; 42:36-38). Wan tra tori na ini Bijbel e taki fu wan getrow uma di nen Naomi. Den tu manpikin fu na uma disi ben kon dede. A ben sari so te, taki a ben wani kenki en nen Naomi kon tron Mara, fu di Naomi wani taki ’Mi prisiri’, èn Mara wani taki ’Sari’.—Rut 1:3-5, 20, 21.

Ma Bijbel no e taki wawan fu a sari di papa nanga mama e sari te den lasi wan pikin na ini dede. A e sori wi tu fa Yehovah e gi krakti na den sma di e sari. Na ini a tra artikel wi sa go luku na sortu fasi Gado e trowstu den wan di e sari fu di wan lobiwan fu den dede.

[Futuwortu]