Loi e Tro Sa Lapa Treqene La Drai i Iehova Cememine La Xomihni Ahoeany
Sabath drai 9 Semitrepa
Nyima 2 me 29
Loi e Tro Sa Lapa Treqene La Drai i Iehova Cememine La Xomihni Ahoeany
“Nyi thina ka loi xane la lapaune . . . nge nyi xomi hni.”—2 PETERU 1:5, 6.
1, 2. Nemene la aliene la hna hape xomihni ahoeany, nge pine nemene matre nyipi ewekë lai kowe la itre Keresiano?
CALEMI catre hë la drai i Iehova. (Ioela 1:15; Zefania 1:14) Pine laka easë la itre Keresiano ka mele nyipici koi Akötresie, haawe easa ajane me lapa treqene la ijine cili, ijine kola troa anyipicine la musi Iehova. Ngo ame ngöne la ijine easa lapa treqene la drai cili, easa cile kowe la imethinë, me ijelengazo, me icilekeu, me mec pine la lapaune së. (Mataio 5:10-12; 10:22; Hna Amamane 2:10) Qa ngöne lai, nyipi ewekë troa xomihni ahoeany—ene la troa atreine xomihnine la nöjei pengöne akötr. Kola xatua së hnei Peteru aposetolo troa “thina ka loi xane la lapaune i nyipunie . . . nge xomi hni.” (2 Peteru 1:5, 6) Nyipi ewekë koi së la xomihni ahoeany, ke, öni Iesu: “Ame la ate cile huti uti hë la pune, te, tro ha mel.”—Mataio 24:13.
2 Ketre, kola tithi së hnene la itre mec, nge kola meci la itre sinee së, me traqa la itre xaa ithupathi ju kö. Drei kö la madrine i Satana e troa paatre la lapaune së! (Luka 22:31, 32) Ijije hi tro sa xomihnine la itre ithupathi ka nyimutre, jëne la ixatua i Iehova. (1 Peteru 5:6-11) Tro sa pane ce wange la itre hna melëne hnene la itre xaa atr ka amamane laka, ijije hi tro sa lapa treqene la drai Iehova cememine la xomihni ahoeany, me lapaune ka catrecatre pala hi.
Thaa hna sewe angatre kö hnene la mec
3, 4. Hamëne jë la ketre tulu matre troa amamane laka, ijije hi tro sa nyihluei Iehova cememine la nyipici, ngacama hetrenyi së la ketre sine mec.
3 Thaa Akötresieti kö enehila a kuca la itre iamamanyikeu matre troa aloine la itre sine meci së, ngo Nyidrëti pe a hamëne koi së la trenge catre matre tro sa atreine xomihnine ahoeane itre ej. (Salamo 41:1-3) Öni Sharon, ka hape: “E tro hmaca ni a mekune qaane ekö uti hë enehila, tre, caasi pala hi la sine trongeng, ene lo ikatreng. Hna ketr la atuate i eni hnene la ketre mec qaane lo kola mala ni, ene pe kösë hna thapa qa thenge me sewe ni troa kapa la itre madrine ka eje thene la itre xaa nekönatr.” Hnene la hnei Sharon hna thele troa atrepengöi Iehova memine la itre hnei Nyidrëti hna thingehnaeane göi troa pexeje elanyi la egöcatrene la ngönetrei, haawe, hetrenyi hmaca jë thei angeice la mejiun. Ngacama jole koi angeic troa ithanata me tro, ngo ame pe, tre, atraqatre la madrine i angeic ngöne la huliwa ne cainöj. Fifitre hë lao macatre enehila, angeic a qaja ka hape: “Thaa tro jë kö a loi la mecing, ngo ame pe, emelenge la mejiuneng koi Akötresie memine la aqane imelekeunge me Nyidrë. Drei la madrine ka tru thenge troa caas memine la nöje i Iehova, me troa kapa pala hi la ixatua qaathei Nyidrë!”
4 Hnei Paulo aposetolo hna xatuane la itre Keresiano ne Thesalonika troa “haji angete hni ka ewë.” (1 Thesalonika 5:14) Nyimutre la itre jole thene la atr, tune la kola haitre la hni angeic koi ketre ewekë, ene pe kola fetra la meci ka ketr la mekune me aliene hni. Kola cinyihane hnei Sharon ka hape: “Atraqatre la hleuhleu theng, ke, catre e kuhu hning laka pëkö loi hnenge hna kuca, ene pe köni macatre ne lapa fë ni la meci eni e kuhu hning. . . . Kola akeukawanyi ni me hamë eamo koi ni hnene la itre qatre thup. . . . Jëne la Tour de Garde (Ita Ne Thup), Iehova a ini së, cememine la utipin, matre tro sa trotrohnine la engazone lai mec, lo hna lapa fë e kuhu hni ne la atr. Nyipici laka, Nyidrëti a nyihnyawane la nöje i Nyidrë me trotrohnine la itre aliene hni së.” (1 Peteru 5:6, 7) Sharon pala hi a nyihluei Akötresie cememine la hni ka nyipici, nge angeice pala fe a treqene la drai ka tru i Iehova.
5. Nemene la ka anyipicine laka itre Keresiano fe a xomihnin ahoeane la itre xaa akötre hnei angatr hna lapa fë e kuhu itre hni angatr?
5 Atraqatre la akötre ne la itre xaa Keresiano pine lo itre ewekë hnei angatre hna melëne ekö. Hnei Harley hna hane sine lo Hnaaluene Isi Ka Tru e Cailo fen ka iakötrë catr, nge thaa meköle hnyawa kö nyidrëti ngöne la itre jidr, ke, kola puje hmaca la itre ewekë hna kuca hnei nyidrë ekö ngöne la ijine isi. Ngöne la nyidrëti a meköl, nyidrëti a sue draië, me hape: “Wange kö! Hmekëne ju!” Ame la kola hlë, tre, ka cabi asë hë nyidrë hnei zihnu. Kola tro la itre drai, nge kola uti trootro la etrune la itre pu cili, nge thaa catrehnine hmaca kö itre ej; nango hmaloi hë la mele i nyidrë, hnene laka, hnei nyidrëti pala hi hna catre mele thenge la aja i Akötresie.
6. Hna cile tune kaa hnene la ketre Keresiano kowe la ketre meci ka ketr la mekun, me aliene hni angeic?
6 Hna akötre fë hnene la ketre Keresiano la ketre mec ka ketr la mekun me aliene hni angeic me aqane ujë i angeic, matre jole catre koi angeice troa hane cainöje trootro. Ngo ame pe, hnei angeice hna catre ngöne la huliwa celë, ke, atrehmekune hnyawa hi angeic laka, ame la huliwa ne cainöj, tre, celë hi mele koi angeice lai, nge kowe mina fe la itre ka kapa la maca ka loi. (1 Timoteo 4:16) Ame ngöne la itre xaa ijin, pëkö trengecatre i angeic troa fenafena la qëhnelö, öni angeic: “Ame pë hë thupen, atreine hë ni xomehnöthe la itre aliene hning, ene pe eni hë a hane tro kowe la ketre qëhnelö, me tupathe troa fenafena la ketre. Hetrenyi pala hi theng la egöcatre ngöne la ua hnene laka hnenge hna catre cainöje trootro.” Ketre, thaa ka hmaloi kö koi angeice troa sine la itre icasikeu, ngo ka xecie hnyawa kowe la trejine celë la enyipiewekëne la troa itronyi me caas memine la itre trejine ngöne la ua. Celë hi matre, hnei angeice pala hi hna catre troa sine itre ej.—Heberu 10:24, 25.
7. Ngacama itre xan a xou e troa ithanata ngöne la itre gaa tru atr, maine sine la ketre icasikeu pena, tune kaa la aqane xomihni ahoeanyi hnei angatr?
7 Ame itre xaa Keresiano, angatr a meci fë xou—ene la kola xouene la itre xaa ewekë ka eje thei angatr, maine itre ewekë pena ka traqa kowe la mele i angatr, ngo ketre xou lai ka sasaithi tulu pala ha. Drei la ketre ceitun, maine jë angatre a xou troa ithanata ngöne la itre götrane gaa tru atr, maine troa sine pena la ketre icasikeu. Drei jë kö la ehacene koi angatre troa hane qeje mekune ngöne la itre icasikeu ne la ekalesia, maine troa hane cile fë la ketre hnëqa ngöne la Ini Ne Cainöj Qaathei Akötresie! Ngo, angatr a catre xomihni ahoeany, nge atraqatre la madrine së ngöne la angatre a hane sine la itre icasikeu me hane hamë mekun.
8. Nemene la ixatua ka hetre thangane catre ngöne la kola troa cile hnene la ketre atr kowe la akötre ka eje e kuhu hni angeic?
8 Ame la ka troa xatua së troa xomihnin ahoeane la itre akötre ka eje e kuhu itre hni së, tre, ene la troa mano hnyawa me meköl. Ame itre xaa ijin, tre, loi e troa wai droketre. Ngo ame la ka troa hetre thangane catr, tre, ene la troa mejiune koi Akötresie hnene la troa catre thith. Öni Salamo 55:22, ka hape: “Nuepi koi Iehova [“troa ajöne la ehnefe i eö,” MN], nge tro nyidëti a sajuë eö; thaa tro palua kö nyidëti a nue la ka meköti wanga enijën.” Qa ngöne lai, “Lapauneju koi Iehova hnene la hni ’ö ka pexej.”—Ite Edomë 3:5, 6.
Aqane troa xomihni ahoeanyi ngöne la kola meci la ketre sinee së
9-11. (a) Nemene la ka troa xatua së troa xomihni ahoeany, ngöne la easa hacene la kola meci la ketre atr hne së hna hnim? Tune kaa la aqane xatua së hnene la tulu i Ana, matre atreine së troa xomihni ahoeany ngöne la kola meci la ketre sinee së?
9 Atraqatre la hleuhleu së ngöne la kola thapa la mele ne la ketre sinee së hnei mec. Hna treije latresi hnei Aberahama ngöne lo kola meci hnei Sara, ifëneköi nyidrë nge hnimina i nyidrë. (Genese 23:2) Hnei Iesu mina fe hna “sheitë [treij]” ngöne lo kola meci hnene la enehmu i nyidrë, ene Lazaro. (Ioane 11:35) Haawe, trotrohnine hi së laka, tro fe sa hacene la kola meci hnene la ketre atr hne së hna hnim. Ngo, atrehmekune hi la itre Keresiano laka, tro kö a hetre melehmaca elany. (Ite Huliwa 24:15) Qa ngöne lai, thaa angatre kö a hane “teije pin, tui ite xane ka tha mejiune kö.”—1 Thessalonika 4:13.
10 Ame la kola meci la ketre sinee së, tro sa cile tune kaa kowe lai hace cili? Maine jë troa xatua së hnene la ketre ceitun. Ame la kola pane tro hnene la ketre enehmu i epun troa ihamë ngöne la ketre nöj, angeice a troa paatre ngöne la itre xaa hnepe drai, maine treu pena; ngo thaa qea kö la hleuhleu i epun, ke, atre hi epuni laka, tro hmaca kö epone a iöhnyi ngöne la angeice a troa bëek. Maine jë troa nango axapone la hace së hnene la aqane tro sa goeëne tune lai la kola mec hnene la ketre trejine Keresiano, ke atre hnyawa hi së laka, troa amele angeice hmaca elany.
11 Maine tro sa catre mejiune kowe la “Akötesieti ate akeukawan’ asë,” tro lai a xatua së troa xomihni ahoeanyi ngöne la kola meci la ketre sinee së. (2 Korinito 1:3, 4) Haawe, tro fe a xatua së ngöne la easa mekune hmaca lo hna kuca ekö hnene lo ketre sine föe, Ana la ëje i eahlo. Thupene hi la sevene lao macatre ne faipoipo eahlo, kola meci la föi eahlo, matre lapa sine föe ju pe hi eahlo. Ngo kolo ha troa 84 lao macatre i eahlo, nge thaa hnei eahlo kö hna paatre ngöne la ēnē i Iehova göi troa nyihluei Nyidrë. (Luka 2:36-38) Thaa luelue kö së laka, hnene la aqane nue eahlo la mele i eahlo koi Akötresie, ene pe ewekë lai ka xatua eahlo troa cile kowe la hleuhleu, me kowe la ejolene la troa lapaa caasi pë hë. Maine tro sa catre kuca la itre huliwa i Keresiano, tune la huliwa ne cainöjëne la Baselaia, haawe, tro lai a xatua së troa xomihni ahoeany, ngöne la easa melëne la itre ejolene la meci ne la ketre sinee së.
Aqane cile kowe la itre ithupath ka nyimutre
12. Hna xomihnin ahoeane hnene la itre xaa Keresiano la itre itupath e hnine la fami, nemene la itre itupathi cili?
12 Ame la itre xaa Keresiano, tre, angatr a xomihni ahoeany ngöne la kola traqa la itre itupath ngöne la mele ne la fami. Hanawange la ketre ceitun, drei kö la itre ethanyine elanyi qa ngöne la hna nyixetë hnene la ketre e nyidro lue trefën! Hnene laka akötre me hleuhleu la trefën hna nyi xetë trij, ene pe thatreine kö angeice troa meköle ngöne la itre jidr, nge ketre thatreine kö xomehnöthe la treije i angeic. Kola hetre thangane fe ngöne la itre hnepe huliwa ka co hnei angatre hna kuca, laka, maine jë troa nango ngazo maine eatre pena ngöne la kola kuca itre ej. Maine jë thaa xeni hë lai trefëne hna nyi xetë trij, nge kola ae trootro la ngönetrei angeic, nge kolo pë hë a gomegome la mekun, me hni i angeic. Maine jë troa jole koi angeic troa hane kuca la itre huliwa ne la Keresiano. Nge drei fe kö la etrune la akötre ne la itre nekönatr!
13, 14. (a) Nemene la ixatua hne së hna kapa qa ngöne la thithi Solomona ngöne la kola xötrei löthe la ēnē? (b) Pine nemene matre nyipi ewekë tro sa sipone la uati hmitrötre jëne la thith?
13 Ame ngöne la easa cile kowe la itre itupathi cili, tre, Iehova a hamëne la ixatua ka ijije koi së. (Salamo 94:19) Akötresieti a drenge la thithi ne la itre hlue i Nyidrë, celë hi hna amamane hnene la thithi Solomona Joxu ngöne la kola xötrei löthe la ēnē i Akötresie. Hnei Solomona hna thithi koi Akötresie, me hape: “Ame la ite thithi asë me hna sipone asë hnei kete ate ne la nöje i enëtilai asë angete Isaraela, itete isa ate hmekune la aköte ne la hni angat, me xejë la lue ime i angate kowe la ēnēti celë ; shamatineju e hnengödrai, me nue, me kuca, me hamëne kowe la nöjei ate asëjëihë thenge la ite jë i angat, lo ite hnei enëtilai hna ate hmekune la ite hni angat ; ke ate hmekune hmekuje hi enëtilai la ite hni ne la nöjei ate asëjëihë ; mate qoue enëtilai hnei angate ngöne la nöjei drai asëjëihë ne mele angate hune la hnadro, lo hnei enëtilai hna hamëne kowe la ite xötapane hun.”—1 Ite Joxu 8:38-40.
14 Ka nyipi ewekë mina fe tro sa catre thith, matre troa xatua së hnene la uati hmitrötr. (Mataio 7:7-11) Hetrenyi la itre wene ne la ua, ene la itre thiina, tune la madrin, me tingeting. (Galatia 5:22, 23) Drei la kola akeukawane la hni së ngöne la kola sa la itre thithi së hnene la Tretretro së e koho hnengödrai, ene pe, kola nyihnane la hleuhleu hnene la madrin, me xou hnei tingeting!
15. Nemene la itre mekene tusi ka troa xatua së matre nango lapa kötre ju la itre hne së hna hnehengazon?
15 Eje hi laka, maine easë a xomihnin ahoeane la itre akötr ka tru e kuhu hni së, ketre tro fe ha atraqatre catre la aqane tro sa hnehengazo. Ngo tro ha nango lapa kötre la itre xaa hne së hna hnehengazon, e hne së hna lapa mekune la itre trenge ewekë i Iesu, kola hape: “The kukehnine kö la mele i nyipunie, ene la hnei nyipunieti hna troa xeni me ij; memine la ngönetei nyipunie, ene la nyine xetën. . . . Ngo pane thele jë nyipunie la Baselaia i Akötesie, me thina ka meköti [Akötresie]; nge troa hamëne fe koi nyipunie la nöjei ewekë cili.” (Mataio 6:25, 33, 34) Peteru aposetolo a xatua së troa ‘nue pi koi Akötresie la kukehnine së asëjëihë, ke Nyidrëti a hnengazo së.’ (1 Peteru 5:6, 7) Eje hi lai laka, ame la kola traqa koi së la ketre jol, tre, easa catre thele troa nyinyin. Ngo e ase hë së kuca asë la hne së hna atrein, ke, thithi pe hi la ka troa xatua së. Hna nyimane hnene la atre cinyihane la salamo, ka hape: “Nuepi la jë i ’ö koi Iehova; nge lapaunejë koi nyidë, nge tro nyidëti a kuca.”—Salamo 37:5.
16, 17. (a) Pine nemene matre thatreine kö troa paatre the së la hnehengazo mane kukehnin? Nemene la hne së hna troa melën e hne së hna trongëne la hna qaja ngöne Filipi 4:6, 7?
16 Hnei Paulo hna cinyihane ka hape: “The kuke hnine kö la kete ewekë; ngo loi e cengöne amamane koi Akötesie la ite aja i nyipunie hnene la thith, me sipo, me ole. Nge tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitia qa thei Akötesie hune la nöjei mekun’ asë.” (Filipi 4:6, 7) Eje hi laka, thatreine kö troa paatre la kukehnin me hnehengazo thene la itre matra i Adamu ka thaa pexeje kö. (Roma 5:12) Pine la lue föi Esau, lue atre Heth, kola “aköte la hni” ne la keme me thine i Esau, ene Isaka me Rebeka, lue trefën ka nyihlue i Akötresie. (Genese 26:34, 35) Tro fe a hnehengazo la itre Keresiano pine la itre meci ka traqa koi angatr, tui Timoteo me Trofimo. (1 Timoteo 5:23; 2 Timoteo 4:20) Hnei Paulo hna hane hnehengazone fe la itre trejine me angeic. (2 Korinito 11:28) Ngo ame la “Ate shamatine la thithi,” tre, thaa mano kö Nyidrëti troa drenge la itre atr ka hnimi Nyidrë.—Salamo 65:2.
17 Ame ngöne la easa treqene la drai Iehova, tre, easë fe a kapa la ixatua me keukawa qaathene la “Akötesieti ine la tingeting.” (Filipi 4:9) Iehova la “ate utipine me ka ihnim,” nge “ka loi. . . . ate sheng,” nge ‘Nyidëti a mekune laka so ne hnadro së.’ (Esodo 34::6; Salamo 86:5; 103:13, 14) Haawe, epi tro sa ‘qaja amamane koi Nyidrë la itre aja së,’ nge eje hi lai laka, tro hë sa kapa “la tingetinge ka sisitia qa thei Akötesie”—ene la mele xetietë, laka thatreine kö troa trotrohnine hnei atr.
18. Tune la hna qaja ngöne Iobu 42:5, troa atreine “öhnyi” Akötresieti tune kaa?
18 Ame la kola sa la itre thithi së, tre, easë hi a atrehmekune laka, ce Iehova me easë. Thupene la hna xomihnin ahoeane hnei Iobu la itre itupathi angeic, öni angeic: “Nöngöti hna shama enëtilai [Iehova] hnene la lue hnashama; ngo enehila kola xajawa [öhnyi] enëtilai hnei lue xajawangö [lue mek].” (Iobu 42:5) Jëne la lue meke ne wangatrehmekun, me lapaun, me hni ne ole, atreine hi tro sa mekune la aqane ujë i Nyidrëti koi së, nge ijije hi me ketrepengöne hë la aqane “goeë” Nyidrëti hne së. Troa tingetinge la hni së memine la mekuna së, qa ngöne la elolone la aqane imelekeu së me Iehova!
19. Nemene la ewekë ka troa traqa e hne së hna ‘nue pi koi Iehova la kukehnine së asëjëihë’?
19 Maine tro sa ‘nue pi koi Iehova la kukehnine së asëjëihë,’ ijije hi tro sa xomihnin ahoeane la itre itupath, nge lapa hnyawa la itre mekuna së, nge tro fe lai a thupëne la itre hni së me itre mekune së. Tro ha thapa qaa kuhu itre hni së, la ikukehni, me xou, me hnehengazo menu pala ha. Thaa tro kö a jolejole la mekuna së hnene la kukehnin, nge thaa tro kö sa luelue troa axecië mekun.
20, 21. (a) Ame ngöne la hna melëne hnei Setefeno, nemene la ka anyipicine laka, tingetinge nge pëkö xou the së ngöne la easa cile kowe la iakötrë? (b) Qaja jë la ketre tulu ne la hneijine së enehila, ketre Keresiano ka melëne la tingetinge ngöne la kola cile kowe la itre itupath.
20 Hnei Setefano ketre atre drenge hna xomihnin ahoeane la ketre iakötrë ka tru, ka tupathe la lapaune i angeic. Qëmekene tro angeic a cainöje tixenuë, hnene la itre atrene la hnaakootre i angetre Iudra hna “goeën la qëmeke i angeic, kösë qëmeke i angela.” (Ite Huliwa 6:15) Ka tingetinge la iqëmeke i angeic—tune la qëmeke ne la ketre angela, atre tro fë maca i Akötresie. Ame la kola ase fe amamane hnei Setefano laka, sipu qaathene kö la itretre amekötin la zöne la kola meci hnei Iesu, ame hnei angatre “hna elëhni atraqat, nge angat’ a gete umënyö angeic.” “Ngo tiqa ha [Setefano] hnene la Uati Hmitöt, angeic’ a goeë tiline la hnengödrai me öhne la lolo i Akötesie, me Iesu a cile ngöne la götrane maca i Akötesie.” Hetrenyi la ketre trengecatre hna kapa hnei Setefano qa ngöne la hnei angeic hna meköle goeën, ene pe angeice a mele nyipici jë uti hë la mec. (Ite Huliwa 7:52-60) Ngacama pëkö ewekë hne së hna meköle goeën tui Setefano, ngo ame pe, atreine hi tro Akötresieti a hamë së la tingeting ngöne la easa cile kowe la itre iakötrë.
21 Hanawange la aliene hni ne la itre xaa Keresiano hna akötrëne uti hë la mec hnene la angetre Nazi, ngöne lo ijine Hnaaluene Isi Ka Tru. Kola qejepengöne hnene la ketre Keresiano ngöne la hnaakootr, ka hape: “Ase hë amekötine laka, meci la pune koi ni. Hnenge hna dreng, nge thupene lai, eni a qaja la itre hnepe ewekë celë, kola hape, ‘Catre pi me nyipici uti hë la mec,’ me itre xaa hnepe ithanata ne la Joxu së, nge eje hë lai. . . . Ngo thaa nyipi ewekë hë lai enehila. Ke, hetrenyi thenge la tingetinge, nge pëkö xou theng, ewekë lai hna thatreine kö hnene la atr troa trotrohnin!” Hnene la ketre thöth hna troa thupa nyinawan hna cinyihane kowe la keme me thine i angeic, ka hape: “Minui hë nge sine la hawa. Hetre traemenge pala kö troa saze mekun. Ngo tune kaa, hetre manathithi kö hnenge hna troa kapa elanyi e celë fen e traqa ju ni kelikelëne la Joxu së? Ohea! Thaa sihngödre kö koi epone enehila, laka, eni a tro trije la fene celë, nge madrine me tingetinge la hning.” Thaa luelue kö së laka Iehova a sajuëne la itre hlue i Nyidrë ka mele nyipici koi Nyidrë.
Ijije Hi Tro Epuni a Xomihni Ahoeany!
22, 23. Nemene la ka xecie koi së, ngöne la easa lapa treqene la drai Iehova cememine la xomihni ahoeany?
22 Maine jë thaa kolo kö a ketri së hnene la itre jole hne së hna ce wange hë e caha hun. Ngo, thaa ka tria kö lo hnei Iobu hna qaja, ketre atr ka xoue Akötresie, öni angeic: “Ame la ate hna hnahone hnei fö, te, xalaithe hi la ite drai, nge atraqate la gomegome i angeic.” (Iobu 14:1) Ma epuni la ketre keme maine thin, ka catre huliwa matre troa eatrongëne la itre nekö i epuni ngöne la ua. Nyipi ewekë tro angatre a xomihni ahoeane la itre itupathi ngöne la hna ini, ngo drei la madrine ka tru e tro angatre a cile catr, me isi göli Iehova, memine la itre trepene meköti Nyidrë! Maine jë fe troa traqa koi epuni la itre jol me itre itupath ngöne la hna huliwa i maseta. Ngo ijije hi troa xomihnin ahoeane itre ej, memine la itre xaa jole ju kö, ke, ‘Iehova a nyi ehnefe shë.’—Salamo 68:19.
23 Loi e tro epuni a mekune laka, thaa ketre pengöne kö epuni hune la itre xaa atr, ngo loi e tro epuni a hneheene hnyawa laka, thaa tro kö Iehova a thëthëhmine la huliwa i epun, memine la ihnimi hnei epuni hna amamane kowe la ëje i Nyidrë. (Heberu 6:10) Jëne la ixatua i Nyidrë, ijije hi tro epuni a xomihnin ahoeane la itre akötre ka tupathe la lapaune i epun. Haawe, catre jë thithi me kuca la itre hnei epuni hna eköthe amë, thenge pala hi la aja i Akötresie. Thupene lai, tro epuni a mejiune koi Akötresie matre tro Nyidrëti a amanathithi epun, me sajuë epun, nge epuni a lapa treqene la drai Iehova cememine la xomihni ahoeany.
Tro Epuni a Sa Tune Kaa?
• Pine nemene matre nyipi ewekë kowe la itre Keresiano troa xomihni ahoeany?
• Nemene la ka troa xatua së troa xomihnin ahoeane la mec, memine la akötr ka eje the së ngöne la kola meci hnene la ketre sinee së?
• Tro la thithi a xatua së tune kaa troa xomihnin ahoeane la itre itupath?
• Pine nemene matre ijije hi troa lapa treqene la drai Iehova cememine la xomihni ahoeany?
[Thying]