Agpansiasianen so Impankasakey na Dios

“Aliwa la ran duara, noag saksakey a laman. Say impantipon na Dios sirin, aleg a sianen na too.”​—MATEO 19:6.

1, 2. Akin a Makasulatan tan realistiko so panilalo a walaray onlesan problema na sanasawa?

 ISIPEN pa ya akaparaan kayo lan manbiahe na arawi ya usaren yo so sakey a luganan. Wala ra kasi so probleman naeksperiensya yo ed dalan? Aliwan makabat so panisip ya anggapo iratan! Singa bilang, nayarin agmarakep so kipapasen na panaon, kanian nakaukolan a matantan tan maalwar so pampabatik yo. Nayari met a naderalan kayo na makina ya agyo sarag ya apigeren,kanian nakaukolan yon ipireg so luganan insan mananap kayo na mekaniko. Lapud sarayan kipapasen, kasin isipen yo a lingo so impanbiahe yo tan nepeg yo lan taynanan so luganan? Andi. Sano manbiahe kayo na arawi, nayarin walaray problema kanian makabat so pannonot la na saray paraan no panon iratan a remedyoan.

² Mipadpara met itan ed panamaley. Agnapaliisan iray problema, tan makulangkulang no ilaloan na sakey a sankapareha ya onloob ed panamaley a puros liket labat so naeksperiensya ra. Diad 1 Corinto 7:28 et diretsaan ya imbaga na Biblia a saray kaasawaan a lalaki tan bibii so nawalaan na ‘irap ed laman da.’ Akin ya onia so nagagawa? Diad simplin panangibaga, lapud ag-ayadyari so asawan lalaki tan bibii, tan manbibilay itayo la ed “saray panaon a maatap.” (2 Timoteo 3:1; Roma 3:23) Kanian, anggano makapantunosan a maong so sakey a sankapareha tan maespiritual so kanonotan da, sikara so panapanaon a manproblema.

3. (a) Panon ya ipapasen na dakel a totoo ed mundo so panamaley? (b) Akin a panggugunaetan na saray Kristiano a pansiansiaen so panamaley da?

³ Diad modernon panaon tayo, sano nidunget so pigaran sanasawa ed saray problema, say primeron reaksion da et mansian la ra. Diad dakel a bansa, tinmagey a maong so bilang na saray nandiborsyo. Balet, saray tuan Kristiano so manggugunaet a manresolbe ed saray problema imbes a bengatbengat iran mansian. Akin? Lapud say panamaley et ipapasen dan sagradon langkap nen Jehova. Oniay imbaga nen Jesus nipaakar ed saray sanasawa: “Say impantipon na Dios . . . aleg a sianen na too.” (Mateo 19:6) On, aliwan naynay a mainomay so pambilay unong ed satan ya estandarte. Singa bilang, saray kanayon tan arum nira, pati say pigaran managkonseho ed panamaley, ya agmangaawat ed saray prinsipyo na Biblia, so mabetbet a mamapaseseg ed saray sanasawa a mansian odino mandiborsio la ra anggano aliwan Makasulatan iray rason. * Balet amta na saray Kristiano a magmaong so pangapiger tan pamasiansia ed panamaley nen say panampoten itan a tampol. On, importante a diad gapo ni labat et determinaen tayo lan gawaen iray bengatla unong ed paraan nen Jehova​—aliwan unong ed simbawa na arum.​—Uliran 14:12.

Resolbien Iray Problema

4, 5. (a) Antoran problema so nepeg a resolbien diad loob na panamaley? (b) Akin ya epektibo iray prinsipyon walad Salitay Dios, anggano onlesa iray problema ed panamaley?

⁴ Diad tua, amin a panamaley et mankaukolan na nikaduman panangimano ed panapanaon. Diad maslak iran kipapasen et lalanoren na satan so panresolbe ed angkelag iran agpantatalosan. Balet, diad arum a panamaley et walaray mas ambelat a problema a mamepeligron maneral ed pundasyon na relasyon da. No maminsan, nayarin nakaukolan yo so onkerew na tulong ed sakey a Kristianon matatken ya eksperiensyado ed panamaley. Balet, sarayan kipapasen so agmangipapabitar ya anggapo lay ilalo na panamaley yo.  Ipapabitar lambengat na saratan ya importante so maapit ya itumbok yo ed saray prinsipyo na Biblia diad panaanap yoy solusyon.

⁵ Bilang Manamalsa na katooan tan Angiletneg ed uksoyan na panangasawa, si Jehova lambengat so mas makaamta ed pankaukolan tayo ta pian nawalaan itayo na matalonan panamaley. Balet say tepet et, Kasin tatalinengen tayo so simbawa na Salita to tan uunoren tayo itan? Maseguron nagunggonaan itayo no gawaen tayo itan. Oniay imbaga nen Jehova ed saray totoo to nensaman: “O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.” (Isaias 48:18) Ontalona so sakey a panamaley sano tuloken iray totontonen a nidatak ed Biblia. Konsideraen tayon unona so simbawa na Biblia ed saray kaasawaan a lalaki.

‘Itultuloy Yon Aroen so Kaasawaan Yon Bibii’

6. Anto so simbawa na Kasulatan parad saray kaasawaan a lalaki?

⁶ Diad sulat nen apostol Pablo ed saray taga-Efeso et nipabitar so malinew iran totontonen parad saray kaasawaan a lalaki. Oniay insulat nen Pablo: “Asawan lalaki, aroen yo [“itultuloy yon aroen,” NW] so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato; Ontan met so nepeg na saray asawan lalaki a panangaro ra ed saray kaasawaan dan dili a singa panangaro ra ed laman dan dili. Say mangaro ed asawa ton dili aroen toy dilin laman to: Ta anggapo ni toon amusol ed laman ton dili; noag ingen sikato so taganoen to tan pablien to a singa met si Kristo a pinabli to so iglesia; Dia ed ganagana gawaen yo met, balang sakey aroen to so dilin asawa to a bii a singa dilin laman to.”​—Efeso 5:25, 28, 29, 33.

7. (a) Anto so nepeg a manunan kabiangan na pundasyon na sakey a Kristianon panamaley? (b) Panon ya itultuloy ya aroen na kaasawaan a lalaki so asawa ra?

⁷ Agsiningbat nen Pablo so amin a problema a posiblin onlesa ed baetan na asawan laki tan bii. Imbes, tinukoy to so manunan solusyon ed problema ed panamaley diad impangipabitar to ed manunan kabiangan na pundasyon na kada Kristianon panamaley, salanti, say aro. Diad tua, say aro so aminpito ya asalambit ed saray bersikulo ed tagey. Imanoen met so imbaga nen Pablo ed saray asawan lalaki: ‘Itultuloy yon aroen so kaasawaan yo.’ Anggapoy duaruwa a binidbir nen Pablo a magmainomay so pakawalaan na romantikon aro diad gapo nen say pamasiansia ed satan ya aro. Saya so nagagawa ed sarayan “kaunoran ya agew,” lapud dakel so “maaro ed inkasikaran dili” tan “aliwa ran lukas ed antokaman a paknaan.” (2 Timoteo 3:1-3, NW) Say ontan iran makapuy ya ugali so manederal ed dakel a panamaley natan, balet ag-abuloyan na maaron asawan laki so sinisiblet iran ugali na mundo a mangimpluensya ed panag-isip tan kakikiwas to.​—Roma 12:2.

Panon Mon Itarya Iray Pankaukolan na Asawam?

8, 9. Antoray nepeg ya itarya na Kristianon asawan laki parad asawa to?

⁸ No sakey kan Kristianon asawan laki, panon mon napaliisan  iray sinisiblet a tendensia ta pian nipatnag mo so puron panangaro ed asawam? Diad inaon la ran salita nen Pablo ed saray taga-Efeso, impabitar to so duaran bengatla a nakaukolan mon gawaen​—itaryam iray pankaukolan na asawam, tan sikatoy pablien mo a singa laman mon dili. Panon mon nitarya iray pankaukolan na asawam? Sakey lan paraan et diad materyal​—ya asikasoen mo iray pisikal a pankaukolan to. Oniay insulat nen Pablo ed si Timoteo: “No wala so agmanagano ed anak to, tan lalo la ed saray kakaamong to a dili, pinaandi to la so pananisia, et sikato so lalon mauges nen say agmanisia.”​—1 Timoteo 5:8.

⁹ Balet, aliwa labat a pangitarya na tagano, kawesen, tan ayaman so nalalanor. Akin? Lapud say sakey ya asawan laki so nayarin maong a mangitarya na materyal iran pankaukolan na asawa to balet ta agto napepenek so emosyonal tan espiritual a pankaukolan to. Importantin tuloy so pangitarya ed sarayan pankaukolan na asawa to. Tua, dakel a Kristianon lalaki so okupadon maong diad pangaasikaso ra ed saray pamaakaran ed kongregasyon. Balet, say pakawalaan na ambelat iran responsabilidad ed kongregasyon so agmankabaliksan a nepeg lan paulyanan na asawan laki iray obligasyon ton inter na Dios bilang ulo na pamilya. (1 Timoteo 3:5, 12) Nipaakar ed saya, oniay imbalikas na sayan magasin pigay taon lay apalabas: “Unong ed saray kakaukolanen na Biblia, nibaga a say ‘panagpastol et igapo ni ed abung.’ No paulyanan na sakey a matatken so pamilya to, nayarin nabalang to so pribilehyo to bilang matatken.” * Malinew, nepeg ya itaryam so pankaukolan na asawam​—diad pisikal, emosyonal tan, sankaimportantian ed amin, diad espiritual a paraan.

Anto so Kabaliksan na Pamablim ed Asawam?

10. Panon a nipatnag na asawan laki so panamabli to ed asawa to?

¹⁰ No papablien mo so asawam, sikato so asikasoen mon maong lapud sikatoy aaroen mo. Wala so pigaran paraan pian nagawaan mo iya. Unona, nepeg a nawalaan ka na malaem a panaon a kaibay asawam. No ibaliwalam so asawam ed sayan pamaakaran, ompano ombetel so panangaro to. Nodnonoten met a say iisipen mon karakel na panaon tan atension ya iter mo ed sikato et nayarin aliwan samay liknaen ton nakaukolan to. Agmagenap so pangibaga lambengat na panamablim ed sikato. Nepeg a nalikna na asawam a sikatoy papablien mo. Oniay insulat nen Pablo: “Anggapo komon so siopan too a mananap na kaabigan ton dili, noag say kaabigan na kapara ton too.” (1 Corinto 10:24) Bilang maaron asawan laki, seguroen mo a natetebek mo no anton talaga iray nakaukolan na asawam.​—Filipos 2:4.

11. Panon a say panagtrato na asawan laki ed asawa to et mangapekta ed relasyon to ed Dios tan ed kongregasyon?

¹¹ Say sakey nin paraan pian nipatnag mo so panamablim ed asawam et diad matamoy a pantrato ed sikato, diad salita tan gawa. (Uliran 12:18) Oniay imbaga nen Pablo ed saray  taga-Colosas: “Asawan lalaki, aro yo so saray kaasawaan yo, tan agkayo magmaliw ya ampait ed sikara.” (Colosas 3:19) Unong ed sakey a reperensya, say unor a kabiangan na balikas nen Pablo so nayarin nipatalos ed idyomatikon paraan bilang “sikato so agyo ipapasen a katulong” odino “sikato so agyo aaripenen.” Say sakey ya asawan laki a singa-diktador​—balanglan diad pribado odino diad publiko​—so maseguron agmamapabli ed asawa to. No maruksa so panagtrato to ed asawa to, naapektoan so relasyon to ed Dios. Oniay imbaga nen apostol Pedro ed saray kaasawaan a lalaki: “Miamong kayo ed asawa yo unong na igaganggan na kakabatan; igalang yo so bii, alwaran yo a singa mayumis a baso, tan unong a tomatawir met ira na grasya na bilay: pian saray pikakasi yo agnasebelan.” *​—1 Pedro 3:7.

12. Anto so naaralan na Kristianon asawan laki ed paraan na impantrato nen Jesus ed Kristianon kongregasyon?

¹² Agmon balot ibabaliwala so panangarom ed asawam. Sikato so paseguroan mo ed agnaumas a panangarom. Impatnag nen Jesus so ehemplo parad saray Kristianon kaasawaan a lalaki diad paraan na impideneng to ed Kristianon kongregasyon. Sikato so matamoy, mapangasi, tan manamerdona​—anggano aminpigan angipatnag na negatibo iran ugali iray patumbok to. Kanian oniay nayarian nen Jesus ya ibaga ed arum: “Dago kayo’d siak, . . . ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo.” (Mateo 11:28, 29) Pian naalig to si Jesus, nepeg a tratoen na Kristianon asawan laki so asawa to a singa met ed impantrato nen Jesus ed kongregasyon. Makaparepreskon tuloy ed asawan bii no ipapatnag ed sikato nen masiken to so peteg a panamabli diad panamegley na salita tan gawa.

Saray Asawan Bibii ya Ontutumbok ed Saray Prinsipyo na Biblia

13. Antoran prinsipyo so walad Biblia a makatulong ed asawan bibii?

¹³ Akasulat met ed Biblia iray prinsipyo a makatulong ed asawan bibii. Oniay kuan na Efeso 5:22-24, 33: “Sikayo ya asawan bibii, pauleyan kayo ed saray kaasawaan yo a dili, a singa met ed Katawan. Ta say asawan laki sikato so ulo na asawan bii, a singa si Kristo met sikato so ulo na iglesia, a sikaton dili so manangilaban ed laman. Et unong a say iglesia wala ed katutulok ed Kristo, kanian saray asawan bibii pauleyan ira met ed saray kaasawaan da ed ganagana. . . . Say asawan bii nepeg ton takotan [“respetoen a maong,” NW] so asawa to.”

14. Akin a say Makasulatan a prinsipyo na panagpasakop et agmangiyaabeba ed bibii?

¹⁴ Imanoen pa so impangidanet nen Pablo ed panagpasakop tan panagrespeto. Apanonotan so asawan bii a sikatoy manpasakop ed masiken to. Saya so mitunosan ed uksoyan na Dios. Amin a mabilay ed tawen tan ed dalin et walay sakey a pampapasakopan da. Anggan si Jesus et manpapasakop ed si Jehova a Dios. (1 Corinto 11:3) Siempre, no aagamilen na asawan laki so inkaulo to diad suston paraan, mas mainomay a manpasakop ed sikato so asawa to.

15. Anto so pigaran simbawa na Biblia parad asawan bibii?

¹⁵ Indatak met nen Pablo a nepeg a “respetoen a maong [na asawan bii] so asawa to.” Nepeg ya ipatnag na Kristianon asawan bii so “mauyamo tan mareen ya espiritu,” ya agto mapaatagey a susuppiaten so autoridad nen masiken to odino onkiwas ya independente. (1 Pedro 3:4) Panseseetan  na matakot ed Dios ya asawan bii so pankaabigan na pamilya to tan mangitatarok na galang ed ulo to. (Tito 2:4, 5) Panggunaetan to so mansalita na maabig nipaakar ed si masiken to tan anggapo so gawaen ton pakaekalay respeto na arum ed si masiken to. Panggunaetan to met a suportaan iray desisyon nen masiken to pian ontalona iratan.​—Uliran 14:1.

16. Anto so naaralan na Kristianon asawan bibii ed saray alimbawa nen Sara tan Rebeca?

¹⁶ Say pakawalaan na mauyamo tan mareen ya espiritu so agmankabaliksan a say Kristianon bii et agla nayarin mangibalikas na saray opinyon to odino ag-importante so iisipen to. Saray maridios a bibii nensaman, a singa si Sara tan Rebeca, so angibalikas ed saray kapagaan da nipaakar ed pigaran pamaakaran, tan say salaysay na Biblia so mangipapabitar ya inabobonan nen Jehova iratan a kiwas da. (Genesis 21:8-12; 27:46–28:4) Saray Kristianon asawan bibii so nayari met a mangibalikas ed nalilikna ra. Balet, nepeg ya ibaga ra itan ed makonsideran paraan, ya agmanleglemew ed asawa ra. No ontan et magmaliw a mas makapaliket tan epektibo so ontan a pantongtong da.

Say Kaimportantian na Impansipanan

17, 18. Anto so pigaran paraan a naresistian na sanasawa iray getma nen Satanas a maneral ed panamaley da?

¹⁷ Say panamaley et legay-bilay ya impansipanan. Kanian, nepeg a walaan na puron pilalek so asawan laki tan bii a magmaliw a matalona so panamaley da. Magmaliw a makaalipanes tan ombaleg so problema no anggapo so lukas a pantongtong da. Mabetbet et agla mantotongtong iray sanasawa sano walaray onlesan problema, a pansengegay panem-em na sakit na linawa. Arum ni ingen a kaasawaan so mananap na paraan pian makalukpos la ed relasyon da, a nayarin diad pamayubo ra na romantikon liknaan ed agda asawa. Balet, oniay impasakbay nen Jesus: “Balang sakey ya onlimgis ed sakey a bii ed pangagum to, akilawanan la ed sikato diad puso to.”​—Mateo 5:28.

¹⁸ Sinimbawa nen apostol Pablo so amin a Kristiano, pati saray de-asawa a Kristiano: “Onsanok kayo, ingen ta agkayo mankakasalanan: agkomon onselek so agew a sipapasnok kayo ni: Tan agyo palongkitan so Diablo.” (Efeso 4:26, 27) Say manunan kabusol tayo, si Satanas, so manggugunaet a manganamot ed saray agpantatalosan a nayarin onlesa ed baetan na saray Kristiano! Sikato so agyo aabuloyan ya ontalona! Sano onlesa iray problema, mansukimat ed Biblia no anto so ibabaga na satan nipaakar ed panmoria nen Jehova ed saray pamaakaran, diad pangusar ed saray publikasyon a nibase ed Biblia. Pantongtongan yo iray agyo pantatalosan diad kalmado tan matuan paraan. Iyaplika yo iray naaralan yon estandarte nen Jehova ed mismon gagawaen yo. (Santiago 1:22-25) Nipaakar ed panamaley yo, sikayon sanasawa so nepeg a determinadon mankurang a kaiba so Dios, tan agyo aabuloyan so siopaman odino antokaman a mansian ed impankasakey to!​—Miqueas 6:8.

[Saray paimano ed leksab]

Kasin Natandaan Yo?

• Akin ya onlelesa iray problema anggan diad loob na Kristianon panamaley?

• Panon a nitarya na asawan laki iray pankaukolan na asawa to, tan panon ton nipatnag so panamabli to ed akulaw to?

• Anto so nagawaan na asawan bii pian nipatnag toy aralem a panagrespeto ed asawa to?

• Panon a napaelet na asawan laki tan bii so impansipanan da?

[Tepetepet Parad Panagaral]

[Litrato ed pahina 20]

Say asawan laki so nepeg a maong a manangitarya, ya aliwa labat a diad materyal noagta ontan met ed espiritual

[Litrato ed pahina 21]

Makaparepresko ed asawan bii so panamabli na masiken to

[Litrato ed pahina 23]

Nepeg ya ibesngaw na Kristianon asawan bibii so liknaan da diad marespeton paraan