Hobennan, Sigui Tras di Metanan Cu Ta Honra Dios

“Entrena bo mes cu devocion na Dios como bo meta.”​—1 TIMOTEO 4:7, NW.

1, 2. (a) Pakico Pablo a elogia Timoteo? (b) Con hobennan djawe ta ‘entrenando nan mes cu devocion na Dios como nan meta’?

“MI NO tin ni un otro hende di e mesun spirito cu lo precupa sinceramente pa boso bienestar ... El a sirbi hunto cu mi, manera un yiu cu su tata, den e trabou di evangelio.” (Filipensenan 2:20, 22) Apostel Pablo a inclui e elogio caluroso aki den su carta na e cristiannan di prome siglo na Filipos. Na ken e tabata referi? Na Timoteo, su compañero di biahe mas hoben. Imagina bo con contento e confirmacion aki di e cariño y confiansa di Pablo mester a haci Timoteo!

² Hobennan manera Timoteo cu ta teme Dios semper tabata hopi util pa e pueblo di Jehova. (Salmo 110:3) Awe, e organisacion di Dios ta bendiciona cu hopi hoben cu ta sirbi como pionero, misionero, trahado voluntario den construccion y betelita. Otronan cu ta participa cu entusiasmo den actividadnan di congregacion mientras cu nan ta cumpli cu otro responsabilidadnan tambe ta digno di elogio. E hobennan ei ta haya e berdadero satisfaccion di por sigui tras di metanan cu ta honra nos Tata celestial, Jehova. Nan en berdad ta ‘entrenando nan mes cu devocion na Dios como nan meta.’​—1 Timoteo 4:7, 8, NW.

3. Ki preguntanan nos lo considera den e articulo aki?

³ Hoben, abo ta trahando pa alcansa metanan spiritual specifico? Unda bo por haya yudansa y animacion pa haci esei? Con bo por resisti e presionnan di e mundo materialista aki? Ki bendicion bo por spera di ricibi si bo sigui tras di metanan cu ta honra Dios? Laga nos haya contesta riba e preguntanan aki dor di considera e bida y carera di Timoteo.

Bida y Carera di Timoteo

4. Describi Timoteo su carera cristian brevemente.

⁴ Timoteo a lanta na Listra, un stad chikito den e provincia Romano di Galacia. Probablemente el a bin den contacto cu cristianismo tempo cu e tabata un teenager ora Pablo a predica na Listra rond di aña 47 di nos era. Den poco tempo Timoteo a haya un excelente reputacion entre e rumannan cristian local. Ora Pablo a bolbe dos aña despues na Listra y a haya sa di su progreso, el a scohe Timoteo pa sirbi como su compañero den e trabou di misionero. (Echonan 14:5-20; 16:1-3) Segun cu Timoteo a madura, el a ser confia cu asta mas responsabilidad, incluso misionnan crucial pa fortalece e rumannan. Tempo Pablo a skirbi Timoteo for di prizon na Roma rond di aña 65, Timoteo tabata sirbiendo como anciano cristian na Efeso.

5. Segun 2 Timoteo 3:14 y 15, ki dos factor a contribui na Timoteo su decision pa sigui tras di metanan spiritual?

⁵ Tabata bisto cu Timoteo a opta pa sigui tras di metanan spiritual. Pero kico a motiv’e p’e haci esei? Den Pablo su di dos carta na Timoteo, el a menciona dos factor determinante. El  a skirbi: “Continua den e cosnan cu bo a siña y a keda combenci di dje, sabiendo di ken bo a siña nan; y cu for di infancia bo a conoce e scrituranan santo.” (2 Timoteo 3:14, 15) Laga nos analisa prome ki influencia otro cristiannan tabatin riba Timoteo su escohencianan den bida.

Beneficio di Influencianan Positivo

6. Ki entrenamento Timoteo a ricibi, y con el a responde na esaki?

⁶ Timoteo a lanta den un cas dividi den sentido religioso. Su tata tabata un Griego, y su mama, Eunice, y su wela Loida tabata di origen Hudiu. (Echonan 16:1) Eunice y Loida a siña Timoteo e berdadnan di e Scritura Hebreo for di su infancia. Despues cu nan a comberti na cristianismo, sin duda nan a yuda persuadi Timoteo pa e acepta e siñansanan cristian. Claramente, Timoteo a saca pleno probecho for di e entrenamento excelente aki. Pablo a remarca: “Mi [ta corda] e fe sincero cu ta den bo, cu prome tabata biba den bo wela Loida, y den bo mama Eunice, y mi tin sigur cu ta den bo tambe.”​—2 Timoteo 1:5.

7. Ki bendicion hopi hoben ta disfruta di dje awor, y con esaki por beneficia nan?

⁷ Awe, hopi hoben ta bendiciona cu mayor-, wela- y welonan temeroso di Dios kendenan, mescos cu Loida y Eunice, ta reconoce e importancia di metanan spiritual. Por ehempel, ainda Samira ta corda e combersacionnan largo cu e tabatin cu su mayornan tempo e tabata un teenager. “Mami cu papi a siña mi mira cosnan manera Jehova ta mira nan y pa duna prioridad na e trabou di predica”, e ta conta. “Semper nan a motiva mi pa drenta e sirbishi di tempo completo.” Samira a responde faborablemente na e animacion cu su mayornan a dun’e y awor e tin e privilegio di sirbi como miembro di e famia di Betel den su pais. Si bo mayornan ta anima bo pa enfoca riba metanan spiritual, pensa seriamente riba nan conseho. Nan tin bo bienestar na pecho.​—Proverbionan 1:5.

8. Con Timoteo a beneficia di compañerismo cristian edificante?

⁸ Ta importante tambe pa bo busca compañerismo edificante den e hermandad cristian. Tanto e ancianonan cristian di Timoteo su mes congregacion como esnan di Iconio, rond di 30 kilometer leu, tabata conoc’e hopi bon. (Echonan 16:1, 2) El a cultiva un amistad intimo cu Pablo, un persona dinamico. (Filipensenan 3:14) Pablo su cartanan ta indica cu Timoteo tabata habri pa conseho y semper cla pa imita ehempelnan di fe. (1 Corintionan 4:17; 1 Timoteo 4:6, 12-16) Pablo a skirbi: “Abo a sigui [“cu sumo cuidou”, NW] mi siñansa, conducta, proposito, fe, pasenshi, amor,  perseverancia.” (2 Timoteo 3:10) Si, Timoteo a sigui Pablo su ehempel cuidadosamente. Di igual manera, si bo hala cerca personanan fuerte den sentido spiritual den e congregacion, nan lo por yuda bo desaroya metanan spiritual saludabel.​—2 Timoteo 2:20-22.

Studia “e Scrituranan Santo”

9. Ademas di scohe e asociacion corecto, kico bo tin cu haci pa “entrena bo mes cu devocion na Dios como bo meta”?

⁹ Acaso e unico cos cu bo mester haci pa alcansa metanan spiritual ta di scohe e asociacion corecto? No. Mescos cu Timoteo, bo tin cu analisa “e scrituranan santo” cuidadosamente. Kisas bo no ta un hende cu ta gusta studia, pero corda cu Timoteo tabatin cu ‘entrena su mes cu devocion na Dios como su meta.’ Hopi bes atletanan ta train duro lunanan largo pa por alcansa nan meta. Di igual manera, pa bo alcansa metanan spiritual, bo tin cu haci sacrificio y esfuerso diligente. (1 Timoteo 4:7, 8, 10, NW, nota na pia di pagina) Pero kisas bo ta puntra bo mes: ‘Con studiamento di Bijbel por yuda mi alcansa mi metanan?’ Laga nos considera tres manera den cua esei por yuda bo.

10, 11. Dicon e Scritura lo motiva bo pa alcansa metanan spiritual? Duna un ehempel.

¹⁰ Di prome, e Scritura lo duna bo e motivacion corecto. E ta revela e personalidad maraviyoso di nos Tata celestial, su acto supremo di amor na nos fabor, y e bendicionnan eterno cu e tin reserva pa su fiel sirbidornan. (Amos 3:7; Juan 3:16; Romanonan 15:4) Segun cu bo conocemento di Jehova ta crece, bo amor p’e y bo deseo pa dedica bo bida na dje tambe lo aumenta.

¹¹ Hopi cristian hoben ta bisa cu basicamente loke a yuda nan haci e berdad di nan mes ta un estudio personal di Bijbel riba un base regular. Tuma por ehempel Adele. El a lanta den un famia cristian pero nunca e no a pone meta spiritual. E ta corda: “Mi mayornan tabata bai Salon di Reino cu mi, pero mi no tabatin un estudio personal ni mi no tabata scucha na reunion.” Despues cu su ruman muher a batisa, Adele a cuminsa tuma e berdad mas na serio. “Mi a cuminsa lesa Bijbel completo. Mi tabata lesa un poco y despues skirbi un comentario riba loke mi a caba di lesa. Te ainda mi tin tur mi notanan. Mi a lesa Bijbel den un aña.” Como resultado di esei, Adele a sinti su mes motiva pa dedica su bida na Jehova. A pesar di un incapasidad fisico serio cu e tin, aworaki e ta traha como pionero, of evangelisado di tempo completo.

12, 13. (a) Ki cambionan un estudio di Bijbel lo yuda un hoben haci, y con? (b) Duna ehempel di sabiduria practico cu e Palabra di Dios ta contene.

¹² Di dos, Bijbel lo yuda bo haci e cambionan necesario den bo personalidad. Pablo a bisa Timoteo cu “e scrituranan santo” ta “util pa siñansa, pa reprendemento, pa coreccion, pa educa den husticia, pa e hende di Dios por ta perfecto, ekipa pa tur bon obra.” (2 Timoteo  3:16, 17) Ora bo ta medita regularmente riba asuntonan cu tin di aber cu e Palabra di Dios y ta aplica principionan biblico, bo ta permiti e spirito di Dios refina bo personalidad. Lo e cultiva den bo cualidadnan esencial, manera humildad, perseverancia, diligencia y berdadero amor pa bo rumannan cristian. (1 Timoteo 4:15) Timoteo tabata posee e cualidadnan aki, y p’esei e tabata hopi util tanto pa Pablo como pa e congregacionnan cu Timoteo a sirbi.​—Filipensenan 2:20-22.

¹³ Di tres, e Palabra di Dios ta un mangasina di sabiduria practico. (Salmo 1:1-3; 19:7; 2 Timoteo 2:7; 3:15) Lo e yuda bo scohe bo amigonan sabiamente, selecta entretenimento saludabel y trata cu hopi otro situacion dificil. (Genesis 34:1, 2; Salmo 119:37; 1 Corintionan 7:36) Si bo kier alcansa metanan spiritual, ta importante pa bo tuma decisionnan sabi awor.

“Lucha e Bon Lucha”

14. Pakico siguimento tras di metanan spiritual no ta e cos di mas facil pa haci den bida?

¹⁴ E cos di mas sabi cu un persona por haci den su bida ta di duna prioridad na metanan cu ta honra Jehova; pero esei sigur no ta e cos di mas facil pa haci. Por ehempel, ora bo tin cu scohe un carera, bo famia-, amigo- y maestronan di scol cu bon intencion por pone hopi presion riba bo pa sigui un enseñansa avansa y un carera lucrativo cu, segun nan, ta e clave pa berdadero exito y felicidad. (Romanonan 12:2) Mescos cu Timoteo, lo bo tin cu “lucha e bon lucha di fe” pa bo por “gara e bida eterno” cu Jehova ta extende na bo.​—1 Timoteo 6:12; 2 Timoteo 3:12.

15. Probablemente, ki oposicion Timoteo a enfrenta?

¹⁵ Ora miembro di famia cu no ta creyente ta bai contra di bo escohencianan den bida, e prueba por ta asta mas dificil ainda. Posiblemente, Timoteo tabatin cu vence e oposicion ei. Segun un enciclopedia biblico, probablemente e famia di Timoteo “tabata pertenece na e clase educa y cu bon entrada.” Casi sigur su tata a spera di dje pa e busca enseñansa avansa y sigui cu un empresa di famia. * Imagina bo con e tata di Timoteo lo a reacciona ora el a haya sa cu Timoteo a prefera e peliger- y insiguridadnan financiero di e trabou di misionero hunto cu Pablo!

16. Con un hoben a trata cu oposicion di mayor?

¹⁶ Awe hobennan cristian ta haya nan cu retonan similar. Matthew, kende ta sirbi na un sucursal di Testigonan di Jehova, ta corda: “Dia mi a cuminsa traha como pionero, mi tata a keda sumamente decepciona. El a haya cu mi a ‘desperdicia’ mi enseñansa dor di haci trabou di limpiesa pa sostene mi den mi ministerio. E tabata ridiculisa mi y corda mi cuanto lo mi por a gana si mi a busca un trabou full-time.” Con Matthew a trata cu e oposicion ei? “Mi a tene mi na un programa rigido di lesamento di Bijbel y tabata haci oracion constantemente, specialmente na momentonan cu lo mi por a perde mi temperamento facilmente.” Matthew su determinacion a hiba na un gran bendicion. Cu tempo, e relacion cu su tata a mehora. Tambe Matthew a hala mas cerca Jehova. El a bisa: “Mi a mira con Jehova a percura pa mi, anima mi y yuda mi evita di tuma mal decision. Si mi no a haci esfuerso pa alcansa metanan spiritual lo mi no a experencia ningun di e cosnan aki.”

Keda Enfoca Riba Metanan Spiritual

17. Con algun ruman por comete e kibocacion di desanima esnan cu ta plania pa drenta e sirbishi di tempo completo? (Mateo 16:22)

¹⁷ Den un forma sutil asta bo propio rumannan di fe por desanima bo pa sigui tras di metanan spiritual. Kisas algun ta bisa bo:  ‘Pakico traha pionero? Bo por hiba un bida normal y toch participa den e trabou di predica. Busca un bon trabou y garantisa bo siguridad financiero.’ Esaki por parce un conseho sano, pero si bo siguie, lo bo ta entrenando bo mes cu devocion na Dios como bo meta?

18, 19. (a) Con bo por keda enfoca riba metanan spiritual? (b) Splica ki sacrificio abo, como hoben, ta haciendo na fabor di e Reino.

¹⁸ Aparentemente algun cristian den tempo di Timoteo tabatin e mesun pensamento. (1 Timoteo 6:17) Pa yuda Timoteo mantene su bista riba metanan spiritual, Pablo a anim’e, bisando: “Ningun solda den sirbishi militar no ta envolve su mes den asuntonan di tur dia, pa e por complace esun cu a tum’e den sirbishi como solda.” (2 Timoteo 2:4) Un solda cu ta den servicio activo no por laga empeñonan civil kita su atencion. E mester ta semper cla pa sigui ordo di su comandante. Tanto su bida como bida di otro hende ta depende di esei. Como un solda bou di Cristo, bo tambe tin cu keda enfoca riba un solo cos y evita di bai innecesariamente tras di empeñonan material cu por stroba bo di cumpli cu bo ministerio cu ta salba bida.​—Mateo 6:24; 1 Timoteo 4:16; 2 Timoteo 4:2, 5.

¹⁹ En bes di sigui e meta di hiba un bida di comodidad, cultiva un spirito di sacrificio propio. “Como miembro di e ehersito di Cristo, sea prepara pa biba sin e comodidadnan di bida.” (2 Timoteo 2:3, The English Bible in Basic English) Tempo cu Timoteo tabata acompaña Pablo, el a siña e secreto pa keda contento asta den e circunstancianan di mas dificil. (Filipensenan 4:11, 12; 1 Timoteo 6:6-8) Abo por haci mescos. Bo ta dispuesto pa haci sacrificio na fabor di e Reino?

Bendicionnan Awor y den Futuro

20, 21. (a) Menciona algun bendicion cu lo bo ricibi si bo sigui tras di metanan spiritual. (b) Kico bo ta determina pa haci?

²⁰ Pa mas o menos 15 aña, Timoteo a traha estrechamente cu Pablo. Timoteo a mira personalmente con congregacionnan nobo a forma segun cu e bon nobo a plama den casi henter e area noord di Lama Mediteraneo. Su bida tabata mas excitante y yen di satisfaccion cu si el a scohe pa hiba un bida “normal.” Si bo sigui tras di metanan spiritual, bo tambe lo cosecha bendicionnan spiritual rico. Lo bo hala cerca Jehova y gana e amor y respet di otro cristiannan. En bes di sinti e dolor y frustracion cu coremento tras di rikesa material ta trece cu ne, lo bo disfruta di e felicidad berdadero cu dunamento sin egoismo ta produci. Y e cos di mas precioso cu lo bo haya ta e ‘berdadero bida’, esta, bida eterno den un paradijs riba Tera.​—1 Timoteo 6:9, 10, 17-19; Echonan 20:35.

²¹ Pues, si ainda bo no ta entrenando bo mes cu devocion na Dios como bo meta, nos ta anima bo calurosamente pa bo cuminsa haci esei mesora. Hala cerca di e rumannan di bo congregacion cu por yuda bo traha pa alcansa metanan spiritual, y busca nan guia. Duna prioridad na estudio personal di e Palabra di Dios riba un base regular. Sea determina pa resisti e spirito materialista di e mundo aki. Y corda semper cu e Dios cu “ta provee pa nos tur cos na abundancia” ta priminti cu bo por ricibi bendicion rico tanto awor como den futuro si bo scohe metanan cu ta honr’e.​—1 Timoteo 6:17.

[Nota]

Bo Ta Corda?

• Unda hobennan por haya yudansa pa traha pa alcansa metanan spiritual?

• Pakico un estudio di Bijbel diligente ta asina importante?

• Con hobennan por resisti e influencia materialista di e mundo aki?

• Ki bendicion hende cu ta busca metanan spiritual ta ricibi?

[Preguntanan di Estudio]

[Plachi na pagina 24]

Timoteo a sigui tras di metanan excelente

[Plachi na pagina 25]

Ki influencianan positivo a yuda Timoteo?

[Plachi na pagina 26]

Abo ta traha pa alcansa metanan spiritual?