Yonguwan, du muiti fu doro marki di e gi Gado grani

„Yu . . . musu leri yusrefi fu dini Gado na wan getrow fasi.”​—1 TIMOTEYUS 4:7.

1, 2. (a) Fu san ede Paulus ben prèise Timoteyus? (b) Fa yonguwan na ini a ten disi ’e leri densrefi fu dini Gado na wan getrow fasi’?

„MI NO abi nowan tra sma di e denki leki fa en e denki èn di sa sorgu trutru gi den sani di abi fu du nanga unu. . . . Neleki fa wan pikin de nanga en papa, na so a ben wroko tranga nanga mi, so taki a bun nyunsu ben kan go na fesi” (Filipisma 2:20, 22). Na apostel Paulus ben taki den moi sani disi na ini a brifi di a skrifi gi den fosi yarihondro Kresten na ini Filipi. Fu suma a ben taki dyaso? A ben taki fu Timoteyus, a yongu mati fu en di go nanga en na difrenti presi. Yu kan frustan taki Timoteyus ben prisiri di a yere taki Paulus lobi en èn taki a ben frutrow en!

² Neleki Timoteyus, na so yonguwan di abi frede gi Gado ala ten de wan blesi gi a pipel fu Yehovah (Psalm 110:3). Na ini a ten disi, furu yonguwan de na ini na organisâsi fu Gado, èn den de wan blesi fu di den e dini leki pionier, zendeling, den e yepi bow Kownukondre zaal, èn den e wroko na Bethel. Wi e prèise sosrefi den wan di e wroko fayafaya na ini a gemeente aladi den abi tra frantwortu. Den yonguwan disi e prisiri trutru fu di den e du muiti fu doro marki di e gi grani na wi hemel Tata, Yehovah. Fu tru, den ’e leri densrefi fu dini Gado na wan getrow fasi’.—1 Timoteyus 4:7, 8.

3. Sortu aksi wi sa go luku na ini na artikel disi?

³ Efu yu yongu ete, yu e du muiti fu doro marki di e gi Gado grani? San kan yepi yu èn gi yu deki-ati fu du dati? San kan yepi yu fu no suku gudu soleki fa grontapusma e du? Sortu blesi yu kan fruwakti te yu e du muiti fu doro marki di e gi Gado grani? Wi o kisi piki tapu den aksi disi te wi o luku a libi fu Timoteyus èn den sani di a du na ini a diniwroko.

Suma ben de Timoteyus?

4. Fruteri syatu fa a libi fu Timoteyus ben de di a tron wan Kresten.

⁴ Timoteyus gro kon bigi na ini Listra, wan pikin foto na ini a distrikt Galasia di ben de na ondro a tiri fu Rome. A kan taki Timoteyus kon sabi a Kresten bribi di a ben de wan tini, na a ten fu 47 G.T. di Paulus ben preiki na ini Listra. Heri esi den brada kon lobi a fasi fa Timoteyus ben du en wroko na ini a gemeente drape. Tu yari baka dati, di Paulus drai go baka na Listra, a yere fa Timoteyus go na fesi, èn fu dati ede a teki en fu wroko makandra nanga en leki zendeling (Tori fu den Apostel 14:5-20; 16:1-3). Di Timoteyus kon tron wan lepi Kresten, dan a kisi moro bigi frantwortu. Wan fu den prenspari sani di a ben musu du tu, na taki a ben musu go na den brada fu gi den deki-ati. Na a ten fu 65 G.T., di Paulus ben de na strafu na ini Rome èn a ben skrifi wan brifi gi Timoteyus, dan Timoteyus ben e dini leki wan Kresten owruman na ini Efeise.

5. San na tu sani di yepi Timoteyus fu doro marki di e gi Gado grani, soleki fa 2 Timoteyus 3:14, 15 e taki?

⁵ A de krin fu si taki Timoteyus ben du muiti fu doro marki di e gi Gado grani. Ma san gi en a deki-ati fu du dati? Na ini a di fu tu brifi di Paulus ben skrifi gi Timoteyus, a ben taki fu tu prenspari sani di yepi Timoteyus. A ben skrifi: „Tan du den sani di yu leri èn di yu kon bribi fu  di sma overtoigi yu, bika yu sabi fu suma yu leri den, èn yu ben sabi den santa buku kaba sensi di yu ben de wan beibi” (2 Timoteyus 3:14, 15). Meki wi go luku fosi fa tra Kresten gi Timoteyus deki-ati fu teki bun bosroiti.

Leri wan sani fu den wan di de bun eksempre

6. Sortu leri Timoteyus ben kisi, èn san a du nanga den sani di a leri?

⁶ A no ala den memre fu na osofamiri pe Timoteyus kweki ben de na bribi. En papa ben de wan Grikisma, èn en mama Enise nanga en granmama Lowis, ben de Dyu (Tori fu den Apostel 16:1). Sensi di Timoteyus ben de wan beibi, Enise nanga Lowis leri en den tru tori di skrifi na ini den Hebrew Buku fu Bijbel. Baka di den teki a Kresten bribi, den overtoigi en so taki a poti bribi na ini den Kresten leri. A no de fu taki dati Timoteyus kisi wini fu den sani disi di a ben leri. Paulus ben taki: „Mi e memre yu leki wan sma di abi trutru bribi sondro fu hoigri; yu granmama Lowis nanga yu mama Enise fosi ben abi a bribi dati, ma mi de seiker taki yu abi a bribi dati tu.”—2 Timoteyus 1:5.

7. San na wan blesi gi furu yonguwan, èn sortu wini disi kan gi den?

⁷ Na ini a ten disi, a de wan blesi gi furu yonguwan taki den abi papa nanga mama, granpapa nanga granmama di abi frede gi Gado. Neleki Lowis nanga Enise, den e frustan taki a de prenspari fu yepi den yonguwan fu poti marki di e gi Gado grani. Fu eksempre, Samira e memre den langa takimakandra ete di a ben abi nanga en papa nanga mama di a ben de wan tini. „Mi mama nanga papa leri mi fu si sani soleki fa Yehovah e si den èn den leri mi fu si a preikiwroko leki a moro prenspari sani na ini mi libi”, na so a e fruteri. „Ala ten den gi mi deki-ati fu du moro na ini diniwroko soleki fu pionier noso fu go na Bethel.” Samira gi yesi na a rai di en papa nanga mama gi en, èn now a abi a grani fu dini na Bethel na ini a kondre fu en. Efu yu papa nanga mama e gi yu a deki-ati fu poti marki di e gi Gado grani, dan prakseri bun fu a rai di den gi yu. Yu papa nanga mama wani taki sani go bun nanga yu.—Odo 1:5.

8. Fa Timoteyus kisi wini fu di a ben de bun mati nanga lepi Kresten?

⁸ A prenspari sosrefi fu suku mati na ini a Kresten gemeente, di kan gi yu deki-ati. Den Kresten owruman na ini a gemeente fu Timoteyus èn sosrefi den owruman na ini a foto Ikonium di ben de sowan 30 kilometer moro fara, ben sabi en heri bun (Tori fu den Apostel 16:1, 2). Timoteyus kon tron bun mati nanga Paulus di ben du en diniwroko fayafaya (Filipisma 3:14). Den brifi fu Paulus e tyari kon na krin taki Timoteyus ben lobi en te sma ben gi en rai, èn taki a ben de klariklari fu teki na eksempre fu sma di ben abi wan tranga bribi (1 Korentesma 4:17; 1 Timoteyus 4:6, 12-16). Paulus ben skrifi: „Yu sabi heri bun san mi ben leri yu, fa mi ben libi èn san na a  marki di mi ben abi na ini a libi; yu sabi sosrefi a bribi fu mi, fa mi ben abi langa pasensi, fa mi ben lobi trawan, fa mi ben horidoro” (2 Timoteyus 3:10). Iya, Timoteyus ben meki tranga muiti fu teki na eksempre fu Paulus. Na so a de tu taki te yu e tron mati fu lepi brada nanga sisa na ini a gemeente, dan dati sa yepi yu fu poti marki di e gi Gado grani.—2 Timoteyus 2:20-22.

Studeri „den santa buku”

9. Boiti taki yu musu abi mati di e gi yu deki-ati, san yu musu du tu fu ’leri dini Gado na wan getrow fasi’?

⁹ San yu musu du moro fu doro marki di e gi Gado grani, boiti taki yu musu abi mati di e gi yu deki-ati? Neleki Timoteyus, yu sa musu ondrosuku „den santa buku” finifini. Kande yu no lobi studeri, ma hori na prakseri taki Timoteyus ben musu ’leri ensrefi fu dini Gado na wan getrow fasi’. Nofo tron a de so taki sportman e wroko tranga omeni mun langa soso fu doro wan spesrutu marki. Na so a de tu taki yu musu libi wan tu sani na baka èn yu musu meki tranga muiti fu man doro den marki di yu poti gi yusrefi (1 Timoteyus 4:7, 8, 10). Ma kande yu e aksi yusrefi: ’Fa a studeri di mi e studeri Bijbel o yepi mi fu doro den marki fu mi?’ Meki wi go luku dri fasi fa Bijbel o yepi yu.

10, 11. Fa Bijbel kan yepi yu fu poti marki gi yusrefi di e gi Gado grani? Gi wan eksempre fu dati.

¹⁰ A fosi fasi fa Bijbel o yepi yu, na taki a e gi yu bun reide fu san ede yu musu poti marki gi yusrefi di e gi Gado grani. Bijbel e sori san na den tumusi moi fasi fu wi hemel Tata, san Yehovah du fu di a lobi wi, èn a e sori taki na ini a ten di e kon getrow futuboi fu Gado o de koloku fu têgo (Amos 3:7; Yohanes 3:16; Romesma 15:4). Te yu o kon sabi moro fu Yehovah, dan dati o meki taki yu o lobi en moro èn yu o wani gi yu libi abra na en.

¹¹ Furu Kresten yonguwan e agri taki wan prenspari sani di yepi den fu libi soleki fa Gado wani, na a studeri di den studeri Bijbel doronomo. Fu eksempre, Adele di gro kon bigi na ini wan Kresten osofamiri, noiti no ben poti marki gi ensrefi fu dini Gado. A e fruteri: „Mi papa nanga mama ben e tyari mi go na a Kownukondre zaal, ma mi srefi no ben e studeri Bijbel èn mi no ben e arki srefi na den konmakandra.” Baka di en sisa dopu, dan Adele bigin prakseri seryusu fu den sani di a ben leri na ini a tru anbegi. „Mi bigin leisi Bijbel. Te mi ben e leisi wan pisi, dan mi ben skrifi syatu san mi ben leisi. Te now ete mi abi ala den sani di mi skrifi. Mi leisi a heri Bijbel na ini wán yari.” Den sani disi gi Adele deki-ati fu gi en libi abra na Yehovah. Aladi a malengri, toku a e pionier now.

12, 13. (a) Sortu kenki wan yonguwan sa man tyari kon na ini en libi te a e studeri Bijbel, èn fa a o man du dati? (b) Kari wan tu koni rai di skrifi na ini Gado Wortu.

¹² A di fu tu fasi fa Bijbel e yepi yu, na taki yu sa man kenki a fasi fa yu e denki èn a fasi fa yu e tyari yusrefi. Paulus ben taigi Timoteyus taki „den santa buku” „bun fu gi leri, fu frumane sma, fu poti sani kon reti, fu gi trangaleri na wan regtfardiki fasi, so taki a sma di de fu Gado kan kon bun dorodoro èn de srekasreka fu du ibri  bun wroko” (2 Timoteyus 3:16, 17). Te yu e denki dipi doronomo fu den sani di skrifi na ini Gado Wortu, èn te yu e hori yusrefi na Bijbel gronprakseri, dan yu e gi a yeye fu Gado na okasi fu meki yu tron wan moro bun Kresten. A yeye fu Gado sa yepi yu fu tron wan sma di abi sakafasi, di e horidoro, di lobi wroko tranga, èn di abi trutru lobi gi Kresten brada nanga sisa (1 Timoteyus 4:15). Timoteyus ben abi den fasi disi, èn fu dati ede a ben de wan bigi yepi gi Paulus èn gi den gemeente pe a ben e dini.—Filipisma 2:20-22.

¹³ A di fu dri fasi fa Gado Wortu e yepi yu, na taki a lai nanga koni rai (Psalm 1:1-3; 19:7; 2 Timoteyus 2:7; 3:15). Gado Wortu sa yepi yu fu sabi suma yu kan teki leki yu mati, sortu prisiriten fiti, èn a sa yepi yu fu teki furu tra prenspari bosroiti (Genesis 34:1, 2; Psalm 119:37; 1 Korentesma 7:36). A de tumusi prenspari taki yu e teki koni bosroiti nownow efu yu wani doro den marki fu yu.

„Feti a bun feti”

14. Fu san ede a no makriki fu doro den marki di yu poti fu gi Gado grani?

¹⁴ A moro koni sani di yu kan du na fu du muiti fu doro marki di e gi Yehovah grani, ma a no makriki fu du disi. Fu eksempre, te yu musu bosroiti sortu wroko yu o du, dan den famiriman fu yu, den speri fu yu, noso den leriman fu yu ben sa kan dwengi yu fu teki moro hei skoroleri so taki yu kan abi wan kefalek wroko di e pai furu moni. Den e du dati fu di den e bribi taki na den sani disi o meki yu libi waka bun èn yu o de koloku trutru (Romesma 12:2). Neleki Timoteyus, yu sa musu „feti a bun feti di abi fu du nanga a bribi” so taki yu kan „grabu a têgo libi hori bun steifi”, iya, a libi di Yehovah e pramisi fu gi yu.—1 Timoteyus 6:12; 2 Timoteyus 3:12.

15. Sortu gens Timoteyus ben kisi kande?

¹⁵ Te famiriman fu yu di no de na bribi no lobi den bosroiti di yu teki, dan dati kan meki en moro muilek gi yu. A kan de so taki Timoteyus ben kisi den sortu gens disi. Soleki fa wan buku e taki, dan a famiri fu Timoteyus ben de „gudusma di kisi hei skoroleri”. A kan taki en papa ben fruwakti taki a ben musu teki moro hei skoroleri èn taki a ben o drai a bisnis fu a famiri. * Timoteyus ben wani wroko leki zendeling nanga Paulus, aladi disi ben wani taki dati ogri ben kan miti en èn taki a no ben o abi furu moni. Yu kan frustan taki a papa fu Timoteyus no ben lobi a tori kwetikweti di a yere taki Timoteyus ben wani du so wan sani nanga en libi!

16. San wan yongu brada du di en papa gens en?

¹⁶ Yongu Kresten na ini a ten disi, e kisi den srefi sortu problema dati. Matthew, di e wroko na wan bijkantoro fu Yehovah Kotoigi, e memre disi ete: „Di mi bigin pionier, mi papa no ben lobi a sani dati kwetikweti. Mi bigin krin gebow fu sorgu misrefi leki pionier, èn fu dati ede mi papa ben feni taki na fu soso mi teki skoroleri. A ben e spotu mi, fu di a ben taigi mi ibri tron baka o furu moni mi ben kan meki efu mi ben abi wan moro bun wroko.” San Matthew du di a sani disi pasa nanga en? „Mi no ben misi fu leisi Bijbel èn mi ben e begi doronomo, spesrutu na den momenti te mi ben e firi taki mi ben o lasi misrefi.” Matthew kisi wini fu di a horidoro. Te fu kaba, a kon de moro bun nanga en papa. Boiti dati, a kon tron wan moro bun mati fu Yehovah. „Mi si taki Yehovah gi mi den sani di mi abi fanowdu na ini a libi, a gi mi deki-ati, èn a yepi mi fu no teki don bosroiti”, na so Matthew e taki. „Mi no ben o ondrofeni den sani disi, efu mi no ben du muiti fu doro marki di e gi Gado grani.”

Tan hori na prakseri sortu marki yu wani doro fu gi Gado grani

17. Fa son sma di e taki sani sondro fu denki, kan meki den wan di wani pionier, lasi-ati? (Mateyus 16:22)

¹⁷ Srefi wan tu Kotoigi di e taki sani sondro fu denki, kan meki yu lasi-ati te yu e du muiti fu  doro marki di e gi Gado grani. Kande sonwan fu den e taki: ’Fu san ede yu wani pionier? Yu no abi fu pionier, ma yu kan libi leki fa ala tra sma e libi èn toku yu kan du a preikiwroko. Suku wan bun wroko so taki yu no o abi moni problema.’ Kande a gersi leki disi na bun rai. Ma a de so trutru taki yu e leri fu dini Gado na wan getrow fasi efu yu e teki a rai dati fu den?

18, 19. (a) Fa yu kan tan hori den marki di e gi Gado grani, na prakseri? (b) Fruteri sortu sani yu leki yonguwan e du fu a bun fu a Kownukondre.

¹⁸ Soleki fa a sori, son Kresten na ini a ten fu Timoteyus ben abi a srefi denki disi (1 Timoteyus 6:17). Paulus ben wani yepi Timoteyus fu tan poti prakseri na den marki di e gi Gado grani, èn fu dati ede a gi en a deki-ati disi: „Nowan man di de wan srudati e go moksi ensrefi nanga bisnis afersi, so taki a sma di teki en leki srudati kan feni en bun” (2 Timoteyus 2:4). Wan srudati di de na feti, no o poti prakseri na den sani di den borgu e du. A musu de srekasreka fu du wantewante san en komandanti e taki, bika te a e du dati, dan a kan kibri en eigi libi èn di fu trawan. Fu di yu na wan srudati fu Krestes, meki yu musu tan poti prakseri na a diniwroko. Yu no musu suku fu kisi gudu bika dati ben o meki taki yu no o man du yu diniwroko di e meki sma kisi frulusu.—Mateyus 6:24; 1 Timoteyus 4:16; 2 Timoteyus 4:2, 5.

¹⁹ Na presi taki yu e suku fu kon gudu nomonomo, du sani gi trawan èn no prakseri yusrefi wawan. „Leki wan srudati fu Krestes Yesus, yu no musu de nomonomo fu suku den sani di e meki a libi kon moro makriki” (2 Timoteyus 2:3, The English Bible in Basic English). Fu di Timoteyus ben go makandra nanga Paulus na difrenti presi, meki a leri fu de tevrede nanga den sani di a abi, srefi na ini den moro muilek situwâsi (Filipisma 4:11, 12; 1 Timoteyus 6:6-8). Yu kan du a srefi sani. Yu de klariklari fu libi wan tu sani na baka, gi a bun fu a Kownukondre?

Den blesi di yu sa kisi now èn na ini a ten di e kon

20, 21. (a) San na wan tu blesi di yu sa kisi te yu e du muiti fu doro marki di e gi Gado grani? (b) Sortu fasti bosroiti yu abi?

²⁰ Sowan 15 yari langa Timoteyus wroko nanga Paulus. Timoteyus si fa nyun gemeente ben seti di a bun nyunsu ben preiki na pikinmoro a heri kontren na noordsei fu a Mindrikondre Se. A ben du furu span sani na ini en libi, èn a ben de koloku. A no ben o man ondrofeni den sani disi efu a ben bosroiti fu libi soleki fa ala tra sma e libi. Te yu e du muiti fu doro marki di e gi Gado grani, dan yu srefi sa kisi bogobogo blesi na ini yu diniwroko. Yu sa tron wan moro bun mati fu Yehovah, èn den brada nanga sisa na ini a Kresten gemeente sa lobi yu èn den sa lespeki yu. Te sma e suku fu kon gudu, dan den e kisi furu problema èn den no de koloku. Ma yu no sa ondrofeni den sani dati te yu no e denki yusrefi nomo èn te yu e du ala san yu man na ini yu diniwroko. Ma san de moro prenspari leki dati, na taki yu sa „grabu a trutru libi hori bun steifi”, iya, a têgo libi na ini a paradijs na grontapu.—1 Timoteyus 6:9, 10, 17-19; Tori fu den Apostel 20:35.

²¹ Sobun, efu yu no leri ete fa fu dini Gado na wan getrow fasi, dan wi e gi yu a deki-ati fu du dati wantewante. Tron bun mati fu den brada nanga sisa na ini a gemeente di kan yepi yu fu doro marki di e gi Gado grani, èn aksi den rai. Studeri Gado Wortu doronomo èn meki dati de wan prenspari sani na ini yu libi. Abi a fasti bosroiti fu no suku fu kon gudu soleki fa den grontapusma e du. Hori na prakseri ala ten taki a Gado „di e gi wi ala sani bogobogo, so taki wi kan abi prisiri”, e pramisi fu gi yu furu blesi now èn na ini a ten di e kon te yu e poti marki gi yusrefi di e gi Gado grani.—1 Timoteyus 6:17.

[Futuwortu]

Yu e memre disi ete?

• San kan yepi yonguwan fu doro marki di e gi Gado grani?

• Fu san ede a de prenspari fu studeri Bijbel doronomo?

• San kan yepi yonguwan fu no de leki den grontapusma di e suku fu kon gudu nomonomo?

• Sortu blesi yu sa kisi te yu e du muiti fu doro marki di e gi Gado grani?

[Aksi fu a tori disi]

[Prenki na tapu bladzijde 24]

Timoteyus ben du muiti fu doro bun marki

[Prenki na tapu bladzijde 25]

San ben yepi Timoteyus?

[Prenki na tapu bladzijde 26]

Yu e du muiti fu doro marki di e gi Gado grani?