No prati san Gado poti na ondro wán tyatyari

„Den no de tu skin moro, ma wán skin. Fu dati ede, nowan sma musu prati san Gado poti na ondro wán tyatyari.”​—MATEYUS 19:6.

1, 2. Fu san ede trowpaar musu fruwakti taki den o kisi problema na ini den trowlibi, èn san Bijbel e taki fu a tori disi?

KON meki wi taki dati yu de fu go nanga oto na wan farawe presi. Yu denki taki yu o kisi problema te yu de na pasi? A o de wan don sani fu denki taki dati no o pasa! Fu eksempre, kande hebi alen o fadon, èn dati o meki taki yu no o rèi so tranga èn yu o luku moro bun pe yu e go. Kande wan sani o broko na a oto èn yu no man meki en. Te dati pasa, dan yu musu go na seisei fu a pasi èn aksi wan sma fu yepi yu. Te den problema disi e miti yu, dan yu no o taki dati a ben o moro bun efu yu ben tan na oso, a no so? Yu no ben o gowe libi na oto na sei pasi, a no so? Nôno yu no ben o du dati. Te yu e go na wan farawe presi, dan yu e fruwakti taki yu o kisi problema èn yu o luku fa yu o lusu den problema dati.

² Na so a de tu nanga a trowlibi. Problema o kon na ini a trowlibi, èn a ben o de wan don sani efu tu sma di o trow nanga makandra e denki taki a libi fu den no o abi nowan problema. Na ini 1 Korentesma 7:28, Bijbel e sori krin taki masra nanga wefi o kisi „banawtu na ini den libi”. Fu san ede dati o pasa? We, fu di masra nanga wefi na sondusma, èn fu di wi e libi na ini ’muilek ten di tranga fu pasa’ (2 Timoteyus 3:1; Romesma 3:23). Sobun, srefi efu wan trowpaar man libi bun nanga makandra èn den wani du san Gado e taki, toku ten na ten den sa kisi problema.

3. (a) Fa furu grontapusma e si a trowlibi? (b) Fu san ede Kresten e du muiti fu no broko trow?

³ Na ini a ten disi a de so taki te son trowpaar e kisi problema, dan a fosi sani di den wani du, na fu broko a trow. Na ini furu kondre, moro nanga moro sma e broko trow. Ma na presi taki tru Kresten wani broko trow wantewante te den e kisi problema, dan den e pruberi fu lusu den problema fu den. Fu san ede den e du dati? Fu di den e si a trowlibi leki wan santa sani di Yehovah gi den. Yesus ben taki disi fu trowpaar: „Nowan sma musu prati san Gado poti na ondro wán tyatyari” (Mateyus 19:6). A tru taki a no makriki ala ten fu du dati. Fu eksempre, furu tron trowpatna e kisi rai fu famiriman nanga trawan di e taigi den san den musu du na ini den trowlibi, aladi den sma disi no e hori densrefi na Bijbel gronprakseri. Nofo tron den e gi trowpatna a deki-ati fu prati noso fu broko trow, aladi Bijbel no e gi den trowpatna pasi fu prati noso fu broko trow fu den sani dati ede. * Ma Kresten sabi taki a moro bun fu lusu den problema na ini den trowlibi èn fu tan nanga makandra, na presi fu broko a trow wantewante. Iya, a de tumusi prenspari taki na a bigin kaba trowpaar e bosroiti fu du sani soleki fa Yehovah wani, èn taki den no sa arki a rai fu libisma.—Odo 14:12.

Fa fu lusu den problema

4, 5. (a) Sortu problema sma e kisi na ini a trowlibi? (b) Fu san ede den gronprakseri di skrifi na ini Gado Wortu e yepi wi trutru, srefi te problema e kon na ini wi trowlibi?

⁴ A tru taki ala trowpatna musu luku ten na ten fa sani e waka na ini a trowlibi fu den. Nofo tron disi wani taki dati den musu pruberi fu lusu pikin kesekese. Ma son leisi trowpatna abi moro bigi problema di kan meki taki den wani  broko trow. Son leisi yu sa musu suku yepi kande na wan lepi Kresten owruman di trow. Ma te den sani disi e pasa, dan dati no wani taki dati a trowlibi fu yu no bun kwetikweti. Te yu e kisi den problema disi, dan a de prenspari fu hori yusrefi na Bijbel gronprakseri fu man lusu den.

⁵ Fu di Yehovah meki libisma èn fu di na en seti a trowlibi, meki a sabi moro leki iniwan tra sma san wi abi fanowdu fu abi wan bun trowlibi. Ma a sani di wi musu aksi wisrefi na disi: Wi sa arki den rai di skrifi na ini a Wortu fu en èn wi sa du san a taki? Wi sa kisi wini trutru efu wi e du dati. Yehovah ben taigi a pipel fu en fu owruten: „O, efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se” (Yesaya 48:18). Te wi e hori wisrefi na den markitiki di skrifi na ini Bijbel, dan dati kan meki wi abi wan bun trowlibi. Meki wi go luku fosi sortu rai Bijbel e gi masra.

„Tan lobi un wefi”

6. Sortu rai Bijbel e gi masra?

⁶ Na ini a brifi di na apostel Paulus skrifi gi den Efeisesma, a e sori masra krin san den musu du. Paulus ben skrifi: „Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente. Na a srefi fasi den masra musu lobi den wefi leki den eigi skin. A man di lobi en wefi, lobi ensrefi tu, bika nowan man abi bita-ati gi en eigi skin; ma a e sorgu a skin èn a e luku en bun, neleki fa Krestes e du nanga a gemeente. Ma toku, meki ibriwan fu unu sosrefi lobi en wefi leki fa a lobi ensrefi.”—Efeisesma 5:25, 28, 29, 33.

7. (a) San musu de wan fu den moro prenspari sani na ini wan Kresten trowlibi? (b) San wan masra musu du fu tan lobi en wefi?

⁷ Paulus no e taki fu ibri problema di masra nanga wefi kan kisi. Na presi fu dati, a e taki fu a moro prenspari sani di kan lusu ibri problema na ini a trowlibi. A sani disi di musu de na ini ibri Kresten trowlibi, na lobi. Fu taki en leti, na ini den bijbeltekst di wi kari na fesi, a wortu lobi skrifi seibi leisi. Luku sosrefi taki Paulus e taigi masra: „Tan lobi un wefi.” A no de fu taki dati Paulus ben sabi taki a no te wan sma bigin kisi lobi firi gi wan trawan, dan a o tan lobi a sma dati. Disi de so spesrutu na ini den „lasti dei” disi fu di furu sma „lobi densrefi nomo” èn ’den no wani meki kruderi’ (2 Timoteyus 3:1-3). Den sortu takru fasi disi e meki taki na ini a ten disi furu trowpatna e kisi problema na ini den trowlibi. Ma wan masra di lobi en wefi sa sorgu taki a no e denki leki fa grontapusma e denki, èn taki a no e handri neleki grontapusma di e denki densrefi nomo.—Romesma 12:2.

Fa yu kan sorgu gi a wefi fu yu?

8, 9. Na sortu fasi wan Kresten masra musu sorgu gi en wefi?

⁸ Efu yu na wan Kresten masra, fa yu kan sorgu taki yu no e denki yusrefi nomo  èn fa yu kan sori trutru lobi gi yu wefi? Den sani di Paulus ben taigi den Efeisesma, e sori taki yu musu du tu sani, namku taki yu musu sorgu gi yu wefi, èn taki yu musu luku en bun neleki yu eigi skin. Fa yu kan sorgu gi yu wefi? Wán fasi fa yu kan du dati, na te yu e sorgu gi den sani di a abi fanowdu na ini a libi. Paulus ben skrifi Timoteyus: „Fu tru, efu wan sma no e sorgu den sma fu en, spesrutu den sma fu en osofamiri, dan a drai en baka gi a bribi, èn a takru moro leki wan sma di no e bribi.”—1 Timoteyus 5:8.

⁹ Ma wan masra no musu sorgu soso gi nyanyan, krosi, nanga wan tanpresi. Fu san ede? Kande a e sorgu gi ala den sani dati di a wefi abi fanowdu, ma a no e hori den firi fu en wefi na prakseri èn a no e yepi en fu kisi wan moro tranga bribi. A de prenspari fu sorgu gi en na den fasi disi tu. A tru taki furu Kresten mansma abi furu fu du na ini a gemeente. Ma awinsi yu abi bigi frantwortu na ini a gemeente, toku dati no wani taki dati yu no abi fu du a wroko di Gado gi yu leki edeman fu yu osofamiri (1 Timoteyus 3:5, 12). Wan tu yari pasa a tijdschrift disi ben taki: „Soleki fa Bijbel e sori, wan owruman musu bigin luku fa sani e go na ini en eigi osofamiri. Efu wan owruman no e sorgu gi en osofamiri, dan a kan lasi a grani di a abi.” * A de krin fu si taki a de prenspari fu sorgu taki yu wefi kisi den sani di a abi fanowdu. Boiti dati, yu musu sorgu taki yu e hori den firi fu en na prakseri, èn san de moro prenspari, yu musu sorgu taki a abi wan tranga bribi.

San a wani taki fu lobi yu wefi?

10. Fa wan masra kan sori taki a lobi en wefi?

¹⁰ Te yu lobi yu wefi, dan yu o sorgu bun gi en. Yu kan du dati na difrenti fasi. A fosi sani na taki yu musu teki nofo ten fu de makandra nanga yu wefi. Efu yu no e poti prakseri na en na a fasi disi, dan a kan taki a no o lobi yu moro. Hori na prakseri sosrefi taki awansi yu denki taki yu e teki nofo ten fu de nanga yu wefi èn taki yu e poti nofo prakseri na en, toku yu wefi kan feni taki dati no nofo. Yu no kan taki nomo dati yu lobi yu wefi. A wefi fu yu musu firi taki yu lobi en. Paulus ben skrifi: „Meki ibriwan sma no tan suku en eigi bun, ma a di fu trawan” (1 Korentesma 10:24). Te yu lobi yu wefi, dan yu o du ala san yu man fu kon sabi san a abi fanowdu trutru.—Filipisma 2:4.

11. Te wan masra no e handri bun nanga a wefi fu en, dan fa a sani dati abi krakti tapu a matifasi di a abi nanga Gado èn tapu den grani di a abi na ini a gemeente?

¹¹ Wan tra fasi fa yu kan sori taki yu lobi yu wefi, na te yu e libi nanga en na wan switi fasi. Yu kan sori disi nanga a fasi fa yu e du sani èn nanga a fasi fa yu e taki (Odo 12:18). Paulus ben taigi den Kolosesma na ini wan brifi: „Un masra, tan lobi un wefi èn no abi bita-ati gi den” (Kolosesma 3:19). Soleki fa wan buku e taki, dan wán fasi fa yu kan taki a lasti pisi fu a vers disi na taki masra „no musu si a wefi fu  den leki wan futuboi”, noso „a no musu meki a wefi fu en de leki wan srafu gi en”. Wan masra di grofu èn di e rigeri nanga en wefi te den de den wawan noso te den de nanga tra sma, no e sori kwetikweti taki a lobi en wefi. Te a grofu nanga a wefi fu en, dan dati kan pori a matifasi fu en nanga Gado. Na apostel Petrus ben skrifi disi gi masra: „Tan libi tu nanga un wefi na wan fasi di e sori taki unu abi sabi, aladi unu e gi na uma grani fu di a de wan moro swaki prapi, bika unu nanga den o kisi libi fu Gado aladi unu no frudini dati, èn un musu du dati so taki nowan sani e tapu den begi fu unu.” *—1 Petrus 3:7.

12. San wan Kresten masra kan leri fu a fasi fa Yesus ben e handri nanga a Kresten gemeente?

¹² No denki taki yu no abi fu du noti fu meki yu wefi tan lobi yu. Gi en a dyaranti taki yu sa tan lobi en. Yesus gi Kresten masra wan moi eksempre te wi e luku a fasi fa a ben e handri nanga a Kresten gemeente. A ben e handri na wan safri-ati fasi nanga a gemeente, a ben abi switifasi, èn a ben gi a gemeente pardon, srefi te den bakaman fu en ben tan abi den srefi takru fasi fu den. Fu dati ede Yesus ben kan taigi sma: „Un kon na mi, . . . bika mi abi safri-ati nanga sakafasi, èn unu sa kisi krakti baka” (Mateyus 11:28, 29). Wan Kresten masra musu handri na a srefi fasi nanga en wefi leki fa Yesus ben e handri nanga a gemeente. Wan man di lobi en wefi trutru, sa sori dati nanga a fasi fa a e taki èn nanga den sani di a e du. Na so fasi a sa meki a wefi fu en firi bun.

Wefi di e hori densrefi na Bijbel gronprakseri

13. Sortu Bijbel gronprakseri kan yepi wefi?

¹³ Bijbel abi gronprakseri tu di kan yepi wefi. Efeisesma 5:22-24 e taki: „Meki den wefi saka densrefi na den masra ondro neleki fa den e saka densrefi na Masra ondro, bika wan masra na a ede fu en wefi neleki fa Krestes na a ede tu fu a gemeente, èn en na wan frulusuman fu a skin disi. Fu taki en leti, neleki fa a gemeente e saka ensrefi na Krestes ondro, na so den wefi musu saka densrefi tu na den masra ondro na ini ala sani. . . . A wefi musu abi dipi lespeki gi en masra.”

14. Fu san ede a no wani taki dati wan umasma lagi te Bijbel e taki dati a musu saka ensrefi na en masra ondro?

¹⁴ Luku taki Paulus e sori o prenspari a de taki wan wefi e saka ensrefi na en masra ondro èn taki a e lespeki en masra. A e taigi wefi fu tan hori a sani disi na prakseri fu di Gado seti sani so. Gado wani taki ibri yeye na hemel èn ibri sma na grontapu musu saka ensrefi na wan trawan ondro. Srefi Yesus musu saka ensrefi na Yehovah Gado ondro (1 Korentesma 11:3). A no de fu taki dati wan masra di e tyari a frantwortu fu en leki edeman na wan bun fasi, sa meki en moro makriki gi en wefi fu saka ensrefi na en masra ondro.

15. San na wan tu rai di Bijbel e gi wefi?

¹⁵ Paulus ben taki tu dati wan wefi „musu abi dipi lespeki gi en masra”. Wan Kresten wefi musu „abi wan tiri èn safri fasi”, na presi fu opo ensrefi teige en masra, noso fu du san ensrefi wani sondro fu arki en masra (1 Petrus 3:4). Wan wefi di abi frede gi Gado e du ala san a man fu sorgu bun gi na osofamiri èn fu meki na edeman fu en e kisi grani (Titus 2:4, 5). A sa  meki muiti fu taki bun fu en masra, èn na so fasi a sa sorgu taki a no e du sani di kan meki trawan lasi lespeki gi en masra. A sa meki tranga muiti sosrefi fu horibaka gi den bosroiti di a masra teki.—Odo 14:1.

16. San Kresten wefi kan leri fu na eksempre fu Sara nanga Rebeka?

¹⁶ Te wan Kresten uma abi wan tiri èn safri fasi, dan disi no wani taki dati a no mag taki fa a e denki fu wan tori noso taki den sani di a e taki no de prenspari. Umasma di ben e dini Gado na ini owruten, soleki Sara nanga Rebeka, ben taki fa den ben denki fu wan tori, èn Bijbel e sori taki Yehovah ben feni a sani dati bun (Genesis 21:8-12; 27:46–28:4). Kresten wefi kan taki sosrefi fa den e denki fu wan tori. Ma den musu taki na wan lespeki fasi, èn den no musu taki na wan fasi di e sori taki den e wisiwasi den masra. Te wefi e du dati, dan den sa si nofo tron taki den man taki moro bun nanga den masra, èn taki den masra sa wani arki san den e taki.

A de prenspari fu hori unsrefi na a pramisi di unu meki

17, 18. San na wan tu sani di masra nanga wefi kan du fu no meki Satan pori a trowlibi fu den?

¹⁷ Te wan man nanga wan uma trow, dan den pramisi fu tan nanga makandra den heri libi langa. Fu dati ede wan masra nanga wan wefi musu wani fu meki muiti so taki a trowlibi fu den e waka bun. Te den no e taigi makandra fa den e denki fu sani, dan dati kan meki taki den e mandi nanga makandra, èn te fu kaba a sani disi kan tron wan seryusu problema. A e pasa furu tron taki te problema e kon na ini a trowlibi, dan trowpatna no e taki nanga makandra moro, èn disi kan meki taki den e kon abi bita-ati gi makandra. Son trowpatna e suku fu broko a trow, èn fu dati ede den e bigin hori nanga wan tra sma di no de den trowpatna. Yesus ben gi a warskow disi: „Iniwan sma di e tan luku wan uma fu kisi tranga lostu gi en, du sutadu nanga en kaba na ini en ati.”—Mateyus 5:28.

¹⁸ Na apostel Paulus ben gi ala Kresten, sosrefi Kresten di trow, a rai disi: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi” (Efeisesma 4:26, 27). Satan, a moro bigi feanti fu wi, lobi en te Kresten abi wan kesekese nanga makandra, fu di na so fasi a e pruberi fu tyari pratifasi kon. No gi en pasi fu meki a sani dati pasa nanga yu! Te yu abi problema na ini a trowlibi, dan gebroiki Bijbel publikâsi fu kon sabi san Bijbel e taki fu a fasi fa Yehovah e si a tori. Te yu o taki fu wan problema, dan taki san de tapu yu ati, ma no rigeri. Yu no musu sabi wawan san na den markitiki fu Yehovah, ma yu musu hori yusrefi na den markitiki fu en tu (Yakobus 1:22-25). Abi a fasti bosroiti fu waka nanga Gado leki trowpaar, èn no meki nowan sma, noso nowan sani prati san Gado poti na ondro wán tyatyari!—Mika 6:8.

[Futuwortu]

Yu e memre disi ete?

• Fu san ede Kresten srefi kan kisi problema na ini a trowlibi?

• Fa wan masra kan sorgu gi en wefi, èn fa a kan sori taki a lobi en wefi?

• San wan wefi kan du fu sori taki a abi dipi lespeki gi en masra?

• Fa wan masra nanga wan wefi kan sorgu taki den e hori densrefi na a pramisi di den meki?

[Aksi fu a tori disi]

[Prenki na tapu bladzijde 20]

Wan masra musu sorgu taki en wefi e kisi den sani di a abi fanowdu na ini a libi, èn a musu studeri Bijbel nanga en tu

[Prenki na tapu bladzijde 21]

Wan masra di lobi en wefi, sa meki en wefi firi bun

[Prenki na tapu bladzijde 23]

Na wan lespeki fasi Kresten wefi e taki fa den e denki fu wan tori