Barezilai​—E Tangata Tei Kite i Tona Au Kotinga

‘EAA e tikaʼi kia riro rai au ei teiaa kia koe?’ Ko Barezilai taua tangata ruaine ra e 80 ona mataiti tei tuatua i teia ki te Ariki o Iseraela ko Davida. Te karanga ra te Pipiria e “e tangata taoiau oki aia,” kare e ekoko no tona apinga nui. (2 Samuela 19:32, 35) I noo a Barezilai ki te enua o Gileada, e ngai maunga i te tua itinga o te Kauvai Ioridana.​—2 Samuela 17:27; 19:31.

Eaa ra te turanga o Barezilai i te tuatua anga aia i taua tuatua ra kia Davida? E no teaa ra teia tangata ruau i tuatua akapera ai?

Meameaau i te Ariki

Kua rokoia a Davida e te kino. Kua taruri ke ia e tana tamaiti ko Abasaloma te terono nona i muri ake i te ‘keia anga i te ngakau o te tangata o Iseraela.’ Te taka meitaki ua ra e kare a Abasaloma e akaora mai i tetai ua atu tei vai tiratiratu ki tona metua tane. No reira kua akaruke a Davida e tona au tavini ia Ierusalema. (2 Samuela 15:6, 13, 14) I te tae anga atu o Davida ki Mahanaima, e ngai i te tua itinga i Ioridana, kua tauturu a Barezilai iaia.

Kua oronga maoraora ua a Barezilai e nga puke tangata ke mai ko Sobi raua ko Makira i te au apinga e manganui na Davida. Kua akaari mai teia tokotoru tangata tiratiratu e kua marama ratou i tona turanga taitaia i to ratou tuatua anga no runga ia Davida e tona au tangata e: “E mate to teianei au tangata i te aere anga mai na te medebara i te pongi, e te roiroi,  e te kaki vai.” Kua rave a Barezilai, a Sobi, e Makira i ta ratou i rauka i te akamerengo i taua au anoano ra na te oronga anga na Davida e tona au tangata i te au roi, te titona, te kerite, te varaoa, te titona tunu paka, te pipi, te puri, te meri, te pata, te mamoe, e te tetai atu au apinga materia.​—2 Samuela 17:27-29.

Ka rokoia ratou e te kino no te tauturu ia Davida. Kare a Abasaloma e vaoo ua ma te kore e akautunga i tetai ua atu tei turuturu i te ariki tikai. No reira e ngakau toa tikai to Barezilai i te akaari anga i te tu tiratiratu kia Davida.

Kua Taui te Turanga

I muri poto mai, kua aro atu te nuku vaeau meameaau o Abasaloma i te au tangata o Davida. Kua tupu te tamaki i roto i te vao rakau o Epharaima, penei i vaitata atu ki Mahanaima. Kua taiaia te nuku o Abasaloma, “e pou maata tei reira i taua rā ra.” Noatu kua tauta a Abasaloma i te oro, kua tamateia ra aia i muri ua mai.​—2 Samuela 18:7-15.

Kua riro akaou mai ko Davida te ariki o Iseraela kare i akaaoangaia ana. Kare tona au tangata i noo tuitarere akaou. Tei runga ravao, kua riro to ratou tu tiratiratu kia Davida ei apai mai i tana akangateiteianga e te akameitakianga.

Ia Davida e mea ra ka oki ki Ierusalema, “kua aere mairā Barezilai i Gileada mei Rogelima mai, e aere katoa raua ma te ariki ki tetai pae Ioridana, kua arataki atura iaia ki tetai pae Ioridana.” I taua atianga ra, kua oronga atura a Davida i teia patianga ki taua tangata ruaine ra kia Barezilai: “Taki aere katoa taua, e naku koe e angai i Ierusalema.”​—2 Samuela 19:15, 31, 33.

Kare e ekoko e, kua ariki rekareka tikai a Davida i te tauturu a Barezilai. Kare mei te mea e te inangaro ua ra te ariki i te akaoki i tona meitaki na te oronga anga atu i te au mea materia. E tangata apinga nui oki a Barezilai e kare aia e anoano i taua tu tauturu ra. Penei te inangaro ra a Davida iaia ki ko i tona paepae ariki no to taua tangata ruaine ra au tu memeitaki. Ka riro te rauka anga tetai ngai tinamou i reira, i te oronga i tetai au tikaanga manea roa no Barezilai kia rekareka i te au akameitakianga o te riro anga ei oa no te ariki.

Tu Akaaka e te Tu Tika Tikai

I te ariu anga atu ki te patianga a te Ariki ko Davida, kua na ko atura Barezilai e: “Mei te aa ra te roa o toku nei aʼo, ka tae katoa atu ei taua ko te ariki ki Ierusalema. Kua tae au ki te varu nga[u]ru anga o toku nei mataiti i teianei rā: e kite ainei au i te meitaki e te kino? e kite ainei oki to tavini i taku e kai nei e taku e inu nei? e tika aina oki au kia akarongo i te imene tane e te imene vaine?” (2 Samuela 19:34, 35) No reira, kua patoi atu a Barezilai i taua patianga ra ma te tu akangateitei e kare i ariki i taua manako meitaki ra. No teaa ra?

Tetai tumu no ta Barezilai ikianga penei no tei tangata metua aia e no te au tu ngata e piri maira ki te reira. Penei kua manako a Barezilai e kare e roa tona ora anga. (Salamo 90:10) Kua rave aia i tei rauka iaia i te turu ia Davida, e kua kite katoa rai aia i te au tu ngata ta te tangata metua anga ka akatupu kiaia. Kare a Barezilai i akatika ana i te manako o te turanga ngateitei e te papa nunui kia arai iaia mei te akamanako tika anga i te ka rauka iaia. Kare i aite ki te tangata noinoi ko Abasaloma, kua akaari ra a Barezilai i te tu akaaka ma te pakari.​—Maseli 11:2.

Tetai tumu ke mai no ta Barezilai ikianga penei ko tona anoano auraka kia riro tona au tu ngata ei tamanamanata i te angaanga a te ariki ta te Atua i akataoonga. Kua ui atura a Barezilai e: “Eaa e tikaʼi kia riro rai to tavini ei teiaa ki taku pu ki te ariki?” (2 Samuela 19:35) Noatu te turuturu ra rai aia ia Davida, kare e kore kua irinaki  tikai a Barezilai e ka puapinga roaia atu te au angaanga ka tukuia mai me na tetai mapu tane e rave i te reira. Kare e kore te manako ra aia i tana uaorai tamaiti e, kua na ko atura a Barezilai e: “Ka akara ana ra i to tavini ia Kimihama; koia te ka aere atu i to tere, e taku pu e te ariki; ka rave ei koe i taau e inangaro iaia.” Kare i riri ana, kua ariki ra a Davida i teia manako. I mua ake ka tikoti ei ki tetai tua i te kauvai Ioridana, “kua ongi akera [a Davida] ia Barezilai, e kua akaora atura iaia.”​—2 Samuela 19:37-39.

Anoanoia te Tu Tau

Te akaketaketa maira te papaanga o Barezilai i te anoano no te tu tau. I tetai tua, auraka tatou e patoi i te tikaanga takake kia tavini me kore auraka e kopae i te aruaru i te reira no te mea te inangaro ra tatou i tetai oraanga maru ua me kore te manako ra e kare tatou e tukatau i te rave apainga. Ka rauka ua i te Atua i te akarava mai i to tatou ngai i ngere me irinaki tikai tatou ki runga iaia no te maroiroi e te pakari.​—Philipi 4:13; Iakobo 4:17; 1 Petero 4:11.

I tetai tua, ka anoanoia tatou kia kite i to tatou au kotinga. Ei akaraanga, penei e maata tikai te angaanga a tetai Kerititiano i roto i te au angaanga pae vaerua. Te kite ra aia e me ariki aia i tetai au tuanga angaanga ke mai, ka rokoia aia e te kino no te kopae anga i te au apainga Tuatua Tapu mei te akono anga i tona pamiri i te pae vaerua e te pae kopapa. I roto i taua au turanga ra, kare ainei i te tu tau e te maru kia patoi atu aia i te au tuanga angaanga ke mai no taua taime ua ra?​—Philipi 4:5; 1 Timoteo 5:8.

Te oronga maira a Barezilai i tetai akaraanga meitaki tikai, e e mea tau roa kia akamanakonako tatou no runga i te reira. E tiratiratu tikai aia, e ngakau toa, e oronga ua, e te akaaka. Tei maata roa atu, kua aruaru tikai a Barezilai i te tuku i to te Atua au anoano na mua ake i tona uaorai.​—Mataio 6:33.

[Mapu i te kapi 15]

(No runga i teia, akara i te puka)

Aere a Barezilai e varu ngauru ona mataiti ki tetai tere roiroi i te tauturu ia Davida

GILEADA

Rogelima

Sukota

Mahanaima

Kauvai Ioridana

Giligala

Ieriko

Ierusalema

EPHARAIMA

[Tutu i te kapi 13]

No teaa ra a Barezilai i patoi ei i te manako meitaki o Davida?