Wukwashu Kufuma Kudi ‘Nzambi Wahanaña Kutatakena niKukundeja’

YAAKA 2,000 yinahituhu, Pawulu nsoneki yaBayibolu wamulumbulwili Yehova hamu neyi ‘Nzambi wahanaña kutatakena nikukundeja.’ (Aroma 15:5) Chineli Bayibolu yatuleja nawu Yehova hahimpaña mukuhita kwampinjuku, tunateli kukuhwelela netu Nzambi wuchidi kukundeja antu amukalakelaña. (Yakoba 1:17) Kafwampi, Bayibolu yahosha nawu Yehova wakundejaña antu akeñaña kuyikundeja mujinjila jashiyashana. Jinjilanyi mwakundejelañayi? Nzambi wakoleshaña antu alombaña wukwashu windi nawa wazatishaña enikristu alala kulonda kukundeja akwawu akakwitiya. Yehova wahana nsañu yakuzañalesha Mwiizu dindi Bayibolu sweje yakoleshaña owu anakudila anyanawu afwa. Lekenu tushinshiki nyichidi yisatu yakukundejelamu.

“Yehova Wamutiyili”

Mwanta Davidi wasonekeli hadi Nleñi Yehova nindi: “Mukuhwelelenu hampinji jejima, enu nyichidi yawantu; ichilenu nyichima yenu kumesu indi; Nzambi diyi chiswamu chetu chakubatamina.” (Masamu 62:8) Muloñadi Davidi chamukuhweleleliyi Yehova? Hakuhosha hansañu yindi, Davidi wasonekeli nindi: “Kazweñi iwu wabileleli, Yehova wamutiyili, wamuhandishili muyihuñu yindi yejima.” (Masamu 34:6) Muyihuñu yejima yahitilumu, Davidi walombeleña mpinji yejima wukwashu waNzambi nawa Yehova wamukwashileña. Davidi welukili hayuma yahitilumu nindi Nzambi wukumukiña nawa wukumukwasha kulonda kumika.

Anvwali anakudila atela kwiluka nawu Yehova wakayikwasha hampinji yachineñi cheneni  neyi chakwashiliyi Davidi. Atela kumusolomoka ‘watiyaña kulomba’ wabadika nikukuhwelela nawu wakayikwasha. (Masamu 65:2) William ashimunawu muchibaba chinafumuhu wahosheli nindi: “Kapampa kakavulu, natiyileña neyi hinukutwesha kumika nakushakama chakubula mwanamuku nawa namulombaña Yehova kulonda yankundeji. Yehova wanyinkaña ñovu mpinji yejima kulonda nitwalekuhu kuhanda.” Ninenu, neyi mumulomba Yehova nachikuhwelelu, Nzambi wamwiwulu wabadika wakayikwasha. Kafwampi Yehova Nzambi wakana antu amukalakelaña nañovu nindi: “Muloña ami Yehova Nzambi yeyi nakakukwataña kuchikasa cheyi chachidiilu, nakakwilaña nami, Bayi wutiya womaku, nukukukwashañaku.”—Isaya 41:13.

Wukwashu Wafumaña Kudi Amabwambu Alala

Anvwali afwishaña nyana kakavulu akeñaña mpinji yakudila kumbadi kulonda kumanisha chikela. Hela chochu, neyi chakwila adambulaña kudi akwawu hampinji yayilehi, hichinateli kwikala chachiwahuku. Kwesekeja naYishimu 18:1 yahosha nawu, “wadambulaña hakanka windi” nateli kwikala mukukala. Dichi anakudila atela kubabala kulonda abuli kudambula kwakankawawu.

Amabwambu amwakamaña Nzambi anateli kuhana wukwashu weneni kudowu adi muyihuñu. Yishimu 17:17 yahosha nawu: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” Lucy atenawu muchibaba chinafumuhu, amukundejeli kudi amabwambu jindi alala hanyima yakufwisha mwanindi weyala. Kuhosha hadi akwawu akakwitiya amuchipompelu, Lucy wahosheli nindi: “Kuhempula kwawu kwankwashili nankashi, hela chakwila mpinji jikwawu ahosheleña mazu antesha. Ibwambu wumu wanhempwileña hamafu inadiña nkawami. Welukili nindi nukudilaña hetala, dichi kakavulu wenjileña nakundilishaku. Mukwawu wantemesheleleña nshiña nakunkundeja mafuku ejima. Amakwawu cheñi atutambikileña kumatalawu nakudiila hamu yakudya nawa atwalekeluhu kwila mwenimu.”

Hela chakwila chineñi chacheni chatiyañawu anvwali neyi anafwishi mwana hichamanaña swayuku, kulomba kudi Nzambi nikudikunda namabwambu alala awiniKristu, chinateli kuleta kukundeja kwakweni kudana anakudila.  Anvwali awiniKristu amavulu anajimbeshi mwana elukaña nawu Yehova wekala nawu. Chalala, Yehova “wakuswishaña abaluka nyichima; wakasaña hayilonda yawu.”—Masamu 147:3.

Nsañu yamuBayibolu yaKundejaña

Kubombela hakulomba nikudikunda kwakukolesha, Izu daNzambi dasonekewa dekala hinsulu yakukundeja kudi antu anafwishi. Nsañu yamuBayibolu yamwekeshaña nawu Yesu wafwilaña chikupu nawa wukweti wuswa wakumanisha chineñi chawanvwali anafwishi kuhitila mukusañula afu. Nsañu yamuchidiwu yakundejaña antu anafwishi. Twayenu tushinshiki hansañu jiyedi jamuchidiwu.

Luka kapetulu 7 kalumbulula chuma chamwekeni hampinji Yesu yabulakeniyi antu ayileña nakujiika mufu mumusumba waNena. Antu adiña kwakwihi nakujiika mwana wanfwila wasemuka kankawindi. Vasi 13 yashimuna nawu: “Mwanta chanamumoniyi, hakumutiyila wushona, hakumwila nindi, Bayi wudilaku.”

Antu antesha hohu diwu ekalaña nawulobu wakumumwenesha maama yawantu hachipenji chamwanindi. Muloñadi Yesu chahosheleliyi ñana? Muloña welukili nindi chineñi chamaama yawantu yeniwu chadiña kwakwihi nakumana. Nsañu yatwalekahu nawu: “[Yesu] hakuswila kwakwihi hakukunka kumutembu; atembekeli hiyakwimana ku-ka. Hakwila nindi, Eyi mukwenzi, nakwili nami hindukaku. Owu wafwili ashakama nikushakama, atachika nikuhosha; hakumwinkayi maama yindi.” (Luka 7:14, 15) Hayina mpinji, maama yawantu watela wadilili cheñi, ilaña haniyi mpinji wadilili kudila kwamuzañalu.

Hampinji yikwawu Yesu amuwanini kudi muntu wejina daJayirusa, wakeñeleña nindi Yesu  yamuukili mwanindi wadiña nayaaka 12 wakatili nankashi. Hashimbwili hohu chantesha, Jayirusa amulejeli nawu mwanindi wamumbanda nafwi. Iyi nsañu yamuneñesheli Jayirusa chikupu, ilaña Yesu wamulejeli nindi: “Bayi wutiya womaku, kumina[ku] dakukuhwelela hohu.” Chashikiliyi hetala danichi chisaka, Yesu weñilili mwadiña mwana wamumbanda wafwili. Chanamukwatiyi kuchikasa, hakumwila nindi: “Eyi mwana, nakwila nami hindukaku.” Chumanyi chamwekeni? “Hohenohu owu mwana yohinduka nikuhinduka.” Indi anvwali jindi atiyili ñahi? ‘Ahayamini nakuzañalala nankashi.’ Chelili Jayirusa niñodindi amukumbati mwanawu wamumbanda, azañaleli chikupu. Amweni neyi adiña nakulota.—Maku 5:22-24, 35-43.

Nsañu yakunama yamuchidiwu yamuBayibolu yahosha hakusañuka kwawanyana, yamwekeshaña chuma chiyatela kutalila anvwali anakufwisha makonu kumpinji yakumbidi. Yesu wahosheli nindi: ‘Mpinji yinakwinza yakela antu ejima adi mumajamu achanukishu akatiya izu dindi nakwidikamu.’ (Yowanu 5:28, 29) Nkeñelu yaYehova kudi Mwanindi yidi yakwila nawu wakasañula afu. Yihita yawanyana afwa “akatiya izu” hampinji yakahoshayi nindi: “Nakwila nami hindukaku.” Atwansi wenawa akatachika kwenda nikuhosha. Kufwana Jayirusa niñodindi, anvwali janawa anyana ‘akahayama nakuzañalala nankashi.’

Neyi mwafwishahu dehi mwana weyala hela wamumbanda, mwani ilukenu nenu, Yehova nateli kuhimpa chineñi chenu kwikala muzañalu kuhitila mukusañuka. Hakwila nawu muheteli muniku kuchiñeja, mwatela kwovwahila kukonkomwena kwañimbi yamasamu kwakwila nawu: “Keñakeñenu Yehova, niñovu jindi; keñakeñenu mesu indi nyaka yejima. Anukenu nyidimu yindi yakuhayama yineliyi; niyuma yindi yakala yineliyi.” (Masamu 105:4, 5) Mukalakelenu Yehova Nzambi walala, nawa difukulenu munjila yetejewa.

Chumanyi chikafumamu neyi ‘mumukeñakeña Yehova’? Munateli kukoleshewa kuhitila mukulomba kudi Nzambi, amabwambu alala aweniKristu akweti kukeña atela kuyikundeja nawa munateli kuwana muzañalu kuhitila mukudiza Izu daNzambi. Cheñi, kumpinji yakumbidi yidi mukamwihi, mwakamona nenu Yehova wakayikoñela ‘nyidimu yakuhayama nawa yakala’ kulonda mwakahetelumu haya nyaka hamu nimwanenu wafwili dehi.

[Chikasha chidi hefu 5]

“Muletenu Mumbanda Wafwishili Anyana Ayedi”

Kehinde niBintu adisumbula akwituña daNigeria nawa hiyaYinsahu jaYehova, afwishili anyanawu ayedi wamumbanda niweyala muwubanji wahamukwakwa. Kufuma hayina mpinji, akabakeni nachineñi muloña wakufwisha anyanawu. Hela chochu, chikuhwelelu chawu mudi Yehova chayikoleshaña, nawa atwalekahu kushimwina nsañu yamuBayibolu yakuchiñeja kudi antuñi nawu.

Antu amakwawu amweni kuwunda nikukola kwamwekesheluwu aKehinde naBintu. Ifuku dimu mumbanda wejina daUkoli walejeli ibwambu daBintu nindi: “Muletenu mumbanda wafwishili anyana ayedi hampinji yoyimu wuchidi kushimwina nsañu yamuBayibolu. Nakufwila kwiluka chuma chamuleñelaña kwikala nañovu yakumika.” Chenjiliyi Bintu kwitala daniwu mumbanda, Iñoda Ukoli wamulejeli nindi: “Nakukeña kwiluka chakuleñela kutwalekahu kushimwina hadi Nzambi wajahili anyaneyi. Nzambi wajahili mwanami wamumbanda wumu hohu. Kufuma tuhu hayina mpinji, hinakeñaña nikutiya hadi Nzambuku.” Bintu wazatishili Bayibolu hakulumbulula chaleteshaña antu kufwa nimuloña wutwatelela kwikala nakuchiñeja kwakwila nawu ayetu yitwakeña afwa akayisañula.—Yililu 24:15; Aroma 5:12.

Kufamahu, Iñoda Ukoli wahosheli nindi: “Natoñojokeleña nami Nzambi diyi wajahaña antu. Ichi neluki dehi walala.” Wafuukwiluhu kudiza Bayibolu nawaYinsahu jaYehova kulonda yadizi yikaninu yaNzambi yayivulu.

[Chikasha chidi hefu 6]

‘Inakukeña kuKwashana, Ilaña Hineluki Chakukwashanaku’

Hela chakwila anvwali nianyana asemuka namwana wunafwi aneñaña nankashi, amabwambu jawu atela kwakamena. Akeñaña kukwasha chisaka ilaña achinaña nawu kuhosha hela kwila chuma chatama chikuletesha chineñi chawu kuswejelaku. Iji diju njila jatela kwilawu owu anakutoñojoka nawu, ‘Inakukeña kukwashana, ilaña hineluki chakukwashanaku.’

❖ Bayi mutondolwela muntu wunafwishi muloña himuneluki chuma chakuhosha hela chakwilaku. Mukuyikolesha neyi mwikala nawu hamu. Komana chayikalila kutoñojoka mazu akuhosha? Kuyikumbata nikuyileja chalala nenu “Ninami naneñi” chikuyiletesha kwiluka nawu mwayakamenaña. Komana mwachinaña nenu neyi mutachika kudila, mukuswejesha chineñi chawu? Bayibolu yahosha nawu: “Dilenu nawakwakudila.” (Aroma 12:15) Kudila kwenu kukumwekesha nawu munaneñi nawu, nawa chikuyikundeja.

❖ Tachikilenuhu. Komana munateli kutelekela chisaka yakudya? Komana munateli kuyikoselaku yeña? Munateli kuya nakuyisendelaku yuma kudi kwejima? Bayi muhosha nenu, “Neyi kudi chuma chidi chejima chimunakukeña munleji.” Hela munahoshi namuchima wumu, mazu wenawa atela kumwekana kudi anvwali anafwishi nawu mudi nanyidimu yayivulu hakwila muyikwashi. Ilaña ihulenu nenu, “Chumanyi chinatela kwila hakwila niyikwashuku katataka?” nawa ilenu chuma chinakukeñawu. Ilaña tondolwelenu kudiñija munsañu yakundama kuchisaka chawu.

❖ Tondolwelenu kuhosha nenu, “Neluki chimunakutiya.” Muntu wudi wejima watiyilaña mwacheñi neyi muntu yakeñawu nafwi. Hela tuhu ninenu mwafwishahu dehi mwana, himuneluki chikupu chinakutiyawuku.

❖ Hahitaña mpinji yeneni hakwila chisaka chitachiki cheñi kutiya neyi chekalañawu mpinji yejima. Twalekenuhu kuyikwasha kushika hakumina ñovu jenu. Kakavulu chisaka chinafwishi achishaña maana hamafuku akusambila, ilaña akeñaña wukwashu kubadika hamafuku akusambila hela nyilungu yakutachikilahu. Shenuku maana kuyuma yikukeñañawu munyilungu nitukweji tudi hambidi. *

[Tumazu twaheshina]

[Nyevulu yidi hefu 7]

Nsañu yamuBayibolu yashimuna nawu Yesu wukweti ñovu nimpwila yakusañula anyana