Au Uianga a te Aronga Tatau

I te mea i akamata tikai te kokotianga i te aerenga te au tane ngati Iseraela katoatoa ki te Oroa Areto Akaopue Kore, naai i reira i kokoti i te momua o te titona tei apaiia mai ki te iero?

Kua akaue te Ture a Mose i te ngati Iseraela: “Kia taki toru to te au tane katoa i o ou ra aere akakite anga atu ki mua i te aroaro o to Atua ra o Iehova i te mataiti okotai, i te ngai tana e akono ra; ei te oroa areto akaopue kore ra, e te oroa ebedoma ra, e te oroa patia anga puakapa.” (Deuteronomi 16:16) Mei te taime mai i te Ariki ko Solomona e aere ua atu, ko te ngai ta te Atua i iki koia oki ko te iero i Ierusalema.

Te mea mua o te au oroa e toru i raveia te reira i te akamataanga o te tuatau tupuanga rau. Tapaia ko te Oroa Areto Akaopue, i akamata te reira i te ra i muri ake i te akono anga i te Pasa ia Nisana 14 e kua raveia e itu ra e tae atu kia Nisana 21. Te ra rua o te oroa, ia Nisana 16, e akairo te reira i te akamataanga o te kokotianga mua o te mataiti tei akatumuia ki runga i te karena akatapuia. A taua ra ra, ka apai te taunga maata i “tetai ruru i taua popo” o te kokotianga titona e ka ruru i te reira “ki mua i te aroaro o Iehova” i ko i te iero. (Levitiku 23:5-12) I te mea e kua anoanoia te au tane katoatoa kia tae ki te Oroa Areto Akaopue Kore, naai i reira i kokoti i teia au atinga?

Ko te akauenga kia oronga i te momua o te kokotianga kia Iehova i te tuatau o te Oroa Areto Akaopue Kore, i orongaia te reira ki te iti tangata katoa. Kare te au tangata tataki tai e anoanoia kia akamata i te kokotianga e kia apai i tana uaorai momua ki ko i te iero. Mari ra, kua akaueia te iti tangata kia rave i te reira na roto i tetai kauono. No reira, ko te kokoti anga i te ruru no te Oroa Areto Akaopue Kore ka raveia te reira na roto i te tono anga i tetai pupu tereketi ki tetai kainga titona vaitata ua mai. I te tuatua anga no runga i teia, kua akakite te Encyclopaedia Judaica e: “Me kua para te titona ka apaiia mai te reira mei te tua mai o Ierusalema; me kare ka apaiia mai te reira mei tetai ngai mai i roto ia Iseraela. E tokotoru tangata i te kokoti, e tangata e tana matipi mingi e te kete.” E oti i reira kua apaiia tetai ruru titona ki ko i te taunga maata, kia oronga aia i te reira kia Iehova.

Kua riro te umuumuanga kia oronga i te momua o te kokotianga, i te oronga i tetai tikaanga manea no te ngati Iseraela kia akaari i to ratou rekareka no te akameitakianga a te Atua ki runga i to ratou enua e ta ratou kokotianga. (Deuteronomi 8:6-10) Maata atu ra i te reira, ko te oronga anga atinga, ‘e ata anake ia no te au mea memeitaki a muri atu.’ (Ebera 10:1) Tei puapinga maata roa atu, kua akatu akaouia mai a Iesu Karaiti i roto ia Nisana 16 i te mataiti 33 T.N., te ra no te oronga anga i te momua o te kokotianga kia Iehova. No runga ia Iesu, kua tata te apotetoro ko Paulo e: “Kua tu akaou tikai ra te Mesia mei te mate maira, kua riro ïa ei momua no te aronga i topa te moe ra. . . . E akonoia ra te tangata ravarai i tona uaorai pupu; ko te Mesia te momua; e i muri ake, ko to te Mesia ïa, kia mama mai aia ra.” (1 Korinetia 15:20-23) Te ruru o te momua ta te taunga maata i ruru ki mua i te aroaro o Iehova i akaata mai te reira ia Iesu Karaiti tei akatu akaouia mai​—te tangata mua tei akatuia mai mei te mate ki te ora mutu kore. Akatuera iora i reira a Iesu i te mataara no te akamatara mai anga i te tangata mei te ara e te mate.

[Akameitakianga no te Tutu i te kapi 26]

© 2003 BiblePlaces.com