¿Tsʼoʼok wa a kʼebantal tu contra le kiliʼich muukʼoʼ?
¿Tsʼoʼok wa a kʼebantal tu contra le kiliʼich muukʼoʼ?
«Yaan kʼeban ku bisik máak tiʼ kíimil.» (1 JUAN 5:16.)
1, 2. ¿Bix k-ojéeltik jeʼel u kʼebantal máak tu contra le kiliʼich muukʼoʼ?
U TÚUL koʼolel Alemaniaileʼ, kex táan kaʼach u meyajtik Dioseʼ tu yaʼalaj: «Jach ku chiʼichnakkúuntiken in tuklik tsʼoʼok in kʼebantal tu contra le kiliʼich muukʼoʼ». Baʼaleʼ, utúul máax meyajtik Dioseʼ, ¿jeʼel wa u kʼuchul u kʼebankúunsuba tu contra u kiliʼich muukʼ Dioseʼ?
2 Le Bibliaoʼ ku yaʼalikeʼ, jeʼel u páajtal u kʼebantal máak tu contra le kiliʼich muukʼoʼ. Jesucristoeʼ tu yaʼalaj: «Tuláakal kʼeban yéetel tuláakal baʼal kʼaas ka u yaʼal máakeʼ ku páajtal u [perdonartaʼal] tiʼ, baʼaleʼ wa ku yaʼalik baʼal kʼaas tu yoʼolal Kiliʼich Pixaneʼ [wa kiliʼich muukʼoʼ] leloʼ maʼ bíin [perdonartaʼak] tiʼiʼ» (Mateo 12:31). Le Bibliaoʼ ku yaʼaliktoʼon xaneʼ, «wa tu juunal k-óol táan k-kʼebanchajal ku tsʼoʼokol k-kʼamik u kʼaj óolalil le jaajoʼ, minaʼan uláakʼ kíimsbil siibal tu yoʼolal le kebanoʼoboʼ. Chéen ku pʼáataltoʼon u jakʼ óolil le pʼis óoloʼ» (Hebreob 10:26, 27). Tsʼoʼoleʼ, le apóstol Juanoʼ tu yaʼalaj xan: «Yaan kʼeban ku bisik máak tiʼ kíimil» (1 Juan 5:16). Baʼaleʼ, le máax tsʼoʼok u luubul tiʼ upʼéel nojoch kʼebaneʼ, ¿letiʼ wa unaj u yaʼalik tsʼoʼok u beetik upʼéel kʼeban «ku bisik máak tiʼ kíimil»?
Le máax ku pʼatik u beetik le kʼaasoʼ ku perdonartaʼal
3. Wa lubaʼan k-óol yoʼolal baʼax kʼaas t-beeteʼ, maʼ xaaneʼ, ¿baʼax ku yeʼesik leloʼ?
3 Chéen Jéeoba jeʼel u páajtal u juzgartik le máaxoʼob ku kʼebantaloʼoboʼ. U jaajileʼ, tuláakloʼon yaan k-kʼubik cuenta tiʼ, baʼaleʼ maʼ saajkoʼoniʼ tumen k-ojel letiʼeʼ mantatsʼ ku beetik baʼax toj (Génesis 18:25; Romailoʼob 14:12). Chéen Jéeoba aʼalik wa tsʼoʼok k-beetik upʼéel kʼeban maʼ tu páajtal u perdonartaʼal yéetel chéen xan letiʼ jeʼel u yilik wa yaan u luʼsiktoʼon u kiliʼich muukʼeʼ (Salmo 51:11). Baʼaleʼ, wa jach lubaʼan k-óol yoʼolal le baʼax t-beetoʼ, maʼ xaaneʼ leloʼ ku yeʼesik jach tu jaajil tsʼoʼok arrepentir tiʼ le baʼax kʼaas t-beetoʼ. Baʼaleʼ ¿bix u yeʼesik máak jach tu jaajil tsʼoʼok u arrepentir?
4. 1) ¿Baʼax u kʼáat u yaʼal u arrepentir máak? 2) ¿Baʼaxten ku líiʼsik k-óol le baʼax ku yaʼalik le Salmo 103:10-14?
4 U arrepentir máakeʼ u kʼáat u yaʼal u kʼexik u tuukul tiʼ le baʼax tsʼoʼok u beetkoʼ wa le baʼax ku tuklik u beetik kaʼachoʼ. U kʼáat xan u yaʼal u yaatal u yóol máak yoʼolal le baʼax kʼaas tu beetoʼ yéetel u kanáantik maʼ u kaʼa beetik. Wa tsʼoʼok k-lúubul tiʼ upʼéel nojoch kʼeban, baʼaleʼ tsʼoʼok u joʼopʼol k-eʼesik jach tu jaajil tsʼoʼok pʼatik le baʼax kʼaas t-beetoʼ, le baʼax ku yaʼalik le salmistaaʼ ku líiʼsik k-óol: «[Jéeobaeʼ] maʼ u tsʼáatoʼon le boʼolil ku náajmatik k-kʼasaʼaniloʼ yéetel k-kʼebanoʼoboʼ; u yaakunajeʼ sen nojoch utiaʼal máaxoʼob tsikikoʼob jeʼel bix sen kaʼanlil le kaʼan tu yóokʼol luʼumeʼ. Tsʼoʼok u náachkuntik tiʼ toʼon k-kʼebanoʼob jeʼel bix u náachkunsmail j-lakʼin tiʼ j-chikʼin. Yuumtsileʼ jach muumun óol yéetel le máaxoʼob tsikikoʼ jeʼel bix juntúul taatatsil yéetel u paalaleʼ; tumen letiʼeʼ yojel yéetel baʼax beetaʼanoʼon: maʼalob u yojelil, toʼoneʼ maʼay luʼumoʼon» (Salmo 103:10-14).
5, 6. Tsol baʼax ku yaʼalik 1 Juan 3:19-22, yéetel tsol baʼax tu yóotaj u yaʼal le apóstol Juanoʼ.
5 Ku líiʼsik xan k-óol le baʼax ku yaʼalik le apóstol Juanaʼ: «Bey jeʼel u páajtal k-ojéeltik utiaʼaloʼon le jaajoʼ, yéetel k-uʼuyik jeetsʼel aniloʼon tu táan Jajal Dios; tumen wa k-puksiʼikʼal ku takik k-pool tiʼ wa baʼaxeʼ, Jajal Dioseʼ [maas] nojoch tiʼ k-puksiʼikʼal, yéetel letiʼeʼ u yojel tuláakal. Bey túunoʼ in yaabilaj sukuʼuneʼex, wa k-puksiʼikʼal maʼ táan u takik k-pooleʼ, yantoʼon kʼub óolal tu táan Jajal Dios; letiʼeʼ bíin u tsʼáatoʼon tuláakal baʼax ka k-kʼáat tiʼ, tumen k-uʼuyajtʼantik u yaʼalmaj tʼaanoʼob yéetel k-beetik baʼax utstutʼaan» (1 Juan 3:19-22).
6 K-ojel «utiaʼaloʼon le jaajoʼ» tumen k-yaabilmaj k-sukuʼunoʼob yéetel k-ilik maʼ k-lúubul tiʼ kʼeban (Salmo 119:11). Wa k-puksiʼikʼal ku takik k-pool yoʼolal wa baʼaxeʼ, maʼ u tuʼubultoʼoneʼ «Dioseʼ [maas] nojoch tiʼ k-puksiʼikʼal, yéetel letiʼeʼ u yojel tuláakal». Letiʼeʼ ku chʼaʼik óotsilil toʼon tumen u yojel «[k-]yaabiltikeʼex yéetel x-maʼ kaʼapʼéel ichil», k-kanáantik maʼ k-lúubul tiʼ kʼeban yéetel k-tsʼáaik k-óol meyajte (1 Pedro 1:22). Wa k-kʼubik óol tiʼ Jéeoba, wa k-eʼesik jach tu jaajil k-yaabilmaj yéetel wa k-kanáantik maʼ k-kʼebantal chéen k-óoliliʼeʼ, k-puksiʼikʼaleʼ maʼ ken u tak k-pool yéetel maʼ ken k-sublaktal k-orar tiʼ Dios. Tsʼoʼoleʼ Jéeobaeʼ yaan u núukik k-oracionoʼob tumen k-beetik baʼax ku yaʼalik.
Máakoʼob kʼebanchajoʼob tu contra le kiliʼich muukʼoʼ
7. ¿Baʼax eʼesik wa yaan u perdonaraʼal upʼéel kʼeban?
7 ¿Baʼax kʼebaniloʼob maʼ tu páajtal u perdonartaʼal? Utiaʼal k-núukik le kʼáatchiʼaʼ koʼox ilik jujumpʼéel baʼax úuch tu kʼiiniloʼob Jesús. Leloʼobaʼ yaan u líiʼskoʼob k-óol wa láayliʼ lúubul k-óol kex tsʼoʼok arrepentir yoʼolal le nojoch kʼeban tsʼoʼok k-beetkoʼ. Yaan k-ilkeʼ, le baʼax eʼesik wa yaan u perdonaraʼal upʼéel kʼebaneʼ maʼ letiʼe baʼax beetaʼaboʼ, baʼaxeʼ letiʼe baʼax péeks máak u beetoʼ yéetel wa tu chʼaʼatukultaj u beetik.
8. ¿Bix úuchik u kʼebankúunskuba le u nuuktakil le judíoʼob tu contra le kiliʼich muukʼoʼ?
8 Teʼ yáax siglooʼ, u nuuktakil le judíoʼob tu tsʼáajubaʼob tu contra Jesusoʼ tu kʼebankúunsubaʼob tu contra le kiliʼich muukʼoʼ. Letiʼobeʼ kex tu yiloʼob le milagroʼob tu beetaj Cristo yéetel u yáantaj u kiliʼich muukʼ Dioseʼ, tu yaʼaloʼobeʼ tiʼ Satanás u taal le páajtalil yaan tiʼ Cristooʼ. Jesuseʼ tu yaʼaleʼ, úuchik u kʼaakʼas tʼaanoʼob tu contra le kiliʼich muukʼoʼ «maʼ bíin saʼatsaʼak[oʼobiʼ], mix tiʼ le kʼiinoʼobaʼ, mix tiʼ le kʼiinoʼob bíin taalakoʼ» (Mateo 12:22-32).
9. ¿Baʼax tu yaʼalaj Jesús yoʼolal u yaʼalaʼal kʼaakʼas baʼaloʼob tu contra le kiliʼich muukʼoʼ?
9 Tumen le kiliʼich muukʼ tiʼ Dios u taaloʼ, ken aʼalaʼak baʼal tu contraeʼ u jaajileʼ táan u yaʼalaʼal baʼal tu contra Jéeoba. Le máaxoʼob ku tʼaanoʼob tu contra le kiliʼich muukʼ yéetel maʼ tu arrepentiroʼobeʼ maʼ kun perdonarbiloʼob. Le ka tʼaanaj Jesús tiʼ le kʼebanaʼ táan kaʼach u tuukul tiʼ le máaxoʼob tu yóoliliʼob ku tsʼáaikubaʼob tu contra le kiliʼich muukʼoʼ. Kex tumen táan kaʼach u yilkoʼob bix u meyaj tiʼ Jesús u kiliʼich muukʼ Dioseʼ, u enemigoʼobeʼ tu yaʼaloʼobeʼ tiʼ le Kʼasilbaʼal ku taal u páajtaliloʼ. Le oʼolal lúuboʼob tiʼ u kʼebanil u yaʼalikoʼob kʼaakʼas baʼaloʼob tu contra le kiliʼich muukʼoʼ. Jesuseʼ tu yaʼalaj tu yoʼolal lelaʼ: «Le máax ku yaʼalik kʼaakʼas tʼaanoʼob tiʼ Kiliʼich Pixaneʼ mix bikʼin bíin saʼatsaʼak tiʼ, baʼaleʼ yaan u kuchik u siʼipil mantatsʼ» (Marcos 3:20-29).
10. Jesuseʼ, ¿baʼaxten tu yaʼalaj Judaseʼ letiʼe «máax saataliliʼeʼ»?
10 Koʼox xan ilik baʼax úuch yéetel Judas Iscariote. Judaseʼ maʼ jach maʼalob u kuxtal kaʼach tu táan Diosiʼ, tumen ku yoklik le taakʼin tsʼaʼan u kanáantoʼ (Juan 12:5, 6). Tu tsʼookeʼ tu konaj Jesús yoʼolal treinta upʼéelel u taakʼinil plata tiʼ u nojchil le judíoʼoboʼ. Kex yaachaj u yóol ka tsʼoʼokeʼ, baʼaleʼ maʼ tu yeʼesaj wa jach tu jaajil arrepentirnajaʼaniʼ. Le oʼolal Judaseʼ maʼ kun kaʼa kuxkíintbil, le beetik Jesuseʼ tu yaʼaleʼ Judaseʼ letiʼe «máax saataliliʼeʼ» (Juan 17:12; Mateo 26:14-16).
Máakoʼob maʼ tu kʼebankúunsubaʼob tu contra le kiliʼich muukʼoʼ
11-13. ¿Tiʼ baʼax kʼebanil lúub David yéetel Betsabé, yéetel bix u líiʼsik k-óol ojéeltik perdonartaʼab u kʼebanoʼob tumen Jéeoba?
11 Yaan kʼiineʼ utúul sukuʼun kex tsʼoʼok u tsʼáaik ojéelbil le nojoch kʼeban tsʼoʼok u beetkoʼ, yéetel kex tsʼoʼok u yáantaʼal tumen le ancianoʼoboʼ, maʼ tu jáawal u yuʼubkuba kʼaasil (Santiago 5:14). Wa bey k-uʼuyikbaoʼ, maʼalob ka k-il baʼax ku yaʼalik le Biblia yoʼolal jujuntúul máakoʼob perdonartaʼab u kʼebanoʼoboʼ.
12 Utúul tiʼ letiʼobeʼ rey David, letiʼeʼ lúub tiʼ upʼéel nojoch kʼeban yéetel Betsabé wa Bat-seba, u yatan Urías. Davideʼ tu yilaj táan kaʼach u yichkíil le koʼolelaʼ ka tu yaʼalaj ka bisaʼak tu yiknal utiaʼal ka núup chilak tu yéetel. Le ka tu yojéeltaj pʼáat embarazadaileʼ, joʼopʼ u kaxtik bix jeʼel u beetik u núup chital Urías yéetel Betsabé, beyoʼ yaan u yaʼalaʼal utiaʼal Urías le chaambal kun síijloʼ. Baʼaleʼ maʼ béeychaj le baʼax tu tuklaj u beetkoʼ, le oʼolal tu yaʼalaj ka beetaʼak u kíimsaʼal Urías teʼ tuʼux ku yúuchul baʼateʼel kaʼachoʼ. Ka tsʼoʼokeʼ, Davideʼ tsʼoʼok u beel yéetel Betsabé, yéetel le chaambal síijtiʼoboʼ, kíimi (2 Samuel 11:1-27).
13 Koʼox ilik baʼax tu beetaj Jéeoba yéetel u kʼeban David yéetel Betsabé. Dioseʼ tu perdonartaj u kʼeban David, tumen maʼ xaaneʼ tu yilaj jach tu jaajil arrepentirnaji yéetel yoʼolal u pactoi le Reino tsʼokaʼaniliʼ u beetik tu yéeteloʼ (2 Samuel 7:11-16; 12:7-14). Betsabeeʼ, maʼ xaaneʼ arrepentirnaj xan, le oʼolal tsʼaʼab u páajtalil tiʼ u síijsik Salomón, máax kʼuch u beetuba reyiloʼ, yéetel tiʼ u familia taal Jesucristo (Mateo 1:1, 6, 16). Wa k-lúubul tiʼ upʼéel nojoch kʼebaneʼ, maʼ u tuʼubultoʼoneʼ Jéeobaeʼ ku chʼaʼik en cuentai wa jach tu jaajil tsʼoʼok k-arrepentir.
14. Le baʼax tu beetaj Manasesoʼ, ¿bix u yeʼesik Jéeobaeʼ ku perdonartik le nojoch kʼebanoʼoboʼ?
14 Le baʼax úuch yéetel le rey Manasesoʼ, ku yeʼesikeʼ Jéeobaeʼ ku perdonartik le nojoch kʼebanoʼoboʼ. Le reyaʼ tu beetaj baʼaloʼob maʼ utstutʼaan Jéeobaiʼ. Tu beetaj altaroʼob tiʼ Baal, tu adorartaj «tuláakal u eekʼiloʼob kaʼan», tsʼoʼoleʼ tu beetaj xan altaroʼob utiaʼal u adorartaʼal le maʼ jaajil diosoʼob tu táankabil le templooʼ. Tu kʼubaj u paalal bey tóokbil siibaloʼobeʼ, tu beetaj u maas yantal espiritismooʼ tsʼoʼoleʼ tu túulchʼintaj u kajnáaliloʼob Judá yéetel Jerusalén «ka kuxlakoʼob [maas] kʼaas tiʼ le múuchʼ kaajoʼob j-xuʼulsaʼaboʼob tumen Yuumtsil tu táan le j-israelitaʼoboʼ». Maʼ tu yuʼuboʼob mix le baʼaxoʼob aʼalaʼab tumen le profetaʼoboʼ. Ka máan kʼiineʼ, u reyil Asiriaeʼ tu bisaj Manasés bey palitsileʼ. Baʼaleʼ, Manaseseʼ arrepentirnajeʼ ka joʼopʼ u sen orar tiʼ Dios. Jéeoba túuneʼ tu perdonartaj yéetel tu kaʼa sutaj tu kaajil Jerusalén bey reyeʼ, ka tsʼoʼokeʼ tu beetaj u kaʼa chʼaʼajoʼoltaʼal u adorartaʼal Jéeoba (2 Crónicas 33:2-17).
15. ¿Baʼax úuch yéetel apóstol Pedro ku yeʼesiktoʼon Jéeobaeʼ jach «nojoch u saʼatsaj»?
15 Ka tsʼoʼok u máan yaʼab jaʼaboʼobeʼ, apóstol Pedroeʼ tu kʼebankúunsuba le ka tu yaʼalaj maʼ u kʼaj óol Jesusiʼ (Marcos 14:30, 66-72). Baʼaleʼ, Jéeobaeʼ tu perdonartaj tumen jach «nojoch u saʼatsaj» siʼipil (Isaías 55:7). Letiʼeʼ tu perdonartaj Pedro, tumen tu yilaj jach tu jaajil arrepentirnaji (Lucas 22:62). Teʼ Pentecostés, cincuenta kʼiinoʼob úuchuk lelaʼ, chíikpaj perdonartaʼabi tumen tsʼaʼab tiʼ tumen Jéeoba u jatsʼuts páajtalil u tʼaan tu táan yaʼab máakoʼob tu yoʼolal Jesús (Beetaʼanoʼob [Hechos] 2:14-36). Wa perdonartaʼab Pedroeʼ, leloʼ ku yeʼesikeʼ Dioseʼ jeʼel xan u perdonartik le máaxoʼob jach tu jaajil ku arrepentiroʼoboʼ. Le salmistaoʼ tu yaʼalaj: «Yuumtsil, Yuumtsil, wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ? Baʼaleʼ tiʼ teech kʼamik saʼatsaj siʼipil» (Salmo 130:3, 4).
Bix jeʼel u xuʼulul k-chiʼichnaktal wa k-tuklik tsʼoʼok kʼebantal
16. ¿Baʼax unaj k-beetik utiaʼal ka perdonartaʼakoʼon tumen Dios?
16 Wa chiʼichnakoʼon tumen k-tuklik tsʼoʼok kʼebantal tu contra le kiliʼich muukʼoʼ, le baʼaxoʼob tsʼoʼok k-ilkoʼ unaj u líiʼskoʼob k-óol, tumen ku yeʼeskoʼob Jéeobaeʼ ku perdonartik le máaxoʼob jach tu jaajil ku pʼatikoʼob le baʼax kʼaasoʼ. Kʼaʼabéet k-orar yéetel u jaajil k-óol tiʼ Jéeoba. Wa tsʼoʼok kʼebantaleʼ, unaj k-kʼáatik ka perdonartaʼankoʼon yoʼolal u kʼiʼikʼel Cristo tu wekajoʼ, yoʼolal u chʼaʼa óotsilil Jéeoba, yoʼolal le kʼeban yaan t-wíinkliloʼ yéetel yoʼolal le bukaʼaj tsʼoʼok beetik teʼ meeyjil kʼaʼaytajoʼ. Toʼoneʼ k-ojel jeʼel u páajtal k-kʼáatik tiʼ Jéeoba ka u perdonartoʼoneʼ, tumen letiʼeʼ ku yeʼesiktoʼon u yutsil kex tumen maʼ k-náajalmiʼ (Efesoiloʼob 1:7).
17. ¿Baʼax unaj u beetik le máax tsʼoʼok u kʼebantaloʼ?
17 ¿Baʼax unaj u beetik le máax tsʼoʼok u kʼebantal yéetel ku yuʼubik maʼ tu páajtal u orar tiʼ Jéeoba yoʼolal le baʼax tu beetoʼ? Le disipulo Santiagooʼ tu yaʼalaj baʼax unaj beetaʼal: «Unaj u tʼanik u nuukiloʼob le iglesiaoʼ [wa múuchʼuliloʼ], utiaʼal ka payalchiʼinakoʼob tu yoʼolal yéetel utiaʼal ka jiʼikʼabtaʼak yéetel aceite tu kʼaabaʼ Yuumtsil. Le ken payalchiʼinakoʼon yéetel oksaj óolaleʼ, le kʼojaʼanoʼ yaan u tojtal u yóol, yéetel yaan u líikʼsaʼal tumen Yuumtsil; yéetel wa kʼebanchajaʼaneʼ yaan u [perdonartaʼal]» (Santiago 5:14, 15).
18. ¿Jeʼel wa u páajtal u perdonartaʼal le máax ku jóoʼsaʼal tiʼ u kaajal Diosoʼ?
18 Kex tumen yaan máax ku jóoʼsaʼal tiʼ u kaajal Jéeoba tumen maʼ tu yóotaj u pʼat le baʼax kʼaas tsʼoʼok u beetkoʼ, leloʼ maʼ u kʼáat u yaʼal wa maʼ tu páajtal u perdonartaʼaliʼ. Le apóstol Pablooʼ tu yaʼalaj yoʼolal utúul máax jóoʼsaʼab tiʼ u kaajal Jéeoba tu kaajil Corinto: «Le jaatsʼ j-tsʼaʼab tiʼ le máak tumen u [maas] yaʼabil ichileʼexoʼ [tu pʼiis] yéetel leloʼ. Bejlaʼ[eʼ], baʼax unaj a beetikeʼexeʼ a saʼatsikeʼex yéetel a kiʼimakkúuntikeʼex u yóol utiaʼal maʼ u saʼatal u yóol tu yoʼolal yaʼabkach yaayaj óolal» (2 Corintoiloʼob 2:6-8; 1 Corintoiloʼob 5:1-5). Baʼaleʼ, utiaʼal u páajtal u kaʼa natsʼkuba tiʼ Jéeobaeʼ, le máakaʼ unaj u yóotik u kʼam le áantaj ku tsʼáaik le ancianoʼob yéetel le Bibliaoʼ yéetel unaj u yeʼesik tsʼoʼok u pʼatik le baʼax kʼaasoʼ. Unaj u «[xíimbal] tubeel utiaʼal ka ilaʼak jach tu jaajil tsʼoʼok [u] kʼexik [u] tuukul» (Lucas 3:8).
19. ¿Baʼax unaj k-beetik utiaʼal ka muʼukʼanchajak k-fe?
19 ¿Baʼax jeʼel u beetik k-tuklik tsʼoʼok kʼebantal tu contra le kiliʼich muukʼoʼ? Maʼ xaaneʼ lelaʼ ku yúuchul tumen jach kaʼananoʼon wa tumen k-kʼáat ka jóokʼok maʼalobil tuláakal baʼax k-beetik; wa beyoʼ unaj k-maas jeʼelsikba yéetel k-orar tiʼ Jéeoba. Maʼ unaj k-chaʼik u lúubsaʼal k-óol tumen Satanás ka tak jáawak k-meyajtik Diosiʼ. Wa Jéeoba maʼ utstutʼaan ka kíimik le kʼasaʼanoʼoboʼ, ¿maʼ wa túun yaan u maas kanáantik le máaxoʼob meyajtikoʼ? Le oʼolaleʼ, wa chiʼichnakoʼon tumen k-tuklik tsʼoʼok kʼebantal tu contra le kiliʼich muukʼoʼ, unaj k-xokik mantatsʼ le Bibliaoʼ, maases le xóotʼoloʼob ku líiʼskoʼob k-óol jeʼex le Salmosoʼ. Tsʼoʼoleʼ, maʼ unaj u jáawal k-bin teʼ muchʼtáambaloʼoboʼ yéetel unaj k-táakpajal mantatsʼ teʼ kʼaʼaytajoʼ. Wa k-beetkeʼ yaan u muʼukʼantal k-fe yéetel maʼ ken k-tukult wa tsʼoʼok lúubul tiʼ upʼéel kʼeban maʼ kun perdonarbi (Tito 2:2).
20. ¿Baʼax kʼáatchiʼiloʼob jeʼel u yáantik máak u yil maʼ u kʼebankúunsuba tu contra le kiliʼich muukʼoʼ?
20 Le máaxoʼob chiʼichnakoʼob tumen ku tuklikoʼob tsʼoʼok u kʼebantaloʼob tu contra le kiliʼich muukʼoʼ, maʼalob ka u beetoʼob le kʼáatchiʼobaʼ: «¿Tsʼoʼok wa in pochʼik wa in tʼaan kʼaas tu contra le kiliʼich muukʼoʼ? ¿Jach wa tu jaajil tsʼoʼok in arrepentir yoʼolal le kʼeban tin beetoʼ? ¿Kin creertik wa jeʼel in perdonartaʼal tumen Jéeobaeʼ? ¿Tsʼoʼok wa in xúumpʼattik le jaajil yéetel maʼ in kʼáat in pʼat le baʼax kʼaasoʼ?». Ken u beet máak le kʼáatchiʼobaʼ, maʼ xaaneʼ yaan u tsʼáaik cuenta maʼ u kʼebankúunsuba tu contra u kiliʼich muukʼ Diosiʼ yéetel maʼ joʼopʼok mix u xúumpʼattik le jaajoʼ. Wa maʼ kaʼa lúubuk tiʼ le kʼeban tu yáax beetoʼ yéetel wa ku creertik yaan u perdonartaʼal tumen Dioseʼ, maʼ u kʼebankúunsuba tu contra le kiliʼich muukʼoʼ.
21. ¿Baʼax kʼáatchiʼiloʼob ken k-núuk teʼ tuláakʼ xookoʼ?
21 ¿Máasaʼ jach maʼalob k-uʼuyikba ken k-ojéelt maʼ k-kebankúunsba tu contra le kiliʼich muukʼoʼ? Baʼaleʼ, yaan uláakʼ kʼáatchiʼob jeʼel u yáantkoʼon k-il wa maʼ k-kʼebankúunsbaeʼ, yéetel leloʼobaʼ yaan k-núukikoʼob teʼ tuláakʼ xookoʼ. Jujumpʼéel tiʼ le kʼáatchiʼobaʼ letiʼ leloʼobaʼ: «¿Kin chaʼik wa in nuʼuktaʼal tumen u kiliʼich muukʼ Dios? ¿Yaan wa ten le jatsʼuts modos ku tsʼáaik le kiliʼich muukʼoʼ?».
¿Baʼax jeʼel a núukikeʼ?
• ¿Baʼaxten k-aʼalik jeʼel u kʼebankúuskuba máak tu contra le kiliʼich muukʼoʼ?
• ¿Baʼax u kʼáat u yaʼal u arrepentir máak?
• Tu kʼiiniloʼob Jesuseʼ, ¿máaxoʼob tu kʼebankúunsubaʼob tu contra le kiliʼich muukʼoʼ?
• ¿Baʼax jeʼel u líiʼsik k-óol wa chiʼichnakoʼon tumen k-tuklik tsʼoʼok kʼebantal tu contra le kiliʼich muukʼoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
Kex tumen Pedro tu yaʼalaj maʼ u kʼaj óol Jesuseʼ, perdonartaʼabi
[U tsolajil le oochel teʼ táan juʼun 5]
Le máaxoʼob tu yaʼaloʼob tiʼ Satanás u taal le páajtalil yaan kaʼach tiʼ Jesusoʼ, tu kʼebankúunsubaʼob tu contra u kiliʼich muukʼ Dios