Pa separ sa ki Bondye in ini ansanm

“Zot nepli de me en sel. Alor sa ki Bondye in ini ansanm zonm pa devre separe.”—MATYE 19:6.

1, 2. Akoz de dimoun marye pou ekspekte rankontre serten problenm tanzantan?

MAZINEN ki ou pe al fer en gran vwayaz lo en bato. Eski ou kapab rankontre bann problenm lo lanmer? I evidan, pa i vre. Par egzanp, ou kapab fer fas avek en tanpet, ki pou obliz ou vey bann laroul ki ti kapab fer ou bato savire. Oubyen ou kapab ganny en problenm avek masin. Si ou pa kapab aranz ou menm, ou pou bezwen demann led avek lezot ki dan zanmirant. Si ou ti rankontre bann problenm parey, eski sa i vedir ki i pa ti en bon nide pour ou konmans sa vwayaz lo sa bato, e ki i ti a pli bon pour debaras ou avek sa bato? Pa neseserman. Si ou fer en gran vwayaz, ou ekspekte rankontre serten problenm e fer fason pour rod en solisyon.

² I parey dan maryaz. Ou pou bezwen ganny serten problenm, e i pa ti pou fer sans pour en koup ki pe anvizaze marye ekspekte en lavi parfetman ere. Dan 1 Korentyen 7:28, Labib i fran ler i fer kler ki msye ek madanm pou “ganny problenm dan [zot] lavi.” Akoz sa? I ase senp, msye ek madanm i enparfe e nou pe viv dan bann “letan difisil.” (2 Timote 3:1; Romen 3:23) Alors menm si de dimoun ki al byen ansanm e ki annan en bon spirityalite i marye, zot pou rankontre serten problenm tanzantan.

3. (a) Ki mannyer bokou dimoun i vwar maryaz dan lemonn? (b) Akoz bann Kretyen i fer tou pour protez zot maryaz?

³ Dan sa lemonn modern, kan serten koup i rankontre problenm, premye keksoz ki zot mazinen se pour separe. Dan bokou pei, lakantite divors pe ogmante dan en fason enkrwayab. Parkont, bann vre Kretyen pa per fer fas avek problenm me plito zot esey rezourd zot. Akoz? Akoz zot konsider maryaz konman en kado sakre sorti kot Zeova. Zezi ti dir konsernan bann koup marye: “Sa ki Bondye in ini ansanm zonm pa devre separe.” (Matye 19:6) I vre i pa touzour fasil pour viv dapre sa standar. Par egzanp, serten dimoun ki kapab enkli nou fanmiy oubyen serten travayer sosyal ki pa respekte bann prensip Labib i souvan-d-fwa ankouraz bann koup pour separe oubyen divorse pour bann rezon ki pa an armoni avek Labib. * Me bann Kretyen i konn tre byen ki i pli bon pour esey aranze e amelyor zot maryaz plito ki deswit separe. An realite, i neseser ki depi okonmansman menm, nou determinen pour fer keksoz dapre sa ki Zeova i kontan, pa dapre sa ki lezot i dir.—Proverb 14:12.

Sirmont Problenm

4, 5. (a) Ki difikilte ki bezwen ganny sirmonte dan maryaz? (b) Akoz bann prensip Labib i vreman marse menm ler problenm i leve dan maryaz?

⁴ An realite, tou maryaz i demann bann pti azisteman tanzantan. Laplipar ditan, i pou neseser pour regle bann pti dezakor. Toudmenm, dan serten maryaz, i kapab annan bann dezakor pli serye ki ti kapab menm anpes sa relasyon kontinyen. Parler, dan kongregasyon ou kapab demann led en ansyen eksperyanse ki’n marye. Menm si i leka,  sa pa vedir ki ou maryaz pa kapab reisi. Parkont sa i montre ki i enportan pour swiv byen bann prensip dan Labib pour trouv bann solisyon ou problenm.

⁵ Zeova i Kreater bann imen e i ti osi konmans laranzman maryaz. Pour sa rezon, i konn pli byen ki nenport dimoun, kwa ki neseser pour reisi dan maryaz. Alor nou bezwen demann nou lekor, Eski nou pou ekout e swiv konsey ki Parol Bondye i donnen? Asire ki nou pou benefisye si nou met sa bann konsey an pratik. Zeova ti dir son pep dan letan lontan: “Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.” (Izai 48:18) Ler nou swiv bann gidans ki sorti dan Labib, sa i kapab fer nou reisi dan maryaz. Premyerman, annou get konsey ki Labib i donn bann mari.

Kontinyen “kontan zot Madanm”

6. Ki konsey Labib i donn bann mari?

⁶ Dan let ki zapot Pol ti ekrir kongregasyon Efez, i annan bann gidans kler pour bann mari. Pol ti ekrir: “Zot, bann mari, [kontinyen] kontan zot madanm parey Kris in kontan [kongregasyon] e in donn son lavi pour li. Bann zonm devre alor, kontan zot madanm parey zot kontan zot prop lekor. Sa ki kontan son madanm, i kontan son prop lekor. Annefe napa personn ki’n deza ay son prop lekor, okontrer, i nouri li e pran byen swen avek li, parey Kris i fer pour [kongregasyon]. Me i osi aplik pour zot. Fodre ki sak mari i kontan son madanm parey son prop lekor.”—Efezyen 5:25, 28, 29, 33.

7. (a) Kwa ki devret baz en maryaz Kretyen? (b) Ki mannyer en mari i montre ki i pe kontinyen kontan son madanm?

⁷ La Pol pa pe diskit tou sitiasyon ki kapab leve dan en maryaz ant en msye ek son madanm. Plito, i fer resortir vre solisyon ki kapab ede pour rezourd preski tou problenm. I pe koz lo sa ki devret pli enportan dan tou maryaz Kretyen, sa i lanmour. Annefe, lanmour i ganny mansyonnen set fwa dan sa bann verse anler. I enteresan lafason ki Pol ti koz lo la dan langaz Grek, i ti demann bann mari pour “[kontinyen] kontan zot madanm.” I evidan ki Pol ti rekonnet ki i pli fasil pour tonm anmoure ki pour kontinyen kontan nou konzwen. Sirtou la ki nou pe viv dan bann “dernyen zour,” kot dimoun i “egois” e ‘pa pare pour tonm dakor.’ (2 Timote 3:1-3) Sa bann move tre i afekte bann maryaz ozordi, me en bon mari pa pou les lenfliyans egois sa lemonn afekte son bann panse ek aksyon.—Romen 12:2.

Ki mannyer ou pou donn ou Madanm sa ki i bezwen?

8, 9. Dan ki fason en mari i bezwen donn son madanm sa ki i bezwen?

⁸ Si ou en mari Kretyen,  ki mannyer ou kapab rezet bann tandans egois e demontre en lanmour senser pour ou madanm? I enteresan sa ki Pol ti dir kongregasyon Efez ki ti ganny mansyonnen oparavan. La Pol ti montre de keksoz ki ou bezwen fer pour ou madanm, ou bezwen nouri li, setadir donn li sa ki i bezwen e pran swen avek li, zis parey ou fer avek ou prop lekor. Ki mannyer ou kapab donn ou madanm sa ki i bezwen? En fason i ler ou donn li bann keksoz materyel dapre son bezwen. Pol ti ekrir Timote: “Si en dimoun i pa port swen son prop parante sirtou bann ki viv dan son lakaz, i’n abandonn lafwa e i pir ki en non-krwaryan.”—1 Timote 5:8.

⁹ Toudmenm, pa zis manze, lenz ek lakaz ki enportan. Akoz? Akoz en mari i kapab donn son madanm en kantite keksoz materyel e pourtan pa donn li sa ki bezwen dan domenn emosyonnel e spirityel. E sanmenm sa bann domenn ki vreman esansyel. I vre ki bokou mari Kretyen i byen okipe avek bann responsabilite dan kongregasyon. Me menm si en msye i annan bokou responsabilite dan kongregasyon, sa pa vedir ki i kapab negliz responsabilite ki Bondye in donn li konman sef fanmiy. (1 Timote 3:5, 12) Konsernan sa size, Latour Veyer ti dir en pe letan pase: “An armoni avek prensip Labib, nou kapab dir ki ‘travay en berze i konmans dan lakour.’ Si en ansyen i negliz son fanmiy, i kapab perdi son privilez konman en ansyen.” * Alor, pa i kler ki ou bezwen donn ou fanmiy sa ki i bezwen dan domenn materyel, emosyonnel e osi sa ki pli enportan dan domenn spirityel.

Ki savedir pran swen avek ou Madanm?

10. Ki mannyer en mari i kapab pran swen avek son madanm?

¹⁰ Si ou pran swen avek ou madanm, ou fer sir ki ou vey lo son byennet akoz ou kontan li. I annan plizyer fason ki ou kapab fer sa. Premyerman, pas ase letan avek ou madanm. Si ou pa pas ase letan avek li, son lanmour pour ou pou diminyen. Mazin osi ki i annan en diferans ant letan ek latansyon ki ou ou krwar ou madanm i bezwen e sa ki li i santi i bezwen. I pa ase pour ou dir ki ou pe pran swen avek li akoz ou kontan li, li i bezwen santi ki ou pran swen avek li e kontan li. Pol ti ekrir: “Personn pa devret rod son prop lentere, me lentere son prosen.” (1 Korentyen 10:24) Konman en bon mari, ou pou fer sir ki ou konpran sa ki ou madanm i vreman bezwen.—Filipyen 2:4.

11. Ki lefe fason en msye i tret son madanm i kapab annan lo son relasyon avek Bondye e avek kongregasyon?

¹¹ En lot fason ki ou kapab montre ki ou vreman pran swen avek ou madanm, se ler ou tret li avek tandres an parol e an aksyon. (Proverb 12:18) Pol ti ekrir bann Kolosyen:  “Bann mari, [kontinyen] kontan zot madanm e pa tret zot dir.” (Kolosyen 3:19) Dapre en liv ki koz lo sa size, dernyen parol Pol ti kapab ganny eksprimen koumsa “pa tret li parey en servant” ouswa “pa fer li vin ou lesklav.” Si en mari i dominer an piblik ouswa kot lakour, i pa pe montre ki i pe vreman pran swen avek son madanm. Ler i tret li dir, sa ti kapab afekte son relasyon avek Bondye. Zapot Pyer ti ekrir konsernan bann mari: “Zot devre viv dan larmoni sakenn avek son madanm e rekonnet ki bann madanm i annan en natir pli feb. Tret zot avek respe parski bann madanm, zot osi partaz ansanm avek zot, sa kado lavi ki Bondye in donnen. Dan sa fason zot lapriyer pa pou ganny okenn lobstak.” *—1 Pyer 3:7.

12. Ki en mari Kretyen i kapab aprann dan lafason ki Zezi ti tret kongregasyon Kretyen?

¹² Pa krwar ki ou madanm pou neseserman toultan kontan ou. Fer li konnen ki ou ankor kontan li. Zezi ti donn en bon legzanp pour bann mari Kretyen dan lafason ki i ti tret kongregasyon. I ti dous, bon avek lezot e pare pour pardonnen, menm si son bann disip ti kontinyen demontre bann move tre. Alor Zezi ti kapab dir avek lezot: “Vin kot mwan, . . . akoz mon dou e mon annan limilite dan mon leker e zot a ganny repo.” (Matye 11:28, 29) Bann mari Kretyen i bezwen tret zot madanm parey Zezi ti tret kongregasyon. En msye ki vreman pran swen avek son madanm, andotmo ki demontre sa an parol e an aksyon, pou en vre sours rekonfor pour son madanm.

Bann Madanm ki viv dapre bann Prensip Labib

13. Ki prensip dan Labib ki kapab ed bann madanm?

¹³ Dan Labib, i osi annan bann prensip ki kapab ed bann madanm. Efezyen 5:22-24, 33 i dir: “Bann madanm, zot devre obei zot mari, parey zot obei Senyer. Parski en mari i sef son madanm parey Kris i sef [kongregasyon]. Kris in sov [kongregasyon] ki son lekor. Alor bann madanm i devre touzour obei zot mari parey [kongregasyon] i obei Kris. . . . Sak madanm i [devret] respekte son mari.”

14. Akoz lefe ki en madanm i bezwen soumet avek son msye pa abes li?

¹⁴ Ou pou remarke ki Pol pe met lanfaz lo soumet e annan respe. Sa i rapel bann madanm pour zot soumet avek zot mari e i an  akor avek laranzman Bondye. Annefe, tou kreasyon dan lesyel oubyen lo later i bezwen obei en lot dimoun. Menm Zezi i obei son Bondye Zeova. (1 Korentyen 11:3) Byensir, ler en mari i egzers son lotorite dan en bon fason, sa i fer li pli fasil pour sa madanm kontinyen soumet avek li.

15. Ki konsey Labib i donn bann madanm?

¹⁵ Pol ti osi dir ki bann “madanm i [devret] respekte [zot] mari.” En madanm Kretyen i devret demontre “en lespri bon e trankil.” I pa pou rezet lotorite son msye avek larogans ouswa vin endepandan avek li. (1 Pyer 3:4) En bon madanm Kretyen i travay dir pour byennet son fanmiy e i anmenn loner pour son sef. (Tit 2:4, 5) I pou esey koz byen lo son mari avek lezot e i pa pou fer nanryen ki ti kapab fer lezot pa respekte li. I pou osi fer bokou zefor pour ki desizyon son mari i reisi.—Proverb 14:1.

16. Ki bann madanm Kretyen i kapab aprann avek legzanp Sara oubyen Rebeka?

¹⁶ Bann madanm i ganny demande pour annan en lespri bon e trankil, me sa pa vedir ki en madanm Kretyen pa kapab annan son pwennvi ouswa ki sa ki i panse napa lenportans. Bann madanm fidel dan letan lontan, parey Sara ek Rebeka, ti pran linisyativ pour eksprim zot konsern lo sa ki ti enportan pour zot, e Labib i montre ki Zeova ti dakor avek sa. (Zenez 21:8-12; 27:46–28:4) Pareyman, bann madanm Kretyen i kapab eksprim zot santiman. Parkont, zot devret fer li avek respe, pa dan zar pe abes zot mari. Ler zot fer sa, zot pou remarke ki kominikasyon pou pli agreab e ki zot mari pou pli byen ekoute.

Lenportans reste fidel avek son Langazman

17, 18. Mansyonn ennde fason ki en msye ek en madanm i kapab anpes Satan esey kas zot maryaz.

¹⁷ Maryaz i en langazman pour lavi. Alors, tou le de sa msye ek sa madanm i devret annan sa dezir senser pour fer reisi zot maryaz. Ler napa vreman en kominikasyon fran, sa i anmenn fristrasyon e problenm i vin pli grav ankor. Malerezman, laplipar ditan sa de dimoun i aret kominike ler zot rankontre problenm, e finalman zot konmans gard rankin avek kanmarad. Serten i rod solisyon par fer fini avek sa relasyon, dan serten ka zot konmans dakor avek en lot dimoun ki pa zot mari oubyen madanm. Zezi ti donn sa lavertisman: ‘En dimoun ki get en madanm avek dezir i’n deza komet adilter avek li dan son leker.’—Matye 5:28.

¹⁸ Zapot Pol ti konsey tou Kretyen, enkli bann Kretyen marye: “Pran lakoler [me] fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.” (Efezyen 4:26, 27) Nou pli gran lennmi, Satan, pe sey kapitaliz lo bann pti diferans ki kapab leve parler ant de Kretyen. Pa les li reisi! Si problenm i leve, rod sa ki Labib i annan pour dir lo pwennvi Zeova lo sa size, par servi nou bann liv ek magazin. Dan en fason kalm e fran, diskit sa bann dezakor. Si ou aksyon i diferan avek bann standar Zeova, fer zefor pour met an pratik sa ki ou’n aprann. (Zak 1:22-25) An sa ki konsern maryaz, annou determinen pour kontinyen servi Bondye konman en koup, e pour pa les nanryen oubyen personn separ sa ki Bondye in ini ansanm!—Mika 6:8.

[Not anba lo paz]

Eski ou rapel?

• Akoz menm de Kretyen marye pou rankontre serten problenm?

• Ki mannyer en mari i nouri e pran swen avek son madanm?

• Konman en madanm i demontre respe pour son msye?

• Ki mannyer msye ek madanm i kapab reste fidel avek zot langazman?

[Kestyon]

[Portre lo paz 24]

En mari pa selman donn son madanm bann keksoz materyel, me osi spirityel

[Portre lo paz 25]

En msye ki vreman pran swen avek son madanm i en sours rekonfor pour li

[Portre lo paz 26]

Bann madanm Kretyen i eksprim zot santiman avek respe