Tulong Manlapud “Dios na Anos tan Ligliwa”

MANGA 2,000 taon lay apalabas, deneskribe nen Pablo, a sakey a nansulat ed Biblia, si Jehova bilang “Dios na anos tan ligliwa.” (Roma 15:5) Lapud ipapaseguro ed sikatayo na Biblia a si Jehova so agmanguman ed ilabas na panaon, makapanmatalek tayo sirin a mangiiter nin siansia so Dios na ligliwa ed saramay manlilingkor ed sikato. (Santiago 1:17) Diad tua, ipaparungtal na Biblia a si Jehova so mangiiter na ligliwa ed saramay mankaukolan diad nanduruman paraan. Anto so arum ed sarayan paraan? Mangiiter so Dios na biskeg ed saramay onaasingger ed sikato diad pikakasi, ya onkekerew na tulong to. Papakiwasen to met iray tuan Kristiano a mangitarya na ligliwa ed saray kapananisiaan da. Tan mangitatarya si Jehova na makapaligsay puso iran salaysay ed Salita to, say Biblia, a nagkalautlan mamabiskeg ed saramay maneermen lapud naandi ed bilay so anak da. Sansakeyen tayon konsideraen irayan taloran klase na ligliwa.

“Sikato so Dinengel nen Jehova”

Onia so insulat nen Arin David nipaakar ed Manamalsa tayo a si Jehova: “Manmatalek kayo ed sikato ed amin a panaon, sikayo a totoo; ipaway yo so puso yo ed arapan to. Say Dios so sakey a salimbeng ed sikatayo.” (Salmo 62:8) Akin et ontan la so talek nen David ed si Jehova? Oniay insulat nen David nipaakar ed inkasikato: “Saya a too a duka inmakis, et sikato so dinengel nen Jehova, tan inlaban To ya impaway ed saray amin a gonigon to.” (Salmo 34:6) Diad amin a makapagonigon a kipapasen a dinalan to, lawas nampikasi si David ed Dios parad tulong, tan sikatoy lawas a tinulongan nen Jehova. Unong ed eksperiensya et amta nen David a sikatoy suportaan tan tulongan na Dios pian makapansungdo.

Kaukolan met a naamtaan na saray maneermen ya atateng a tulongan ira nen Jehova ed pirmin paneermen da, a singa ginawa to ed si  David. Nayarian day onasingger ed matalonggaring a “Dumerengel na pikakasi,” a matalek iran sikatoy ontulong ed sikara. (Salmo 65:2) Onia so inkuan nen William, ya atukoy ed inmunan artikulo: “Mabetbet kon nalilikna a singa agko la nasungdoan so manbilay ya anggapoy ana’ko, tan kinerew ko ed si Jehova ya ikdan toak na pakainawaan ed naliliknak. Et lawas ya iikdan toak na biskeg tan pakpel pian mantultuloy a manbilay.” No manpikasi ka met ed matalonggaring a Dios ed tawen a si Jehova tekep na pananisia, tulongan to ka. Tutal et insipan nen Jehova a Dios ed saramay manggugunaet a manlingkor ed sikato: “Siak si Jehova a Dios mo, a mangitagey na kawanan a limam, a kuan ko ed sika, Agka antakot, tulongan ta ka naani.”​—Isaias 41:13.

Suporta ya Itatarya na Tuan Kakaaro

Saray inateyan na ananak so mabetbet a mankaukolan na panaon ya onakis a bukor pian napakalma day liknaan da. Anggaman ontan, aliwan makabat ya isian day inkasikara ed arum a mabayag. Unong ed Uliran 18:1, “say onsian” et niiyan ed kapeligroan. Kanian, kaukolan a manalwar iramay maneermen ya agda iyaarawi so inkasikara.

Baleg so nitulong na saray ontatakot ed Dios a kakaaro ed saramay nagogonigon. Inkuan na Uliran 17:17: “Say kaaro mangaro ed saray amin a panaon, et say agi nianak ed kasumlangan.” Si Lucy, ya asalambit met ed inmunan artikulo, so aligliwa na saray tuan kakaaro sanen naandi ed bilay so anak ton laki. Oniay inkomento to nipaakar ed saray kakaaro to diad kongregasyon: “Say imbisita ra so akatulong a maong, anggaman no maminsan et pupugeran day mansalita. Sakey ya amigak so binmisita ed siak ed saray agew a manbukbukor ak. Amta ton wala ak ed abung ya onaakis, kanian mabetbet toak a laen tan miakisan ed siak. Wala met so ontatawag ed siak ya inagew-agew pian pasesegen ak. Saray arum met et iimbitaan da kamin mangan ed kaabungan da, tan siansia nin gagawaen da itan.”

Anggaman agnaandin tampol so pirmin ot-ot a nalilikna na atateng lapud inkaandi na anak da, say pampikasi ed Dios tan pilimog ed saray tuan Kristianon kakaaro so mangiter na peteg a ligliwa ed saramay maneermen. Dakel a  Kristianon atateng ya inateyan na anak so akaeksperiensya ya inantabay ira nen Jehova. On, si Jehova et “paabigen to so saray binmetag ed puso, tan bedberen to so sugasugat da.”​—Salmo 147:3.

Ligliwan Itatarya na Saray Salaysay ed Biblia

Niarum ni ed pikakasi tan makapabiskeg ya ulopan, say nisulat a Salitay Dios so makaligliwa ed saramay maneermen. Ipaparungtal na saray salaysay ed Biblia a walaan si Jesus na pirmin pilalek tan say abilidad ya ekalen so ot-ot na inateyan ya atateng diad pamaoli to ed saray inatey. Agaylan peteg a makaligliwa irayan salaysay parad saramay maneermen. Konsideraen tayo so duara ed saraya.

Dedeskribien na Lucas kapitulo 7 so agawa sanen nabet nen Jesus so sakey a tulor diad syudad na Nain. Iponpon da la ed saman so alenleneg ya anak a laki na balo a bii. Oniay inkuan na bersikulo 13: “Nen sikatoy anengneng na Katawan, sikato so inabagey to, et inkuan to ed sikato, Agka mannangis.”

Pigpigara so makapangitepel a mamatunda ed pannangis na ina diad tulor na anak to. Akin balet a ginawa nen Jesus itan? Lapud amta to a magano lan naandi so paneermen na ina. Intuloy ya inkuan na salaysay: ‘Inmasingger [si Jesus] tan diniwit to so lungon, et saray nanawit tinmunda ra. Et inkuan to, Balolaki, kuan ko ed sika, Bangon ka! Tan samay inatey binmangon, tan ginmapo a nansalita, tan inyawat to ed kinen ina to.’ (Lucas 7:14, 15) Seguradon akanangis lamet so ina, balet aliwa lan lapud ermen noagta lapud panliket to.

 Diad sananey met ya inkagawa, si Jesus so inasinggeran na sakey a lakin manngaran na Jairo, a patutulongan lapud graben sakit na 12 años a marikit to. Kamamangta et sinmabi so balita ya inatey lay anak to. Kanian lalon naer-ermenan si Jairo, balet inkuan nen Jesus ed sikato, “Agka antakot, manisia ka labat.” Kasabi da ed abung nen Jairo, inasinggeran nen Jesus so bangkay na bii. Insan to inegnaan ed lima tan inkuan to: ‘Marikit, kuan ko ed sika, Onalagey ka!’ Et anto so agawa? “Say marikit [so] tampol ya inmalagey, tan nanakar.” Panon so inkiwas na atateng to? “Atalagnaw ira ed pirmin liket.” Agaylan liket so alikna nen Jairo tan say asawa to legan a sankalakap da so anak da. Singa ira mankukugip.​—Marcos 5:22-24, 35-43.

Saray ontan a detalyadon salaysay na Biblia nipaakar ed inkioli na ugugaw so mangipapabitar no antoy nailaloan na saray maneermen ya atateng ed arapen. Inkuan nen Jesus: “Onsabi oras, amin so saray wala ed lubok narengel da so boses to tan ompaway ira.” (Juan 5:28, 29) Gagala nen Jehova a paolien na Anak to iramay inaatey. Minilyon ya inaatey ya ananak so ‘makarengel na boses to’ sano ikuan to ed sikaran, ‘Kuan ko ed sikayo, Onalagey kayo!’ Saraman ya ugugaw so makaakar tan makapansalita la lamet. Tan singa si Jairo tan say asawa to, saray atateng na saraman ya ananak so ‘pirmin manliket.’

No naandi ed bilay so anak mo, lawas nonoten a napagmaliw nen Jehova a liket so paneermen mo diad panamegley na kioli. Ta pian minabang ed sayan maglorian ilalo, ontulok ed bilin na salmista: “Anap yo si Jehova tan say biskeg to. Anap yo so lupa to lawas. Nodnonot yo so makapakelkelaw iran gawa ya agawaan to, saray milagro to.” (Salmo 105:4, 5) On, manlingkor ed tuan Dios a si Jehova tan mandayew ed sikato ed naabobonan a paraan.

Anto so tampol a resulta no ‘anapen mo si Jehova’ a Dios? Napabiskeg ka diad pampikasi ed sikato, naligliwa ka na maaron panangiyansakit na saray tuan Kristianon kakaaro, tan napabiskeg ka diad panaral na Salita to. Niarum ni, diad asingger lan arapen et naeksperiensyam so ‘makapakelkelaw iran gawa tan saray milagro’ a gawaen nen Jehova parad magnayon a pakagunggonaan mo tan ed anak mo a naandi ed bilay.

[Kahon ed pahina 5]

“Itagar Mo pa’d dia Imay Bii ya Inateyan na Duaran Anak”

Si Kehinde tan Bintu et sanasawan Tasi nen Jehova a taga Nigeria, a duara ed ananak da so naandi ed bilay lapud impakaaksidente ed kotsi. Nanlapula’d saman a makapasinagem ya inkagawa et pirmin ot-ot so nalilikna ra. Anggaman ontan, say panagmatalek da ed si Jehova so amabiskeg ed sikara, tan intultuloy dan innabang ed totoo so ilalon ibabaga na Biblia.

Naimano na arum so inkakalmado tan biskeg ya impatnag di Kehinde tan Bintu. Aminsan ya agew et inkuan na sakey a bii a manngaran na Mrs. Ukoli ed sakey a kaaro nen Bintu: “Itagar mo pa’d dia imay bii ya inateyan na duaran anak balet ta siansia nin ipupulong to so mensahe na Biblia. Labay kon naamtaan no antoy ontutulong ed sikaton makapansungdo.” Sanen sinmabi si Bintu ed abung na bii, inkuan nen Mrs. Ukoli ed sikato: “Labay kon naamtaan no akin et ipupulong mo nin siansia so nipaakar ed Dios ya amatey ed duaran anak mo. Inala na Dios so alenleneg ya anak kon bii. Kanian nanlapula’d saman et nakalan ak la na interes ed Dios.” Inusar nen Bintu so Biblia pian ipaliwawa no akin ya ompapatey so totoo tan no akin a petepeteg a nailaloan tayo a napaoli iramay inaatey ya inad-aro tayo.​—Gawa 24:15; Roma 5:12.

Insan inkuan nen Mrs. Ukoli: “Say amtak et aalaen na Dios so totoo no ompatey ira. Natan et amtak la so katuaan.” Denesidi to so paiyaralan na Biblia ed saray Tasi nen Jehova pian dakel ni naaralan to nipaakar ed saray sipan na Dios.

[Kahon ed pahina 6]

‘Labay Koy Ontulong, Balet Agko Amta no Panon’

Legay pirmin paneermen na atateng tan agagi na inatey ya ugaw, nayarin nalikna na saray kakaaro ya agda amta no antoy gawaen da. Labay dan suportaan so pamilya balet talawan ira ompan aliwa so nibaga odino gawaen da a mamaloor la ingen ed makapasinagem a kipapasen da. Niraya so pigaran suhestion parad saramay nayarin maniisip a, ‘labay koy ontulong, balet agko amta no panon.’

❖ Agpapaliisan so inateyan lapu labat ta agkayo segurado no dugay ibaga odino gawaen yo. Say mismon ibisita yo et mamabiskeg la ed sikara. Kasin agyo amta no antoy ibaga yo? Diad ilakap tan masimoon a pangibaga yoy “miaambegya ak” et nipalikna yo la ed sikara a mililikna kayo. Kasin antakot kayo ompan no makaakis kayo et lalon naermenan ira? Ibabaga na Biblia: “Minanangis kayo ed saray mannanangis.” (Roma 12:15) Saray lua yo so pakapatnagan a miaambegya kayo ed ermen da, tan makaligliwa itan.

❖ Manbulon la. Kasin makapangiparaan kayo na simplin panangan parad pamilya? Kasin nasinopan yo iray atalangkab lan sisinopan da? Kasin sarag yoy magmaliw ya ibabaki ra? Agyo ibabagan, “Ibaga yo labat ed siak no walay kaukolan yo.” Anggano masimoon so pangibalikas yo ed saratan, say pakalikas na maslak ya inateyan ya atateng et anggapoy panaon yo pian ontulong ed sikara. Imbes et itepet, “Anto so nagawaan ko pian natulongan ta kayo natan?” insan gawaen no antoray kerew da. Balet, agpibabalian iray pribadon pasen ed abung da odino personal iran pamaakaran.

❖ Paliisan ya ibagay, “Amtak so nalilikna yo,” lapud nandurumay nalilikna na kada too ed impatey na inadaro. Anggano ikuan lan inateyan kayo met la na anak, agyo amta so eksakton nalilikna ra.

❖ Dakel nin panaon so kaukolan ya onlabas insan ompawil ed normal so liknaan na pamilya. Itultuloy yoy ontulong anggad nayarian yo. Diad unona et mabetbet a naiikdan na dakel ya imano so inateyan a pamilya, balet ta aliwa labat a diad primero iran agew odino bulan so pankaukolan da ed satan. Magmaliw met a malikas ed saray pankaukolan da diad onsaginonor iran simba tan bulan. *

[Paimano ed leksab]

[Saray litrato ed pahina 7]

Ipapanengneng na saray salaysay ed Biblia a walaan si Jesus na pakapanyari tan pilalek a paolien iray ugugaw