Хуыцау цы баиу кодта, уый ма ахицӕн кӕнут
Хуыцау цы баиу кодта, уый ма ахицӕн кӕнут
«Дыууӕ нал сты, фӕлӕ – иу буар. Уӕдӕ Хуыцау цы баиу кодта, уый адӕймаг ма ахицӕн кӕнӕд» (МАТФЕЙЫ 19:6).
1, 2. Лӕг ӕмӕ ус хаттӕй-хатт зын уавӕрты кӕй бахаудзысты, уый диссаг цӕуылнӕ у ӕмӕ Библи уый тыххӕй цы дзуры?
ЗӔГЪӔМ, дӕхи сцӕттӕ кодтай машинӕйыл дард фӕндагыл цӕуынмӕ. Уый гӕнӕн ис, ӕмӕ фӕндагыл исты ’рцӕуа? Диссаг дӕр уаид, «уымӕн гӕнӕн нӕй», зӕгъгӕ, зӕгъын! Чи зоны ахӕм боныхъӕд скӕна, ӕмӕ дӕ бахъӕуа дӕ цыд фӕсындӕгдӕр кӕнын ӕмӕ дарддӕр сабыргай скъӕрын. Кӕнӕ та дӕ машинӕйӕ исты фехӕла, ӕмӕ йӕ дӕхи бон саразын ма уа. Уӕд дӕ бахъӕудзӕн дӕ машинӕ фӕндаггӕронмӕ атӕрын ӕмӕ искӕмӕ ӕххуысмӕ фӕдзурын. Ахӕм уавӕры куы бахауай, уӕд хъуамӕ дӕ рацыдыл фӕсмон фӕкӕнай ӕмӕ дӕ машинӕ уым ныууадзай? Нӕ. Дард фӕндагыл цӕугӕйӕ ды алцӕмӕдӕр фенхъӕлмӕ кӕсыс ӕмӕ сӕм рагацау дӕхи бацӕттӕ кӕныс.
2 Уый зӕгъӕн ис бинонты цардӕй дӕр. Лӕг ӕмӕ ус зын уавӕрты ма бахауой, уый гӕнӕн нӕй. Диссаг дӕр уаид, сӕ иумӕйаг цардӕй амондӕй дарддӕр куы ницӕмӕ ӕнхъӕлмӕ кӕсиккой. Библи 1 Коринфӕгтӕм 7:28 ӕргом дзуры, зӕгъгӕ, лӕгтӕ ӕмӕ устытӕн «сӕ царды уыдзӕн бирӕ мӕт». Цӕмӕн у афтӕ? Цыбыртӕй йӕ куы зӕгъӕм, уӕд уымӕн, ӕмӕ лӕгтӕ ӕмӕ устытӕ сты ӕнӕххӕст ӕмӕ цӕргӕ та кӕнӕм «тынг уӕззау рӕстӕджы» (2 Тимофеймӕ 3:1; Ромӕгтӕм 3:23). Уӕдӕ кӕрӕдзи чи ӕмбары ӕмӕ хъуыддӕгтӕм Хуыцауы цӕстӕй чи кӕсы, ахӕм бинонтӕ дӕр-иу хаттӕй-хатт бахаудзысты зын уавӕрты.
3. а) Дунейы бирӕтӕ бинонты цардмӕ цы цӕстӕй кӕсынц? ӕ) Чырыстӕттӕ бинонты цард бахъахъхъӕныныл цӕмӕн архайынц?
3 Абоны дунейы иуӕй-иу бинонтӕ зын уавӕрты куы бахауынц, уӕд сӕ фыццаг хъуыды вӕййы, ахицӕн уӕм, зӕгъгӕ. Бирӕ бӕстӕты, чи ахицӕн, ахӕм бинонты нымӕц фылдӕрӕй-фылдӕр кӕны. Ӕцӕг чырыстӕттӕ та сӕ зындзинӕдтӕй нӕ фӕлидзынц, фӕлӕ фӕархайынц, цӕмӕй сӕ хъуыддӕгтӕ банывыл кӕной. Цӕмӕн? Уымӕн ӕмӕ чырыстӕттӕ ӕмкъайад нымайынц Йегъовӕйы стыр лӕварыл. Йесо бинонты тыххӕй загъта: «Хуыцау цы баиу кодта, уый адӕймаг ма ахицӕн кӕнӕд» (Матфейы 19:6). Раст зӕгъгӕйӕ, ацы уагӕвӕрдмӕ гӕсгӕ цӕрын алыхатт ӕнцон нӕ вӕййы. Зӕгъӕм, Библийы уагӕвӕрдтӕ чи нӕ зоны, уыцы хӕстӕджытӕ ӕмӕ иннӕтӕ – уыдонимӕ, бинонты цард куыд аразын хъӕуы, уый фӕдыл уынаффӕтӕ чи фӕдӕтты, уыдонӕй дӕр иуӕй-иутӕ – лӕг ӕмӕ усӕн арӕх фӕдзурынц, цӕмӕй ахицӕн уой, Библимӕ гӕсгӕ сын хицӕн кӕнын куы нӕ фембӕлы, уӕд дӕр *. Фӕлӕ чырыстӕттӕ зонынц, уайтагъд ахицӕн кӕныны бӕсты, хъуыддӕгтӕ банывыл кӕнын ӕмӕ бинонты цард бахъахъхъӕнын бирӕ хуыздӕр кӕй у. Тынг ахсджиаг у, цӕмӕй чырыстӕттӕ ӕппӕты райдианы аскъуыддзаг кӕной, иннӕты куыд фӕнды, афтӕ нӕ, фӕлӕ Йегъовӕйы куыд фӕнды, афтӕ кӕй кӕндзысты (Ӕмбисӕндтӕ 14:12).
Зындзинӕдты сӕрты хизын
4, 5. а) Бинонты цавӕр зындзинӕдтӕ фӕхъӕуы скъуыддзаг кӕнын? ӕ) Бинонты царды исты зындзинӕдтӕ куы фӕзыны, уӕд Хуыцауы Ныхасы уагӕвӕрдтӕ хорз ӕххуыс цӕмӕн вӕййынц?
4 Рӕстӕгӕй-рӕстӕгмӕ алы бинонты дӕр фӕхъӕуы аныхас кӕнын, цы сӕ тыхсын кӕны, уыдӕттыл. Арӕхдӕр уыдон вӕййынц цыдӕр гыццыл хъуыддӕгтӕ. Фӕлӕ бинонтӕ ахӕм стыр зындзинӕдтыл дӕр сӕмбӕлынц, ӕмӕ суанг сӕ цард фехӕлынӕй дӕр тӕссаг вӕййы. Хатт уӕ, чи зоны, бахъӕуа усджын, фӕлтӕрд хистӕр нӕлгоймаджы ӕххуыс. Фӕлӕ уый ууыл дзурӕг нӕу, ӕмӕ уӕ бинонты цард нӕ рӕстмӕ кӕны. Уыцы уавӕртӕ ӕвдисынц, куыд ахсджиаг у хъуыддӕгтӕ Библийы уагӕвӕрдтӕм гӕсгӕ скъуыддзаг кӕнын.
5 Йегъовӕ у адӕмы Сфӕлдисӕг ӕмӕ бинонты царды Бындурӕвӕрӕг. Уымӕ гӕсгӕ уымӕй хуыздӕр ничи зоны, цы хъӕуы, цӕмӕй нӕ цардӕмбалимӕ амондджын уӕм. Фарст уый мидӕг ис, ӕмӕ йӕ Ныхасы цы уынаффӕтӕ ис, уыдонмӕ хъусдзыстӕм ӕмӕ сӕ ӕххӕст кӕндзыстӕм ӕви нӕ. Йӕ ныхасмӕ гӕсгӕ куы бакӕнӕм, уӕд нын уый, ӕнӕмӕнг, фӕпайда уыдзӕн. Йегъовӕ рагзаманты йӕ адӕмӕн загъта: «Ехх, ӕмӕ мын мӕ амындтӕм куы хъусис! Уӕд дӕ фарн уаид цӕугӕдонау, дӕ рӕстад та – денджызы уылӕнтау» (Исай 48:18). Лӕг ӕмӕ ус, Библи цы зӕгъы, уымӕ куы хъусой, уӕд уыдзысты амондджын. Цӕй уӕдӕ уал фыццаг ӕркӕсӕм, лӕгтӕн Хуыцауы Ныхас Библийы цавӕр амындтӕ ис, уымӕ.
«Уарзут уӕ устыты»
6. Фыстад лӕгтӕн цы амоны?
6 Апостол Павелы фыстӕджы Ефесӕгтӕм ис бӕлвырд амындтӕ лӕгтӕн. Павел фыста: «Лӕгтӕ, уарзут уӕ устыты, Чырысти дӕр ӕмбырд куыд бауарзта ӕмӕ йӕхи йӕ сӕрвӕлтау куыд радта, афтӕ. Раст афтӕ лӕгтӕ дӕр, сӕхи буар куыд уарзынц, афтӕ хъуамӕ уарзой сӕ устыты. Йӕ усы чи уарзы, уый уарзы йӕхи дӕр, уымӕн ӕмӕ йӕ буарӕй йе сӕфт никуы ничи уыдта, фӕлӕ йӕм алчидӕр зилы ӕмӕ йӕ хъахъхъӕны, Чырысти дӕр ӕмбырдмӕ куыд зилы ӕмӕ йӕ куыд хъахъхъӕны, афтӕ. Фӕлӕ сымахӕй дӕр алчи, йӕхи куыд уарзы, афтӕ уарзӕд йӕ усы дӕр» (Ефесӕгтӕм 5:25, 28, 29, 33).
7. а) Чырыстон бинонтӕн сӕ цард сӕйраджыдӕр цӕуыл хъуамӕ ӕнцайа? ӕ) Лӕгтӕн сӕ устыты сӕ бон куыд у афтӕ уарзын, цӕмӕй сӕ уарзондзинад ма ӕруазал уа?
7 Лӕг ӕмӕ усы ’хсӕн цы зындзинӕдтӕ фӕзыны, уыдонӕй Павел алкӕцыйы кой дӕр хицӕнӕй нӕ кӕны. Фӕлӕ уый дзуры, алы чырыстон бинонтӕн дӕр сӕ цард сӕйраджыдӕр кӕй хъуамӕ ӕнцайа уарзондзинадыл. Ӕцӕгдӕр, уӕлдӕр цы стихтӕ ӕрхастам, уым уарзыны тыххӕй дзырд цӕуы аст хатты. Уымӕй уӕлдай ма нӕ хъус ӕрдарӕм, Павел лӕгтӕн афтӕ кӕй дзуры, «уарзут уӕ устыты», зӕгъгӕ. Ацы ныхӕстӕ цы ӕвзагыл фыст ӕрцыдысты, уым сӕ хъуыды у уый, ӕмӕ лӕгтӕн сӕ уарзондзинад сӕ устытӕм макуы хъуамӕ ӕруазал уа. Дзырд дӕр ыл нӕй, Павел хорз ӕмбӕрста, адӕймаджы уарзын, ома йыл зӕрдӕ ма сивын, бирӕ зындӕр кӕй у бауарзынӕй. Йӕ ныхӕстӕ уӕлдай ахсджиаг сты ацы «фӕстаг бонты», бирӕтӕ «хиуарзон» ӕмӕ «зындзырд» куы систы, уӕд (2 Тимофеймӕ 3:1–3). Абон ацы ӕвзӕр миниуджытӕ стыр зиан хӕссынц бирӕ бинонтӕн, фӕлӕ уарзӕгой лӕг нӕ бауадздзӕн, цӕмӕй йын хиуарзон дуне йӕ хъуыдытыл ӕмӕ йӕ хъуыддӕгтыл фӕзына (Ромӕгтӕм 12:2).
Дӕ усыл тыхс. Куыд?
8, 9. Чырыстон лӕг йӕ усыл цавӕр хъуыддӕгты тыхсы?
8 Усджын чырыстонӕн йӕ бон куыд у йӕ хиуарзон фӕндтыл хӕцын ӕмӕ йӕ усы ӕцӕг уарзтӕй уарзын? Ефесӕгтӕм фыстӕгӕй уӕлдӕр цы ныхӕстӕ ӕрхастам, уым Павел дзуры, лӕг кӕй хъуамӕ араза, дыууӕ ахӕм хъуыддагыл: йӕ усыл тыхса ӕмӕ, йӕхи буар куыд хъахъхъӕны, афтӕ уый дӕр хъахъхъӕна. Дӕ цардӕмбалыл куыд хъуамӕ тыхсай? Иу уымӕй, ӕмӕ йӕ цух мацӕмӕй уадзай. Павел Тимофеймӕ фыста: «Ӕцӕгдӕр, йӕхиуӕттыл, ӕмӕ уӕлдайдӕр та йӕ бинонтыл, чи нӕ тыхсы, уый ныууагъта уырнындзинад ӕмӕ у, уырнындзинад кӕмӕ нӕй, уымӕй ӕвзӕрдӕр» (1 Тимофеймӕ 5:8).
9 Фӕлӕ уымӕ ӕрмӕст уый нӕ хауы ӕмӕ усӕн хӕрд, дарӕс ӕмӕ хӕдзар уа. Цӕуылнӕ? Лӕг йӕ усы, гӕнӕн ис, ӕмӕ ӕппындӕр хъуаг мацӕмӕй уадза, фӕлӕ йын йӕ зӕрдӕйы ӕнкъарӕнтӕм ӕмӕ йӕ уырнындзинадмӕ йӕ хъус ма дара. Ацы дыууӕ хъуыддаджы йыл тыхса, уый ӕнӕмӕнг у. Бирӕ чырыстон лӕгтӕн гыццыл рӕстӕг нӕ ацӕуы ӕмбырды хъуыддӕгтыл. Фӕлӕ уый ууыл дзурӕг нӕу, ӕмӕ лӕг хъуамӕ куыдфӕндыйы цӕстӕй кӕса, Хуыцау бинонты хистӕрыл цы хӕстӕ сӕвӕрдта, уыдон ӕххӕст кӕнынмӕ (1 Тимофеймӕ 3:5, 12). Уый фӕдыл цалдӕр азы размӕ ацы журналы уыд фыст: «Библийы цы фыст ис, уымӕ гӕсгӕ зӕгъӕн ис, ӕмӕ „дзуг хизыны хъуыддаг хӕдзарӕй кӕй райдайы“. Хистӕр нӕлгоймаг йӕ бинонтӕм йӕ хъус куы нӕ дара, уӕд тӕссаг у, ӕмбырды хистӕр нӕлгоймаг мауал уа, уымӕй» *. Уӕдӕ бӕрӕг у, дӕ усыл кӕй хъуамӕ тыхсай – дарай йӕ, йе ’нкъарӕнтыл ӕмӕ йын, ӕппӕты сӕйраг дӕр та, йӕ уырнындзинадыл хъуыды кӕнай.
Цы нысан кӕны дӕ усы «хъахъхъӕн»?
10. Лӕгӕн йӕ бон куыд у йӕ усӕн аргъ кӕнын?
10 Усы «хъахъхъӕнын», ома йын аргъ кӕнын, нысан кӕны кӕй йӕ уарзыс ӕмӕ йыл куыд ӕмбӕлы, афтӕ кӕй тыхсыс. Уый дӕ бон у аразын цалдӕр хъуыддагӕй. Фыццаг, фаг рӕстӕг ӕрвит дӕ бинойнагимӕ. Дӕ усӕн фаг рӕстӕг куы нӕ арай, уӕд, гӕнӕн ис, ӕмӕ дӕ раздӕрау мауал уарза. Чи зоны, ды хъуыды кӕныс, зӕгъгӕ, мӕ усимӕ фаг рӕстӕг ӕрвитын ӕмӕ йӕм мӕ хъус фаг дарын, фӕлӕ дӕ ус та, гӕнӕн ис, ӕмӕ афтӕ ма хъуыды кӕна. Мӕ усӕн аргъ кӕнын, дзурай, уый фаг нӕу, дӕ ус хъуамӕ хата, кӕй йын аргъ кӕныс, уый. Павел фыста: «Уӕдӕ алчидӕр хъуыды кӕнӕд иннӕйы пайдайыл, йӕхи пайдайыл нӕ, фӕлӕ» (1 Коринфӕгтӕм 10:24). Куыд уарзӕгой лӕг, афтӕ дӕ фӕнды зонын, дӕ усы ӕцӕгдӕр цы хъӕуы, уый (Филиппӕгтӕм 2:4).
11. Лӕг йӕ усӕн куыд у, уый куыд зыны йӕ ахастытыл Хуыцауимӕ ӕмӕ йын ӕмбырды цы хӕстӕ ис, ууыл?
11 Дӕ усӕн кӕй аргъ кӕныс, уый ма дӕ бон у равдисын дӕхи йемӕ уӕзданӕй куы дарай ӕмӕ йемӕ фӕлмӕнӕй куы ныхас кӕнай, уымӕй дӕр (Ӕмбисӕндтӕ 12:18). Павел колоссӕгтӕм ныффыста: «Сымах та, лӕгтӕ, уарзут уӕ устыты ӕмӕ сӕм тызмӕг ма ут» (Колоссӕгтӕм 3:19). Иу чиныджы фыст ис, зӕгъгӕ, ацы стихы фӕстаг ныхӕстӕ ратӕлмац кӕнӕн ис афтӕ, «ӕххуырсты цӕстӕй йӕм ма кӕс» кӕнӕ «цагъар дзы ма скӕн». Йӕ усимӕ тызмӕг чи у – хибарӕй уа, ӕви адӕмы астӕу – уымӕй афтӕ зӕгъӕн нӕй, ӕмӕ йӕ усӕн аргъ кӕны. Лӕг йӕ усӕн ӕвзӕр куы уа, уӕд уый гӕнӕн ис, ӕмӕ йӕ ахастытыл Хуыцауимӕ ӕвзӕрырдӕм фӕзына. Апостол Петр лӕгтӕм фыста: «Уӕ устытимӕ цӕрут, цы зонут, уымӕ гӕсгӕ ӕмӕ, сылгоймаг лӕмӕгъдӕр кӕй у, уымӕ гӕсгӕ сын кад кӕнут, уымӕн ӕмӕ сымах дӕр уыдонимӕ райсдзыстут Хуыцауы стыр хорзӕх – цард. Науӕд уын Хуыцау уӕ куывдтытӕ нӕ хъусдзӕн» * (1 Петры 3:7).
12. Йесо ӕмбырдӕн куыд уыд, уымӕй чырыстон лӕг цӕуыл ахуыр кӕны?
12 Афтӕ макуы хъуыды кӕн, ӕмӕ дӕ дӕ ус куыдфӕндыйӕ дӕр уарздзӕн. Ӕвдис ын, дӕ уарзондзинад кӕй не ’руазал ӕмӕ йӕ раздӕрау кӕй уарзыс. Йесо ӕмбырдӕн куыд уыд, уымӕй хорз цӕвиттон ныууагъта лӕгтӕн. Уый уыд фӕлмӕн, хӕларзӕрдӕ ӕмӕ хатыргӕнаг – суанг-иу йӕ фӕдылдзӕуджытӕн ногӕй ӕмӕ ногӕй се ’взӕр миниуджытӕ куы рабӕрӕг сты, уӕд дӕр. Уымӕ гӕсгӕ Йесойӕн йӕ бон уыд иннӕтӕн зӕгъын: «Ӕрцӕут [мӕм]... уымӕн ӕмӕ ӕз дӕн фӕлмӕн ӕмӕ сӕрныллӕг, ӕмӕ ссардзыстут удӕнцой» (Матфейы 11:28, 29). Чырыстон лӕг дӕр Йесо Чырыстийы фӕзмы, ӕмӕ йӕ усӕн у, Йесо ӕмбырдӕн куыд уыд, афтӕ. Лӕг йӕ усӕн ӕцӕгдӕр куы аргъ кӕна ӕмӕ уый йӕ ныхасӕй ӕмӕ йӕ хъуыддӕгтӕй куы ӕвдиса, уӕд ын хӕсдзӕн ӕцӕг удӕнцой.
Библийы уагӕвӕрдтӕм гӕсгӕ чи цӕры, ахӕм устытӕ
13. Устытӕн Библийӕ цавӕр уагӕвӕрдтӕ ӕххуыс кӕнынц?
13 Библийы ма ис, устытӕн чи баххуыс уыдзӕн, ахӕм уагӕвӕрдтӕ дӕр. Ефесӕгтӕм 5:22–24, 33 фыст ис: «Сылгоймӕгтӕ сӕ лӕгты коммӕ кӕсӕнт, цыма Хицауы коммӕ кӕсынц, афтӕ, уымӕн ӕмӕ усӕн лӕг йӕ сӕрыхицау у, Чырысти ӕмбырды сӕр куыд у, афтӕ – уыцы буар уый фервӕзын кодта. Гъемӕ ӕмбырд Чырыстийы коммӕ куыд кӕсы, афтӕ устытӕ дӕр алы хъуыддаджы дӕр сӕ лӕгты коммӕ кӕсӕнт. [...] Ус та хъуамӕ йӕ лӕджы нымайа».
14. Библи афтӕ кӕй зӕгъы, зӕгъгӕ, ус хъуамӕ йӕ лӕджы коммӕ кӕса, уый йын йӕ кад дӕлӕмӕ цӕуылнӕ кӕны?
14 Ам Павел уӕлдай тынгдӕр ӕргом здахы коммӕ кӕсынмӕ ӕмӕ лӕджы нымайынмӕ. Усӕн йӕ зӕрдыл лӕууын кӕны, цӕмӕй йӕ лӕджы коммӕ кӕса. Хуыцауы дӕр афтӕ фӕнды. Уӕлӕрвты дӕр ӕмӕ зӕххыл дӕр цы удгоймӕгтӕ ис, уыдон иууылдӕр кӕйдӕр коммӕ кӕсынц. Суанг Йесо дӕр кӕсы Йегъовӕ Хуыцауы коммӕ (1 Коринфӕгтӕм 11:3). Кӕй зӕгъын ӕй хъӕуы, лӕг бинонты хистӕры хӕстӕ хорз куы ӕххӕст кӕна, уӕд усӕн дӕр йӕ коммӕ кӕсын ӕнцондӕр уыдзӕн.
15. Библи устытӕн цавӕр уынаффӕтӕ дӕтты?
15 Павел ма ныффыста, зӕгъгӕ, «ус... хъуамӕ йӕ лӕджы нымайа». Чырыстон ус хъуамӕ уа «сабыр ӕмӕ фӕлмӕн удыхъӕды» хицау ӕмӕ йӕ лӕджы сӕрты ма хиза, кӕнӕ хивӕнд митӕ ма кӕна (1 Петры 3:4). Хуыцауӕй чи тӕрсы, ахӕм ус йӕ бинонтыл тыхсы ӕмӕ йӕ сӕрыхицауы кадджын кӕны (Титмӕ 2:4, 5). Уый йӕ лӕгӕй хорз йеддӕмӕ ӕвзӕр никуы фӕдзуры ӕмӕ ахӕмӕй ницы аразы, цӕмӕй йӕ иннӕты цӕсты бафтауа. Уый ма йӕ лӕгӕн ӕппӕт тыхтӕй ӕххуыс кӕны, цы спълан кодта, уый аразынӕн дӕр (Ӕмбисӕндтӕ 14:1).
16. Саррӕ ӕмӕ Ревеккӕйӕ чырыстон устытӕ цӕуыл ахуыр кӕнынц?
16 Чырыстон ус сабыр ӕмӕ фӕлмӕн удыхъӕды хицау кӕй хъуамӕ уа, уый ууыл дзурӕг нӕу, ӕмӕ йын йӕхи хъуыды нӕй, кӕнӕ цы хъуыды кӕны, уый ахсджиаг нӕу. Рагзаманты, Хуыцауӕй чи тарст, ахӕм сылгоймӕгтӕ, зӕгъӕм, Саррӕ ӕмӕ Ревеккӕ сӕ лӕгтӕн сӕ хъуыдытӕ дзурынӕй не ’фсӕрмы кодтой ӕмӕ, Библийы куыд фыст ис, афтӕмӕй сӕ хъуыддӕгтӕ Йегъовӕмӕ раст фӕкастысты (Райдиан 21:8–12; 27:46–28:4). Чырыстон устытӕн дӕр сӕ бон у дзурын, сӕ зӕрдӕйы цы ис, уый. Ӕцӕг, сӕ ныхасыгъӕдӕй хъуамӕ сӕ лӕгты дӕлдӕр ма кӕной, фӕлӕ дзурой уӕзданӕй. Афтӕмӕй уыдон, ӕвӕццӕгӕн, фендзысты уӕзданӕй ныхас кӕнын кӕй у бирӕ ӕхсызгондӕр ӕмӕ лӕгӕн дӕр ӕнцондӕр кӕй у, ус цы хъуыды кӕны, уый бамбарын.
Кӕрӕдзийӕн цы дзырд радтат, уымӕ гӕсгӕ цӕрут
17, 18. Сайтан бинонты цард фехалыныл куы фӕархайы, уӕд лӕгтӕн ӕмӕ устытӕн сӕ бон куыд у йӕ ныхмӕ фӕлӕууын?
17 Ӕмкъайады цӕдис цыбыр рӕстӕгмӕ нӕу, фӕлӕ цӕрӕнбонтӕм. Уымӕ гӕсгӕ лӕджы дӕр ӕмӕ усы дӕр хъуамӕ ӕппӕт зӕрдӕйӕ фӕнда архайын, цӕмӕй амондджынӕй цӕрой. Сӕ хъуыдытӕ кӕрӕдзийӕн ӕргом куы нӕ дзурой, уӕд сӕ гыццыл зындзинадӕй дӕр стыр хъуыддаг рауайдзӕн. Лӕг ӕмӕ усы ’хсӕн исты куы рауайы, уӕд арӕх иу иннӕмӕ нал фӕдзуры, ӕмӕ кӕрӕдзимӕ маст хӕссын райдайынц. Иуӕй-иуты ма бафӕнды, цӕмӕй ахицӕн уой, ӕмӕ уый тыххӕй сӕхицӕн уарзӕттӕ агурын дӕр райдайынц. Йесо фӕдзӕхста: «Сылгоймагмӕ чи кӕсы ӕмӕ йӕм йӕхи чи мондаг кӕны, уый фӕхӕтыд йемӕ йӕ зӕрдӕйы мидӕг» (Матфейы 5:28).
18 Апостол Павел фӕдзӕхста ӕппӕт чырыстӕтты, уыдонимӕ бинонджынты дӕр: «Куы смӕсты уат, уӕддӕр-иу тӕригъӕд ма ӕруадзут; хур уыл мӕстыйӕ ма аныгуылӕд, стӕй-иу Хӕйрӕгӕн бынат ма ныууадзут» (Ефесӕгтӕм 4:26, 27). Нӕ сӕйраг знаг Сайтан архайы, цӕмӕй, чырыстӕтты ’хсӕн исты куы рауайа, уӕд дзы спайда кӕна. Йӕ фӕндиаг макуы фӕуӕм! Де ’мчырыстонимӕ кӕрӕдзи куы нӕ бамбарат, уӕд уыцы фарсты фӕдыл Йегъовӕ цы хъуыды кӕны, уый Библийы бацагур ӕмӕ спайда кӕн нӕ литературӕйӕ. Хъуыддагыл ныхас кӕнгӕйӕ у сабыр ӕмӕ ӕргом. Архай, цӕмӕй Йегъовӕйы уагӕвӕрдты тыххӕй цы зоныс ӕмӕ ды куыд архайыс, уыдон кӕрӕдзийӕ тынг ма хицӕн кӕной (Иаковы 1:22–25). Дзырд уӕ бинонты цардыл куы цӕуа, уӕд фӕндфидар ут, ӕмӕ дарддӕр дӕр иумӕ Хуыцауимӕ цӕут, ӕмӕ, Хуыцау цы баиу кодта, уый хицӕн кӕнын макӕмӕн ӕмӕ мацӕмӕн бауадзут! (Михей 6:8).
[Фиппаинӕгтӕ]
^ 3 абз. Кӕс фӕлгӕты «Развод и раздельное жительство» 2002 азы 8 февралы «Райхъал ут!»-ы 10 ф., (уыр.). Мыхуыры йӕ рауагътой Йегъовӕйы Ӕвдисӕнтӕ.
^ 9 абз. Кӕс 1989 азы 15 октябры «Хъахъхъӕнӕн мӕсыг»-ы 12 ф., (уыр.).
^ 11 абз. Цӕмӕй чырыстон ӕмбырды нӕлгоймагӕн йӕ бӕрны исты хӕстӕ бакӕной, уый тыххӕй хъуамӕ «йӕ къух макӕмӕ иса», мадӕр комкоммӕ ӕмӕ мадӕр ныхасӕй. Уымӕ гӕсгӕ 1990 азы 1 сентябры «Хъахъхъӕнӕн мӕсыг»-ы 25 фарсыл (уыр.) фыст ис: «Нӕлгоймаг йӕ бинонтӕн ӕвзӕр куы уа, фӕлӕ хӕдзары ӕдде та чырыстон миниуджытӕ куы ӕвдиса, уӕд ын ӕмбырды йӕ бӕрны ӕппындӕр ницы хӕс бакӕндзысты» (1 Тимофеймӕ 3:2–5, 12).
Бахъуыды кодтай?
• Суанг чырыстон бинонтӕ дӕр зын уавӕрты цӕмӕн бахауынц?
• Лӕгӕн йӕ бон куыд у йӕ усы дарын ӕмӕ йын кӕй аргъ кӕны, уый ӕвдисын?
• Усӕн йӕ бон цы у аразын, цӕмӕй бӕрӕг уа, йӕ лӕджы кӕй нымайы?
• Лӕг ӕмӕ усӕн сӕ бон цы у аразын, цӕмӕй цы дзырд радтой, уымӕн хицау уой?
[Фарстатӕ ахуыр кӕнынӕн]
[Ныв 24 фарсыл]
Лӕг ӕрмӕст ууыл хъуамӕ ма тыхса, ӕмӕ йӕ усӕн хӕрд ӕмӕ дарӕс уа, фӕлӕ ма йӕ уырнындзинад фидар уа, ууыл дӕр
[Ныв 25 фарсыл]
Лӕг йӕ усӕн куы аргъ кӕна, уӕд ын хӕсдзӕн удӕнцой
[Ныв 27 фарсыл]
Чырыстон устытӕ сӕ хъуыдытӕ ӕмбарын кӕнынц уӕзданӕй
