Atwansi—Fwilenu Kushikija Yikonkwanyi Yakumulemesha Nachu Nzambi
Atwansi—Fwilenu Kushikija Yikonkwanyi Yakumulemesha Nachu Nzambi
‘Dikoleshaña wushiki mukwakama Nzambi.’—1 TIMOTEWU 4:7.
1, 2. (a) Muloñadi Pawulu chamuhamekeleliyi Timotewu? (b) Indi atwansi makonu ‘anakudidizisha ñahi kwakama Nzambi hamu neyi chikonkwanyi chawu’?
“M ULOÑA nabuli mukwawu wudi neyi yena wukwakama chalala chimwashakama. . . . Chanakalakaliyi hamu nanami neyi mwana natata yindi, nakutwala nsañu yayiwahi kumbidi.” (Afwilipi 2:20, 22) Kapostolu Pawulu wasonekeli kuhameka kweniku mumukanda windi kudi eniKristu amuFwilipi amunkulakaji yatachi. Indi wadiña nakutenanyi? Wadiña nakutena Timotewu ibwambu dindi wakansi mwendeleleñawu. Toñojokenu chatiyiliyi Timotewu hakutiya nindi Pawulu wamukeñeli nawa wamukuhweleleli.
2 Atwansi amwakama Nzambi adi neyi Timotewu, mpinji yejima ekalaña yitwa yayiwahi hakachi kawantu jaYehova. (Masamu 110:3) Makonu kuloñesha kwaNzambi kudi nawatwansi anakukalakala hamu neyi apayiniya, amishonali, adihana mumudimu wakutuña niazatilaña haBeteli. Owu anakukalakala munyidimu yamuchipompelu hampinji yoyimu anakwakamena ninyidimu yikwawu niwena atela kuyihameka. Atwansi wenawa adiluñishaña namuzañalu walala wafumaña mukufwila kushikija yikonkwanyi yakumulemesha nachu Tata yetu wamwiwulu, Yehova. Chalala ‘anakudidizisha kwakama Nzambi hamu neyi chikonkwanyi chawu.’—1 Timotewu 4:7, 8.
3. Malwihwinyi yitukushinshikahu munichi chibaba?
3 Hamu neyi kansi, komana wunakufwila kushikija yikonkwanyi yakumulemesha nachu Nzambi? Kudihi kuwunateli kuwana wukwashu nikukoleshewa hakwila wukoñi mwenimu? Wunateli kukana ñahi yililu yakufwila kwikala namaheta amukaayi? Nkiswinyi jiwunateli kukuhwelela kutambwila neyi wufwiila kushikija yikonkwanyi yakumulemesha nachu Nzambi? Lekenu tuwani ñakwilu kunawa malwihu kuhitila mukushinshika hachihandilu chaTimotewu nimudimu windi.
Chihandilu chaTimotewu
4. Lumbululaku mukwihihisha chihandilu chaTimotewu hamu neyi mwiniKristu.
4 Timotewu wakulilili muLisitira, mumbaka yanyanya yakabeta kaRoma kaÑalija. Chakubula kujinooka wadizili ntañishilu yawiniKristu hadiñayi mukwenzi, hampinji yashimwinineñayi Pawulu muLisitira kukamwihi na 47 C.E. Mukunyakashana, Timotewu wekalili nejina dadiwahi kudi amana kwindi awiniKristu adiña mudina iluña. Chimwahitili yaaka yiyedi Pawulu wafuntili kuLisitira, dichi chelukiliyi nindi Timotewu nakuliluku lwakuSpiritu, Pawulu wamutondeli kulonda kukalakala nindi hamu neyi ibwambu dindi kamishonali. (Yililu 14:5-20; 16:1-3) Chapaminiyi Timotewu, amwinkeli nyidimu yamaneni, kubombelahu nimudimu walema wakukolesha amana kwindi. Hampinji Pawulu yamusonekeleliyi Timotewu mukanda henohu wudi mukaleya muRoma kwakwihi na 65 C.E., Timotewu wadiña nakukalakala hamu neyi eluda wawiniKristu kuEfwesesa.
5. Kwesekeja na 2 Timotewu 3:14, 15, yikumanyi yiyedi yaleñeleli Timotewu kufuukulahu kushikija yikonkwanyi yakuspiritu?
5 Chakubula nikujinooka, Timotewu watondeluhu kushikija yikonkwanyi yakuspiritu. Chumanyi chamuleñeleleli kukoña mwenimu? Mumukanda windi wamuchiyedi wasonekeleliyi Timotewu, Pawulu wateneni yikuma yiyedi yateleli kwilayi Timotewu. Wasonekeli nindi: ‘Shakamaku muyuma yiwadizili nakushinshikamu, muloña wuneluki antu akulejeliyu. Muloña kufumisha kuwansi wuneluki nyikanda yajila.’ (2 Timotewu 3:14, 15) Lekenu tushinshiki mudimu wazatiluwu eniKristu amakwawu kutalisha hakufuukula kwaTimotewu.
Hetelenu kuYakutalilahu Yayiwahi
6. Chumanyi chamudizishiluwu Timotewu, nawa weliluhu hodi?
6 Timotewu wakulilili muchisaka chadiña nansakililu yambuka. Tata yindi wadiña kaGriki, nawa mama yindi Yunisi ninkaka yindi Lowisi afumini kumutaña wawaYudeya. (Yililu 16:1) Kufuma kuwansi windi, Yunisi niLowisi amudizishili Timotewu chalala mujiNsona jachiHeberu. Hanyima yakwikala eniKristu, chakubula nikujinooka Yunisi niLowisi amukwashili Timotewu kukuhwelela ntañishilu yawiniKristu. Chakubula nikujinooka, Timotewu waheteleleli mukuna kudizisha kwakuwahi. Pawulu wasonekeli nindi: “Naanukaña kukuhwelela kweyi kwakadi kudimbana; kwokukuhwelela kwasambilili kwikala mudi nkaka yeyi wamumbanda Lowisi, nimudi mama yeyi Yunisi, neluki nami kwakekala nimudeyi nawa.”—2 Timotewu 1:5.
7. Nkiswinyi yadiluñishañawu atwansi amavulu, nawa nkisu yeniyi yinateli kuyihetesha ñahi?
7 Makonu atwansi amavulu adi nakukoleka kwakwikala nawanvwali niankaka jawu akamaña Nzambi, adi neyi Lowisi niYunisi eluka kulema kwayikonkwanyi yakuspiritu. Chakutalilahu, Samira wanukaña mpanji jahanjekeleñawu nawanvwali jindi hampinji yadiñayi kankaña. Walumbulwili nindi, “Maama niTaata andizishili kumona yuma neyi chayimonañayi Yehova nikulemesha mudimu wakushimwina chikupu. Mpinji yejima adiña nakunkolesha kulonda kwikala mumudimu wampinji yejima.” Samira watiyililili kukolesha kwawanvwali jindi nawa chayinu mpinji wukweti kukoleka kwakuzatila haBeteli mwituña dawu. Neyi anvwali jeyi anakukukolesha kusha kashinshi kuyikonkwanyi yakuspiritu, watela kutoñojokahu hakufumba kwawu. Akeñaña wakekali wamuzañalu munshakaminu yeyi.—Yishimu 1:5.
8. Indi Timotewu wahetelelumu ñahi muwubwambu walala waweniKristu?
8 Cheñi, chekala chalema kutonda amabwambu atela kukukolesha mukachi kawamana kwetu awiniKristu. Timotewu amwilukili nankashi kudi aeluda awiniKristu adiña muchipompelu mwadiñayi niaeluda adiña kuIkoniyumu, kwadiña kwakulehi kushika kumakilomita 30. (Yililu 16:1, 2) Wadikwatili wubwambu waweni naPawulu, owu wadiña nakukalakala chikupu. (Afwilipi 3:14) Nyikanda yaPawulu yamwekeshaña nawu Timotewu wetejeleña kufumba nawa wadiña nakwimbujola yakutalilahu yachikuhwelelu. (1 Akorinda 4:17; 1 Timotewu 4:6, 12-16) Pawulu wasonekeli nindi: “Weluka dehi kuleja kwami, nikwenda kwami, ninsañu yinata muchima, nikukuhwelela kwami, nikudiwunjika kwami, nikukeña kwami, nikutatakena kwami.” (2 Timotewu 3:10) Mwalala Timotewu wembujoleli chikupu chakutalilahu chaPawulu. Chochimu, neyi wudikunda chikupu nawantu akola lwakuspiritu muchipompelu, akakukwasha kwikala nayikonkwanyi yayiwahi yakuspiritu.—2 Timotewu 2:20–22.
Dizenu “Nyikanda Yajila”
9. Kufumishaku kutonda amabwambu amawahi, chumanyi chiwatela kwila hakwila nawu ‘wudidizishi kwakama Nzambi hamu neyi chikonkwanyi cheyi’?
9 Komana kushikija yikonkwanyi yakuspiritu chinakubalumuna nawu chiña wutonda amabwambu amawahi? Inehi. Kufwana Timotewu, watela kushinshika chikupu “[mu]nyikanda yajila.” Kudiza hichinateli kwikala chuma chapela kudeyuku, ilaña anukaku neyi Timotewu ‘wadidizishili yomweni kwakama Nzambi.’ Akwakutemuka lufuchi adizaña kapampa kakavulu hadi tukweji twatuvulu kulonda kushikija chikonkwanyi chawu. Chochimu kushikija yikonkwanyi yakuspiritu chakeñekaña kudihana nawa nikuzata nañovu chikupu. (1 Timotewu 4:7, 8, 10) Wunateli kudihula neyi, komana kudiza Bayibolu kunateli kunkwasha ñahi kushikija yikonkwanyi yami? Lekenu tushinshiki hajinjila jisatu.
10, 11. Muloñadi jiNsona chijinateli kukukolesha kushikija yikonkwanyi yeyi yakuspiritu? Hanaku chakutalilahu.
10 Chatachi jiNsona jikukukwasha kwikala nayitoñojoka yayiwahi. Jalumbulula hawuntu wawuwahi waTata yetu wamwiwulu, nihakukeña kwindi kwabadika kwamwekeshañayi hadetu, ninkisu yahaya nyaka yahembelayi antu jindi ashinshika. (Amosi 3:7; Yowanu 3:16; Aroma 15:4) Chiwasweja kwilukilahu yuma yayivulu hadi Yehova, wukuswejelaku kumukeña Yehova nawa wukwikala nampwila yakukeña kudihana kudi yena chikupu.
11 Atwansi awiniKristu amavulu ahoshaña nawu kudiza Bayibolu mpinji yejima, kwekala kwalema muloña kwayikwashaña kwilisha chalala kwikala chawu. Chakutalilahu, Adele wakulilili muchisaka chawiniKristu, ilaña hemikiluhu yikonkwanyi yakuspirituku. Walumbulwili nindi: “Anvwali jami asendeleña Kwitala daWanta ilaña hinadiña nakudiza kwahalwami hela kutiyilila hampinji yakupompaku.” Hanyima yakwila yayindi wamumbanda napapatishewi dehi, Adele watachikili kushaku kashinshi kakeni kuchalala. Wahosheli nindi, “Nemikili chikonkwanyi chakutaña Bayibolu yejima. Nadiña nakutaña mazu antesha nikusoneka chikuma hansañu yinatañi. Yikuma yejima yinasonekeleña nichidi nayu. Namanishili kutaña Bayibolu yejima muchaaka chimu.” Chafuminimu, Adele watoñojokeluhu kudihana kudi Yehova. Hela chakwila wukweti wufwayi weneni wakumujimba, chayinu mpinji wakalakalaña hamu neyi payiniya, hela mukwakushimwina wampinji yejima.
12, 13. (a) Indi kudiza Bayibolu kunateli kumukwasha kansi kuhimpa yumanyi nawa munjilanyi? (b) Hanenu yakutalilahu yamaana alala ekala Mwiizu daNzambi.
12 Chamuchiyedi, Bayibolu yinateli kuyikwasha kuhimpa yililu yenu. Pawulu walejeli Timotewu nindi “nyikanda yajila” “yawaha kuleja nachu, nikutanyisha nachu, nikwolola nachu, nikufumba nachu mwaloña; kulonda muntu waNzambi awanini chikupu, awahili nyidimu yayiwahi yejima.” (2 Timotewu 3:16, 17) Kuhitila mukutoñojoka hansañu yekala Mwizu daNzambi mpinji yejima, nikuzatisha nshimbi jamuBayibolu, spiritu yaNzambi yikawahisha yililu yenu. Mwakekala nayililu yayiwahi, yidi neyi kudikehesha, kumika, kuzata nañovu, nawa nikumwekesha kukeña kwakweni kudi akwetu eniKristu. (1 Timotewu 4:15) Timotewu wadiña nayililu yeniyi, yamuleñeleli kwikala chitwa kudi Pawulu nikuyipompelu kwazatilileñayi.—Afwilipi 2:20-22.
13 Chamuchisatu, Izu daNzambi hinkalaña yamaana alala. (Masamu 1:1-3; 19:7; 2 Timotewu 2:7; 3:15) Izu daNzambi dinateli kukukwasha kutonda amabwambu chiwahi, kusakula yisela yayiwahi, nichakufuukulahu chiwahi hansañu yakala. (Kutachika 34:1, 2; Masamu 119:37; 1 Akorinda 7:36) Kufuukulahu chiwahi chayinu mpinji chalema hakwila wushikiji yikonkwanyi yeyi yakuspiritu.
“Lwaku Njita Yayiwahi”
14. Muloñadi kufwila kushikija yikonkwanyi yakuspiritu chichabulila kwikala chuma chapela?
14 Kutwamijaku yikonkwanyi yakumulemesha nachu Yehova dichuma chasweja kuwaha ilaña hichapelaku. Chakutalilahu neyi hiwukutonda mudimu, hadaha wunateli kumona ikakeja kudi antaña, amabwambu niantañishi yiwalemesha akuhwelela nawu kutaña chikupu nikwikala namudimu wamali amavulu dichuma chalema hakwila wikali namuzañalu. (Aroma 12:2) Kufwana Timotewu, mwatela ‘kulwa njita yayiwahi yakukuhwelela’ hakwila ‘mukwati kuwumi wahaya nyaka’ wayihembelayi Yehova.—1 Timotewu 6:12; 2 Timotewu 3:12.
15. Ikakejanyi damweniyi Timotewu?
15 Neyi chakwila antaña abula kwitiya anakani kufuukula kweyi, kweseka kweniku kwekalaña kweneni chikupu. Chakubula nikujinooka, Timotewu washindili ikakeja damuchidiwu. Kwesekeja namukanda wumu, hadaha chisaka chaTimotewu ‘chadiña chataña nawa chamaheta.’ Chakubula nikujina, tata yindi wakuhweleli nindi Timotewu wakataña shikola yahewulu nawa wukatwalekahu namaheta amuchisaka. * Fwikijenu chatiyiliyi tata yaTimotewu hakwiluka nindi Timotewu wakeñeluhu wubanji nikubula mali kwadiña mumudimu wawumishonali wakalakeleñayi naPawulu!
16. Indi kansi wumu wazatiluhu ñahi nekakeja dawanvwali jindi?
16 EniKristu achidi atwansi makonu atalañanaña nakukala kwamuchidiwu. Matthew, wakalakelaña hakasanji kamutayi kawaYinsahu jaYehova wanukaña nindi: “Hampinji yinatachikili kukalakala neyi payiniya, tata watiyili kutama nankashi. Watoñojokeli nindi shikola yami yayili ‘mumenji’ hakuzata mudimu wakukomba komba hakudikwasha mumudimu wami wakushimwina. Wadiña nakunseha, nikunleja kuvula kwamali yinadi kukwataña neyi niñila mudimu wakuzataña mpinji yejima.” Indi Matthew wazatili munjilanyi nadina ikakeja? “Natwalekeluhu nandandanda yakutaña Bayibolu nikulomba mpinji yejima, sweje hampinji yadiñi yaswayi kuhila.” Kufuukulahu kwaMatthew akwikiswila. Chimwahitili mafuku wulunda windi natata yindi wawahili. Matthew wakundama cheñi kwakwihi naYehova. Matthew wahosheli nindi, “Yehova wakameneni yuma yinakeñeleña, wankolesheli nawa wankiñili hakufuukula kwakubula kushikilamu. Neyi hinafwilili kushikija yikonkwanyi yakuspirituku, mutenowu hinadi kumona yuma yejimiyuku.”
Twamijenuku Yikonkwanyi yakuSpiritu
17. Indi antu amakwawu anateli kudimbulula ñahi ana anakufwila kwiñila mudimu wampinji yejima? (Matewu 16:22)
17 Ikakeja dakuleka kufwila kushikija yikonkwanyi yakuspiritu datela kufuma nikudi akwetu akwakwitiya. Amakwawu atela kwihula nawu, ‘Muloñadi wakwikalila payiniya? Wunateli kushakama nshakaminu yayiwahi hampinji yoyimu nikukalakala mumudimu wakushimwina. Iñilaku mudimu wawuwahi kulonda kwikala namali amavulu.’ Iku kunateli kwikala kufumba kwakuwahi, komana chalala wadidizishaña kwakama Nzambi hamu neyi chikonkwanyi cheyi nikwiteja iku kufumba?
18, 19. (a) Munateli kutwamijaku ñahi yikonkwanyi yakuspiritu? (b) Lumbululenu kudihana kumwadihanaña, hamu neyi atwansi hamuloña waWanta.
18 Chakubula nikujinooka, eniKristu amakwawu amumafuku aTimotewu adiña nayitoñojoka yamuchidiwu. (1 Timotewu 6:17) Hakwila nawu yamukwashi Timotewu kutwalekahu nayikonkwanyi yakuspiritu, Pawulu wamukolesheli Timotewu, nindi: “Hikwekala ishidika wudi kunjita wadikasaña nansañu yamunu mwishinaku, kulonda atiyishi kuwaha yena wamusonekeli muwushidika.” (2 Timotewu 2:4) Mushidika wudi hamudimu hatelela kuluwañeshewa nakufwila yuma yafwilaña muntu wabula kwikala mushidikaku. Wumi windi niwumi wawantu amakwawu washindamena hakwikala wadiloñesha kukalakala hakuleja kwamukulumpi windi wamudimu. Hamu neyi mushidika waKristu, chochimu watela kwikala watona mpinji yejima nakutondolwela kwikala wakasika nakufwila kuheta yuma yakumujimba yamukunkulwayi yatela kukukañesha kuzata mudimu weyi wakupulwisha antu.—Matewu 6:24; 1 Timotewu 4:16; 2 Timotewu 4:2, 5.
19 Chatela kufwila chihandilu chachiwahi kwikala chikonkwanyi cheyi, watela kwikala naspiritu yakudihana. ‘Hamu neyi ishidika waYesu Kristu, diloñeshi kwikala wakadi yuma yazañaleshaña muntu.’ (2 Timothy 2:3, The English Bible in Basic English) Hampinji yadiñayi naPawulu, Timotewu wadizili kajindilu kakwikala namuzañalu hela tuhu hampinji yasweja kukala. (Afwilipi 4:11, 12; 1 Timotewu 6:6-8) Wunateli kwila neyi cheliliyi. Komana wuneteji kudihana hamuloña waWanta?
Nkisu Yakatataka niYakumbidi
20, 21. (a) Shimunenu nkisu yafumaña hakufwila kushikija yikonkwanyi yakuspiritu. (b) Chumanyi chimunakufwila kwila chikupu?
20 Timotewu wazatili naPawulu chakubula kuleka hadi yaaka 15. Timotewu wamweni namensu indi chatuñileñawu yipompelu yayiha chelili nsañu yayiwahi yitandi kwakwihi neluña dejima dakabeta kaluwunda kaMediterranean. Chihandilu chindi chadiña chamuzañalu kubadika chichadi kwikala neyi watondeluhu kushakama wumi ‘wawantu ejima.’ Nawa ninenu mwakamuna nkisu yakuspiritu yayivulu neyi mufwila kushikija yikonkwanyi yakuspiritu. Mukukundama kwakwihi naYehova nawa mukutambwila kalemesha nikukeña kwawakwenu eniKristu. Chatela kumona lukadi nikuhilashana kwafumaña hakufwila maheta akumujimba, mukekala namuzañalu waweni wafumaña hakuhana chakubula lwisu. Chasweja kulema hayuma yejima, mwamba ‘kakwata kuwumi, wowu wumi walala chikupu’—wumi wahaya nyaka muparadisa hamaseki.—1 Timotewu 6:9, 10, 17-19; Yililu 20:35.
21 Neyi kanda mwili mwenimu, tunayikoleshi chikupu kutachika kudidizisha nikumwakama Nzambi neyi chikonkwanyi chenu. Kundamenu kwakwihi nawantu adi muchipompelu atela kuyikwasha kushikija yikonkwanyi yakuspiritu, nawa yilenu ayilejiku maana. Twamijenuku kudiza Izu daNzambi kwahalwenu mpinji yejima. Fwilenu chikupu kudikaña naspiritu yakufwila yuma yakumujimba yamudinu ituña. Mpinji yejima anukenuña nenu Nzambi “wasweja kutwinka yuma yejima nindi tuluñi nachu” wayikana nkisu yayivulu makonu nikumpinji yakumbidi neyi mutonda yikonkwanyi yakumulemesha nachu Nzambi.—1 Timotewu 6:17.
[Tumazu twaheshina]
^ A Giriki alemesheli kutaña chikupu. Plutarch, wadiñaku hampinji yaTimotewu wasonekeli nindi: ‘Kutaña shikola yahewulu diyi nsulu yayuma yejima yayiwahi. . . . Nahoshi nami, shikola yahewulu diyi yaleteshaña kwikala nayililu yayiwahi nawa yakwashanaña kwikala namuzañalu. . . . Yuma yikwawu yejima yayiwahi yawuntu, yamukunkulwayi nawa hiyalema chakwila tuyakameni chikupuku.’—Moralia, I, “The Education of Children.”
Munakwanuka?
• Kudihi atwansi kunateli kuwanawu wukwashi wakufwila kushikija yikonkwanyi yakuspiritu?
• Muloñadi kudiza Bayibolu nakanañachima chikwalemena?
• Indi atwansi anateli kudikaña ñahi nakuluwañesha kwayuma yakumujimba yamukanu kaayi?
• Nkiswinyi yafumaña hakukeña yikonkwanyi yakuspiritu?
[Malwihu aKuzatisha haKudiza]
[Mwevulu wudi hefu 28]
Timotewu wafwilili kushikija yikonkwanyi yayiwahi
[Nyevulu yidi hefu 29]
Yakutalilahu yayiwahi yamuchidinyi yamukwashili Timotewu?
[Nyevulu yidi hefu 31]
Komana wunakufwila kushikija yikonkwanyi yakuspiritu?