Yu sondu teige a santa yeye?
Yu sondu teige a santa yeye?
„Wan sondu de di e tyari dede kon.”—1 YOHANES 5:16.
1, 2. Fa wi du sabi taki Kresten man sondu teige a santa yeye fu Gado?
„MI NO man puru en na mi ede taki mi sondu teige a santa yeye.” Na so wan uma fu Doisrikondre ben skrifi. A ben abi a denki disi aladi a ben e anbegi Gado. A de so taki wan Kresten kan sondu teige a santa yeye fu Gado?
2 Iya, wan Kresten kan sondu teige a santa yeye fu Yehovah. Yesus ben taki: „Sma sa kisi pardon fu ibri sondu di den du èn fu ibri ogri di den e taki fu trawan, ma te den e taki ogri fu a yeye, dan den no sa kisi pardon fu disi” (Mateyus 12:31). Bijbel e gi wi a warskow disi: „Efu wi e tan du sondu fu espresi, baka di wi kon sabi a waarheid soifri kaba, dan nowan srakti-ofrandi no de moro gi sondu, ma wi kan fruwakti wan krutu di sa takru srefisrefi, èn nanga bigi atibron Gado o kiri den wan di e gens en” (Hebrewsma 10:26, 27). Èn na apostel Yohanes ben skrifi: „Wan sondu de di e tyari dede kon” (1 Yohanes 5:16). Ma te wan sma du wan seryusu sondu, dan a de so taki a sma dati srefi kan bosroiti efu a du „wan sondu di e tyari dede kon”?
Wi sa kisi pardon te wi e sori berow
3. Te wi e sari trutru fu di wi du wan sondu, dan san dati e sori?
3 Te fu kaba na Yehovah e krutu sma di du sondu. Iya, wi alamala musu gi frantwortu na en, èn ala ten a e du san reti (Genesis 18:25; Romesma 14:12). Na Yehovah e bosroiti efu a sa gi wi pardon gi wan sondu di wi du, èn a kan puru en santa yeye na wi tapu (Psalm 51:11). Ma efu wi e sari trutru fu di wi du wan sondu, dan dati e sori taki wi abi trutru berow. Ma san na trutru berow?
4. (a) O ten wi kan taki dati wan sma abi berow? (b) Fa Psalm 103:10-14 e trowstu wi?
4 Wan sma di abi berow e kon frustan taki a sondu di a du, noso di a ben abi na prakseri fu du, no bun kwetikweti. Dati wani taki dati a sma disi e sari èn a e drai en libi. Te wi du wan seryusu sondu, èn wi du san de fanowdu fu sori taki wi abi trutru berow, dan wi kan kisi trowstu fu den wortu fu a psalm skrifiman di ben taki: „A [Yehovah] no strafu wi srefi gi den sondu fu wi; èn a no meki wi ondrofeni den takru bakapisi fu den fowtu fu wi. Bika neleki fa hemel hei moro grontapu, na so a e sori bun furu lobi bun-ati gi den wan di abi frede gi en. So fara leki son-opo de fu sondongo, na so fara fu wi a poti den sondu fu wi. Neleki fa wan papa e sori sari-ati gi den manpikin fu en, na so Yehovah sori sari-ati gi den wan di abi frede gi en. Bika ensrefi sabi heri bun fa wi meki; a e hori na prakseri taki wi na doti.”—Psalm 103:10-14.
5, 6. San wi e leri fu 1 Yohanes 3:19-22? Fruklari den wortu fu na apostel.
5 Den wortu fu na apostel Yohanes e trowstu wi tu. A ben taki: „Na so wi o sabi taki wi kon fu a waarheid, èn wi kan de seiker na ini wi ati taki a lobi wi, awansi na sortu fasi wi ati e krutu wi. Bika Gado bigi moro wi ati èn a sabi ala sani. Un lobiwan, efu wi ati no e krutu wi, dan wi kan taki fri nanga Gado. Awansi san wi e aksi, na dati wi e kisi fu en, bika wi e hori wisrefi na den komando fu en, èn wi e du den sani di e prisiri en.”—1 Yohanes 3:19-22.
6 Wi „sabi taki wi kon fu a waarheid” fu di wi e sori lobi gi wi brada nanga sisa, èn fu di wi no e teki en leki wan gwenti fu du sondu (Psalm 119:11). Te wi e firi leki Gado no lobi wi moro, dan a bun fu hori na prakseri taki „Gado bigi moro wi ati èn a sabi ala sani”. Yehovah e sori sari-ati gi wi fu di a sabi taki wi ’lobi wi brada sondro fu hoigri’, a sabi taki wi e meki muiti fu no sondu èn fu du a wani fu en (1 Petrus 1:22). Wi ati no sa ’krutu wi’ te wi e frutrow tapu Yehovah, te wi e sori lobi gi den brada nanga sisa fu wi, èn te wi no e du sondu fu espresi. Wi sa ’man taki fri nanga Gado’ te wi e begi en, èn a sa piki den begi fu wi fu di wi gi yesi na den komando fu en.
Sma di sondu teige a santa yeye
7. O ten wan sma no sa kisi pardon gi wan sondu di a du?
7 O ten Gado no e gi sma pardon gi den sondu di den du? Meki wi luku wan tu eksempre fu Bijbel fu kisi piki tapu na aksi disi. Den eksempre disi sa trowstu wi te wi abi berow èn te wi e sari trutru fu di wi du seryusu sondu. Wi sa si taki a no a sondu di wan sma du e sori efu Gado sa gi a sma dati pardon. Fu taki en leti, Yehovah e luku fu san ede a sma du a sondu, a e ondrosuku na ati fu a sma, èn a e luku efu a sma du a sondu dati fu espresi.
8. Fa sonwan fu den Dyu kerki fesiman fu a fosi yarihondro sondu teige a santa yeye?
8 Den Dyu kerki fesiman fu a fosi yarihondro, sondu teige a santa yeye, fu di den gens Yesus na wan ogri-ati fasi. Den ben si fa a santa yeye fu Gado ben de na tapu Yesus di a ben e du wondru fu gi Yehovah grani. Ma toku den man disi di ben de feanti fu Krestes taki dati na Satan Didibri ben gi en a krakti fu du wondru. Soleki fa Yesus ben taki, dan den sma dati ben du wan seryusu sondu fu di den ben taki ogri fu Gado en santa yeye, èn den no ben o kisi pardon fu a sondu dati na ini a „grontapu sistema disi èn no na ini a grontapu sistema di e kon”.—Mateyus 12:22-32.
9. O ten wan sma e taki ogri fu Gado, èn san Yesus ben taki fu a sani disi?
9 Te wan sma e taki ogri fu Gado, dan fu taki en leti, a sma dati e gi Gado porinen, noso a e kosi Gado. Te wi e taki ogri fu a santa yeye, dan fu taki en leti, wi e taki ogri fu Yehovah fu di a santa yeye na fu En. Te wi e taki den sortu sani dati sondro fu sori berow, dan Gado no sa gi wi pardon. Den sani di Yesus ben taki fu a sondu dati, e sori taki a ben taki fu sma di e gens a santa yeye fu Gado fu espresi. A yeye fu Yehovah ben de na Yesus tapu, ma den gensman ben taki dati na Didibri ben gi en a krakti disi fu du wondru. Na so fasi, den ben taki ogri fu a santa yeye. Fu dati ede Yesus taigi den: „A sma di e taki ogri fu a santa yeye, no o kisi pardon noiti, bika a sondu fu en e tan na en tapu fu têgo.”—Markus 3:20-29.
10. Fu san ede Yesus kari Yudas „a manpikin di o kisi têgo pori”?
10 Luku sosrefi a tori fu Yudas Iskariot. A ben de wan bedrigiman, fu di a ben fufuru moni na ini a monikisi di ben e tan na en (Yohanes 12:5, 6). Bakaten, Yudas go na den Dyu tiriman èn a span anu makandra nanga den fu tori Yesus gi 30 solfru moni. A ben hati Yudas taki a ben tori Yesus, ma noiti a sori berow gi a sondu di a ben du fu espresi. Fu dati ede, Yudas no sa kisi wan opobaka, èn dati meki Yesus kari en „a manpikin di o kisi têgo pori”.—Yohanes 17:12; Mateyus 26:14-16.
Sma di no sondu teige a santa yeye
11-13. Fa Kownu David sondu nanga Batseiba, èn fa a fasi fa Gado handri nanga den e trowstu wi?
11 Son leisi, Kresten di pasa a wet fu Gado e tan broko den ede nanga a tori dati, aladi den taigi den owruman na ini a gemeente kaba sortu sondu den du, èn aladi den kisi yepi fu den owruman disi (Yakobus 5:14). Te so wan sani e trobi wi, dan wi sa kisi wini te wi e luku san Bijbel e taki fu den wan di kisi pardon fu den sondu fu den.
12 Kownu David ben du seryusu sondu di a du hurudu nanga Batseiba, a wefi fu Uria. A moi uma disi ben e wasi na tapu a daki fu wan fu den oso krosibei fu na oso fu David. Di David si disi, dan a meki sma tyari na uma disi kon na a kownu-oso, èn a ben abi seks demakandra nanga en. Bakaten a kon sabi taki Batseiba de nanga bere, èn a pruberi fu seti sani so taki Uria, a masra fu Batseiba, ben kan sribi nanga Batseiba. Na so sma no ben o sabi taki David ben du hurudu. Di sani no waka soleki fa Kownu David ben wani, dan a sorgu taki Uria lasi en libi na ini wan feti. Baka dati, David trow nanga Batseiba, ma a pikin di den kisi, dede.—2 Samuel 11:1-27.
13 Fa Yehovah handri nanga David èn nanga Batseiba? Gado gi David pardon, èn a kan taki a du dati fu di a si taki David ben sori berow èn taki A ben meki wan Kownukondre frubontu nanga en (2 Samuel 7:11-16; 12:7-14). A de krin taki Batseiba sori berow, fu di a kisi a grani fu tron a mama fu Kownu Salomo èn sosrefi wan afo fu Yesus Krestes (Mateyus 1:1, 6, 16). Te wi du wan sondu, dan a bun fu hori na prakseri taki Yehovah e si te wi abi berow.
14. Fa a tori fu Kownu Manase e sori taki Gado de klariklari fu gi sma pardon?
14 A tori fu Kownu Manase fu Yuda e sori taki Yehovah de klariklari fu gi sma pardon. Manase ben e du sani di Yehovah no feni bun. Manase ben meki altari gi Bâal, a ben e anbegi „ala den legre fu hemel”, èn a meki altari srefi gi den falsi gado na ini tu dyari fu a tempel. A gi den manpikin fu en leki bron-ofrandi, èn a gi sma deki-ati fu du afkodrei. Boiti dati, a meki taki den sma fu Yuda nanga Yerusalem „du moro takru sani leki den nâsi di Yehovah ben wai puru na fesi fu den manpikin fu Israel”. Manase no gi yesi na den warskow di den profeiti fu Gado ben gi en. Te fu kaba a kownu fu Asiria tyari Manase gowe leki katiboman. Di Manase ben de na ini katibo, a sori berow èn a tan begi Gado nanga sakafasi. Na so Gado gi Manase pardon, èn A meki a tron kownu baka fu Yerusalem. Manase gi den sma drape deki-ati fu anbegi Yehovah.—2 Kroniki 33:2-17.
15. Fa a grani di na apostel Petrus kisi e sori taki Yehovah „de klariklari” fu gi sma pardon?
15 Hondrohondro yari baka dati, na apostel Petrus du wan seryusu sondu fu di a taki dati a no sabi Yesus (Markus 14:30, 66-72). Ma toku Yehovah ’ben de klariklari fu gi’ Petrus pardon (Yesaya 55:7). Fu san ede Yehovah du dati? Fu di Petrus ben abi trutru berow (Lukas 22:62). Feifitenti dei baka dati, tapu a dei fu a Pinksterfesa, a ben de krin fu si taki Gado ben gi Petrus pardon, fu di Petrus kisi a grani fu gi kotoigi fu Yesus sondro fu frede (Tori fu den Apostel 2:14-36). Efu Gado ben de klariklari fu gi den dri opregtisma disi pardon, dan a sa de klariklari tu fu gi pardon na Kresten di e sori trutru berow, a no so? A psalm skrifiman ben taki „Efu na fowtu yu ben musu luku, o Yah, o Yehovah, dan suma ben kan tan tanapu? Bika na yu e gi pardon trutru.”—Psalm 130:3, 4.
Wi no musu gaw fu denki taki wi sondu teige a santa yeye
16. O ten Gado e gi sma pardon?
16 Den eksempre na ini a artikel disi e sori wi taki wi no musu gaw fu denki taki wi sondu teige a santa yeye. Den eksempre disi e sori taki Yehovah e gi pardon trutru na sma di abi berow fu den sondu fu den. A moro prenspari sani, na taki wi musu begi Gado fayafaya. Efu wi du wan sondu, dan wi kan begi Gado fu gi wi pardon nanga yepi fu a frulusu-ofrandi fu Yesus. Boiti dati, wi musu hori na prakseri taki Yehovah abi sari-ati, a sabi taki wi na sondusma, èn a no e frigiti a diniwroko di wi du na wan getrow fasi gi en. Fu di wi sabi taki Yehovah abi no-frudini bun-ati, meki wi kan aksi en fu gi wi pardon èn wi kan frutrow na tapu taki a sa piki a begi fu wi.—Efeisesma 1:7.
17. San wi musu du te wi sondu èn te wi abi yepi fanowdu?
17 Ma fa a de te wi sondu, èn wi no man begi Gado fu di a bribi fu wi kon swaki? A disipel Yakobus e gi wi a rai disi: „Meki [a sma disi] kari den owru man fu a gemeente kon na en; meki den begi gi en èn lobi oli gi en na ini a nen fu Yehovah. Te den e begi nanga bribi, dan a sma di siki sa kon betre, èn Yehovah sa opo en. Sosrefi, efu a du sondu, dan a sa kisi pardon fu dati.”—Yakobus 5:14, 15.
18. Fu san ede a no abi fu de so taki wan sma di sondu, èn di puru fu a gemeente, sondu teige a santa yeye?
18 Srefi te wan sma di sondu no e sori berow, èn a sma dati puru fu a gemeente, dan a no abi fu de so taki Gado no sa wani gi en pardon. Disi na san Paulus ben skrifi fu wan salfu Kresten di ben puru fu a gemeente fu di a ben sondu: „A piri-ai disi di furu fu unu gi a sma dati, nofo gi en, ma now un musu de klariklari fu gi en pardon èn un musu trowstu en, so taki a sma dati no sa firi sari teleki a lasi-ati” (2 Korentesma 2:6-8; 1 Korentesma 5:1-5). Sma di sondu musu teki a rai di den Kresten owruman e gi den, èn den musu sori taki den abi berow trutru. Te den e du dati, dan Gado sa feni den bun baka. Den sma disi musu ’du sani di e sori taki den abi berow’.—Lukas 3:8.
19. San kan yepi wi fu tan „abi wan tranga bribi”?
19 Sortu sani kan gi wi a firi taki wi sondu teige a santa yeye? Kande na fu di wi e broko wi ede tumusi nanga sani, noso fu di wi e siki. Te dati de so, dan wi musu begi Gado èn wi musu rostu bun. Ma wi musu luku bun taki Satan no e meki wi lasi-ati, so taki wi e tapu fu dini Gado. Yehovah no breiti te ogrisma e dede, èn dati meki a no sa breiti tu te a lasi wan fu den futuboi fu en. Sobun, efu wi e broko wi ede taki wi sondu teige a santa yeye, dan wi musu tan studeri Gado Wortu, èn spesrutu den pisi fu Psalm di e gi sma trowstu. Wi musu tan go na den konmakandra èn wi musu tan teki prati na a Kownukondre preikiwroko. Te wi e du dati, dan dati sa yepi wi fu tan „abi wan tranga bribi” èn wi no sa gaw fu denki taki wi sondu teige a santa yeye.—Titus 2:2.
20. San wan sma musu aksi ensrefi fu kon sabi efu a sondu teige a santa yeye?
20 Iniwan sma di e frede taki den sondu teige a santa yeye, musu aksi ensrefi: ’Mi taki ogri fu a santa yeye? Mi abi trutru berow fu a sondu di mi du? Mi e bribi taki Gado sa gi mi pardon? Mi na wan sma di fadon komoto na bribi, èn di e weigri fu suku yepi na Gado?’ A no de fu taki dati den sma disi sa kon si taki den no taki ogri fu a santa yeye fu Gado, èn taki den no fadon komoto na bribi. Den sma disi abi berow èn den e tan bribi taki Gado sa gi den pardon. Te dati de so, dan den no sondu teige a santa yeye fu Yehovah.
21. Na sortu aksi wi sa poti prakseri na ini a tra artikel?
21 A de wan blesi trutru fu sabi taki wi no sondu teige a santa yeye! Ma na ini a tra artikel wi sa poti prakseri na wan tu aksi di abi fu du nanga a santa yeye. Fu eksempre, kande wi e aksi wisrefi: ’Mi e meki a santa yeye fu Gado tiri mi? Den froktu fu a yeye disi de fu si na ini mi libi?’
San na yu piki?
• Fu san ede wi kan taki dati wan sma kan sondu trutru teige a santa yeye?
• San a wani taki fu abi berow?
• Suma sondu teige a santa yeye di Yesus ben de na grontapu?
• San kan yepi wi fu no denki taki wi sondu teige a santa yeye?
[Aksi fu a tori disi]
[Prenki na tapu bladzijde 17]
Den sma di ben taki dati na Satan ben gi Yesus a krakti fu du wondru, sondu teige a santa yeye fu Gado
[Prenki na tapu bladzijde 18]
Aladi Petrus ben taki dati a no sabi Yesus, toku a no ben sondu teige a santa yeye