Nkonko ya babadi

Bu muvua dinowa ne bua kutuadija pavua bantu balume bonso ba mu Isalele mu tshibilu tshia mampa kaayi mela luevene, mbanganyi bavua banowa mamuma a kumpala a orge avuabu ne bua kulua nawu mu muaba wa tshijila?

Bakambila bena Isalele mu Mikenji ya Mose ne: ‘Balume bonso nebamueneke ku mêsu kua Yehowa Nzambi wenu, misangu isatu ku tshidimu ku tshidimu mu muaba udiye usungula: ku disanka dia mampa adi kaayi ne luevene, ne ku disanka dia mbingu ayi muanda mutekete, ne ku disanka dia bitandatanda.’ (Dutelonome 16:16) Kutuadijila mu tshikondo tshia Mukalenge Solomo, muaba uvua Yehowa musungule uvua ntempelo wa mu Yelushalema.

Tshibilu tshia kumpala ku bisatu ebi tshivua tshienzeka ku ntuadijilu kua muvu wa printemps. Bavua batshibikila ne: tshibilu tshia mampa kaayi mela luevene, ne tshivua tshienzeka dituku dimue panyima pa Pasaka uvuabu benza mu dia 14 Nisana, tshienza matuku muanda mutekete too ne mu dia 21 Nisana. Dituku dibidi dia tshibilu etshi, tuambe ne: mu dia 16 ke muvuabu batuadija dinowa dia kumpala bua tshidimu bilondeshile kalandriye ka malu a ntendelelu. Mu dituku adi, muakuidi munene uvua wangata ‘bintu bipola diambedi’ mu dinowa dia orge ne ubinyukula ‘kumpala kua Yehowa’ mu muaba wa tshijila. (Lewitiki 23:5-12) Bu muvua balume bonso ba mu Isalele ne bua kuikala mu tshibilu tshia mampa kaayi mela luevene, mbanganyi bavua ne bua kunowa bintu bia kulambula ebi?

Mukenji wa kulambula bintu bia kumpala bivuabu banowa kudi Yehowa mu tshibilu tshia mampa kaayi mela luevene uvua muelela tshisamba tshijima. Muntu yonso kavua ne bua kutuadija dinowa ne kuya ne bintu bia kumpala bivuaye unowa ku ntempelo to. Kadi bantu bakese ke bavua ne bua kuenza bualu ebu pa muaba wa tshisamba tshijima. Nunku, bavua batuma bantu bua kukosa matamba a orge ku madimi avua pabuipi bua kuya nawu mu tshibilu tshia mampa kaayi mela luevene. Mukanda mukuabu udi wamba bua bualu ebu ne: “Pavua bantu aba kabayi bapeta orge mu madimi a pabuipi ne Yelushalema, bavua mua kuya kuyikeba muaba kayi wonso mu Isalele. Bavua bayikosa kudi bantu basatu, muntu yonso muikale ne muele ne tshisaka.” (Encyclopaedia Judaica) Bavua balua pashishe ne matamba a tumuma tua orge etu kudi muakuidi munene bua kulambulaye Yehowa.

Mukenji uvuabu belele bena Isalele bua kulambula bintu bia kumpala bivuabu banowa uvua ubapetesha mushindu wa kuela Nzambi tuasakidila bua muvuaye mubeneshe buloba buabu ne dinowa diabu. (Dutelonome 8:6-10) Kadi bualu buvua ne mushinga mbua ne: tshibilu etshi tshivua ‘mundidimbi wa bintu bimpe bilualua.’ (Ebelu 10:1) Bidi nanku, bualu Yezu Kristo wakabika ku lufu mua dia 16 Nisana 33, dituku divuabu balambula Yehowa bintu bia kumpala bivuabu banowa. Mupostolo Paulo wakamba bua Yezu ne: ‘Kristo wakumana kubishibua ku bafue, bu mamuma a kukuama diambedi a bantu bakulala tulu mu lufu. Kadi muntu ne muntu neabike mu mulongo wende: Kristo, mamuma a kukuama diambedi; ne pashishe, bantu ba Kristo nebabike paluaye.’ (1 Kolinto 15:20-23) Bintu bia kumpala bivuabu banowa bivua muakuidi munene unyukula kumpala kua Yehowa, bivua bileja dibishibua dia Yezu Kristo ku lufu, muntu mene wa kumpala wakabika ku lufu bua kupeta muoyo wa tshiendelele. Bua bualu ebu Yezu wakapetesha bantu mushindu wa kupikudibua ku bubi ne ku lufu.

[Mêyi a dianyisha bua tshimfuanyi mu dibeji 26]

© 2003 BiblePlaces.com