Maʼ k-chaʼik u jatsaʼal le baʼax nupaʼan tumen Diosoʼ

«Maʼ kaʼatuloʼobiʼ, baʼaleʼ juntúuliloʼob. Le oʼolaleʼ mix máak unaj u jatsik le baʼax nupaʼan tumen Jajal Dioseʼ.» (MATEO 19:6.)

1, 2. ¿Baʼaxten maʼ unaj u jaʼakʼal k-óol ken k-il yaan jujumpʼéel talamiloʼob tiʼ le máaxoʼob tsʼokaʼan u beeloʼoboʼ?

TUKULTEʼ a kaʼaj a beet upʼéel náanach viaje tiʼ camión. A tuklikeʼ, ¿yaan wa u yantaltech talamiloʼob teʼ bejoʼ? Wa ka tuklik maʼ kun yantal talamileʼ maʼ jach maʼalobiʼ. Tumen maʼ xaaneʼ yaan baʼax jeʼel u beetik maʼ a séeb kʼuchul tuʼux ka binoʼ. Maʼ xaan xaneʼ, jeʼel u kʼastal wa baʼax tiʼ le camión maʼ tu páajtal a wutskíintikoʼ yéetel leloʼ jeʼel u beetik u kʼaʼabéettal a pʼatik le camión teʼ bej utiaʼal ka xiʼikech a kaxt áantajeʼ. Le talamiloʼobaʼ, ¿jeʼel wa u beetikoʼob a tuklik maʼ unaj kaʼach a bin teʼ viaje yéetel unaj a xúumpʼattik le camionoʼ? Máasaʼ maʼ. K-ojleʼ, tiʼ upʼéel náanach viajeeʼ yaan u yantal talamiloʼob, baʼaleʼ yaan k-kaxtik bix jeʼel k-aktáantikoʼobeʼ.

² Bey xan u yúuchul ichil le máaxoʼob tsʼokaʼan u beeloʼoboʼ, láayliʼ xan ku yantal talamil tiʼobeʼ. Le oʼolaleʼ máaxoʼob u kaʼaj tsʼoʼokol u beeloʼobeʼ maʼ maʼalob ka u tukultoʼob wa upuliʼ maʼ kun antal talamil tiʼobiʼ. Teʼ 1 Corintoiloʼob 7:28, le Bibliaoʼ ku yaʼalikeʼ, le máaxoʼob tsʼokaʼan u beeloʼoboʼ yaan u yantal «yaayaj óolal tiʼob». ¿Baʼaxten? Tumen kʼeban wíinikoʼob yéetel tumen kuxaʼanoʼon tiʼ «talam kʼiinoʼob» (2 Timoteo 3:1; Romailoʼob 3:23). Le oʼolal yaan u kʼuchul u kʼiinil u aktáantikoʼob talamiloʼob kex jach maʼalob u biskubaʼob yéetel kex u kʼáatoʼob kuxtal jeʼex u kʼáat Dioseʼ.

3. 1) Yaʼab máakoʼob bejlaʼeʼ, ¿bix u yilkoʼob le tsʼoʼokol beeloʼ? 2) Le máaxoʼob meyajtik Diosoʼ, ¿baʼaxten maʼ tu jáan chʼaʼatuklik u pʼatkubaʼob ken yanak talmil tiʼob?

³ Teʼ kʼiinoʼobaʼ, le máaxoʼob tsʼokaʼan u beeloʼoboʼ ken yanak talamil tiʼobeʼ, yáax baʼax ku beetkoʼobeʼ u pʼatkubaʼob. Tiʼ yaʼab luʼumiloʼobeʼ jach táan u maas yaʼabtal le máaxoʼob ku divorciarkubaʼoboʼ. Baʼaleʼ le máaxoʼob meyajtik Diosoʼ maʼatech u beetkoʼob beyaʼ, baʼaxeʼ ku yilik u yutskíintikoʼob le talamiloʼoboʼ. ¿Baʼaxten? Tumen ku yilkoʼob le tsʼoʼokol beel bey upʼéel baʼal kiliʼich tiʼ Dios u taaloʼ. Jesuseʼ tu yaʼalaj yoʼolal le máaxoʼob tsʼokaʼan u beeloʼoboʼ: «Mix máak unaj u jatsik le baʼax nupaʼan tumen Jajal Dios[oʼ]» (Mateo 19:6). U jaajileʼ maʼ chéen chʼaʼabil u beetaʼal le baʼax ku yaʼalik le tekstoaʼ. Le láakʼtsiloʼoboʼ, le máaxoʼob tsolik u nuʼuk tiʼ le máaxoʼob tsʼokaʼan u beeloʼob yéetel uláakʼ máakoʼob maʼ tu kuxtaloʼob jeʼex u kʼáat Dioseʼ, mantatsʼ ku yaʼalikoʼob tiʼ le máaxoʼob tsʼokaʼan u beeloʼob ka u pʼatubaʼob wa ka u divorciartubaʼob yoʼolal jeʼel baʼaxak talamileʼ. * Baʼaleʼ, le máaxoʼob meyajtik Diosoʼ u yojloʼob maas maʼalob ka u yutskíintoʼob le talamiloʼob ku yantaloʼ ke ka u séeb pʼatubaʼob. Le oʼolaleʼ unaj k-chʼaʼatuklik beetik tuláakal le baʼaloʼob jeʼex u kʼáat Jéeobaoʼ, maʼ jeʼex u yaʼalik le wíinikoʼoboʼ (Proverbios 14:12).

Bix jeʼel u aktáantaʼal le talamiloʼoboʼ

4, 5. 1) ¿Baʼax talamiloʼob jeʼel u yantal ichil le máaxoʼob tsʼokaʼan u beeloʼoboʼ? 2) ¿Baʼaxten jach maʼalob le tsolnuʼukoʼob ku tsʼáaik le Biblia tiʼ le máaxoʼob tsʼokaʼan u beeloʼob ku aktáantikoʼob talamiloʼoboʼ?

⁴ U jaajileʼ, yaʼab tiʼ le máaxoʼob tsʼokaʼan u beeloʼoboʼ ku yantal talamiltiʼob chéen yoʼolal baʼaloʼob maʼ nuuktakoʼobiʼ. Baʼaleʼ, yaan xan tiʼ letiʼobeʼ ku aktáantikoʼob nojoch talamiloʼob jeʼel tak u beetik u jáawal u yaabiltikubaʼob ka tak u pʼatubaʼobeʼ. Maʼ xaaneʼ ku kʼaʼabéettal tak u kʼáatkoʼob áantaj tiʼ utúul anciano tsʼoʼok u chan yúuchtal tsʼoʼokok u beel. Baʼaleʼ, a aktáantik talamiloʼobeʼ  maʼ u kʼáat u yaʼal wa maʼ maʼalob úuchik u tsʼoʼokol a beeliʼ. Baʼaxeʼ ku yeʼesik kʼaʼabéet a maas nuʼuktik a kuxtaleʼex yéetel le baʼaxoʼob ku yaʼalik le Bibliaoʼ.

⁵ Tumen Jéeoba beet wíinikoʼob yéetel letiʼ xan tsʼáa le tsʼoʼokol beeloʼ, chéen letiʼ u yojel baʼax kʼaʼabéet u beetik le máaxoʼob tsʼokaʼan u beeloʼoboʼ utiaʼal ka yanaktiʼob kiʼimak óolal. Baʼaleʼ ¿yaan wa k-beetik le baʼax ku yaʼalik u Tʼaanoʼ? Wa k-beetikeʼ jach yaan u bintoʼon utsil. Jéeobaeʼ tu yaʼalaj tiʼ u úuchben kaajil Israel: «¡[Kexiʼ] kaʼach ka tsʼoʼok[bes] in [...] tʼaanoʼobeʼ! A maʼalob yanileʼ bíin nojochchajak jeʼel bix u bin u nojochtal jumpʼéel áalkab jaʼeʼ, u yaʼabtal a nuʼukuloʼobeʼ bíin béeyak u kuklil [wa u olasi] kʼáaʼnáabeʼ» (Isaías 48:18). U tsʼoʼokbesaʼal le tsolnuʼukoʼob ku tsʼáaik le Bibliaoʼ le beetik u bin utsil tiʼ máak. Le oʼolaleʼ koʼox yáax ilik le tsolnuʼukoʼob ku tsʼaʼabal tiʼ le íichamtsiloʼoboʼ.

«Yaabilt a wataneʼex» mantatsʼ

6. ¿Baʼax tsolnuʼukil ku tsʼáaik le Biblia tiʼ le íichamtsiloʼoboʼ?

⁶ Teʼ carta tu tsʼíibtaj le apóstol Pablo tiʼ le sukuʼunoʼob yanoʼob Efesooʼ tu tsʼáa maʼalob tsolnuʼukoʼob utiaʼal le íichamtsiloʼoboʼ. Letiʼeʼ tu tsʼíibtaj: «Íichamtsileʼex yaabilt a wataneʼex bey jeʼel bix Cristo tu yaabiltaj le [múuchʼuliloʼ] ka tu tsʼáaj u kuxtal tu yoʼolal. Le íichamtsiloʼoboʼ unaj u yaabiltikoʼob u yatanoʼob, jeʼel bix u yaabiltikoʼob u wíinkliloʼobeʼ. Le máax u yaabilmaj u yataneʼ u yaabiltmajuba letiʼ. Tumen mix máak ku pʼektik u wíinklil, baʼaleʼ ku tséentik yéetel ku kanáantik; bey u beetik Cristo yéetel le [múuchʼuliloʼ]. Baʼaleʼ u kʼáat u yaʼal xaneʼ cada juntúul tiʼ teʼexeʼ u yaabilt u yatan jeʼel bix u yaabiltikubaeʼ» (Efesoiloʼob 5:25, 28, 29, 33).

7. 1) Máaxoʼob meyajtik Dioseʼ, ¿baʼax maʼ unaj u jáawal u yantaltiʼob utiaʼal ka páajchajak u aktáantikoʼob le talamiloʼoboʼ? 2) ¿Baʼax u kʼáat u yaʼal Pablo ken u yaʼal tiʼ le íichamtsiloʼob ka u yaabilt u yatanoʼoboʼ?

⁷ Pabloeʼ maʼ tu jach tʼaan tiʼ tuláakal le talamiloʼob jeʼel u yantal tiʼ le máaxoʼob tsʼokaʼan u beeloʼoboʼ. Baʼaxeʼ, ku yaʼalik maʼ unaj u jáawal u yaabilkubaʼob utiaʼal ka páajchajak u aktáantikoʼob le talamiloʼoboʼ. Le yaabilajoʼ ocho utéenel ku chʼaʼachiʼitaʼal teʼ versiculoʼob tsʼoʼok k-xokikoʼ. Tsʼoʼoleʼ ken u yaʼal Pablo tiʼ le íichamtsiloʼob ka u yaabilt u yatanoʼoboʼ, ku tsʼáaik naʼatbil unaj u beetikoʼob mantatsʼ. Pabloeʼ, tu tsʼáaj cuentaeʼ maʼ chéen chʼaʼabil u seguer u yaabiltik u núup máak jeʼex tu káajbaleʼ. Le baʼax tu yilaj Pabloaʼ maas yaʼab u yúuchul teʼ «talam kʼiinoʼob» kuxlikoʼon tuʼux yaan wíinkoʼob ku yaabiltikubaʼob chéen letiʼob yéetel jach séeb u baʼateloʼob (2 Timoteo 3:1-3). Bejlaʼeʼ, yaʼab tiʼ le tsʼokaʼan u beeloʼob yantiʼob le modosoʼobaʼ táan u pʼatkubaʼob, baʼaleʼ le íichamtsil u yaabilmaj u yataneʼ maʼ maʼalob ka joʼopʼok u tuukul yéetel u beetik jeʼex uláakʼ máakoʼoboʼ (Romailoʼob 12:2).

Bix jeʼel u tsʼaʼabal le baʼax kʼaʼabéet tiʼ le atantsiloʼ

8, 9. Utúul íichamtsil ku meyajtik Dioseʼ, ¿bix u yilik u tsʼáaik le baʼaxoʼob kʼaʼabéet tiʼ u yatanoʼ?

⁸ Wa íichamtsilech yéetel ka meyajtik Dioseʼ, ¿baʼax unaj a beetik utiaʼal maʼ a tuukul chéen  ta woʼolal yéetel utiaʼal a weʼesik tiʼ a watan jach a yaabilmaj? Teʼ carta tu tsʼíibtaj tiʼ le Efesoiloʼoboʼ, Pabloeʼ tu yaʼalaj kaʼapʼéel baʼal unaj u beetik le íichamtsiloʼ: yáaxeʼ u tséentik wa u tsʼáaik tuláakal baʼax kʼaʼabéet tiʼ u yatan, yéetel u kaʼapʼéeleʼ u kanáantik yéetel u yaabiltik jeʼex u yaabiltik u wíinklileʼ. Baʼaleʼ ¿bix jeʼel u páajtal u tsʼaʼabal le baʼax kʼaʼabéet tiʼ le atantsiloʼ? Upʼéeleʼ letiʼe u tsʼaʼabal baʼal u jaantoʼ, u yantal tuʼux u kajtal, u yantal baʼax u búukintej yéetel u kanáantaʼal. Pabloeʼ tu tsʼíibtaj tiʼ Timoteo: «Wa yaan máax maʼ tu tséentik u láakʼtsiloʼobeʼ, le máaxoʼob jach tu yotoch kajaʼanoʼob[oʼ], u mixbaʼalkúuntmaj le oksaj óolaloʼ [wa le fejoʼ], maas kʼaas tiʼ juntúul x-maʼ oksaj óolal» (1 Timoteo 5:8, LTN).

⁹ Baʼaleʼ, maʼ chéen yaan yéetel u yantal tuʼux u kajtal, ka yanak baʼax u jaante yéetel ka yanak baʼax u búukint le atantsiloʼ. ¿Baʼaxten maʼ? Tumen maʼ xaaneʼ le íichamtsiloʼ jeʼel u jach tsʼáaik tuláakal le baʼaxoʼob kʼaʼabéet tiʼ u yatanoʼ, baʼaleʼ maʼ tu beetik le baʼaxoʼob jeʼel u maas taasik kiʼimak óolal tiʼ u yatanoʼ yéetel maʼ tu yáantik utiaʼal u maas muʼukʼantal u fe tiʼ Dios. Lelaʼ letiʼe baʼax maas jach kʼaʼabéetoʼ. U jaajileʼ, le xiiboʼoboʼ jach yaʼab meyaj yaan u beetoʼob teʼ múuchʼuliloʼ. Baʼaleʼ, tuláakal lelaʼ maʼ unaj u beetik u jáawal u tsʼoʼokbesikoʼob le meyajoʼob tsʼaʼan u beetoʼob bey poolil tiʼ u familiaʼobeʼ (1 Timoteo 3:5, 12). Maʼ sen úucheʼ, le revista bejlaʼa ku kʼaabaʼtik U Pʼíich Tulumil Kananoʼ tu yaʼalaj yoʼolal u meyaj le íichamtsiloʼoboʼ: «Yoʼolal le baʼaxoʼob ku yaʼalik le Bibliaoʼ, “le nuʼuktaj yéetel le kananoʼ unaj u káajal teʼ najiloʼ”. Wa utúul anciano ku jáawal u kanáantik u familiaeʼ, leloʼ jeʼel u beetik u luʼsaʼal u ancianoileʼ». * Jeʼex aʼalaʼabikoʼ, jach unaj a wilik a tsʼáaik tuláakal le baʼax kʼaʼabéet tiʼ a watan utiaʼal ka yanak kiʼimak óolal tiʼ, yéetel unaj xan a wáantik utiaʼal u maas muʼukʼantal u fe tiʼ Dios.

Bix unaj u kanáantaʼal le atantsiloʼ

10. Le íichamtsiloʼ, ¿bix jeʼel u páajtal u kanáantik u yataneʼ?

¹⁰ Utúul íichamtsil u yaabilmaj u yataneʼ, ku kanáantik yéetel jejeláas bix u yeʼesik u yaabilaj tiʼ u yatan. Yáaxeʼ ku jóoʼsik u súutukil utiaʼal u yantal tu yéetel. Tumen wa maʼ u beetkeʼ, le yaabilaj ku yuʼubik u yatan tu yoʼolaloʼ jeʼel u joʼopʼol u saʼataleʼ. Maʼ xaaneʼ kex teech ka tuklik jach yaʼab súutukil ka máansik yéetel a wataneʼ, letiʼeʼ ku yuʼubik bey kʼaʼabéet a máansik maas yaʼab súutukil tu yéeteleʼ. Maʼ chéen yaan yéetel a waʼalik tiʼ a watan a yaabilmajiʼ. Kʼaʼabéet u yuʼubik jach tu jaajil a yaabiltmaj. Pabloeʼ tu tsʼíibtaj: «Mix máak ka u kaxant uts utiaʼal tu juunal, baʼaleʼ unaj u kaxantik uts utiaʼal uláakʼ» (1 Corintoiloʼob 10:24). Le íichamtsil u yaabilmaj u yataneʼ, unaj u tsʼáaik cuenta baʼaxoʼob jach kʼaʼabéet tiʼ u yatan yéetel unaj u tsʼáaik tiʼ (Filiposiloʼob 2:4).

11. ¿Baʼax ku yúuchul yéetel le íichamtsil maʼatech u tratartik maʼalob u yatanoʼ?

¹¹ Uláakʼ bix u kanáantaʼal le atantsiloʼ, letiʼe u tratartaʼal yéetel u tʼanaʼal yéetel yaabilajoʼ (Proverbios 12:18). Pabloeʼ tu tsʼíibtaj tiʼ  le Colosailoʼoboʼ: «Íichamtsileʼex, yaabilt a wataneʼex yéetel maʼ a kʼuuxileʼex tu yéeteloʼob» (Colosailoʼob 3:19). Upʼéel libroeʼ ku yaʼalikeʼ, le u tsʼook tʼaan tu beetaj Pablooʼ jeʼel u suʼutul beyaʼ: «maʼ a tratarkeʼex bey utúul x-kʼooseʼ» wa «maʼ a wilkeʼex bey utúul palitsileʼ». Le íichamtsil kʼaas u tratartik u yatan tu táan u maasil wa tak ken yanakoʼob tu juunaloʼobeʼ ku yeʼesik maʼ u yaabilmajiʼ. Le íichamtsil maʼatech u tratartik maʼalob u yataneʼ, jeʼel xan u beetik u xuʼulul u biskuba Jéeoba tu yéeteleʼ. Apóstol Pedroeʼ tu tsʼíibtaj tiʼ le íichamtsiloʼoboʼ: «Muunchajak a puksiʼikʼaleʼex utiaʼal a wataneʼex. Tsʼaʼextiʼob le tsiikil unaj u tsʼaʼabaltiʼoboʼ, maʼ chéen tumen [maas] muun u wíinklil le koʼoleloʼoboʼ, baʼaleʼ tumen letiʼobeʼ yantiʼob xan le kuxtal u tsʼaamajteʼex Jajal Dios ichil u chʼaʼa óotsililoʼ. Beeteʼex beyoʼ utiaʼal maʼ u kʼaʼakʼatkuba mix baʼal tiʼ a [oracioneʼex]» * (1 Pedro 3:7).

12. ¿Baʼax jeʼel u páajtal u kanik le íichamtsil tiʼ bix úuchik u tratartik Jesús le múuchʼuliloʼ?

¹² Maʼ u tuʼubultecheʼ mantatsʼ unaj a weʼesik a yaabilaj tiʼ a watan. Le bix úuchik u tratartik Jesús le múuchʼuliloʼ ku yeʼesik tiʼ le íichamtsil bix unaj u tratartik u yatanoʼ. Letiʼeʼ mantatsʼ tu yeʼesaj u yutsil yéetel tu chʼaʼa óotsilil tiʼ u disipuloʼob, maases le ka tu beetoʼob baʼaloʼob maʼ maʼalobtakoʼoboʼ; le oʼolal Jesuseʼ béeychaj u yaʼalik tiʼ le máaxoʼob uʼuyikoʼ: «Koʼoteneʼex tiʼ teen, [...] tumen teneʼ chúukaʼan in wóol yéetel kabal u yóol in puksiʼikʼal; beyoʼ bíin a kaxteʼex jeʼelel utiaʼal a [kuxtaleʼex]» (Mateo 11:28, 29). Le íichamtsil ku meyajtik Diosoʼ ku yilik u tratartik u yatan jeʼex úuchik u tratartaʼal le múuchʼulil tumen Jesusoʼ. Le máax jach tu jaajil u yaabilmaj u yatan yéetel ku yeʼesik yéetel le baʼaxoʼob ku beetik bey xan yéetel le baʼaxoʼob ku yaʼalikoʼ, yaan u taasik kiʼimak óolal yéetel jeʼelelil tiʼ u yatan.

Atantsiloʼob ku tsʼáaik ichil u kuxtaloʼob le baʼax ku yaʼalik le Bibliaoʼ

13. ¿Baʼax tsolnuʼukiloʼob ku tsʼáaik le Biblia jeʼel u yáantik le atantsiloʼoboʼ?

¹³ Teʼ Bibliaoʼ yaan xan tsolnuʼukoʼob jeʼel u yáantik le atantsiloʼoboʼ. Efesoiloʼob 5:22-24, 33 ku yaʼalik: «Le atantsiloʼoboʼ ka yanakoʼob tu yáanal u páajtalil u yíichamoʼob, bey jeʼel bix tiʼ Yuumtsileʼ. Tumen le íichamtsiloʼ u pool le atantsiloʼ, bey jeʼel bix Cristo u pool le iglesiaoʼ [wa múuchʼuliloʼ]. Cristoeʼ letiʼ xan u [salvadori] le iglesiaoʼ, lelaʼ u wíinklil; baʼaleʼ bey jeʼel bix le iglesia tiʼ yaan tu yáanal u páajtalil Cristooʼ bey xan le atantsiloʼoboʼ unaj u yantaloʼob tu yáanal u páajtalil u yíichamoʼob tiʼ tuláakal baʼal. [...] Yéetel le atantsiloʼ u tsik u yíicham».

14. ¿Baʼaxten maʼ táan u mixbaʼalkúuntaʼal le koʼolel ken u yaʼal le Biblia ka u chaʼa u nuʼuktaʼaloʼ?

 ¹⁴ Pabloeʼ jach tʼaanaj tiʼ u kʼaʼabéetil u yeʼesaʼal tsiikil bey xan u tsʼáaikuba máak yáanal u páajtalil uláakʼ. Tiʼ le atantsiloʼ ku kʼaʼajsaʼal kʼaʼabéet u tsʼáaikuba yáanal u páajtalil u yíicham, tumen bey u yaʼalmil Dios ka beetaʼakoʼ. Tuláakal baʼax kuxaʼan way Luʼum bey xan teʼ kaʼanoʼ, ku tsʼáaikuba yáanal u páajtalil wa máax. Tak Jesucristoeʼ ku tsʼáaikuba yáanal u páajtalil Jéeoba (1 Corintoiloʼob 11:3). Baʼaleʼ, wa le íichamtsil ku nuʼuktaj tubeeleʼ, u yataneʼ maʼ talam ken u yil u tsʼáaikuba yáanal u páajtaliliʼ.

15. ¿Baʼax tsolnuʼukiloʼob ku tsʼáaik le Biblia tiʼ le atantsiloʼoboʼ?

¹⁵ Jeʼex xan tu yaʼalil Pabloeʼ «le atantsiloʼ u tsik u yíicham». Unaj u yantal tiʼ «jumpʼéel chʼujuk jéetsʼel óol», maʼ unaj u kaxtik baʼateʼel tiʼ u yíichamiʼ mix xan u luʼskuba yáanal u páajtaliliʼ (1 Pedro 3:4). Le maʼalob atantsiloʼ ku meyaj utiaʼal u kaxtik u yutsil u familia yéetel ku tsikik le máax u pooloʼ (Tito 2:4, 5). Ku tʼaan maʼalob yoʼolal u yíicham yéetel maʼatech u beetik baʼaloʼob jeʼel u mixbaʼalkúuntik wa u taasik subtsilil tiʼ u yíicham tu táan u maasileʼ. Tsʼoʼoleʼ, ku yáantaj xan utiaʼal ka jóokʼok maʼalobil le baʼaxoʼob ku chʼaʼatuklaʼal tumen u yíichamoʼ (Proverbios 14:1).

16. ¿Baʼax jeʼel u páajtal u kanik le atantsiloʼob tiʼ le baʼax tu beetaj Sara yéetel Rebecaoʼ?

¹⁶ Le u yantal upʼéel chʼujuk jéetsʼel óolal tiʼ le koʼoleloʼ, maʼ u kʼáat u yaʼal wa maʼ unaj u yuʼubaʼal yéetel u chʼaʼabal en cuenta le baʼaxoʼob ku tuklikoʼ. Úuchileʼ, le koʼoleloʼob tu meyajtoʼob Jéeoba, jeʼex Sara yéetel Rebecaeʼ tu tsʼáajoʼob ojéeltbil le baʼaxoʼob chiʼichnakkúunskoʼoboʼ, yéetel le Bibliaoʼ ku yaʼalikeʼ Jéeobaeʼ tu kʼamaj le baʼax tu beetoʼoboʼ (Génesis 21:8-12; 27:46–28:4). Bejlaʼa xaneʼ, le atantsiloʼob ku meyajtikoʼob Diosoʼ jeʼel u páajtal u tsʼáaikoʼob ojéeltbil le baʼax ku tuklikoʼoboʼ. Baʼaleʼ, unaj u beetkoʼob yéetel tsiikil, maʼ unaj u taaskoʼob bey mix baʼalil u yíichamoʼobiʼ. Wa ku beetkoʼob beyaʼ, maʼ xaaneʼ jeʼel u maas beetaʼal u cuentai le baʼax ku yaʼalikoʼoboʼ.

Maʼ unaj a wilik chéen bey upʼéel báaxleʼ

17, 18. Le máaxoʼob tsʼokaʼan u beeloʼoboʼ, ¿baʼax unaj u beetkoʼob utiaʼal maʼ u chaʼik u jaʼatsloʼob tumen Satanás?

¹⁷ Le tsʼoʼokol beeloʼ utiaʼal mantatsʼ, le oʼolal tu kaʼatúulal unaj u yilkoʼob ka xiʼik utsil tiʼob. Wa maʼ tu múul tsikbaltkoʼob baʼax chiʼichnakkúunskoʼobeʼ, leloʼ jeʼel u beetik u maas yantal talamil tiʼobeʼ yéetel u maas nojochtaloʼob. Le máaxoʼob tsʼokaʼan u beeloʼoboʼ, u suukaʼanileʼ ku xuʼulul u tʼankubaʼob ken yanak wa baʼax talmil tiʼobeʼ, yéetel leloʼ ku beetik u káajal u pʼektikubaʼob. Yanoʼobeʼ utiaʼal u yilik u pʼatkubaʼob yéetel u núupoʼobeʼ, ku joʼopʼol u kaxkoʼob u yaabilaj yaanal máax. Jesuseʼ tu yaʼalaj: «Jeʼel máaxak ku paktik juntúul koʼolel utiaʼal u tsʼíibolteʼ tsʼoʼok u núupkʼebantal tu puksiʼikʼal tu yéetel» (Mateo 5:28).

¹⁸ Pabloeʼ tu yaʼalaj tiʼ le cristianoʼob, bey xan tiʼ le íichamtsiloʼoboʼ: «Wa ka kʼuuxileʼexeʼ maʼ a kʼebantaleʼex; yéetel maʼ u pʼáatal bul kʼiin kʼuuxeʼex. Maʼ a tsʼáaikeʼex tuʼux u meyaj kʼasilbaʼal» (Efesoiloʼob 4:26, 27). Tiʼ Satanás, le máax jach pʼekmailoʼonoʼ, jach maʼalob u meyaj tiʼ le talamiloʼob ku yantal tiʼ le máaxoʼob meyajtik Diosoʼ. ¡Maʼ a tsʼáaik tuʼux u beetik le baʼax u kʼáatoʼ! Ken a aktáant talamileʼ, táanil ilawil baʼax ku yaʼalik le jóoʼsaʼaniloʼob utiaʼal a wojéeltik baʼax ku yaʼalik Jéeoba tu yoʼolal. Maʼ a kʼeyaj, baʼaxeʼ aʼal tiʼ a núup jach baʼax chiʼichnakkúuntkech. Ilawil a wojéeltik baʼaxoʼob ku kʼáatik Jéeoba yéetel ilawil wa táan a tsʼáaik ichil a kuxtal le baʼax ku yaʼalikoʼ (Santiago 1:22-25). Wa tsʼokaʼan a beeleʼ, chʼaʼatukult a beetik baʼax u kʼáat Jéeoba yéetel maʼ a chaʼik u jatsaʼal le baʼax nupaʼan tumen Diosoʼ (Miqueas 6:8).

[Tsolajiloʼob]

¿Kʼajaʼan wa tech?

• ¿Baʼaxten ku aktáantkoʼob talamil tak le máaxoʼob tsʼokaʼan u beeloʼob ku meyajkoʼob Diosoʼ?

• Le íichamtsiloʼ, ¿bix jeʼel u kanáantik yéetel u tsʼáaik le baʼax kʼaʼabéet tiʼ u yatanoʼ?

• ¿Baʼax unaj u beetik le atantsil utiaʼal u yeʼesik nojoch tsiikil tiʼ u yíichamoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 23]

Le máax jach tu jaajil u yaabilmaj u yataneʼ ku yáantik utiaʼal ka yanak kiʼimak óolal tiʼ

[U tsolajil le oochel teʼ táan juʼun 24]

Le íichamtsiloʼ maʼ chéen unaj u tsʼáaik le baʼaxoʼob kʼaʼabéet tiʼ u yatanoʼ, baʼaxeʼ unaj xan u yáantik u maas muʼukʼankúuns u fe tiʼ Dios

[U tsolajil le oochel teʼ táan juʼun 25]

Le atantsiloʼob ku meyajkoʼob Diosoʼ ku tsʼáaikoʼob ojéeltbil yéetel tsiikil le baʼax ku tuklikoʼoboʼ