Epi “Tro Pala Hi Nyipunie Ngöne La Ua”?
Sabath drai 2 Semitrepa
Nyima 6 me 13
Epi “Tro Pala Hi Nyipunie Ngöne La Ua”?
“Tro pala hi nyipunie ngöne la Ua, mate tha kuca kö hnei nyipunie la aja i ngönetei.”—GALATIA 5:16.
1. Tune kaa la aqane troa thipetrije la xou, ene lo xou troa kuca la ngazo me icilekeu memine la ua?
Ijije hi tro sa thipetrije la xou, ene la xou troa kuca la ngazo me troa icilekeu memine la uati hmitrötre i Iehova. Troa kuca la hnei Paulo hna qaja, ka hape: “Tro pala hi nyipunie ngöne la Ua, mate tha kuca kö hnei nyipunie la aja i ngönetei.” (Galatians 5:16) Maine tro sa nue la Ua i Akötresie troa eatrongë së, thatreine jë kö troa musinë së hnene la itre aja ka menu ne la ngönetrei së.—Roma 8:2-10
2, 3. Maine tro pala hi sa tro ngöne la ua, nemene elanyi la thangane koi së?
2 Maine tro sa “tro pala hi ngöne la Ua”, haawe, ketre tro fe hë la trenge catre i Akötresie a upi së troa drengethenge Iehova. Tro hë së a eëne la itre thiina i Nyidrë ngöne la itre huliwa ne cainöj, me hnine la ekalesia, me hnine la hnalapa së me ngöne la nöjei götrane ju kö. Troa mama la wene ne la Ua ngöne la aqane imelekeu së memine la itre xan, ene la hne së hna faipoipo memin, memine la itre nekö së, memine la itre sine hmi së Keresiano.
3 Maine tro sa “mele ngöne la ua thenge Akötresie”, haawe, tro ha sewe së troa kuca la ngazo. (1 Peteru 4:1-6) E maine tro sa nue göhnene la ua ngöne la mele së, haawe, thaa tro jë kö sa kuca la ketre ngazo hna thatreine troa seng. Ngo nemene kö la itre xaa götranene la mele së, tro sa kepe thangane ka loi qa ngön, e hne së hna catre tro pala hi ngöne la ua?
Loi e tro pala hi sa easenyi catre koi Akötresieti me Keriso
4, 5. Pine laka easa tro ngöne la ua, tune kaa la aqane tro sa goeë Iesu?
4 Pine laka easa tro ngöne la uati hmitrötr, ijije hi tro sa easenyi catre koi Akötresie memine la hupuna i Nyidrë. Hnei Paulo hna cinyanyi kowe la itre sine hmi nyidrë, göne la itre ahnahna ngöne la götrane la ua; öni nyidrëti koi angatre ka hape: “Qa ngöne lai, eni a thue macanyi nyipunie laka pëkö ewekë hnene la Ua i Akötresieti a hape, anathema Iesu ; nge pëkö ate ateine qaja ka hape, joxu Iesu loi pe hnene la Uati Hmitöt.” (1 Korinito 12:1-3) E hetre ua ka ukune la ketre atr troa ëji Iesu, tre, thaa ua qaathei Akötresieti kö lai, ngo qaathei Satana Diabolo pe. Ngo ame së itre Keresiano ka tro thenge la uati hmitrötr, xecie hnyawa koi së laka, hnei Iehova hna amele Iesu hmaca me adraiëne la Hupuna i Nyidrë e hune la nöjei hna xupe asë. (Filipi 2:5-11) Easa lapaune kowe la mele hna hujëne hnei Keriso, nge easa kapa laka Iesu la Joxu hna acile hnei Akötresie.
5 Hna kelikelëne hnene la itre xaa Keresiano ne la hneijine i Iesu la mekun, ene laka, hnei Iesu hna traqa e celë fen fë ngönetrei ne atr. (2 Ioane 7-11) Qa ngöne la ini ka ngazo cili, itre xan a thipetrije ju la nyipici göi Iesu lo Mesia. (Mareko 1:9-11; Ioane 1:1, 14) Ame la troa tro ngöne la uati hmitrötr, tre, kolo hi lai a troa sewe së troa kei kowe la iamenumenu ene lo hmi thoi. Ngo loi e tro pala hi sa hlë hmek, matre troa eje pala hi the së la ihnimi gufa i Iehova me “trongëne la nyipici.” (3 Ioane 3, 4) Haawe, catre pi së troa thipetrije la nöjei aqane iamenumenu, matre tro pala hi sa acatrene hnyawa la itre aqane imelekeu së memine la Tretretro së e koho hnengödrai.
6. Nemene la itre thiina hna troa hamëne hnene la ua i Akötresie e tro sa tro ngöne la ua?
6 Ame la Paulo a e wengëne la hmi kowe la idrola me itre wapicine hmi, e hnine lo itre “huliwa ne la ngönetrei”, angeic a aceitunëne ju la kuci ngazo me thiina ka sis. Nge angeic a qeje pengöne fe, ka hape: “ame ite ate i Keriso, te, hna asataurone (athipe hune la sinöe) la ngönetei me ite aja ne eje me itre ka itheitheil. Maine mele shë ngöne la Ua, hawe, easha tro ngöne la Ua.” (Galatia 5:19-21, 24, 25) Nemene la itre thiina ka loi hna troa aciane hnene la trengecatre ne la ua i Akötresie thene la itre ka mele me tro ngöne la ua? “Ame la wene ne la Ua”, öni Paulo tre, “ihnim, me madin, me tingeting, me xomi hni ahoeany, me metöt, me thina ka loi me nyipici.” (Galatia 5:22, 23) Tro sa pane ce wange la itre götrane ka isapengönene la wene ne la ua.
“Ihnimekeu ju nyipunie”
7. Qeje pengöne jë la ihnim me hamëne la itre xaa pengöne ej?
7 Ame la ihnim, tre, celë hi ketre igötranene la wene ne la ua, nge ame itre xaa ijin, ke, ej a qaja la ihnimi ka jui, me imeku, me ihnimi nyipici. Tusi Hmitrötr a hape, “Akötesieti la ihnim” pine laka, Nyidrëti hi la tulu ka draië ne la thiina cili. Jëne la mele hna hujëne hnei Keriso Iesu, kola mama hnyawa e cili la ihnimi nyidrë memine la Tretretro i nyidrë kowe la nöjei atr asë. (1 Ioane 4:8; Ioane 3:16; 15:13; Roma 5:8) Kola atrehmekune hnene la itre atr ka hape itretre drei Iesu së, hnene laka, hetrenyi the së la ihnimekeu. (Ioane 13:34, 35) Ame së, hna upi së me amekötine koi së tro sa “ihnimekeu”. (1 Ioane 3:23) Nge Paulo a qaja ka hape, ame la ihnim, tre, ene la troa xomihni ahoean me menyik. Thaa ka ikucanyi kö ej me selën, thaa thiina ka qali kö me atre thele pena la ewekë i angeice kö. Thaa atre madrine kö la thiina ka thaa meköti kö ngo ka madrine la nyipici. Ihnimi a kapa me mejiun me xomi hnine la nöjei ewekë asë. Ketre, pë jë pi kö tro la ihnimi a paatr.—1 Korinito 13:4-8.
8. Pine nemene matre loi e tro sa amamane la ihnimi së kowe la itre atr ka ce me easë troa hmi koi Iehova?
8 Maine tro sa nue la ua i Akötresie troa aciane e kuhu hni së la ihnim, haawe, tro ha mama hnyawa la thiina celë ngöne la aqane imelekeu së me Akötresie memine fe la itre xaa atr. (Mataio 22:37-39) Hna cinyihane hnei Ioane aposetolo, ka hape: “Ame la ate tha ihnim, angeice pala kö ngöne la mec. Atre ihumuthi la ate methinëne la tejine me angeic ; nge ate hë nyipunie laka ame la ate ihumuthi, te, pëkö mele ka tha ase palua kö a lapa e kuhu hni angeic.” (1 Ioane 3:14, 15) Ijije tro la atre ihumuthi a öhnyi hnë lapa zae ngöne la ketre traon ne Isaraela, e hnei angeice hna humuthe lai atr ngo thaa lue ka imethinë kö nyidro. (Deuteronomi 19:4, 11-13 ) Maine tro sa nue la ua troa eatrongë së, haawe, tro hë së a amamane la ihnimi së koi Akötresie, me kowe la itre sine ce hmi së itre Keresiano, me kowe mina fe la itre xaa atr.
“Madrine i Iehova la egöcatre së”
9, 10. Nemene la madrin, nge nemene la itre kepine ka nyimutre matre easa madrin?
9 Ame la madrin, tre, celë hi hatrene la manathithi ka tru. Iehova la “Akötresie trene manathith (madrin).” (1 Timoteo 1:11; Salamo 104:31) Ka madrine la Hupuna troa kuca la aja ne la Tretretro i nyidrë. (Salamo 40:8; Heberu 10:7-9) Nge “ame la madin qa thei Iehova te, egöcate [së] hi lai.”—Nehemia 8:10
10 Maine eje the së la madrine qaathei Akötresie, haawe, tro ha hetrenyi the së la nyipi ajane troa kuca la aja i Nyidrë, ngacama easë ju hë a cile kowe la itre jol, me hace, maine itre icilekeu pena. Hane hi lai ketre manathithi ka tru hne së hna kapa e tro sa “ate Akötesie”! (Ite Edomë 2:1-5) Hetre madrine së qa ngöne la aqane imelekeu së me Akötresie, nge hna nyitrepene lai hnene la atrehmekun ka meköt me lapaune koi Nyidrë me kowe la thupene mele ene lo mele i Iesu hna huujën. (1 Ioane 2:1, 2) Ketre jëne madrine fe koi së la troa hane sine la lapa ka caahae ne la itre trejine e cailo fen asë. (Zefania 3:9; Hagai 2:7) Kola amadrinë së mina fe hnene la mejiune së kowe la Baselaia memine la hnëqa së ka tru troa cainöjëne la maca ka loi. (Mataio 6:9, 10; 24:14) Kola nyixane fe la itre madrine celë hnene la mejiune laka tro fe hë së a hane mele uti hë epine palua (Ioane 17:3) Pine laka easa hnine la nöjei manathithi cili, ene pe easë “a madin!”—Deuteronomi 16:15
Mele tingetinge ju me xomi hni ahoeany
11, 12. (a) Nemene la aqane tro nyipunie a qeje pengöne la tingeting? (b) Nemene la thangane la tingetinge i Akötresie koi së?
11 Ame la tingeting, tre, celë hi ketre götranene la wene ne la Ua, nge ej a qaja la pengöne la ketre atr ka mele xetietë nge pëkö gomegome ngöne la mele i angeic. Ame la Tretretro së ekoho hnengödrai, tre, Nyidrëti la Akötresieti ne la tingeting, nge eje hi laka, thaa tro kö a gufa la hna ithanata celë, hna hape: “Tro Iehova a amanathithine la nöjei Nyidë hnene la tingeting.” (Salamo 29:11; 1 Korinito 14:33) Öni Iesu ekö kowe la itretre drei nyidrë: “Ini a amë la tingetinge thei nyipunie, tingetingenge kö la hnenge hna hamë nyipunie.” (Ioane 14:27) Nemene aqane tro la tingetinge cili a xatuane la itretre drei nyidrë?
12 Hnene la tingetinge qaathei Iesu hna axapone la itre hni me itre mekune ne la itretre drei nyidrë, me acone la xou thei angatr. Nge eje thei angatr la tingeting, qa ngöne laka, angatr a kapa lo uati hmitrötr hna thingehnaean? (Ioane 14:26) Jëne la ixatua ne la ua memine la kola sa la itre thithi së enehila, haawe, easa melëne la ketre “tingetinge ka sisitia qa thei Akötesie” ka amanone me axapone la itre hni së me itre mekuna së. (Filipi 4:6, 7) Ketre, kola xatua së hnene la ua i Iehova troa menyike me tingeting kowe la itre sine hmi së Keresiano me kowe la nöjei atr asë.—Roma 12:18; 1 Thesalonika 5:13.
13, 14. Nemene la aliene la hna hape xomihniahoeany, nge pine nemene matre loi e tro sa eëne la thiina cili?
13 Lue ewekë ka ce tro la tingeting memine la xomihniahoeany. Maine jë troa xomihnine ahoeane e jele jë la trenge hni së, maine kuca la ketre ewekë ka ngazo koi së, nge easa mejiune me treqene matre troa nango tro loi la jole cili. Ka xomi hni ahoeanyi Akötresie. (Roma 9:22-24) Hnei Iesu fe hna amamane la thiina cili. Ijije tro fe së a hane kepe thangane qa ngöne la xomihni ahoeany, pine laka Paulo a cinyihane ka hape: “Ngo hna hnimi ni hnei Iesu Keriso ngöne hi lai, mate pane amamane göi ni la xomi hni ahoeanyi asëjëihë, nyine tulu koi angate angete troa lapaune koi nyidë epine uti hë la mele ka tha ase palua kö.”—1 Timoteo 1:16.
14 Kola xatua së mina fe hnene la xomihni ahoean troa atreine itreqe, e qaja jë me kuca jë koi së la itre ewekë ka ngazo hnene la itre xan, nge thaa hnei angatre pe hna thë; maine pena, itre ka thaa hni ka menyike kö koi së. Hnei Paulo ekö hna ithuecatre kowe la itre xaa keresiano, ka hape: “Xomi hnine ahoeane ju la nöjei ate asëjëihë.” (1 Thesalonika 5:14) Pine laka itre atr ka thaa pexeje kö së nge ka kuca asë hi së la ngazo, haawe, aja së fe e troa xomihni së hnei itre xan e hetre ewekë ka ngazo ju hne së hna kuca ngöne la easa ce mele me angatr. Haawe, loi e tro sa catre troa “xomi hni ahoeanyi memine la madin.”—Kolose 1:9-12
Loi e Tro Sa Thiina Ka Menyik Me Thiina Ka Loi
15. Nemene la aliene la hna hape thiina ka menyik me thiina ka loi, nge hamëne jë la itre ceitun.
15 Troa mama la ajane së troa xatuane la itre xan, e hetrenyi the së la thiina ka menyike me thiina ka loi me ihnim; kola mama lai ngöne la itre hne së hna qaja me kuca. Ka thiina ka loi pala hi Iehova memine la Hupuna i Nyidrë. (Roma 2:4; 2 Korinito 10:1) Kola thele thene la itre hlue i Akötresie me Keriso, la thiina ka menyik me thiina ka loi. (Mika 6:8; Kolose 3:12) Kola mama laka “Ataqate fe la ihnimi” ne la itre xaa atr ka thaa hane kö nyi hlue i Akötresie. (Ite Huliwa 27:3; 28:2) Nyipici, maine tro sa “catre tro ngöne la ua”, haawe, ijije hi tro sa hane amamane la thiina së ka menyik.
16. Eue la itre ijine kola upi së troa amamane la thiina ka menyik?
16 Ijije hi tro sa thiina ka menyik me thiina ka loi, ngacama ka ithele trenge hni la itre trenge ewekë ka akötr maine itre huliwa ka ngazo hna kuca menune koi së. Öni Paulo: “Elëhni jë ngo the ngazo kö nge the lö kö la jö hune la wesite i nyipunie nge the nue hne i diabolo kö. . . . Nge ihnim ipitö ju nyipunie, nge iutipinekeuneju, kola inu’aloinekeun, tune la hnei Akötesie hna nu’aloinyi nyipunie göi Keriso.” (Efeso 4:26, 27, 32) Ka lolo catre tro sa thiina ka menyike kowe la itre atr ka akötr hnine la itre itupath. Eje hi lai laka, maine tro la ketre qatre thup a mekune ka hape, loi e tro angeic a hnöthe troa hamë eamo qa hnine la Tusi Hmitrötr kowe la ketre trejine ka nanyi trootro qa ngöne la ‘thiina ka loi memine la meköti me nyipici’, wanga troa akötrëne la trejine me angeic, haawe, kolo hi lai a amamane ka hape thaa ka thiina ka loi kö, nge pëkö ihnimi e kuhu hni ne la qatre thup.—Efeso 5:9.
17, 18. Nemene la ketre aqane tro sa qeje pengöne la thiina ka loi, nge tune kaa la aqane troa atraqatre la thiina celë ngöne la mele së?
17 Ame la thiina ka loi, tre, ene mina fe la troa thiina ka meköt, troa lolo la aqane ujë, celë hi thiina ne la atr ka trongëne la loi. Ame Akötresieti, ke, ka thiina ka loi Nyidrë, nge pëkö ethane la thiina cili thei Nyidrë. (Salamo 25:8; Zakaria 9:17) Ame Iesu, tre, atre thiina ka meköti nyidrë, nge ka pë ethane la aqane ujë i nyidrë. Ngo ame la kola hë nyidrëti ka hape, “Ate ini ka loi”, hnei Iesu hna xelene troa qeje nyidrëti ka hape “ka loi”; hnene hi laka, nyidrëti a atrehmekune laka Akötresieti hi la tulu ka sisitria ngöne la kola qeje thiina ka loi. (Mareko 10:17, 18)
18 Atreine hi së troa kuca la loi, ngo ngazo pe, tre, hna thungi jë së hnene lo ngazo hne së hna kapa qa thene lo lue pane keme me thine së. (Roma 5:12) Loi pe, ijije hi tro sa amamane la thiina cili, e tro sa thithi matre tro Akötresieti a ‘ini së la loi.’ (Salamo 119:66) Öni Paulo kowe la itre sine huliwa i nyidrë e Roma, ka hape: “Nge xecie hë e kuhu hninge göi nyipunie, ange tejine me ini laka tiqa ha nyipunie hnene la thina ka loi, nge tiqa fe hë hnei inamacan’asë.” (Roma 15:14) Loi e tro la qatre thup a ketre “ate ajane la ka loi.” (Tito 1:7, 8) Maine tro sa nue la ua i Akötresieti troa eatrongë së, haawe, tro ha atre së hnene la thiina ka loi së, nge tro Iehova a ‘meku së pine la loi hne së hna kuca.’—Nehemia 5:19; 13:31.
“Lapaun ka pë thoi ngön”
19. Qeje pengöne jë la lapaun thenge la hna qaja ngöne la tusi Heberu 11:1.
19 Ame la lapaun, ene lo ketre wene ne la Ua, tre, ej a “lapa qale kowe la nöjei ewekë hna mejiune kow, me nyine anyipicine la nöjei ewekë ka tha hna goeëne kö.” (Heberu 11:1) Ame la troa hetrenyi la lapaun, tre, ene la troa xecie hnyawa koi së laka, ame asë hi la itre hnei Iehova hna thingehnaean, tre, eatre asë hi itre ej. Thaa jole kö tro sa trotrohnine laka hetrenyi la itre xaa ewekë hna thaa öhne kö hnei lue meke i atr (tune la eny); ka tune hi la lapaune lai, laka, easa mejiune kowe la itre ewekë hna thaa öhne kö hnei lue meke i atr. Hna jëne hi la itre ewekë hna xup, matre kola upi së troa atrehmekune laka hetre Atre Xupe la nöjei ewekë asë. Celë hi pengöne lapaune lai nyine tro sa eën, maine easa ajane troa tro pala hi ngöne la ua.
20. Nemene la “ngazo ate ajolenyi shë” nge tune kaa la aqane tro sa neëne ej memine lo itre huliwa ne ngönetrei?
20 Ame ngöne la ketre götran, ame la pë lapaun, tre, celë hi “ngazo ate ajolenyi së.” (Heberu 12:1) Nyipi ewekë tro sa qale kowe la Uati Hmitrötre i Akötresie matre atreine së troa neëne la itre huliwa ne la ngönetrei, ene la thele mo me itre ini ka thoi; itre ewekë lai ka troa lepe trije la lapaune së. (2 Timoteo 4:3-5) Hetre thangane la ua i Akötresie thene la itre hlue i Nyidrë enehila, ngöne laka, hetrenyi angatr la lapaun, lapaune ka eje fe thene lo Itretre Anyipicin ka mel qëmekene la traqa i Iesu, hna e wengën la ëjene la itre xan hnine la Tusi Hmitrötr. (Heberu 11:2-40) Nge eje hi lai laka, tro fe la sipu “lapaune (së) ka pë thoi ngön” a acatren la lapaunene la itre xan.—1 Timoteo 1:5; Heberu 13:7.
Amamane Jë La Thiina Ka Menyik Memine La Xomehnöth
21, 22. Tune kaa la ketre aqane troa qeje pengöne la thiina ka menyik; nge pine nemene matre nyipi ewekë tro sa eëne la thiina cili?
21 Ame la thiina ka menyik, tre, ene la troa menyike pala hi la aqane mel, nge troa lolo la aqane imelekeu së memine la itre xan. Ame la aqane ujë ka menyik, tre, celë hi ketre thiina lai ka eje ngöne la pengöi Akötresie. Thaa sihngödre kö koi së la mekune cili, pine laka, Iesu hnyawa hi lo iahnuene la thiina i Iehova; ka menyike la aqane ujë i nyidrë, nge ka pë ethan. (Mataio 11:28-30; Ioane 1:18; 5:19. Haawe, nemene la hna thele thene la itre hlue i Iehova?
22 Pine laka itre keresiano së, kola thele the së troa “meköt, me amamane la thina ka menyike asë kowe la nöjei ate asë.” (Tito 3:2) Easa amamane la thiina ka menyike ngöne la huliwa ne cainöje së. Hna ithuecatre kowe lo itre trejine ka maca ngöne la ua, troa xom’amekötine lo itre keresiano ka tro menu, ngo “ngöne la hni ka menyik.” (Galatia 6:1) Ijiji së asë hi troa ixatua matre troa hetrenyi la tingeting me caas, hnene la hne së hna “hni ka ipië me menyik.” (Efeso 4:1-3) Tro sa atreine amamane la thiina ka menyik, e hne së hna tro pala hi ngöne la ua me huliwane la xomehnöth.
23, 24. Nemene la xomi hni, nge tune kaa la aqane tro ej a xatua së?
23 Ame la xomehnöth, tre, ej a aijijë së troa musinëne la itre mekuna së, me itre trenge ewekë së me itre huliwa së. Hnei Iehova hna “xomihnin” Qëmekene la tro angetre Babulona, a thapa e Ierusalema. (Isaia 42:14). Hnene la Hupuna i Nyidrë hna ‘hamëne la tulu’ hnene la hna xomihni ngöne lo nyidrëti a akötr. Ketre, hnei aposetolo Peteru hna eamone la itretre dreng keresiano troa “nyi xomi hni xane la inamacan.”—2 Peteru 1:5-8; 2:21
24 Kola thele thene la itre qatre thup tro angatr a atreine xomihni. (Tito 1:7, 8) Ame enehila, ame la itre hna eatrongëne hnene la Uati Hmitrötr, tre, ijije hi tro angatr a hane xomihni, ene pe tro hë angatr a neëne la kuci ngazo me trije la itre aqane ithanata ka sis, maine ketre ewekë ju kö hnei Iehova hna xele ma wang. Maine tro sa nue la ua i Akötresie troa aciane the së la xomihni maine xome hnöth, haawe, tro ha mama lai ngöne la itre hne së hna qaja me kuca.
Catre pi së tro ngöne la ua
25, 26. Maine tro sa tro ngöne la ua, nemene la thangane lai ngöne la itre aqane imelekeu së memine la itre xan enehila memine fe la itre hne së hna mejiune kow ngöne la itre drai elany?
25 Maine tro sa tro ngöne la ua, haawe, tro hë së a itretre catre cainöjëne la maca ka loi ne la Baselaia. (Itre Huliwa 18:24-26) Tro hë së a itre atr hna pi nyi sinatrongen hnene la itre xan, nge tro hë la itre atr ka qale catre koi Akötresie a thele troa ce sinee me easë. Pine laka easa nue la uati hmitrötr troa eatrongë së, haawe, tro fe hë së a hane ithuecatr ngöne la ua kowe la itre xaa ka nyihlue i Iehova. (Filipi 2:1-4) Hapeu, thaa celë kö la aja ne la nöjei Keresiano lai?
26 Ame ngöne la fene celë hna musinëne hnei Satana, thaa hmaloi kö troa tro ngöne la ua. (1 Ioane 5:19) Loi pe, itre milio la etrune la itre atr ka tro tune lai enehila. Maine tro sa mejiune koi Iehova hnene la hni së ka pexej, haawe, tro hë sa mele madrine enehila, nge ijije hë tro sa catre trongëne epine palua la itre gojenyi ka meköt ne la Akötresie ka hamëne la Uati Hmitrötr cememine la ihnim.
Nemene la aqane sa i nyipunie?
• Tune ka la aqane troa hetre thangan la ‘easa tro ngöne la ua’ ngöne la aqane imelekeu së me Akötresie memine la Hupuna i Nyidrë?
• Nemene la itre xaa götranene la wene ne la ua?
• Nemene la aqane tro sa amamane la wene ne la ua i Akötresie?
• Qa ngöne laka easa tro ngöne la ua, nemene la thangane lai ngöne la mele së enehila memine la itre hne së hna mejiune elany?
[Thying]