Dai Pagsuwayon an Pinagsaro nin Dios
Dai Pagsuwayon an Pinagsaro nin Dios
“Bako na sindang duwa, kundi sarong laman. Kun siring, an pinagsaro nin Dios dai pagsuwayon nin siisay man.”—MATEO 19:6.
1, 2. Taano ta sono sa Kasuratan sagkod realistiko na laoman na an mga mag-agom magkakaigwa nin mga problema paminsanminsan?
IMAHINARA na kamo mabiahe nin halawig na may darang auto. Mapapaatubang daw kamo sa mga problema mantang nagbibiahe? Bako nanggad na madonong na ipamugtak na dai magkakaigwa nin mga problema! Halimbawa, tibaad mapaatubang kamo sa maraot na kamugtakan nin panahon, na kinakaipuhan nindong magluwayluway asin mapagmaan na magpadagos. Mantang nagbibiahe, tibaad magkaaberiya na dai nindo kayang resolberan, kaya kaipuhan nindong gumilid sa tinampo asin humagad nin tabang. An siring daw na mga situwasyon mapangyari sa saindo na magkonklusyon na napasala kamo sa desisyon nindong magbiahe asin na maninigo nindong bayaan an saindong auto? Dai. Kun nagbibiahe nin harayo, inaantisipar na nindo an mga problema asin madonong na naghahanap nin mga paagi tanganing maatubang an mga iyan.
2 Totoo man iyan sa pag-agom. Dai malilikayan an mga problema, asin bakong madonong na laoman kan magkailusyon na nagpaplanong magpakasal na puro na sana kaogmahan an buhay may agom. Sa 1 Corinto 7:28, prangkang sinasabi kan Biblia na an mga mag-agom magkakaigwa nin “kahorasaan sa saindang laman.” Taano ta siring kaini? Sa simpleng pagtaram, huli ta an mga mag-agom bakong sangkap, asin nabubuhay kita sa “delikadong mga panahon na masakit pakibagayan.” (2 Timoteo 3:1; Roma 3:23) Huli kaini, dawa an mag-agom na magkabagay asin espirituwal an kaisipan mapapaatubang sa mga problema paminsanminsan.
3. (a) Paano minamansay nin dakol sa kinaban an pag-agoman? (b) Taano an mga Kristiano ta nagmamaigot na papagdanayon an saindang pag-agoman?
3 Sa kinaban sa presenteng panahon, kun an mga mag-agom napapaatubang sa mga problema, an enot na reaksion ninda iyo na taposon an pag-agoman. Sa dakol na kadagaan, padakol nang padakol an nagdidiborsio. Minsan siring, an tunay na mga Kristiano inaatubang an mga problema imbes na dulagan iyan. Taano? Huling minamansay ninda an pag-agom bilang sagradong regalo hale ki Jehova. Si Jesus nagsabi mapadapit sa mga mag-agom: “An pinagsaro nin Dios dai pagsuwayon nin siisay man.” (Mateo 19:6) Totoo, bako pirmeng pasil na mamuhay sono sa pamantayan na iyan. Halimbawa, an mga paryente asin iba pa—pati an nagkapirang parakonseho sa mag-agom—na dai minimidbid an mga prinsipyo sa Biblia sa parate sinasadol an mga mag-agom na magsuwayan o magdiborsio huli sa mga dahelan na bakong sono sa Kasuratan. * Alagad aram kan mga Kristiano na mas marahay nanggad na pakarhayon asin papagdanayon an pag-agoman imbes na taposon tolos iyan. Tunay nanggad, mahalagang marhay na sa kapinonan pa sana determinado na kitang gibohon an mga bagay-bagay oyon sa paagi ni Jehova—bakong oyon sa hatol nin iba.—Talinhaga 14:12.
Pag-atubang sa mga Kadepisilan
4, 5. (a) Anong mga problema an dapat na atubangon sa sarong pag-agoman? (b) Taano ta an mga prinsipyo na yaon sa Tataramon nin Dios talagang epektibo dawa kun minalataw an mga problema sa pag-agoman?
4 An totoo iyo na an gabos na pag-agoman nangangaipo nin atension sa panapanahon. Sa kadaklan na kamugtakan, kalabot dian an paghusay sa saradit na dai pagkakaoyon. Pero, sa nagkapirang pag-agoman, tibaad igwa nin mas magabat na mga problema na nagsasapeligro sa pundasyon kan relasyon nin mag-agom. Kun beses, tibaad kaipuhan nindong humagad nin tabang sa may kabatidan asin may agom na Kristianong magurang sa kongregasyon. Minsan siring, an mga situwasyon na ini dai nangangahulogan na dai nagin mapanggana an saindong pag-agoman. Itinatampok sana kaiyan an kahalagahan kan maingat na pagsunod sa mga prinsipyo sa Biblia tangani na maresolberan an mga problema.
5 Bilang an Kaglalang kan rasa nin tawo asin an Kagtugdas kan areglo nin pag-agoman, si Jehova an mas nakakaaram kisa siisay pa man kan kaipuhan niato tanganing magkaigwa nin mapangganang pag-agoman. An hapot iyo na, Kita daw mahinanyog sa hatol na manonompongan sa saiyang Tataramon asin masunod dian? Tunay nanggad na makikinabang kita kun gigibohon niato iyan. Sinabi ni Jehova sa saiyang suanoy na banwaan: “O kun ika sana kutana totoong matao nin atension sa sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.” (Isaias 48:18) An pagsusog sa mga giya na yaon sa Biblia puedeng magbunga nin mapangganang pag-agoman. Estudyaran nguna niato an hatol na itinatao kan Biblia sa mga agom na lalaki.
“Padagos Nindong Mamotan an Saindong Agom na Babae”
6. Ano an sono sa Kasuratan na hatol para sa mga agom na lalaki?
6 An surat ni apostol Pablo sa mga taga Efeso igwa nin malinaw na mga giya para sa mga agom na lalaki. Si Pablo nagsurat: “Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon asin itinao an saiyang sadiri para dian. Sa paaging ini an mga agom na lalaki kaipuhan na mamoot sa saindang agom na babae siring sa saindang sadiring hawak. An namomoot sa saiyang agom na babae namomoot sa saiya man sana, huli ta noarin man mayong tawo na naongis sa saiyang sadiring laman; kundi pinapakakan nia asin minamahal iyan, arog kan ginigibo man kan Cristo sa kongregasyon. Minsan siring, an lambang saro sa saindo mamoot man sa saiyang agom na babae arog kan pagkamoot nia sa saiyang sadiri.”—Efeso 5:25, 28, 29, 33.
7. (a) Ano an maninigong magin lataw na kabtang kan pundasyon nin sarong Kristianong pag-agoman? (b) Paano padagos na mamomotan kan mga agom na lalaki an saindang agom?
7 Dai tinotokar ni Pablo an gabos na posibleng problema na tibaad maglataw sa pag-oltanan nin mag-agom. Imbes, tinokar nia an pundamental na solusyon kan problema paagi sa pagsambit sa kun ano an maninigong magin lataw na kabtang kan pundasyon kan lambang Kristianong pag-agoman—an pagkamoot. Sa katunayan, an pagkamoot nasambitan nin anom na beses sa mga bersikulo na yaon sa enotan. Mangnohon man na sinasabihan ni Pablo an mga agom na lalaki: “Padagos nindong mamotan an saindong agom na babae.” Daing duda, minimidbid ni Pablo na mas pasil na marhay an mamoot kisa mapagdanay an pagkamoot. Nangorognang totoo ini sa “huring mga aldaw” na ini, na an dakol “mamomoton sa sainda man sana” asin “mga dai maoyonan.” (2 Timoteo 3:1-3) An siring na negatibong mga kualidad dikit-dikit na minapaluya sa dakol na pag-agoman ngonyan, alagad dai totogotan nin sarong mamomoton na agom na lalaki na makaimpluwensia sa saiyang kaisipan asin gawe-gawe an maimot na ugale kan kinaban na ini.—Roma 12:2.
Paano Nindo Ikakatao an mga Pangangaipo kan Saindong Agom na Babae?
8, 9. Sa anong mga paagi na itinatao nin sarong Kristianong agom na lalaki an mga pangangaipo kan saiyang agom?
8 Kun kamo sarong Kristianong agom na lalaki, paano nindo malalabanan an maimot na mga tendensia asin ikakapaheling an tunay na pagkamoot sa saindong agom? Sa saiyang mga tataramon sa mga taga Efeso na kinotar sa enotan, sinabi ni Pablo an duwang bagay na kaipuhan nindong gibohon—itao an mga pangangaipo kan saindong agom, asin pakamahalon sia siring kan ginigibo nindo sa sadiri nindong hawak. Paano nindo ikakatao an mga pangangaipo kan saindong agom? An sarong paagi iyo an pagtao kan pisikal na mga pangangaipo kan saindong agom. Si Pablo nagsurat ki Timoteo: “Tunay na kun an siisay man dai nagsusustento sa mga sadiri nia, asin orog na sa kasararo nia sa harong, sia nagpainda kan pagtubod asin orog pa karaot kisa sa tawong dai nin pagtubod.”—1 Timoteo 5:8.
9 Minsan siring, labi pa an kalabot kisa sa pagtao sana nin kakanon, gubing, asin istaran. Taano? Huling an agom na lalaki puedeng magin marahayon na paratao nin materyal na mga pangangaipo kan saiyang agom alagad nagkukulang sa pagpanigo kan emosyonal asin espirituwal na pangangaipo kaini. Mahalagang marhay an pagtao kan huring nasambitan na mga pangangaipong ini kan agom na babae. Totoo, dakol na Kristianong lalaki an sibot na marhay sa pag-asikaso sa mga bagay na may koneksion sa kongregasyon. Alagad an pagkaigwa nin magabat na mga paninimbagan sa kongregasyon dai nangangahulogan na papabayaan na kan agom na lalaki an pag-otob nia kan tao nin Dios na mga obligasyon bilang payo kan pamilya. (1 Timoteo 3:5, 12) Sa pagkomento sa bagay na ini, an magasin na ini nagsambit kan minasunod na pahayag nagkapirang taon na an nakaagi: “Kaoyon kan mga kahagadan sa Biblia, masasabing an ‘pagsongko sa pagpastor nagpopoon sa harong.’ Kun papabayaan nin sarong magurang sa kongregasyon an saiyang pamilya, puedeng mawara sa saiya an saiyang pribilehio.” * Malinaw nanggad, kaipuhan na itao nindo an mga pangangaipo kan saindong agom—sa pisikal, emosyonal asin, an pinakaimportante sa gabos, sa espirituwal.
Ano an Boot Sabihon kan Pakamahalon an Saindong Agom na Babae?
10. Paano papakamahalon nin sarong agom na lalaki an saiyang agom?
10 Kun minamahal nindo an saindong agom na babae, aasikasohon nindo sia huling namomotan nindo sia. May nagkapirang paagi na magigibo nindo ini. Enot, magtao nin igong panahon na makaibanan an saindong agom. Kun papabayaan nindo an saindong agom sa bagay na ini, an pagkamoot nia saindo puedeng lumipot. Konsideraron man na an panahon asin atension na iniisip nindong kaipuhan kan saindong agom tibaad bako man an namamatean niang kaipuhan nia. Iyan bako sanang pagsabi na minamahal nindo an saindong agom. Dapat na namamatean kan saindong agom na sia minamahal. Si Pablo nagsurat: “An lambang saro maghanap, bakong kan saiyang karahayan, kundi kan sa iba.” (1 Corinto 10:24) Bilang mamomoton na agom na lalaki, gusto nindong masierto na nasasabotan nindo kun ano talaga an mga pangangaipo kan saindong agom.—Filipos 2:4.
11. Paanong an relasyon kan agom na lalaki sa Dios asin sa kongregasyon naaapektaran kan pagtratar nia sa saiyang agom?
11 An saro pang paagi tanganing ipaheling na minamahal nindo an saindong agom iyo an pagtratar sa saiya sa mapagpadangat na paagi, sa pagtaram sagkod sa paggawe. (Talinhaga 12:18) Nagsurat si Pablo sa mga taga Colosas: “Kamong mga agom na lalaki, padagos na mamotan an saindong agom na babae asin dai kamo maanggot sa sainda na may kapaitan.” (Colosas 3:19) Oyon sa sarong reperensia, an huring kabtang kan tataramon ni Pablo puedeng itradusir sa idiomatikong paagi na “dai nindo sia pagtrataron na garo katabang” o “dai nindo sia pag-oriponon.” An agom na lalaki na garo diktador—magsalang sa pribado o sa publiko—tunay nanggad na dai nagpapaheling na minamahal nia an saiyang agom. Huli sa maringis na pagtratar nia sa saiyang agom, puedeng maapektaran an saiyang relasyon sa Dios. Si apostol Pedro nagsurat sa mga agom na lalaki: “Padagos na makiiba sa siring na paagi sa [saindong agom] segun sa kaaraman, na tinatawan sinda nin onra siring sa lalagan na mas maluya, an babae, mantang kamo man mga paramana sa kaibanan ninda kan dai na kutana maninigong biyaya nin buhay, tanganing an saindong mga pamibi dai maolang.” *—1 Pedro 3:7.
12. Ano an manonodan nin sarong Kristianong agom na lalaki sa paagi kan pagtratar ni Jesus sa Kristianong kongregasyon?
12 Dai noarin man pagbali-walaon an pagkamoot kan saindong agom. Siertohon liwat sa saiya an saindong nagdadanay na pagkamoot. Si Jesus nagtao nin halimbawa para sa Kristianong mga agom na lalaki sa paagi kan pagtratar nia sa Kristianong kongregasyon. Sia maboot asin mapagpatawad—dawa kan an saiyang mga parasunod paorootrong nagpaheling nin negatibong mga ugale. Sa dahelan na iyan masasabi ni Jesus sa iba: “Madia kamo sa sako, . . . huli ta ako mahoyo asin may kababaan an puso, asin makakakua kamo nin kaginhawahan para sa saindong kalag.” (Mateo 11:28, 29) Bilang pag-arog ki Jesus, tinatratar kan Kristianong agom na lalaki an saiyang agom kapareho kan pagtratar ni Jesus sa kongregasyon. An lalaki na talagang minamahal an saiyang agom, na ipinapaheling ini sa tataramon asin gibo, magigin gikanan nin tunay na kaginhawahan sa agom na babae.
Mga Agom na Babae na Namumuhay Kaoyon kan mga Prinsipyo sa Biblia
13. Anong mga prinsipyo sa Biblia an makakatabang sa mga agom na babae?
13 An Biblia igwa man nin mga prinsipyo na makakatabang sa mga agom na babae. An Efeso 5:22-24, 33 nagsasabi: “Magpasakop an mga agom na babae sa saindang agom na lalaki nin siring sa Kagurangnan, huli ta an agom na lalaki iyo an payo kan saiyang agom na babae kun paanong si Cristo iyo man an payo kan kongregasyon, mantang sia an paraligtas kan hawak na ini. Sa katunayan, kun paanong an kongregasyon nagpapasakop ki Cristo, siring man an mga agom na babae sa saindang agom na lalaki sa gabos na bagay. . . . An agom na babae maninigong magkaigwa nin hararom na paggalang sa saiyang agom.”
14. Taano ta an prinsipyo nin pagpasakop na sono sa Kasuratan dai nakakapamenos sa mga babae?
14 Mangnohon an itinaong pagdodoon ni Pablo sa pagpasakop asin paggalang. Ipinapagirumdom sa agom na babae na magpasakop sia sa saiyang agom. Kaoyon ini kan areglo nin Dios. May nakakasakop sa gabos na nabubuhay na linalang sa langit asin sa daga. Dawa si Jesus nagpapasakop ki Jehova Dios. (1 Corinto 11:3) Siempre, nagigin mas pasil para sa agom na babae na magdanay na nagpapasakop sa saiyang agom na naggagamit kan pagkapayo kaini sa tamang paagi.
15. Ano an nagkapira sa mga hatol kan Biblia para sa mga agom na babae?
15 Sinabi man ni Pablo na an agom na babae “maninigong magkaigwa nin hararom na paggalang sa saiyang agom.” An Kristianang agom maninigong magpaheling nin “toninong asin mahoyong espiritu,” na dai nakikidiskutir nin may pagkaarogante sa saiyang agom o nagsasadiri man nin desisyon. (1 Pedro 3:4) An diosnon na agom na babae nagmamaigot na marhay para sa ikakarahay kan pamilya asin nagtatao nin onra sa saiyang payo. (Tito 2:4, 5) Maghihingoa siang magtaram nin marahay dapit sa saiyang agom asin sa siring dai magibo nin ano man na mapangyari sa lalaki na dai igalang nin iba. Sia magmamaigot man na marhay tanganing magin mapanggana an mga desisyon kan saiyang agom na lalaki.—Talinhaga 14:1.
16. Ano an manonodan kan Kristianang mga agom sa halimbawa ni Sara asin Rebeca?
16 An pagkaigwa nin toninong asin mahoyong espiritu dai nangangahulogan na an sarong Kristiana mayo nin mga opinyon o na bakong mahalaga an saiyang iniisip. An diosnon na mga babae kan suanoy, arog ni Sara asin Rebeca, dai nag-alangan na ipahayag an saindang ikinakapurisaw manongod sa mga bagay-bagay, asin an rekord sa Biblia nagpapaheling na inoyonan ni Jehova an saindang ginibo. (Genesis 21:8-12; 27:46–28:4) Puede man na ipaaram kan Kristianang mga agom an saindang mga saboot. Minsan siring, maninigo nindang gibohon iyan sa makonsiderasyon, bakong mapagmenos na paagi. Manonompongan ninda na an siring na pakikikomunikar sa lambang saro magigin mas kawiliwili asin epektibo.
An Papel nin Kapanugaan
17, 18. Ano an nagkapira sa mga paagi na malalabanan nin mga mag-agom an mga pagprobar ni Satanas na raoton an pag-agoman?
17 An pag-agom sarong bilog na buhay na kapanugaan. Kun siring, an agom na lalaki sagkod an agom na babae maninigong magkaigwa nin tunay na pagmawot na magin mapanggana an pag-agoman. An kawaran nin bukas na komunikasyon puedeng makadagdag sa mga problema asin grumabe iyan. Parateng marhay, an mga mag-agom dai na nag-oolay kun nagkakaigwa nin mga problema, na nagreresulta sa paghinanakit. May mga agom na naghahanap pa ngani nin paagi tanganing makabutas sa agom ninda, na tibaad nagkakaigwa nin romantikong interes sa bako nindang agom. Si Jesus nagpatanid: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.”—Mateo 5:28.
18 Hinatolan ni apostol Pablo an gabos na Kristiano, kaiba an may agom na mga Kristiano: “Maanggot kamo nin grabe, pero dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.” (Efeso 4:26, 27) An satong pangenot na kaiwal, si Satanas, nagmamaigot na aprobetsaran an dai pagkaintindihan na puedeng lumataw sa pag-oltanan nin mga Kristiano. Dai pagtogotan na magin mapanggana sia! Kun lumataw an mga problema, magsiyasat sa sinasabi kan Biblia manongod sa kaisipan ni Jehova sa mga bagay-bagay, na ginagamit an mga publikasyon na basado sa Biblia. Pag-olayan an dai pagkaintindihan sa kalmado asin onestong paagi. Dapat na an talagang ginigibo nindo kaoyon kan nanodan nindo manongod sa mga pamantayan ni Jehova. (Santiago 1:22-25) Kun mapadapit sa saindong pag-agoman, magin determinado na danay na maglakaw kaiba nin Dios bilang mag-agom, asin dai pagtogotan an siisay man o an ano man na pagsuwayon an pinagsaro nia!—Miqueas 6:8.
[Mga Nota sa Ibaba]
^ par. 3 Helingon an kahon na “Divorce and Separation” sa Awake! na Pebrero 8, 2002, pahina 10, ipinublikar kan Mga Saksi ni Jehova.
^ par. 9 Helingon an The Watchtower, Mayo 15, 1989, pahina 12.
^ par. 11 Tanganing makualipikar sa mga pribilehio sa Kristianong kongregasyon, an sarong lalaki dapat na “dai nangongolog”—sa ibang pagtaram, saro na nambubugbog o nananakot sa berbal na paagi. Sa siring, an isyu kan The Watchtower na Setyembre 1, 1990 nagsasabi sa pahina 25: “An sarong lalaki dai kualipikado kun sia minagawe sa diosnon na paagi sa ibang lugar alagad garo diktador kun nasa harong.”—1 Timoteo 3:2-5, 12.
Nagigirumdoman daw Nindo?
• Taano ta dawa an Kristianong mga mag-agom nakakaeksperyensia nin mga problema?
• Paano ikakatao nin agom na lalaki an mga pangangaipo kan saiyang agom asin ikakapaheling na minamahal nia ini?
• Ano an puedeng gibohon nin sarong agom na babae tanganing ipaheling na sia may hararom na paggalang sa saiyang agom?
• Paano papakosogon nin mag-agom an saindang kapanugaan?
[Mga Hapot Para sa Pag-adal]
[Ritrato sa pahina 20]
An sarong agom na lalaki maninigo na magin marahay na paratao, bako sanang sa materyal kundi pati sa espirituwal
[Ritrato sa pahina 21]
An lalaking minamahal an saiyang agom gikanan nin kaginhawahan sa agom na babae
[Ritrato sa pahina 23]
Ipinapaaram kan Kristianang mga agom an saindang saboot sa magalang na paagi