Lugwasyo Luzwa Kuli Leza “Uugwasya Bantu Kuti Bakkazike Myoyo Akuba Basicamba”

KWAMYAKA iili 2,000 yainda, mulembi wa Bbaibbele Paulo wakaamba Jehova kuti ngu “Leza uugwasya bantu kuti bakkazike myoyo akuba basicamba.” (Baloma 15:5, Ci) Mbwaanga Bbaibbele lilatusyomezya kuti Jehova taku nacinca, tulakonzya kuba masimpe kuti Leza ucibaumbulizya aabo bamubelekela. (Jakobo 1:17) Alimwi Bbaibbele lyaamba kuti Jehova ulaumbulizya munzila ziindenyi-iindenyi kuli baabo bayandika kuumbulizyigwa. Ino ninzila nzi zimwi eezyi? Leza ulabayumya aabo bamusikila mumupailo ibalomba lugwasyo. Alimwi ulabakulwaizya Banakristo beni-beni kuti baumbulizye basyominyina. Alimwi Jehova ulaumbulizya kwiinda muzibalo zikulwaizya zili mu Jwi lyakwe, Ibbaibbele, ikapati kuli baabo bakopenyi mumoyo akaambo kakufwidwa mwana. Atulange-lange nzila eezyi zyotatwe zyakuumbulizya, aimwi elikke.

“Jehova Wakaswiilila”

Mwami Davida wakalemba kwaamba Mulengi wesu Jehova kuti: “Amumusyome kuziindi zyoonse, nobantu; amutule myoyo yanu kulinguwe; Leza ngemayubilo esu.” (Intembauzyo 62:8) Nkaambo nzi Davida ncaakajisi lusyomo luli boobu muli Jehova? Kalyaamba mwini, Davida wakalemba kuti: “Oyu uupengede wakakwiila, lino Jehova wakaswiilila, wamuvuna mumapenzi aakwe oonse.” (Intembauzyo 34:6) Mubuumi bwakwe boonse bwamapenzi-penzi, lyoonse Davida wakali kupaila kuli Leza kuti amugwasye, alimwi lyoonse Jehova wakali kumugwasya. Kwiinda muzintu Davida nzyaakabona,  wakalizyi kuti Leza wakali kukonzya kumugwasya kutegwa ayume.

Ibazyali ibali mubuumba beelede kuzyiba kuti Jehova una kuli ambabo mumapenzi aabo mapati mbweena mbwaakacita kuli Davida. Balakonzya kumusikila “[uu]swiilila zikombyo” mupati kabasyomede kuti uyakubagwasya. (Intembauzyo 65:2) William iiwaambwa mucibalo cainda, wakati: “Ziindi zinji ndakali kulimvwa kuti tiindakali kukonzya kupona ikuti katako mwana wangu, ndakamulomba Jehova kuti andigwasye mupenzi eeli. Lyoonse wali kundipa nguzu alimwi wali kundiyumya kutegwa ndizumanane kupona.” Ikuti andinywe kamupaila kuli Jehova calusyomo, Leza mupati wakujulu uyakumugwasya. Alimwi Jehova Leza ulabasyomezya aabo bakakatila kumubelekela nati: “Mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”—Isaya 41:13.

Lugwasyo Luzwa Kubalongwe Beni-Beni

Ibazyali aabo bafwidwa mwana ikanji-kanji bayandika ciindi cakulila kabali balikke akugusya cili kumoyo. Nokuba boobo, ikuba molikke kwaciindi cilamfwu takuyandiki. Kweelana a Tusimpi 18:1, BT, kulategwa “Uulizandula” ulakonzya kunjila mupenzi. Aboobo aabo bali mubuumba beelede kubona kuti tiibalizandula.

Balongwe bayoowa Leza balakonzya kubagwasya kapati aabo bali mubuumba. Bbuku lya Tusimpi 17:17, BT, lyaamba kuti: “Mulongwe ulayanda mweenzinyina ciindi coonse, pele munyina uzyalilwa kugwasya muziindi zyamapenzi.” Lucy iwaambwa mucibalo cainda, wakaumbulizyigwa abalongwe beni-beni naakafwidwa mwana musankwa. Kaamba balongwe bamumbungano, wakati: “Kutulingula kwabo kwakagwasya kapati, nokuba kuti aabona tiibakali kwaamba manji. Mweenzuma umwi wakali kundiswaya mumazuba ngondakali ndelikke. Wakalizyi kuti ndina kuli aŋanda kandilila, ikanji-kanji wakali kuboola wazyi kulila awalo. Aumwi wakali kusika abuzuba kundiyumya-yumya. Alimwi bamwi bakazumanana kutwiita kumaanda aabo kucakulya.”

Nokuba kuti kucisa kwamoyo nkobamvwa bazyali nobafwidwa takumani kufwambaana, kupaila kuli Leza akuba akati kabalongwe  Banakristo beni-beni kulaumbulizya kapati kuli baabo bali mumapenzi. Bazyali banji Banakristo ibakafwidwa balimvwa kuti Jehova uulaambabo. Masimpe, Jehova “batyopedwe ulabayumya, ulaanga zilonda zyabo.”—Intembauzyo 147:3, BT.

Zibalo Zyamu Bbaibbele Zyuumbulizya

Kunze lyamupailo akuba akati kabalongwe, Jwi lya Leza lilembedwe lilaumbulizya kuli baabo balila. Zibalo zyamu Bbaibbele zitondezya kuti Jesu ulayandisya alimwi ulijisi nguzu zyakumana buumba bwabazyali balila kwiinda mukubabusya bakafwa. Zibalo zili boobu zilabaumbulizya kapati aabo bali mubuumba. Atulange-lange zibalo zili boobo zyobilo.

Kuli Luka caandaano 7 kwaambwa cakacitika Jesu naakayaanya basidilwe mumunzi wa Naini. Basidilwe bakali kuyakukuzikka mwana wamukamufwu wakazyedwe alikke. Kapango 13 kaamba kuti: “Mwami naakamubona wakamufwida luzyalo, wati kulinguwe, Leka kulila.”

Mbasyoonto bakali kukonzya kubaambila banyina mwana kuti baleke kulila. Nkaambo nzi Jesu ncaakaambila boobu? Nkaambo wakalizyi kuti kuusa kwabanyina kwakali kuyanda kumana. Cibalo cilazumanana kwaamba kuti: “[Jesu] waswena afwaafwi wajata macila, abakamutembekede baima, wati, Mulombe, ndakwaambila, Buka. Mpoonya awo uwakafwide wakabuka, wakala watalika kwaambaula. Nkabela wamupa kulibanyina.” (Luka 7:14, 15) Aciindi aawo kulibonya kuti banyina bakalila alimwi, pele kulila kwabo kwakali kwakukkomana.

 Buzuba bumwi Jesu wakaswaigwa amuntu wazina lya Jairo iwakali kuyanda lugwasyo nkaambo mwana wakwe musimbi wamyaka iili 12 wakaciswa kapati. Kwiinde buyo kaindi kaniini, kwakasika mulomo wakuti mwana wafwa. Aaya makani aatakondi akamutontozya mumazwi Jairo, akamuleka makanda, pele Jesu wakamwaambila kuti: “Utayoowi, kosyoma buyo.” Kabalila, Jesu wakanjila muŋanda kumwana uufwide. Wamujata ajanza, wati: “Kasimbi, buka.” Ino ncinzi cakacitika? “Mpoonya mpoonya kasimbi kakanyampuka, kakeenda.” Ino mbuti bazyali mbobakalimvwa? “Bakakankamana lukankamano lupati.” Jairo amukaintu wakwe nibakamukumbatila mwana, bakakkomana cakuti boola ubone. Cakali mbuli kuti bakali kulota buya.—Marko 5:22-24, 35-43.

Izibalo zili boobu zyamu Bbaibbele izyaamba kubusyigwa kwabana zitondezya bazyali bali mubuumba sunu kuti baya kubusyigwa bana babo. Jesu wakati: “Ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya.” (Johane 5:28, 29) Jehova wakamupa nguzu Mwana wakwe zyakubusya baabo bafwide. Bana batabaliki bakafwa baya ‘kumvwa ijwi lyakwe’ aakuti: ‘Amubuke!’ Aabo bana baya kutalika alimwi kweenda akwaambaula. Mbweena mbuli Jairo amukaintu wakwe, ibazyali babana aabo baya “[ku]kakankamana lukankamano lupati.”

Ikuti naa mwakafwidwa mwana musankwa naa musimbi, amubone kuti Jehova ulakonzya kucinca kuusa kwanu kuba lutangalo kwiinda mukumubusya. Ikutegwa tugwasyigwe abulangizi oobu butaliboteli, amuccilile kukulwaizya kwasintembauzyo kwakuti: “Amuyandaule Jehova anguzu zyakwe! Amulangaule busyu bwakwe lyoonse! Amuyeeya milimo iigambya njaakacita, malele aakwe.” (Intembauzyo 105:4, 5) Inzya, amumubelekele Leza wakasimpe Jehova, amumukombe munzila njayanda.

Ino mbubotu nzi mbomunga mwajana ino ikuti ‘mwamulangaula Jehova’? Muya kujana nguzu kwiinda mukupaila kuli Leza, muya kuumbulizyigwa abalongwe Banakristo beni-beni bajisi luyando, alimwi muya kukulwaizyigwa kwiinda mukwiiya Jwi lya Leza. Kunze lyaboobo, muciindi buyo cisyoonto cacaala, muyakubona milimo iigambya amaleele’ Jehova ngayakucita ‘kutegwa mukagwasyigwe kukabe akutamani kubikkilizya amwana ngumwakafwidwa.

Kabbokesi kali apeeji 5]

“Amumulete Mukaintu Wakafwidwa Bana Bobilo”

Kehinde a Bintu banabukwetenyi bakucisi ca Nigeria Bakamboni ba Jehova, bakafwidwa bana bobilo muntenda yamumugwagwa. Kuzwa ciindi eeco bali kukopona mumoyo akaambo kalufwu oolu lwabana. Nokuba boobo, lusyomo lwabo muli Jehova lwabayumya alimwi bazumanana kwaambila bantu mulumbe wabulangizi wamu Bbaibbele.

Bantu bakabona kukkalikana alimwi akuliyumya nkobacita ba Kehinde a Bintu. Buzuba bumwi bamuka Ukoli, bakaambila mweenzinyina umwi waba Kehinde a Bintu kuti: “Amumulete mukaintu wakafwidwa bana bobilo, pele ucizumanana kukambauka mulumbe wamu Bbaibbele. Ndiyanda kuzyiba cimupa kuliyumya.” Bintu naakasika aŋanda yabo, bamuka Ukoli bakamwaambila kuti: “Ndiyanda kuzyiba ncocizumanana kukambauka makani aa Leza iwakakujaila bana bako. Leza wakandijaila mwana wangu musimbi omwe buyo ngondakajisi. Kuzwa ciindi eeco tandicimuyandi Leza amwainda.” Bintu wakabelesya Bbaibbele kupandulula icipa kuti bantu kabafwa alimwi ambotukonzya kuba masimpe kuti ibakatusiya baya kubusyigwa.—Incito 24:15; Ba-Roma 5:12.

Kuzwa waawo, bamuka Ukoli bakati: “Ndakali kuyeeya kuti Leza nguujaya bantu. Ino ndazyiba bwini makani mbwaabede.” Wakatalika kwiiya Bbaibbele a Bakamboni ba Jehova kutegwa aiye zisyomezyo zya Leza.

Kabbokesi kali apeeji 6]

‘Ndilayanda Kugwasya, Pele Tandizi naa Inga Ndatalikila Aali’

Mbwaanga bazyali abanabakwabo mwana wakafwa bali mubuumba, ibeenzinyina balakonzya kweenkela kubagwasya. Balayanda kugwasya, pele balayoowa kuti ndiza balaamba cimwi iciti batyompye naa balalubizya calo citiipe kuti bacimwe kwiindilila banamukwasyi. Zyeezi nzila zimwi zibakonzya kubelesya aabo ‘bayanda kugwasya pele batazyi aakutalikila.’

❖ Mutani kubatantamuki bafwidwa akaambo kakuti tamucizi cakwaamba naa cakucita. Kuti naa mwabaswaya balakonzya kuyumizigwa. Sena tamucizyi cakwaamba aciindi eeci? Kubaambila kuti mwausa kulufwu lwacitika mumukwasyi kulakonzya kubatondezya kuti mulabayanda. Sena mulayoowa kulila akaambo kakuyeeya kuti ndiza mulabapa kuusa kapati? Ibbaibbele lyaamba kuti: “Mulile abaabo balila.” (Baloma 12:15, Ci) Kulila kwenu kutondezya kuti mwausa alimwi kulabaumbulizya.

❖ Amubelesye bupampu. Sena tamukonzyi kubajikila cakulya? Sena tamukonzyi kubasanzyila mbale? Sena inga mwabaulila naa kubaletela ziyandika? Mutaambi kuti, “Naa kuli ncomuyanda inga mwandiita.” Nokuba kuti majwi aaya mabotu, alakonzya kutondezya bazyali banji bafwidwa kuti mujisi bubi. Muciindi caboobo, mulakonzya kubuzya kuti, “Ino ncinzi ncondikonzya kucita lino?” bamwaambila amuucite mulimo ooyo. Pele tamweelende kusika mumasena ngomutazumizidwe muŋanda naa kubandika twaambo tutamujatikizyi.

❖ Tamweelede kwaamba kuti, “Ndilizi mbomulimvwide.” Tobantu tulaindana mbotulimvwa kuti naa twafwidwa. Nokuba kuti andinywe mwakafwidwa kale mwana, tamuzyi mbubalimvwide balo.

❖ Iciindi cilamfwu cilainda mukwasyi kautana kkalikana mbuli mbuwakabede. Kamuzumanana kugwasya kusikila mpomukonzya. Kuzwa ciindi naacitika buyo malila mukwasyi ooyu ulagwasigwa, pele lugwasyo luyandika kuzumanana kwasondo naa kwamyezi kuzwa ciindi eeco. *

Bupanduluzi buyungizidwe

[Zifwanikiso izili apeeji 7]

Zibalo zyamu Bbaibbele zitondezya kuti Jesu ulijisi nguzu alimwi uliyandide kubabusya bana