Kua Ara Ainei Koe i te Vaerua Tapu?

“Te vai ra te ara mate rava.”​—1 IOANE 5:16.

1, 2. Akapeea tatou i kite ei e ka rauka i te ara i te vaerua tapu o te Atua?

“KUA pou toku manako katoa i te akamanako anga e kua ara au i te vaerua tapu.” I tata ei tetai vaine i Tiamani, noatu e te tavini ra aia i te Atua. Ka rauka ainei i tetai Kerititiano i te ara tikai i te vaerua tapu, me kore te mana ririnui o te Atua?

² Ae, ka rauka i te ara i te vaerua tapu o Iehova. “E tika te au ara katoa e te akakino a te tangata nei kia akakore,” i karanga ai a Iesu Karaiti, ‘kare ra te akakino i te vaerua tapu e akakoreia.’ (Mataio 12:31) Te akamatakiteia ra tatou e: “Kua rauka na ia tatou te kite i te tuatua-mou ka rave inangaro mou atu ei i te ara, kare ua atu e tarangaara toe, Kareka e ngarangara anga rikarika i te tutaki.” (Ebera 10:26, 27) E kua tata te apotetoro ko Ioane e: “Te vai ra te ara mate rava.” (1 Ioane 5:16) Inara ka akaruke ua ainei ki te tangata tei rave i te ara kino kia akara mai me kua rave rai aia i “te ara mate rava”?

Ka Apai Mai te Tataraara i te Akakoreanga Ara

3. Eaa i tetai taime te tikaanga me kua taitaia tikai tatou no tetai ara a tatou i rave?

³ Ko Iehova te Akava openga o te aronga rave tarevake. E tikai, e tutakianga ta tatou katoatoa kiaia, e e rave ua ana aia i te mea tika. (Genese 18:25; Roma 14:12) Na Iehova e akara mai e me kua rave rai tatou i tetai ara kare e akakoreia, e ka rauka iaia i te akaatea i tona vaerua mei runga mai ia tatou. (Salamo 51:11) Inara, me kua taitaia tikai tatou no tetai ara a tatou i rave, i te akaaraanga kua tataraara tikai tatou. Eaa ra te tataraara tika tikai?

4. (a) Akapeea koe me akamarama mai i te kupu e tataraara? (e) Eaa te apinga pumaana tikai ia Salamo 103:10-14?

⁴ Te aiteanga e kia tataraara koia oki kia taui tatou i to tatou manakoanga ki te angaanga tarevake i raveia i mua ana me kore tei rave akakoroia. Te aiteanga e kua mii tikai tatou me kore kua tataraapa tikai tatou e kua anga ke mei tetai arataa rave ara. Me kua rave ana tatou i tetai ara kino pakari e kua akono i te au takainga umuumuia kia akaari e kua tataraara tikai tatou, ka akapumaanaia tatou e te au tuatua a te tata taramo e: “Kare akenei [a Iehova] i akaoko mai ia tatou e kia aite ki ta tatou au ara; kare oki i tutaki mai ia tatou e kia aite ki to tatou au kino. Mei te teitei o te au rangi i runga i te enua nei, mei te reira te maata o tona aroa i te aronga i mataku iaia ra. Mei te itinga o te rā e taka ke i te opunga o te rā ra, ko tana ïa akataka ke anga i ta tatou au ara ia tatou nei. Mei te aroa o te metua ki tana ra au tamariki, ko to Iehova ïa aroa ki te aronga i mataku iaia ra. Kua kite oki aia i to tatou tu; te manako ra aia e, e one tatou nei.”​—Salamo 103:10-14.

5, 6. E oronga mai i te tumu manako ia 1 Ioane 3:19-22, e e akamarama mai i te aiteanga o te au tuatua a te apotetoro.

⁵ Ei akapumaana anga katoa, ko te au tuatua a te apotetoro ko Ioane: “Ko te mea teia e kite ei tatou e, no te tuatua-mou tatou, e e kore ei to tatou ngakau e mataku i mua iaia. Kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei. E aku au akaperepere e, kia kore to tatou ngakau e akaapa ia tatou, [“e tuatua mataratara ua ta tatou i te Atua,” NW] kare o tatou e taitaiaanga i reira i te Atua ra. E ta tatou e pati atu iaia ra, e rauka ïa ia tatou, no te mea te akono nei tatou i tana au akauenga, e te rave nei i te au mea e marekaʼi aia ra.”​—1 Ioane 3:19-22.

⁶ E “kite ei tatou e, no te tuatua-mou tatou” ka tika e te akaari ra tatou i te aroa taeake e kare tatou e rave ua atu ana i te ara. (Salamo 119:11) Me no etai tumu e te manako ra tatou e  kua apa tatou, kia akamaara meitaki tatou e “e maata [atu] te Atua i to tatou ngakau.” Te akaaroa maira a Iehova ia tatou no te mea te kite meitaki ua ra aia i to tatou “aroa taeake pikikaa kore,” to tatou tamakianga i te ara, e ta tatou au tautaanga i te rave i tona anoano. (1 Petero 1:22) Kare to tatou ngakau e “akaapa ia tatou” me irinaki tatou kia Iehova, me akaari i te aroa taeake, e kare tatou i apa no te rave matau ua anga i te ara. Ka rauka ia tatou i te ‘tuatua mataratara ua atu ki te Atua’ na roto i te pure, e ka pau mai aia ia tatou no te mea te akono ra tatou i tana au akauenga.

Kua Ara Ratou i te Vaerua

7. Eaa te akataka maira me ka akakoreia tetai ara me kare?

⁷ Eaa te au ara kare e akakoreia? Kia pau i teia uianga, e akamanako ana tatou i tetai au akaraanga a te Pipiria. Ka riro teia ei akapumaana anga kia tatou me kua tataraara tatou inara te taitaia tikai ra rai no ta tatou au tarevake kino pakari. Ka kite mai tatou e kare e ko te tu o te ara ta tetai tangata i rave te apinga puapinga maata, mari ra, ko te akakoroanga, te tu o te ngakau, e te maata o tona inangaro i te rave anga i te ara, te ka akataka mai me ka akakoreia tetai ara me kare.

8. Akapeea tetai au arataki akonoanga ngati Iuda o te anere mataiti mua i te ara anga i te vaerua tapu?

⁸ Te au arataki akonoanga ngati Iuda i te anere mataiti, tei patoi rikarika ia Iesu Karaiti, kua ara ratou i te vaerua tapu. Kua kite ratou i te vaerua o te Atua e angaanga ra i roto ia Iesu, iaia e rave ra i te au temeio te akangateitei ra  ia Iehova. Inara, te oronga ra teia au enemi o Karaiti i teia mana kia Satani te Tiaporo. Kia tau ki ta Iesu, te aronga e akakino ra i te vaerua tapu o te Atua, te rave ra i tetai ara kare e akakoreia i roto i teianei “ao, kare oki i te ao a muri atu.”​—Mataio 12:22-32.

9. Eaa te akakino, e eaa ta Iesu i tuatua no te reira?

⁹ Ko te akakino e tuatua tapepe pikikaa, e mamae, me kore e kino maata. I te mea e ko te Atua te Tumuanga o te vaerua tapu, te akakino anga i tona vaerua te aite ra ki te akakino anga ia Iehova. I te taangaanga ua anga i te reira tu tuatuaanga ma te tataraara kore, kare e akakoreia. Te au tuatua a Iesu no runga i taua ara anga, te akaari maira e te taiku ra a Iesu ki te aronga e patoi akakoro ra i te angaanga a te vaerua tapu o te Atua. No te mea kua angaanga te vaerua o Iehova i roto ia Iesu inara kua oronga tona aronga patoi i teia mana ki te Tiaporo, kua ara iora ratou i te akakino i te vaerua. No reira, a Iesu i karanga atu ei e: ‘Ko tei akakino i te vaerua tapu, kare rava tana e akakoreia, e tau iaia te mate mutu kore.’​—Mareko 3:20-29.

10. Eaa a Iesu i kapiki ei ia Iuda e ko “te tamaiti o te mate”?

¹⁰ E akamanako katoa ana i te akaraanga o Iuda i Kariota. Kua aruaru aia i tetai mataara pikikaa, i te keia anga mei te pia moni tei orongaia kiaia kia akono. (Ioane 12:5, 6) Kua aere atu a Iuda i muri akera ki te au tutara ngati Iuda e kua akanoonoo i tetai parani kia pikikaa ia Iesu e 30 ario. Ae, kua tataraapa tikai a Iuda i muri ake i te pikikaa anga, inara kare roa aia i tataraara ana no tana ara i rave akakoro ei. Tei tupu, kare a Iuda i tau ana no tetai akatuakaouanga. Kua kapiki a Iesu iaia i reira e ko “te tamaiti o te mate.”​—Ioane 17:12; Mataio 26:14-16.

Kare Ratou i Ara i te Vaerua

11-13. Akapeea te Ariki ko Davida i te ara anga no runga ia Bateseba, e eaa te pumaana ka rauka mai mei to te Atua tu akonoanga ia raua?

¹¹ I tetai au taime, te au Kerititiano tei aaki i  ta ratou ara kino e tei rauka i te tauturu pae vaerua mei te aronga pakari o te putuputuanga, penei te taitaia ra rai no te aati anga i te ture a te Atua i mua ana. (Iakobo 5:14) Me te manamanata ra tatou uaorai i roto i teia tu, i te akaraanga ka meitaki tatou i te akamanako i ta te Tuatua Tapu e akakite maira no runga i te aronga tei akakoreia ta ratou au ara.

¹² Kua ara kino te Ariki ko Davida no runga ia Bateseba, te vaine a Uria. I te kite anga i teia vaine purotu e pai ra, iaia e akara atura ki raro mei tona tauu are i te pae mai, kua apai mai a Davida iaia ki tona are ariki e kua moe kapiti atu kiaia. I te akakiteia atu anga i muri akera e kua nui aia, kua kimi a Davida i tetai ravenga kia moe te tane, ko Uria, kia Bateseba i te tapokianga i te akaturi. I te puapinga kore anga te reira parani, kua akanoonoo te ariki kia taiaia a Uria i roto i te tamakianga. I muri akera, kua riro mai a Bateseba ei vaine na Davida e kua anau mai i tetai pepe nana tei mate atura.​—2 Samuela 11:1-27.

¹³ Kua akono a Iehova i te au mea no runga ia Davida raua ko Bateseba. Kua akakore te Atua i te ara a Davida, i te akamanakoanga i te au mea mei tona tataraara anga e te koreromotu Patireia tana i papau atu kiaia. (2 Samuela 7:11-16; 12:7-14) I te akaraanga kua akaari a Bateseba i te tu tataraapa, no te mea kua akameitakiia aia no te riro mai anga ei metua vaine no te Ariki ko Solomona e ei tupuna vaine no Iesu Karaiti. (Mataio 1:1, 6, 16) Me kua ara tatou, e mea meitaki i te akamaara e e akamanako ana a Iehova i to tatou tu tataraara.

14. Akapeea te maata o to te Atua akakoreanga i te ara i te akatutuangaia i roto i te Ariki ko Manase?

¹⁴ Te maata o to Iehova akakoreanga i te ara, kua akatutu katoaia mai i roto i te akaraanga o te Ariki ko Manase o Iuda. I roto i te mata o Iehova kua rave aia i te kino. Kua akatu a Manase i te au atarau kia Baala, kua akamori i te “nuku katoa o te rangi ra,” e kua akatu katoa rai i te au atarau ki te au atua pikikaa i roto i te nga paepae iero e rua. Kua oronga aia i tana au tamariki kia tauia ki te ai, kua akamaroiroi i te au angaanga purepure, e kua maani aia i te aronga o Iuda e Ierusalema “kia maata to ratou kino i to te pa enua i tairipotiia e Iehova i mua i te aroaro o te tamariki a Iseraela ra.” Kare te au akamatakiteanga tei orongaia e te au peroveta a te Atua i akarongoia ana. I te openga iora, kua apai te ariki o Asura ia Manase ei tuikaa. Iaia e tuikaa ra, kua tataraara a Manase e kua pure akaaka ua atu rai ki te Atua, tei akakore mai i tana ara e tei akaoki akaou atu iaia ki te taoonga ariki i Ierusalema, te ngai i akamaroiroi ei aia i te akamori mou.​—2 Paraleipomeno 33:2-17.

15. Eaa te tupuanga i roto i te oraanga o te apotetoro ko Petero te akaari maira e kua akakore a Iehova i te ara “na roto i tetai mataara maata roa atu”?

¹⁵ I te au anere mataiti i muri mai, kua ara kino te apotetoro ko Petero na te uuna anga ia Iesu. (Mareko 14:30, 66-72) Inara, “na roto i tetai mataara maata roa atu” kua akakore a Iehova i te ara a Petero. (Isaia 55:7, NW) Eaa te tumu? No te mea kua tataraara tikai a Petero. (Luka 22:62) Kua kite meitakiia te akapapuanga o to te Atua akakoreanga i te ara i tetai 50 ra i muri mai, i te ra o te Penetekote kua rauka ia Petero te atianga kia oronga i tetai akakitekiteanga mataku kore no runga ia Iesu. (Angaanga 2:14-36) E tumu ainei tetai e ka akakore rai te Atua i te ara a te au Kerititiano tei tataraara tikai i teia tuatau nei? “Naringa koe, e Iehova, e akairo ana i te au ara nei, e te Atu, koai te ka mou?” i imene ei te tata taramo, “tei ia koe ra te akakore i te ara.”​—Salamo 130:3, 4.

Te Akamaru i te Mataku no te Ara

16. I raro i teea au turanga e oronga ai te Atua i te akakoreanga ara?

¹⁶ Ka tauturu te au akaraanga tei taiku muaia akenei i te akamaru i to tatou apiapi i te ara anga i te vaerua tapu. Te akaari maira te reira e e akakore ana a Iehova i te ara a te aronga ara tei tataraara. Te apinga puapinga maata koia oki ko te pure akatenga ki te Atua. Me kua ara tatou, ka rauka ia tatou i te pati atu kia akakoreia mai te ara i runga i te tumu anga o to Iesu atinga oko, to Iehova akaaroa, to tatou tu apa ua, e to tatou rekoti no te tavinianga tiratiratu. I te kite mai anga i to Iehova takinga meitaki, ka rauka ia tatou i te  akakoreanga ara, i te irinakianga e ka orongaia mai te reira.​—Ephesia 1:7.

17. Eaa te ka raveia me kua ara tatou e te anoano ra i te tauturu pae vaerua?

¹⁷ Akapeea me kua ara tatou inara kare e rauka i te pure no te mea kua makiia tatou i te pae vaerua e ta tatou ara? No runga i teia, kua tata te pipi ko Iakobo e: “E tiki [te reira tangata] i te aronga pakari o te ekalesia ra; e na ratou e pure iaia ma te akatainu iaia i te manongi i te ingoa o te Atu ra: E e ora taua maki ra i te pure akarongo, e na te Atu aia e akatu ki runga; e i rave na aia i te ara ra, e akakoreia tana ara.”​—Iakobo 5:14, 15.

18. Eaa te ara a tetai tangata ka rauka ai i te akakoreia noatu e kua akaateaia aia mei te putuputuanga?

¹⁸ Noatu me kare te tangata rave tarevake i tataraara i taua taime ra e kua akaateaia aia mei te putuputuanga, kare tana ara i te mea e kare e akakoreia. No runga i tetai tangata akatainuia tei rave i te tarevake e tei akaateaia i Korinetia, kua tata a Paulo e: “Kua oti ua na taua mate i tukuia atu e te tangata e manganui i taua tangata ra. E teianei e akakore atu kotou i tana ara, e e akapumaana atu e tikaʼi, ko te apuku uaia aea taua tangata ra i te aue maata.” (2 Korinetia 2:6-8; 1 Korinetia 5:1-5) Inara, kia akaoraia i te pae vaerua, ka anoanoia te aronga tarevake i te ariki i te tauturu pae vaerua tei akatumuia ki runga i te Pipiria a te aronga pakari Kerititiano e kia oronga mai i te akapapuanga e kua tataraara tikai ratou. Kia ‘tuku mai ratou i te akonoanga tau i te tataraara.’​—Luka 3:8.

19. Eaa te ka tauturu ia tatou kia vai ‘ora meitaki ua i te akarongo’?

¹⁹ Eaa te akatupu ra i te manakoanga e kua ara tatou i te vaerua tapu? Penei no te tu tikaoru me kore te tu apikepike i te pae kopapa e te pae manako tetai au tumu ia. I taua turanga ra, penei e mea meitaki te pure e te akangaroi meitaki. Auraka roa tatou e tuku ia Satani i te akataitaia ia tatou, kia tapu ia tatou i te tavinianga i te Atua. I te mea e kare a Iehova e rekareka ana i te mate o tetai tangata kino, papu roa e kare aia e rekareka i te mate anga o tetai ua atu ona tavini. E no reira me te mataku ra tatou e kua ara tatou i te vaerua, kia apii ua rai tatou i te Tuatua a te Atua, kapiti mai te au tuanga akapumaana mei te au Salamo. Ka anoanoia tatou kia aere ua rai ki te au uipaanga putuputuanga e kia piri atu ki roto i te angaanga tutu anga i te Patireia. I te rave anga i te reira ka tauturu ia tatou kia “ora meitaki i te akarongo” e kia akarangatiraia mei te apiapi i te akamanakoanga e kua rave tatou i te ara kare e akakoreia.​—Tito 2:2.

20. Eaa te akamaramaanga te ka tauturu i tetai tangata i te kite e kare aia i ara i te vaerua tapu?

²⁰ Tetai ua atu te mataku ra e kua ara ratou i te vaerua tapu, penei ka ui ratou kia ratou uaorai e: ‘Kua akakino ainei au i te vaerua tapu? Kua tataraara tikai ainei au i taku ara? E irinaki ainei toku i roto i ta te Atua akakoreanga ara? E apoteiti ainei au tei patoi i te marama pae vaerua?’ I te akaraanga, ka kite mai te reira au tangata e kare ratou i akakino ana i te vaerua tapu o te Atua, e kare katoa ratou i riro mai ana ei au apoteiti. Kua tataraara ratou, e e akarongo mou to ratou i roto i ta Iehova akakoreanga ara. Me ko te reira ia, kare ratou i ara i te vaerua tapu o Iehova.

21. Eaa te au uianga ta te atikara e aru mai nei ka akamanako atu?

²¹ Mei teaa tikai te pumaana i te akapapuia anga e kare tatou i ara i te vaerua tapu! Inara, no runga i teia tumu manako, te vai ra te au uianga te ka akamanakoia i roto i te atikara e aru mai nei. Ei akatauanga, penei ka ui tatou kia tatou uaorai e: ‘Te arataki tikaiia ra ainei au e te vaerua tapu o te Atua? Te kitea puia ra ainei te reira au ua i roto i toku oraanga?’

Eaa Taau Pauanga?

• Eaa tatou ka karanga ei e ka rauka i te ara i te vaerua tapu?

• Eaa te aiteanga e kia tataraara?

• Koai tei ara i te vaerua ia Iesu i runga nei i te enua?

• Akapeea te autu anga i te apiapi no te rave anga i tetai ara kare e akakoreia?

[Au Uianga Apii]

[Tutu i te kapi 17]

Te aronga tei karanga e kua rave a Iesu i te au temeio ma te mana o Satani, kua ara i te vaerua tapu o te Atua

[Tutu i te kapi 18]

Noatu e kua uuna aia ia Iesu, kare a Petero i rave ana i tetai ara kare e akakoreia