Ṭhalaite U In Nu leh Pate Thinlung In Khawih A Ni

“KA FATE thutakah an awm tih ka hriat aliama lâwmna nasa zâwk rêng ka nei lo ve,” tiin tirhkoh Paula chuan a ziak a ni. (3 Johana 4) He Bible chânga fate tih hian Kristian zirtîrte kâwk mah se, Pathian ṭih nu leh pate chuan Johana sawi chhuah thute hi awlsam takin an hre thiam a. Nu leh pate’n an thlahte nunah danglamna pawimawh tak an thlen ang chiah hian, fate pawhin an nu leh pate nun an tidanglam hle a ni.

Israel Lal Solomona chuan fate’n an nu leh pate rilru an khawih thûk theihzia a hria a. Heti hian a ziak a ni: “Fapa fingin pa lâwm a siam a, fapa â erawh chu nu rihna a ni,” tiin. (Thufingte 10:⁠1) Chuvângin, kum upa zâwkte pawh tiamin naupang zawng zawng hian an thiltihin an nu leh pate a nghawng dân tûr chu an ngaihtuah tûr a ni. Engvângin nge chu chu thil tih âwm a nih?

Châwm lian tûr chea Pathian ṭih i nu leh Pate’n an enkawlna zawng zawng che chu han ngaihtuah teh! I pian hma hun rei tak ata tawh khân an ngaihtuah chein, i tân an ṭawngṭai ṭan tawh a. I pian hnuah, i nu leh pate chuan nangmah nêna inlaichînna thûk tak an nei a, nu leh pa nihna chanvo leh mawhphurhna ropui tak​—⁠leh sâng tak ni si​—⁠avâng chuan Pathian hnênah lâwmthu an sawi ngei ang. Mahnia engmah ti thei lo nausên te tak tê chu tûnah chuan an enkawl a ngai a, Jehova betu an nih angin an mawhphurhna chu an la thutak hle a ni.

I nu leh pate chu Kristian dik an nih avângin, anni chuan Bible leh Bible ṭanchhan thu chhuahte chu kaihruaitu rin tlâk takah an hmang a, fate lo enkawl puitling tawhte hnên aṭangin thurâwn an la bawk. Tin, an rilru kamtu thilte chu Pathian hnênah ṭawngṭaiin an thlen chhunzawm zêl bawk a ni. (Rorêltute 13:⁠8) I lo ṭhan chhohvin, i nu leh pate chuan i chaknate chu an hria a, i chak lohnate pawh an hai chuang lo. (Joba 1:⁠5) Tleirâwl chhuah chhoh kumahte chuan harsatna tharte a lo thleng a. A châng chuan, hel i chîng thei a, chutah chuan i nu leh pa chu an ṭawngṭai nasa lehzual a, lehkha an chhiar nasa lehzualin, i Pa vâna mi Jehova i biak zawm theih nâna ṭanpui dân che an ngaihtuah nasa lehzual a ni.

I nu leh pate ngaihah chuan anni chu engtik lai pawhin i tân nu leh pa an ni reng a. Taksa lam, rilru lam, ngaihtuahna lam, leh thlarau lama i ṭhatna tûr chu i lo ṭhan len hnu thleng pawhin an lungkham reng a ni. Amaherawhchu, chutih chhûng chuan mahnia duh thlan theihna i nei tih an hre reng a, eng angin nge i lo ṭhan len dâwn tih chu sawi theih a ni lo. A tâwpah chuan, i kawng zawh tûr chu nangmah ngeiin i thlang ang.

 Chuvângin, fate “thutakah an awm” tih hriat aliama ‘lâwmna nasa zâwk rêng’ nu leh pate tân a awm lo a nih chuan, chu mi kalha thil a thlenin, chu chuan lungngaihna a thlen ang tih chu a âwm hle a ni lâwm ni? Dik takin, âtthlâk taka thil ti fate chuan an nu leh pate lungngaihna an thlen a. Solomona chuan heti hian a sawi: “Fapa â chu a pa tilungngaitu a ni a, a hringtunu tân a khâ a ni,” tiin. (Thufingte 17:25) Fain Pathian dik biakna a kalsan hunah nu leh pate chuan lungngaihna an va tuar nasa tak êm!

Nangni hian in chhûngkuaah leh chu mi bâkah pawh nghawng nasa tak in nei thei tih a chiang hle. In nungchang chuan in nu leh pate thinlung chu a khawih thûk hle a. Pathian leh a zirtîrnate in hnâwl chuan in nu leh pate’n an tuar dâwn a ni. Amaherawhchu, chu mi letling chiah pawh chu a thleng dik thei bawk. Jehova laka in rinawm renga a thu inâwih reng chuan, in nu leh pate chu an hlim ang. In nu leh pate thinlung tihlâwm chu tum tlat ang che u! Nangmahni enkawl a, vênghim a, hmangaihtu che u hnênah chuan eng thilpêk hlu zâwk dang nge inpêk theih tehlul ang? (w07 5/1)