Guutip ataqatigiilersitai kialuunniit avissaartissanngilai

„Marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai.“ — MATTHÆUSI 19:6.

1, 2. Sooq aappariit ilaannikkut ajornartorsiuteqalertarnissaata naatsorsuutiginissaa Biibili naapertorlugu piviusorsiornerua?

TAKORLOORIARUK umiatsiamik sivisuumik angalaniarlutit aallarniartutit. Aqqutaani unamminiarnartunik nalaataqassanerpit? Taama isumaqanngikkaanni sianiitsorpallannerussaaq. Assersuutigalugu silarlussiulersinnaavutit kigaallattariaqalerlutit mianersornerusariaqalerlutillu. Immaqa umiatsiaq illit aaqqissinnaanngisannik ajoquteqalerpoq uniinnarnissat ikiortissarsiornissallu pisariaqalerlutik. Pissutsit taama innerat pissutigalugu isummissavit aallarsimasariaqanngikkaluarlutit umiatsiarlu qimaannartariaqarlugu? Naagga. Ungasissumut angalassagaanni ajornartorsiuteqalertarnissaa piareersimaffigineqartarpoq, taakkualu qanoq ililluni isumatuumik iliuuseqarfigineqarsinnaanerat paasiniarneqartarpoq.

² Aappariinnermi aamma taamaappoq. Ajornartorsiuteqalertarnissaa pinngitsoorneqarsinnaanngilaq, aappassiariillu katinnissaminnik eqqarsaateqartut sianiitsorpallassapput naatsorsuutigigunikku inuunerup nuannersuujuaannarnissaa. Korinthimiunut allakkat siulliit 7:28-mi toqqaannartumik allassimavoq aappariit ’uinngup piisigut naalliuuteqassasut’ (1900/1961). Sooq taamaappa? Oqaatigilluaannarlugu angutit arnallu naammalluinnanngitsuummata aamma ’ullut atugarliungaarfiusut’ inuuffigigatsigit. (2 Timotheusi 3:1; Romamiut 3:23) Taamaattumik aappariit inooqatigiilluarsinnaagaluarlutillu anersaakkut ittunik pingaartitsigaluartut ilaannikkut ajornartorsiuteqalertassapput.

3. (a) Silarsuarmi inuit ilarpassuinit aappariinneq qanoq isigineqarpa? (b) Sooq kristumiut aappariittuarnissartik sulissutigiuarpaat?

³ Ullumikkut silarsuarmi aappariit aappariittut ajornartorsiuteqaleraangamik qimattarnerat nalinginnaavoq. Nunat ilarpassuini avittut amerligaluttuinnarput. Kristumiulli ilumoortut ajornartorsiutit qimarratiginagit iliuuseqarfigisarpaat. Sooq? Aappariinneq Jehovamit tunissutitut illernartutut isigigamikku. Jiisusi ima oqarpoq: „Guutip ataqatigiilersitai inuup avissaartissanngilai.“ (Matthæusi 19:6) Ilumoorpoq najoqqutassiamik tamatuminnga malinninnissaq ajornaatsuujuaannanngitsoq. Ilaquttat, aappariinnik siunnersuisartut allallu najoqqutassianik Biibilimeersunik akuerinninngitsut aappariinnik siunnersuigajupput Biibilimik tunngaveqanngitsumik averuseqqullugit aveqqullugilluunniit. * Kristumiulli nalunngilaat aappariinnermi ajoqutaasunik iluarsiiniarnissaq aappariiginnarnissarlu isumaalliorluni qimannissaminngarnit pitsaanerungaartoq. Jehovap peqqusineratut iliorniarluta — inuit siunnersuutaannik malinninniarnata — aallaqqaammulli aalajangernissarput pingaaruteqarluinnarpoq. — Ussatit 14:12.

Ajornartorsiutit qanoq qaangerneqartartut

4, 5. (a) Unamminiarnartut suut aappariinnermi nalaanneqanngitsoorsinnaanngillat? (b) Sooq najoqqutassiat Guutip oqaasianiittut aappariinnermi ajornartorsiuteqaleraluaraangat atorluarsinnaappat?

⁴ Aappariit tamavimmik ilaannikkut ajornartorsiummik aaqqiinissaq siunertaralugu immikkut soqutigineqartariaqartarput. Amerlanertigut isumaqatigiinngissutit soorpianngitsut aaqqinneqarnissaat pineqartarpoq. Aappariilli ilaat ilungersunarnerusunik, aappariinnerup tunngavippiaanik navianartorsiortitsisinnaasunik, ajornartorsiuteqarsinnaapput.  Ilaannikkut utoqqaanertamut aappalimmut misilittagaqarluartumut ikioqqullusi saaffiginnittarnissarsi pisariaqartarsinnaavoq. Pissutsilli taama ittut pilertarmata imaanngilaq aappariinnersi iluatsinngitsoortoq. Ajornartorsiutinik aaqqiissagaanni najoqqutassianik Biibilimeersunik malinneqqissaarnissap pingaaruteqarneranut erseqqissaataaginnarput.

⁵ Jehovap, inummik Pinngortitsisuugami aappariinnermillu aaqqissuussinermik pilersitsisuugami, allanit tamanit nalunnginneruaa aappariillualerniarluta sunik pisariaqartitsinersugut. Siunnersuutinik taassuma oqaasianiittunik tusarnaarusunnersugut maleruaarusunnersugullu apeqqutaaginnarpoq. Qularutissaanngilaq taamaaliorutta uagutsinnut iluaqutaassasoq. Jehovap itsaq innuttani ima oqarfigai: „Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ (Esaja 48:18) Biibilimi unnersuussutigineqartunik maleruaaneq aappariillualersitsisinnaavoq. Siullermik misissoriartigu uiusut Biibilimi qanoq siunnersorneqarnersut.

„Nuliasi asajuarsigik“

6. Biibilimi uiusunut qanoq siunnersuuteqarpa?

⁶ Apustili Paulusip Efesosimiunut allagaani uiusunut najoqqutassiaqarpoq erseqqissunik. Paulusi ima allappoq: „Angutit, nuliasi asassavasi [asajuarsigik, NV] soorlu Kristusip ilagiit asagai imminullu tunniulluni taakku pillugit. Taamatut aamma uiusut nuliatik asassavaat namminneq timimittut. Nuliaminik asannittoq imminik asavoq. Inuummi timini uumissunngisaannarpaa, kisianni inuussutissittarpaa paaqqisarlugulu soorlu Kristusip ilagiit taama pisarai. Ilississaarli tamassi immikkut nuliasi immissisut asasussaavasi, nuliaasullu uini mianerisussaavaa [ataqqingaassavaa, NV].“ — Efesosimiut 5:25, 28, 29, 33.

7. (a) Aappariit kristumiut tunngaviannut suna ilaasariaqarpa? (b) Uiusut nuliatik qanoq ilillutik asajuarsinnaavaat?

⁷ Uiusup nuliaasullu akornanni ajornartorsiutaalersinnaasut tamaviisa Paulusip samminngilai. Pingaarnersaasorli ingerlaannaq sammilerpaa aappariit kristumiut tamarmik tunngavigisaannut ilaasariaqartup pingaarutillip, tassa asanninnerup, innersuussutigineratigut. Oqaatsimmi ’asanninneq’-up naggueqatai versini issuarneqartuni arfinileriarlugit eqqaaneqarput. Maluginiaruttaaq Paulusip uiusunut siunnersuutaa una: „Nuliasi asajuarsigik.“ Qularnanngitsumik Paulusip paasisimavaa asannilersoornissaq asannilersooqqajuarnissaminngarnit amerlanertigut ajornannginnerusartoq. Tamanna ingammik atuuppoq ’ulluni kingullerni’ makkunani inuppassuit ’namminissarsiorlutillu’ ’saammartitassaanngiffianni’. (2 Timotheusi 3:1-3) Pissuserineqartut ajortut taama ittut ullumikkut aappariippassuarnut aserorsaataapput, uiusulli asannittup eqqarsartaatsini iliuutsinilu namminissarsiornermit silarsuup ilisarnaatigisaanit ilusilersortinnavianngilaa. — Romamiut 12:2.

Nuliavit pisariaqartitai qanoq isumagisinnaavigit?

8, 9. Uiusup kristumiup nuliani sutigut isumagisussaavaa?

⁸ Uiuguit kristumiu, qanoq ilillutit namminissarsioqqajaaneq  akiorsinnaaviuk nuliallu asanninnermik ilumoortumik ersersitsivigalugu? Paulusip Efesosimiunut siunnersuutimini issuarneqareersuni iliuuserisassatit marluk uparuarpai. Eqqaavaa soorlu illit nammineq timit inuussutissittarneratigut paarineratigullu isumagisarit, taamatuttaaq illit nuliat tamakkunuunatigut isumagissagit. Qanoq ilillutit taamaaliorsinnaavit? Ilaatigut pigisatigut isumassorneratigut, tassa timikkut pisariaqartitaasa isumaginerisigut. Paulusip Timotheusi ima allaffigaa: „Eqqarliminik, pingaartumik inoqutiminik, isumaginninngitsoq uppernerminik tunussisuuvoq uppinngitsumillu ajornerulluni.“ — 1 Timotheusi 5:8.

⁹ Kisiannili uiusup nerisassaqarnissaq, atisassaqarnissaq inissaqarnissarlu kisiisa isumagisussaanngilai. Sooq? Uiusoq nuliaminik pigisatigut isumaginnillaqqissorujussuugaluarluni taassuma misigissutsikkut anersaakkullu pisariaqartitaanik isumaginninngitsoorsinnaasarmat. Uiusup eqqaaneqartunut kingullernut tunngatillugu nuliaminik isumaginninnissaa pingaaruteqartorujussuuvoq. Ilumoorpoq anguterpassuit kristumiut ilagiinnut tunngasunik ulapputeqartartut. Uiusulli teokratiimut tunngasunik akisussaaffeqangaatsiarnini ilaqutariinnut ittuusutut pisussaaffimminik Guutimeersunik sumiginnaanissaminut utoqqatsissutigisinnaanngilaa. (1 Timotheusi 3:5, 12) Tamatumunnga tunngatillugu oqaaseqaatitut Vagttårnet-imi ukiualuit matuma siorna ima allassimasoqarpoq: „Piumasaqaatinit Biibilimeersunit erserpoq ’paarsisutut kiffartorneq angerlarsimaffimmi aallartittartoq’. Utoqqaanertap ilaquttani sumiginnarunigit utoqqaanertatut kiffartornermik immikkut pisinnaatitaaffini annaasinnaavaa.“ * Erseqqippoq nuliannik — timikkut, misigissutsikkut, pingaarnerpaamillu anersaakkut — isumaginnilluarnissat pingaaruteqarluinnartoq.

Nuliamik ’paaqqinninneq’ qanoq paasisariaqarpa?

10. Uiusoq nuliaminik qanoq ’paaqqinnissinnaava’?

¹⁰ Uiusup nuliaminik ’paaqqinninnera’ ima paasisariaqarpoq asagamiuk isumassorluaraa. Illit nuliat assigiinngitsorpassuartigut isumassorluarsinnaavat. Pingaarnerpaamik aappat piffissaqarfigilluartaruk. Tamatuma tungaatigut nuliat sumiginnarukku asajunnaarsinnaavaatit. Mannattaaq eqqumaffigiuk: Immaqa isumaqarputit nuliavit qanoq piffissaqarfigitiginissaa sammineqarnissaminillu qanoq pisariaqartitsitiginera nalunagu, imaassinnaavorli isummat nuliavit nammineq pisariaqartitaanut naapertuutinngitsoq. Nuliat asaneraannassanngilat. Asaneqartutut misigisariaqarpoq. Paulusi ima allappoq: „Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.“ (1 Korinthimiut 10:24) Uiusutut asannittutut, nuliavit pisariaqartitavii paasisimanerlugit qulakkeertariaqarpat. — Filippimiut 2:4.

11. Uiusup nuliaminik pinneriaasia Guutimut ilagiinnullu attaveqarneranut qanoq sunniuteqartarpa?

¹¹ Allatiguttaaq nuliat isumassorsinnaavat taassumunnga soqutigittartuunikkut, oqaatsikkut iliuutsikkullu. (Ussatit 12:18) Paulusip Kolossemiut ima allaffigai: „Uiususi, nuliasi asassavasi,  peqqarniisaarfigeqinasigillu.“ (Kolossemiut 3:19) Paulusip allagaanut taakkununnga tunngatillugu oqaaseqaat naapertorlugu versip naggataatungaa oqariartaatsit assersuutaasut atorlugit aamma ima nutserneqarsinnaavoq: „kiffatut oqaluffigeqinagu“ imaluunniit „inussianngorteqinagu“. Uiusoq — angerlarsimaffimmi imaluunniit kikkut tamarmik takkuanni — qunutitsisoq nuliaminik isumassuisuunngilluinnarpoq. Nuliaminik naakkittaatsumik pinninnermigut Guutimut attaveqarnini ajoquseriaannaavaa. Apustili Petrusi ima allappoq: „Taamatuttaaq ilissi angutit, arnaq [nuliarsi] ilissinnit qajannarnerusoq qajassuullugu inooqatigissavarsi; ataqqissavasilu, taakkuttaarmi saammaannermit tunissutaasumik inuussutaasumik ilumut kingornusseqataasussaammata — qinusarnisi akornuserneqaqqunagit.“ * — 1 Petrusi 3:7.

12. Uiusup kristumiup Jiisusip ilagiinnik pinnittarnera qanoq ilinniarfigisinnaavaa?

¹² Nuliavit asanninnera taamaattussaannartut isiginngisaannaruk. Qularunnaarsittuaruk asallugu. Jiisusip ilagiinnik pinnittarnera uiusunut kristumiunut maligassaavoq. Jiisusi saamallunilu inussiarnersuullunilu isumakkeerfiginnittuuvoq — ajoqersukkani ajortumik pissusilersoqattaaraluartut. Taamaammat Jiisusi ima oqarsinnaasimavoq: „Ornissinga . . . qanilaarama uummatikkullu makitajuikkama; taava qasuerfissarsiumaarpusi tarnissinnut [tarnissigullu nukissaqalissaasi, NV].“ (Matthæusi 11:28, 29) Uiusup kristumiup Jiisusip maligassiaa malittarpaa Jiisusip ilagiinnik pinninneratut nuliaminik pinninnermigut. Uiusup nuliaminik pingaartitsinermigut pingaartitsinerminillu oqaatsikkut iliuutsikkullu ersersitsinermigut ’paaqqinnivissup’, nuliani nukissaqalersissavaa.

Nuliaasut najoqqutassiat Biibilimeersut naapertorlugit inuusut

13. Nuliasunut iluaqutaasinnaasunik Biibilimi sunik najoqqutassiaqarpa?

¹³ Biibilimi aamma najoqqutassiaqarpoq nuliaasunut iluaqutaasinnaasunik. Efesosimiunut allakkani, kapitali 5, versini 22-24-mi aamma 33-mi ima allassimavoq: „Nuliaasusi uissinnut [naalatsigitissaasi] soorlu Naalakkamut, uiusoq nuliaminut niaquummat soorlu Kristusi ilagiinnut niaquusoq timiminullu annaassisuulluni. Soorlu ilagiit Kristusimut naalatsigititaasut taamatut aamma ilissi nuliaasut tamatigut uissinnut naalatsigitissaasi. . . . Nuliaasup uini mianerisussaavaa [ataqqingaassavaa, NV].“

14. Sooq naalatsigitinnissaq pillugu najoqqutassiaq Biibilimeersoq arnanut nikanarsaataanngila?

¹⁴ Maluginiaruk Paulusip naalatsigitinnissap ataqqinninnissallu pingaaruteqassusiannik erseqqissaanera. Nuliaasoq eqqaasinneqarpoq uiminut naalatsigitinnissaminik. Tamanna Guutip aaqqissuussineranut tamarmut naapertuuppoq. Pinngortitat qilammiittut nunarsuarmiittullu tamarluinnarmik arlaannut naalatsigitipput. Jiisusi allaat Jehova Guutimut naalatsigitippoq. (1 Korinthimiut 11:3) Erseqqippoq uiusup ilaqutariinnut ittuusutut oqartussaassutsini iluamik atortarpagu, nuliata naalatsigittuarnissani ajornannginnerutissagaa.

15. Nuliaasunut siunnersuutigineqartut Biibilimiittut ilaannik eqqaasaqarit.

¹⁵ Paulusi aamma allappoq nuliaasup ’uini ataqqingaassagaa’. Nuliaasoq kristumiu ’piuaatsumik qanilaartumillu anersaaqassaaq’, aamma anneruniarluni uini unammillissanngilaa namminersorniassananilu.  (1 Petrusi 3:4) Nuliaasoq Guutimik mianerinnittoq inoqutimi iluaqutissaannik suleruloortarpoq uinilu ataqqinaatissittarlugu. (Titusi 2:4, 5) Uini ajunngitsumik oqaluuseriniartassavaa, taamaalillunilu ataqqineqarunnaassutigisinnaasaanik iliuuseqarnaveersaassaaq. Aammattaaq uimi aalajangigai piviusunngortinniarlugit sapinngisani tamaat iliuuseqassaaq. — Ussatit 14:1.

16. Nuliaasut kristumiut Saramik Rebekkamillu oqaluttuat qanoq ilinniarfigisinnaavaat?

¹⁶ Piuaatsumik qanilaartumillu anersaaqarneq ima paasisariaqanngilaq arnaq kristumiu isumaqanngitsoq, imaluunniit taassuma isumaa pingaaruteqanngitsoq. Itsaq Guutimik mianerinnittut, soorlu Sara Rebekkalu, arlaannik isumakuluuteqarnerminnik ersersitsisarsimapput, Biibilimilu oqaluttuarineqartuni erserpoq Jehovap tamanna akuerigaa. (1 Mosesi 21:8-12; 27:46–28:4) Aamma arnat kristumiut misigissutsitik isummatillu oqaatigisinnaavaat. Isumatusaarlutilli nikaginnippalunngitsumillu taamaaliortariaqarput. Qularnanngitsumik paasilissavaat taamatut pissuseqarnermikkut attaveqatigiinnertik pitsaanerulersoq aamma isummatik uiminnit tusaaniarneqarnerulersut.

Pisussaasutut misiginissaq pingaaruteqarpoq

17, 18. Saatanip aappariikkunnaarsitsiniaaneri aappariit qanoq ilillutik akiorsinnaavaat?

¹⁷ Aappariinneq tassaavoq aappariittuarnissamut inuuneq naallugu pisussaaffik. Taamaammat uiusup nuliaasullu aappariinnermik ingerlalluarnissaat ilumoorlutik kissaatigisariaqarpaat. Attaveqaqatigiilluartoqanngippat ajornartorsiutit immaqa alliartorsinnaapput naggataatigullu ajornartorsiuterujussuanngorlutik. Ajornartorsiuteqaleraangat aappariit attaveqaqatigiikkunnaarajuttarput, tamannalu kamannermik ajuallassimaarnermillu kinguneqartarpoq. Aappariit ilaat allaat aappariikkunnaarnissaminnut periarfissarsiortarput immaqalu aapparinngisaminnik soqutigisaqalertarlutik. Jiisusi ima mianersoqqusivoq: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ — Matthæusi 5:28.

¹⁸ Apustili Paulusi kristumiut tamaasa, aamma aappallit, ima siunnersorpai: „Kamassimariannguaritsi, kisiannili ajortuliornasi. Seqineq tarrisinnaveersiuk narrutsassimanissinni. Diaavululu inissaqarteqinasiuk.“ (Efesosimiut 4:26, 27) Uagutsinnut akeraasup pingaarnerup, Saatanip, kristumiut isumaqatigiinngissutigilersinnaasaat atornerlunniarsarisarpai. Iluatsitsisinniaqinagu! Ajornartorsiuteqaleraangat pineqartumut Jehovap isiginnittaasia pillugu Biibilimi qanoq allassimasoqarnersoq misissortarsiuk. Ajornartorsiutit eqqissillusi unneqqarillusilu oqaloqatigiissutigisarsigik. Jehovap najoqqutassiai pillugit ilisimasassi taakkualu maleruarniarlugit iliuuserisassi imminnut naapertuulluinnarnissaat isumagisarsiuk. (Jaaku 1:22-25) Aappariittut Guutimik saqeqateqartuarnissarsi aalajangiusimasiuk, taassumalu ataqatigiilersitai kimilluunniit sumilluunniillu avissaartinneqartinngisaannarsigit! — Mika 6:8.

[Quppernerup ataani ilanngussat]

Eqqaamavigit?

• Sooq allaat aappariit kristumiut ajornartorsiorsinnaasarpat?

• Uiusup nuliani qanoq isumassorsinnaavaa asannittuliorfigalugu?

• Nuliaasoq uiminik ataqqinningaarnini ersersinniarlugu susinnaava?

• Aappariit qanoq ilillutik aappariittuarnissartik aalajangiusimanerulersinnaavaat?

[Atuaqqissaarnermi apeqqutit]

[Qupp. 13-mi assiliartaq]

Uiusup nuliani pigisatiguinnaanngitsoq aammali anersaakkut isumagilluassavaa

[Qupp. 14-mi assiliartaq]

Uiusup nuliaminik isumassuinermigut ’paaqqinnittup’ nuliani nukissaqalersittarpaa

[Qupp. 16-mi assiliartaq]

Nuliaasut kristumiut misigissutsitik isummatillu ataqqinnippaluttumik oqaatigisarpaat