No Separá Loke Dios A Uni

“Nan no ta dos mas, sino ún karni. P’esei loke Dios a uni, no laga ningun hende separá.”—MATEO 19:6.

1, 2. Pakiko ta bíbliko i realístiko pa ferwagt ku de bes en kuando parehanan kasá lo haña nan ku problema?

IMAGINÁ bo ku bo ta kla pa kuminsá un biahe largu ku outo. Bo por haña bo ku difikultat na kaminda? Lo bo ta naïf pa pensa ku nada lo no por pasa! Por ehèmpel, bo por haña bo ku mal wer, i p’esei lo bo tin ku baha velosidat i kore ku mas kuidou. Dado momento bo por haña bo ku un problema di motor ku abo mes no por solushoná, i p’esei lo bo tin ku hala kant’i kaminda i buska yudansa. Akaso e situashonnan ei mester pone bo konkluí ku tabata un ekibokashon pa kuminsá e biahe i ku bo mester bai laga e outo? Nò. Ora bo ta biaha un distansia largu, bo ta ferwagt problema i ku sano huisio bo ta buska un manera pa solushoná nan.

² Meskos ta konta pa matrimonio. Problema ta inevitabel, i si un pareha ku ta plania pa kasa ta kere ku nan lo hiba un bida di puru felisidat, nan lo ta basta naïf! Na 1 Korintionan 7:28, Beibel ta bisa frankamente ku esposo i esposa lo tin “tribulashon den e bida aki.” Pakiko esaki ta e kaso? Simplemente pasobra esposo i esposa ta imperfekto, i nos ta bibando den “tempunan trabahoso.” (2 Timoteo 3:1; Romanonan 3:23) P’esei, asta un pareha kompatibel, ku inklinashon spiritual, de bes en kuando lo haña nan ku problema.

3. (a) Kon hopi hende di mundu ta mira matrimonio? (b) Pakiko kristiannan ta hasi esfuerso pa konserbá nan matrimonio?

³ Den e mundu moderno aki, ora algun pareha haña problema ku otro, nan promé reakshon ta pa kibra e matrimonio. Den hopi pais, e sifranan di divorsio ta oumentando drástikamente. Sin embargo, kristiannan berdadero ta enfrentá problema en bes di kore pa nan. Pakiko? Pasobra nan ta mira matrimonio komo un regalo sagrado di Yehova. Relashoná ku parehanan kasá, Hesus a bisa: “Loke Dios a uni, no laga ningun hende separá.” (Mateo 19:6) Ta bèrdat ku no ta semper fásil pa biba segun e prinsipio ei. Por ehèmpel, hopi bes famia i otro personanan—inkluso algun konsehero di matrimonio—ku no ta rekonosé prinsipionan di Beibel ta animá parehanan pa separá òf divorsiá sin ku nan tin un base bíbliko. * Pero kristiannan sa ku ta muchu mas mihó pa hasi esfuerso pa mehorá i konserbá nan matrimonio ku kore kibr’é. Sí, ta masha importante pa for di kuminsamentu nos ta determiná pa hasi kosnan segun e kamindanan di Yehova—no segun e konseho di hende.—Proverbionan 14:12.

Vense Difikultat

4, 5. (a) Ki difikultatnan por presentá den un matrimonio? (b) Dikon e prinsipionan ku nos por haña den e Palabra di Dios realmente ta duna resultado, asta ora surgi problema den un matrimonio?

⁴ Den tur matrimonio sa pasa kosnan ku mester di atenshon. Den mayoria kaso, esei lo enserá resolvé desakuerdonan menor. Pero den algun matrimonio kisas tin difikultatnan mas serio ku ta menasá e fundeshi di e relashon. Tin biaha lo bo tin ku buska yudansa di  un ansiano kristian kasá ku tin eksperensia. Sin embargo, e echo ku boso ta pasa den e situashonnan aki no ta nifiká ku boso matrimonio ta un frakaso. Simplemente nan ta enfatisá e importansia di pega firmemente na prinsipionan di Beibel ora di buska solushon.

⁵ Komo esun ku a krea hende i establesé e areglo di matrimonio, Yehova sa mihó ku kualke otro persona kiko nos mester hasi pa por tin un matrimonio eksitoso. E pregunta ta: Nos lo skucha e konseho hañá den su Palabra i obedes’é? Si nos hasi esei, lo e benefisiá nos sigur. Yehova a deklará na su pueblo di antigwedat: “Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.” (Isaias 48:18) Ora nos ta pega na e guia ku Beibel ta duna, nos por tin éksito den matrimonio. Laga nos konsiderá promé ki konseho Beibel ta duna esposonan.

“Sigui Stima Boso Esposa”

6. Ki konseho Beibel ta duna esposonan?

⁶ E karta ku apòstel Pablo a skirbi e efesionan ta kontené un guia kla pa esposonan. Pablo a skirbi: “Esposonan, [“sigui,” NW] stima boso esposa, meskos ku Kristu tambe a stima e iglesia i a entregá su mes p’e. Asina esposonan tambe mester stima nan esposa manera nan mes kurpa. Esun ku ta stima su esposa ta stima su mes; pasobra nunka ni un hende no a odia su mes karni, ma ta aliment’é i ta kuid’é, meskos ku Kristu tambe ta hasi ku e iglesia. Asina anto, laga kada un di boso tambe stima su esposa manera su mes.”—Efesionan 5:25, 28, 29, 33.

7. (a) Kiko mester ta un parti importante di e fundeshi di un matrimonio kristian? (b) Kon esposonan ta sigui stima nan esposa?

⁷ Pablo no ta papia di tur posibel problema ku por surgi entre un esposo i un esposa. Mas bien, e ta yega na esensia di e asuntu dor di indiká kiko mester ta un parti importante di e fundeshi di tur matrimonio kristian: amor. De echo, e versíkulonan sitá anteriormente ta menshoná e verbo “stima” seis bes. Ripará tambe ku Pablo ta bisa esposonan: “Sigui stima boso esposa.” Sin duda, Pablo a rekonosé ku ta muchu mas fásil pa kuminsá stima un persona ku pa mantené e stimashon ei. Esaki ta e kaso foral den “e último dianan” aki ora ku hopi hende ta “stimadó di nan mes” i “irekonsiliabel.” (2 Timoteo 3:1-3) E kualidatnan negativo ei ta kaba ku hopi matrimonio awe, pero un esposo amoroso lo no laga e karakterístikanan egoista di e mundu aki influensiá su manera di pensa i aktua.—Romanonan 12:2.

Kon Bo Por Perkurá pa Bo Esposa?

8, 9. Den ki maneranan un esposo kristian ta perkurá pa su esposa?

⁸ Si bo ta un esposo kristian, kon bo por resistí tendensianan egoista i desplegá  berdadero amor pa bo esposa? Den su palabranan na e efesionan sitá anteriormente, Pablo a identifiká dos kos ku bo tin ku hasi—perkurá pa bo esposa i kuid’é meskos ku bo ta kuida bo mes kurpa. Kon bo por perkurá pa bo esposa? Un manera pa hasi esei ta den sentido material, es desir, sòru pa e nesesidatnan físiko di bo esposa. Pablo a skirbi Timoteo: “Si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.”—1 Timoteo 5:8.

⁹ Sin embargo, esei ta enserá mas ku djis perkurá kuminda, paña i dak riba kabes. Dikon? Pasobra podisé un esposo ta perkurá hopi bon pa e nesesidatnan material di su esposa pero e no ta satisfasé su nesesidatnan emoshonal i spiritual. Ta esensial pa e esposo perkurá pa su esposa den e sentidonan aki tambe. Ta bèrdat ku hopi hòmber kristian ta sumamente okupá ku asuntunan relashoná ku e kongregashon. Pero e echo ku un esposo tin responsabilidatnan di peso den e kongregashon no ta motibu pa e neglishá e obligashonnan ku Dios a dun’é komo kabes di famia. (1 Timoteo 3:5, 12) Algun aña pasá e revista aki a komentá lo siguiente riba e asuntu aki: “Na armonia ku rekisitonan bíbliko, nos por bisa ku ‘pastoreo ta kuminsá na kas.’ Si un ansiano neglishá su famia, e por pone su nombramentu na peliger.” * P’esei ta imperativo pa bo perkurá pa bo esposa físikamente, emoshonalmente i, mas importante ku tur, spiritualmente.

Kiko Kier Men Kuida Bo Esposa?

10. Kon un esposo por kuida su esposa?

¹⁰ Si bo ta kuida bo esposa, bo ta perkurá bon p’e pasobra bo ta stim’é. Bo por hasi esaki den vários manera. Na promé lugá, dediká sufisiente tempu na bo kasá. Si bo neglishá bo kasá den e sentido aki, su amor pa bo por fria. Tene kuenta tambe ku loke abo ta kere ku bo esposa tin mester pa loke ta tempu i atenshon kisas no ta loke e ta sinti ku e tin mester. No ta simplemente un asuntu di bisa ku bo ta kuida bo esposa. Ta bo esposa mester sinti ku e ta wòrdu kuidá. Pablo a skirbi: “No laga ningun hende buska su mes interes, sino esun di su próhimo.” (1 Korintionan 10:24) Komo un esposo amoroso, bo ke hasi sigur ku bo ta komprondé e nesesidatnan real di bo esposa.—Filipensenan 2:4.

11. Ki efekto e trato ku un esposo ta duna su kasá tin riba e esposo su relashon ku Dios i riba e kongregashon?

¹¹ Un otro manera pa mustra ku bo ta kuida bo kasá ta dor di trat’é ku kariño, tantu ku palabra komo akshon. (Proverbionan 12:18) Pablo a skirbi e kolosensenan: “Esposonan, stima boso esposanan, i no sea  amargá kontra nan.” (Kolosensenan 3:19) Di akuerdo ku un buki di konsulta, por tradusí e último parti di Pablo su deklarashon komo “no trat’é manera un kriá di kas” òf “no hasié un esklabo.” Un esposo ku ta un tirano—sea ora e ta su so ku su kasá òf den públiko—sigur no ta demostrá ku e ta kuida su kasá. Si e trata su esposa na un manera brutu, esei por afektá su relashon ku Dios. Apòstel Pedro a skirbi esposonan: “Biba ku boso esposanan ku komprenshon, manera ku un vaso mas delikado, komo ku e ta hende muhé; i dun’é onor komo ko-heredero di e grasia di bida, pa boso orashonnan no wòrdu strobá.” *—1 Pedro 3:7.

12. Kiko un esposo kristian por siña for di e manera ku Hesus a trata e kongregashon kristian?

¹² Nunka pensa ku di mes bo esposa ta stima bo. Semper lag’é sinti ku bo ta stim’é. Hesus a pone un ehèmpel pa esposonan kristian den e manera ku el a trata e kongregashon kristian. E tabata suave, bondadoso i kla pa pordoná—asta ora ku bes tras bes su siguidónan a manifestá karakterístikanan negativo. P’esei Hesus por a bisa otro hende: “Bin serka mi . . . pasobra mi ta mansu i humilde di kurason; i boso lo haña sosiegu [“refreskamentu,” NW] pa boso alma.” (Mateo 11:28, 29) Un esposo kristian ku ta imitá Hesus ta trata su esposa na e mesun manera ku Hesus a trata e kongregashon. Un hòmber ku di bèrdat ta kuida su esposa, mustrando esaki ku palabra i akshon, lo ta un fuente di berdadero refreskamentu p’e.

Esposanan Ku Ta Biba Segun Prinsipionan di Beibel

13. Ki prinsipio bíbliko por yuda esposanan?

¹³ Beibel ta kontené tambe prinsipionan ku por yuda esposanan. Efesionan 5:22-24, 33 ta deklará: “Esposanan, sea sumiso na boso mes esposo, manera na Señor. Pasobra e esposo ta kabes di e esposa, meskos ku Kristu tambe ta kabes di e iglesia, e mes siendo salbadó di e kurpa. Ma meskos ku e iglesia ta sumiso na Kristu, asina tambe e esposanan mester ta sumiso na nan esposo den tur kos. . . . E esposa perkurá pa e respetá su esposo.”

14. Pakiko e prinsipio bíbliko di sumishon no ta rebahá hende muhé?

¹⁴ Nota e énfasis ku Pablo a pone riba sumishon i rèspèt. E ta rekordá e esposa pa ta sumiso na su esposo. Esaki ta na armonia ku e areglo di Dios. Tur kriatura bibu den shelu i riba tera ta sumiso na un persona. Asta Hesus ta sumiso na Yehova Dios. (1 Korintionan 11:3) Naturalmente, ora un esposo ta kumpli ku su papel komo kabes na un manera apropiá, ta bira mas fásil pa su esposa keda sumiso na dje.

15. Kua ta algun konseho ku Beibel tin pa esposanan?

¹⁵ Pablo a deklará tambe ku un esposa mester “respetá su esposo.” Un esposa kristian mester manifestá un “spiritu suave i ketu,” lokual ta enserá no kuestioná ku arogansia e outoridat di su esposo ni aktua independiente di dje. (1 Pedro 3:4) Un esposa deboto na  Dios ta traha duru pa e bienestar di su famia i ta onra su kabes. (Tito 2:4, 5) Lo e hasi su bèst pa papia bon di su esposo i no hasi nada ku por pone otro hende falta rèspèt p’e. Ademas, lo e duna di su parti pa e desishonnan di su esposo por tin éksito.—Proverbionan 14:1.

16. Kiko esposanan kristian por siña for di e ehèmpelnan di Sara i Rebeka?

¹⁶ E echo ku un muhé kristian tin un spiritu suave i ketu no ta nifiká ku e no tin opinion òf ku su manera di pensa no ta importante. Muhénan deboto di antigwedat, manera Sara i Rebeka, a tuma inisiativa pa ekspresá nan preokupashon tokante sierto asuntunan, i e registro di Beibel ta mustra ku Yehova a aprobá nan akshonnan. (Génesis 21:8-12; 27:46–28:4) Esposanan kristian tambe por duna di konosé kiko nan ta sinti. Sin embargo, nan mester hasi esaki ku konsiderashon, i no ku un tono di menospresio. Probablemente nan lo ripará ku tal forma di ekspresá nan mes lo ta mas agradabel i efikas.

E Importansia di Kompromiso

17, 18. Kiko esposo i esposa por hasi pa resistí e intentonan di Satanas pa kibra e union matrimonial?

¹⁷ Matrimonio ta un kompromiso di bida largu. P’esei tantu esposo komo esposa mester tin un deseo sinsero pa nan matrimonio funshoná. Falta di komunikashon franko por laga problema kria pus i baster. Demasiado biaha, parehanan ta stòp di papia ku otro ora surgi problema, i esaki ta kousa renkor. Algun asta ta buska manera pa pone fin na e relashon, podisé dor di krea interes romántiko den un persona ku no ta nan kasá. Hesus a spièrta: “Ken ku wak un muhé pa dese’é, ya kaba el a kometé adulterio kuné den su kurason.”—Mateo 5:28.

¹⁸ Apòstel Pablo a konsehá tur kristian, inkluso matrimonionan kristian: “Rabia, ma no hasi piká; no laga solo baha riba boso rabia, i no duna Diabel oportunidat.” (Efesionan 4:26, 27) Satanas, nos enemigu prinsipal, ta purba probechá di e desakuerdonan ku por surgi entre kristiannan. No dun’é chèns! Ora surgi problema, investigá kiko Beibel ta bisa tokante e pensamentunan di Yehova riba e asuntu, ku yudansa di publikashonnan bíbliko. Papia di e desakuerdonan na un manera kalmu i franko. Hasi esfuerso pa no solamente haña sa kiko ta e normanan di Yehova, sino realmente kumpli ku nan tambe. (Santiago 1:22-25) Ora ta trata di boso matrimonio, sea determiná pa sigui kana ku Dios komo pareha, i no laga niun hende ni nada separá loke é a uni!—Mikeas 6:8.

[Nota]

Bo Ta Kòrda?

• Pakiko asta den matrimonionan kristian por tin problema?

• Kon un esposo por perkurá pa su kasá i mustra ku e ta kuid’é?

• Kiko un esposa por hasi pa mustra ku e ta respetá su kasá?

• Kon esposo i esposa por fortalesé nan sentido di kompromiso?

[Preguntanan di Estudio]

[Plachi na página 20]

Un esposo mester perkurá bon pa su esposa, no solamente den sentido material sino tambe spiritual

[Plachi na página 21]

Un hòmber ku ta kuida su esposa ta un fuente di refreskamentu p’e

[Plachi na página 23]

Ku rèspèt esposanan kristian ta duna di konosé kiko nan ta sinti