Tapapa Atu i te Ra o Iehova ma te Akakoromaki

“Kapiti katoa to kotou akarongo . . . ki te akakoromaki.”​—2 PETERO 1:5, 6.

1, 2. Eaa te akakoromaki, e eaa te au Kerititiano ka anoano ei te reira?

TE VAITATA maira tikai te ra maata o Iehova. (Ioela 1:15; Zephania 1:14) Ei au Kerititiano e tauta nei i te akono tamou i to tatou tiratiratu ki te Atua, te tapapa marie nei tatou i taua tuatau ra me akakiteia to Iehova turanga ngateitei. I teia taime ra, te aro atu nei tatou i te makitakita, te akakino, te takinga kino anga e te mate, no to tatou akarongo. (Mataio 5:10-12; 10:22; Apokalupo 2:10) Te umuumu ra teia i te akakoromaki​—te tu kite i te autu i te kino. Te raurau maira te apotetoro ko Petero ia tatou e: “Kapiti katoa to kotou akarongo . . . ki te akakoromaki.” (2 Petero 1:5, 6) Ka anoanoia tatou kia akakoromaki, no te mea kua karanga a Iesu e: “Kareka te tāpu tikai e tae ua atu ki te openga ra, ka ora ïa.”​—Mataio 24:13.

² E kite katoa mai ana tatou i te maki, te mii, te mamae ngakau, e tetai atu au timataanga. Mei teaa rai to Satani mataora me ngere tatou i to tatou akarongo! (Luka 22:31, 32) Ma ta Iehova tauturu, ka rauka ia tatou i te akakoromaki i te au tu timataanga tukeke. (1 Petero 5:6-11) E akamanako ana i tetai au tupuanga tika tikai te akapapu maira e ka rauka ia tatou i te tapapa atu i to Iehova ra ma te akakoromaki e te akarongo ngaueue kore.

Kare te Maki i Tapu ia Ratou

3, 4. Oronga mai i tetai akaraanga i te akaari e ka rauka ia tatou i te tavini tiratiratu ia Iehova noatu te makimaki.

³ Kare te Atua e akaora temeio ana ia tatou i teia tuatau, inara e oronga mai ana aia kia tatou i te maroiroi kia akakoromaki i te maki. (Salamo 41:1-3) “Kua roa te tuatau i toku akamaaraanga,” i karanga ai a Sharon, “e kua riro te pereoo ei tokorua tamou noku. Mei te anau mai anga e aere atu, kua akangere te maki uti iaku i te rekarekaanga i toku tuatau tamarikianga.” I te kite mai anga ia Iehova e tana au taputou no te oraanga meitaki, kua oronga mai te reira i te manakonakoanga kia Sharon. Noatu e e ngata ana iaia i te tuatua e te aaere, e kite mai ana aia i te rekareka i roto i te angaanga orometua Kerititiano. Mei etai 15 mataiti i topa akenei, kua karanga mai aia e: “Penei ka kino ua atu rai toku maki, inara toku irinakianga ki roto i te Atua e toku pirianga kiaia ko toku irinakianga ia i te ora. Mei teaa rai toku mataora e tei rotopu au i to Iehova iti tangata e te rauka nei i tana turuturuanga tapu kore!”

⁴ Kua raurau te apotetoro ko Paulo i te au Kerititiano i Tesalonia kia “akapumaana atu i te ngakau taitaia.”  (1 Tesalonia 5:14) Te au mea mei te taitaia oonu e akatupu ana i te maki manako. I te 1993, kua tata a Sharon: “I te kite mai anga iaku uaorai ei ravenga puapinga kore tikai, kua . . . topa roa atu au ki roto i tetai aka maki manako no tetai toru mataiti. . . . Kua tae mai te akapumaana e te akoanga mei te aronga pakari. . . . Na roto i Te Punanga Tiaki, kua oronga maru ua mai a Iehova i te maramaanga no runga i te maki manako kino pakari. Ae, te manako ua maira aia i tona iti tangata e te marama ra i to tatou au manako.” (1 Petero 5:6, 7) Te tavini tiratiratu nei rai a Sharon i te Atua iaia e tapapa ra i te ra maata o Iehova.

5. Eaa te akapapuanga e ka rauka i te au Kerititiano i te akakoromaki i te taomianga pakari?

⁵ E rokoia ana tetai au Kerititiano e te taomianga pakari no te au apinga tei tupu ana kia ratou i roto i te oraanga. Kua kite ana a Harley i te ta anga kikino i roto i te Tamaki II o te Ao e kua moemoea kinoia no runga i te tamakianga. Iaia e moe ra, kua ava maata aia: “E akara meitaki! E matakite!” I te ara mai anga, kua mau takiri aia i te ou. Inara, kua rauka iaia i te aruaru i tetai oraanga tei tau ki te Atua, e aere rai kua iti mai te kino e te putuputu o te reira au moemoea.

6. Akapeea tetai Kerititiano i te aro atu anga i te au manamanata o te manako ngakau?

⁶ Tetai Kerititiano tei rokoia e te maki manako bipolar, kua kite mai e e aka angaanga tikai kia tutu aere mei tera ngutupa ki tera ngutupa. Inara, kua tamou marie ua atu rai aia, no te mea kua kite mai aia e ka riro te angaanga orometua ei ora nona e no te aronga tei ariu meitaki mai. (1 Timoteo 4:16) Tetai taime e aka angaanga iaia i te aere ua atu i te akatangi i te oe, inara kua karanga mai aia e: “I muri mai, kua rauka iaku i te akatere meitaki i toku au manako ngakau, kua aere atu ki tera mai ngutupa, e kua tamata akaou. Na te piri tamou atu anga ki roto i te angaanga orometua, kua akono tamou au i tetai oraanga pae vaerua tau ua.” Kua riro katoa te aere atu anga ki te au uipaanga ei akaaoanga, inara kua irinaki papu tikai teia taeake i te puapinga o te taokotaianga pae vaerua. No reira, kua tauta pakari aia kia tae atu ki reira.​—Ebera 10:24, 25.

7. Noatu e te mataku ra tetai pae i te tuatua i te ngai tangata me kore i te aere mai ki te uipaanga, akapeea ratou i te akaari anga i te akakoromaki?

⁷ E au matakuanga to tetai au Kerititiano​—e au matakuanga maata i tetai au turanga me kore i tetai au apinga. Ei akatauanga, penei e mataku ana ratou i te tuatua i te ngai tangata me kore kia aere mai ki te uipaanga. E akamanako ana e mei teaa rai te ngata kia ratou i te paupauanga i te au uipaanga Kerititiano me kore i te oronga anga i tetai akoanga i runga i te Apii Orometua Teokaratiki! I na, te akakoromaki ra rai ratou, e te ariki maata nei tatou i to ratou tae anga mai e ta ratou au rave anga.

8. Eaa tikai te mea puapinga rava i te autu anga i te tu ngata i te pae manako ngakau?

⁸ Penei ka tauturu te akangaroi e te moe meitaki i tetai tangata kia akakoromaki i te au tu ngata i te pae manako. Penei e mea meitaki kia kimi atu i te tauturu i te pae rapakau. Inara, te mea puapinga rava, ko te irinakianga ki te Atua na roto i te pure. “E tuku koe i taau apainga kia Iehova ra, e nana koe e tauturu mai,” te karanga ra a Salamo 55:22. “Kare rava aia e vaoo ua atu i te tangata tuatua-tika kia akangaueueia ra.” E no reira, “e irinaki kia Iehova ma to ngakau katoa ra.”​—Maseli 3:5, 6.

Akakoromaki Anga i te Mamae Ngakau

9-11. (a) Eaa te ka tauturu ia tatou i te akakoromaki i te taitaia me mate tetai tei akaperepereia? (e) Akapeea te akaraanga o Ana i te tauturuanga ia tatou kia akakoromaki i te mamae ngakau?

⁹ Me akatakake ana te mate i te au mema pamiri, e akatupu ana te reira ngere maata i te taitaia oonu. Kua aue a Aberahama i te mate anga o tana vaine akaperepere, ko Sara. (Genese 23:2) Kua “aue [katoa] iorā” te tangata apa kore ko Iesu i te mate anga tona taeake ko Lazaro. (Ioane 11:35) E no reira e mea natura ua i te kite mai i te maromaroa me mate ana tetai tangata taau e akaperepere ra. Inara, kua kite te au Kerititiano e e tuakaouanga tetai. (Angaanga 24:15) No reira, kare ratou e “taitaia, mei tetai papaki kare o ratou tiakianga ra.”​—1 Tesalonia 4:13.

¹⁰ Akapeea tatou i te akonoanga i te mamae ngakau? Penei ka tauturu mai teia akatutuanga. Tei matauia kare tatou e kite mai ana i te maromaroa maata me aere ana tetai taeake i tetai teretereanga, i te mea ka kite akaou tatou iaia me oki mai aia. I te manako akapera anga i te mate o tetai Kerititiano tiratiratu, penei ka akaiti mai i to tatou mamae no te mea kua kite oki tatou e e akapapuanga tona no te tuakaouanga.​—Koheleta 7:1.

 ¹¹ Na te irinaki pu tikai anga ki runga i “te Atua nona anake te pumaana” ka tauturu ia tatou i te akakoromaki i te mamae ngakau. (2 Korinetia 1:3, 4) Ka tauturu katoa te akamanakoanga i ta te vaine takaua ko Ana i rave i te anere mataiti mua. Kua riro mai aia ei vaine takaua i muri ake e itu mataiti ua i te akaipoipoanga. Inara i te 84 mataiti, te oronga ra rai aia i te tavinianga tapu kia Iehova i te iero. (Luka 2:36-38) Kare e ekokoanga e kua tauturu te reira oraanga tapu iaia i te akono i te mamae e te maromaroa. Te piri putuputu anga ki roto i te au angaanga Kerititiano, kapiti mai te angaanga tutu anga i te Patireia, ka tauturu ia tatou i te akakoromaki i te au tupuanga no te mamae ngakau.

Akono Anga i te Au Tu Timataanga Tukeke

12. Eaa te timataanga ta tetai au Kerititiano i akakoromaki te piri atura ki te oraanga pamiri?

¹² E akakoromaki ana tetai au Kerititiano i te au timataanga te piri atura ki te oraanga pamiri. Ei akatauanga, me akaturi ana tetai tokorua, mei teaa tikai te au tupuanga kino pakari ta te reira ka akatupu! Penei no te poitirere e te mamae, kare e rauka i te tokorua akaipoipo pikikaaia i te moe meitaki e penei ka aueue ua rai aia. Penei te raveanga i te au angaanga mama ua, ka riro ei taomianga tikai e ka tupu mai te au tarevake me kore te au kino tupu poitirere ua. Penei kare e rauka te tokorua tiama i te kaikai, penei ka topa tona kopapa, e penei ka taitaia i te pae manako. Penei e mea ngata i te piri atu anga ki roto i te au angaanga Kerititiano. E mei teaa rai te akakeuanga maata ta teia e akatupu ana ki te tamariki!

13, 14. (a) Eaa te akamaroiroianga tei rauka ia koe mei te pureanga a Solomona i te ai anga o te iero? (e) Eaa tatou ka pure ei no te vaerua tapu?

¹³ Me kite mai tatou i te reira au timataanga, e oronga mai ana a Iehova i te tauturu ta tatou e anoano ra. (Salamo 94:19) E akarongo ana te Atua i te au pure a tona iti tangata, mei tei akaariia mai i roto i te pure a te Ariki ko Solomona i te ai anga o te iero o Iehova. Kua pure a Solomona ki te Atua e: “Ko te au pure katoa e te au patianga e patiia e te au tangata katoa, e Iseraela nei i te tangata katoa e to au tangata katoa i kite i te kino o tona uaorai ngakau, e kua oora tika mai i ona puke rima ki teianei are: Ei reira koe e akarongo mai ei i runga i te rangi i te ngai taau e noo ra, ka akakore mai ei i te ara, e e rave, e akatau mai oki koe i te tuatua ki te tangata katoa kia tau ki tona aerenga, ko koe oki te kite i tona ngakau; ko koe, ko koe anake ra, tei kite i te ngakau o te tamariki katoa a te tangata nei: Kia mataku oki ratou ia koe i te au rā katoa i to ratou noo anga i te enua taau i oronga  mai ki to matou nei ai metua ra.”​—1 Ariki 8:38-40.

¹⁴ E aka tauturu tikai kia pure ua atu rai no te vaerua tapu. (Mataio 7:7-11) Te ua o te vaerua, te kapiti maira te au tu mei te rekareka e te au. (Galatia 5:22, 23) Mei teaa tikai te pumaana i te kiteanga e te pau maira to tatou Metua i te rangi i ta tatou au pure​—kua tupauia te mamae ki te rekareka, e kua tupauia te makitakita ki te au!

15. Eaa te au tuatua tapu te ka tauturu i te akamaru i to tatou apiapi?

¹⁵ E tupu katoa ana rai te apiapi me ka akakoromaki tatou i te taomianga maata. Inara ka rauka tetai o teia au manamanata i te akamaruia me akamanako tatou i teia au tuatua a Iesu e: “E teianei, e ako atu au ia kotou, auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa . . . . E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:25, 33, 34) Te raurau maira te apotetoro ko Petero ia tatou kia ‘uri i to tatou tumatetenga katoa ki runga i te Atua; koia oki te tiaki mai ia tatou.’ (1 Petero 5:6, 7) E mea tau kia akono i te au tautaanga kia akatikatika i tetai manamanata. Inara, i muri ake i te rave anga i te ka rauka ia tatou, e puapinga ake i te pure i te akamanako ua atu i te manamanata. “E uri atu i to aerenga ki runga ia Iehova; e irinaki iaia, e nana e akatupu i te reira,” i imene ei te tata taramo.​—Salamo 37:5.

16, 17. (a) Eaa tatou ka kore roa ai e ngere takiri i te apiapi? (e) Eaa ta tatou ka kite mai me taangaanga tatou ia Philipi 4:6, 7?

¹⁶ Kua tata a Paulo e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) E tika rai, kare te au uanga apa a Adamu e kore takiri i te apiapi. (Roma 5:12) Kua riro te au vaine ngati Heta a Esau “ei mamae ngakau” ki te nga metua akamori i te Atua o Esau, ko Isaaka e Rebeka. (Genese 26:34, 35) Kua akatupu katoa te maki i te apiapi ki taua au Kerititiano mei ia Timoteo e Terophimo rai. (1 Timoteo 5:23; 2 Timoteo 4:20) Kua apiapi katoa a Paulo i tona au taeake irinaki. (2 Korinetia 11:28) Inara ka akarongo ua rai “tei akarongo i te pure ra” ki te aronga e aroa ra iaia.​—Salamo 65:2.

¹⁷ Ia tatou e tapapa atura i to Iehova ra, tei ia tatou te turuturuanga e te pumaana mei “te Atua au ra.” (Philipi 4:9) “E Atua takinga-meitaki, e te aroa ua,” a Iehova e te ‘meitaki ra e te papa ua ra i te akakore mai i te ara,’ e ‘kua kite oki aia e, e one ua tatou.’ (Exodo 34:6; Salamo 86:5; 103:13, 14) E no reira kia ‘akakite tatou kiaia i to tatou anoano,’ no te mea ka taki atu teia ki te rauka anga ia tatou to “te Atua au ra”​—te tu maru tei runga ravao i ta te tangata ka marama.

18. Mei tei tataia ia Iobu 42:5, akapeea e rauka ai i te “kite” i te Atua?

¹⁸ Me pauia ta tatou au pure, kua kite tatou e tei ia tatou te Atua. I muri ake i to Iobu akakoromaki anga i tona au timataanga, kua karanga aia e: “I kite akenei au ia koe [e Iehova] i te kite taringa nei; i teianei ra, te [“kite,” NW] nei taku mata ia koe.” (Iobu 42:5) Ma te ngakau marama, te akarongo, e te arikianga, ka rauka ia tatou i te akamanako i to te Atua akonoanga ia tatou e ka ‘kite’ mai iaia ma tetai tu kitea koreia i mua na. Mei teaa atura taua pirianga i te oronga mai anga kia tatou i te au o te ngakau e te manako!

19. Eaa te ka tupu me ‘uri tatou i to tatou tumatetenga katoa ki runga ia Iehova’?

¹⁹ Me ‘uri tatou i to tatou tumatetenga katoa ki runga ia Iehova,’ ka rauka ia tatou i te akakoromaki i te au timataanga ma te tu maru oonu te paruru ra i to tatou ngakau e te manako. I roto tikai i to tatou ngakau akatutuia, ka kite mai tatou i te tu rangatira mei te tu emiemi, te mataku, e te poitirere. Kare to tatou manako e tamanamanataia e te tu ngata me kore te tu apiapi.

20, 21. (a) Eaa te akapapuanga no runga i te tu maru o Setephano e oronga maira i te aro atu anga i te takinga kino anga? (e) E taiku mai i tetai akaraanga no teia tuatau no te tu maru i te akakoromaki i te au timataanga.

²⁰ Kua akaari te pipi ko Setephano i te tu maru i te akakoromakianga i tetai timataanga maata o tona akarongo. I mua ake i te oronga anga aia i te akakiteanga openga, pouroa te aronga i roto i te Sunederi kua “akara atura i tona mata mei te mata o te angela ra.” (Angaanga 6:15) E maru tikai tona akaraanga​—mei to te angera rai, e karere na te Atua. I muri ake i to Setephano akakite atea anga i to ratou apa i to Iesu matenga, kua  “motu atura to ratou ngakau i te riri; pakati atura to ratou nio iaia.” ‘Ki akera aia i te vaerua tapu,’ kua “akara tamou tikai atura [a Setephano] ki runga i te rangi, e kite atura i te kakā o te Atua, e ia Iesu i te tu anga i te rima katau o te Atua ra.” Kua akamaroiroiia e te reira orama, kua tiratiratu ua atu rai a Setephano e mate ua atu aia. (Angaanga 7:52-60) Noatu e kare tatou e kite mai ana i te au orama, ka rauka ia tatou i te tu maru tei orongaia mai e te Atua me takinga kinoia.

²¹ E akamanako ana i te au manako o tetai au Kerititiano tikai tei tamateia e te Nazi i te tuatau o te Tamaki II o te Ao. I te akakiteanga i tona tua i roto i te akavaanga, kua karanga mai tetai e: “Kua tukunaia mai te utunga no te mate. Kua akarongo au, e oti i muri akera i toku tuatua anga i te au tuatua, ‘Kia tiratiratu ua e mate ua atu,’ e tetai atu au tuatua aere a to tatou Atu, kua oti te au mea katoatoa. . . . Inara auraka e manamanata atu i te reira i teianei. No te mea kua rauka iaku i taua au ra, taua tu maru ra, kare rava e rauka ia koe i te akamanako atu!” Tetai Kerititiano mapu te aro atura i te mate na te tipu anga i te katu, kua tata atu ki tona nga metua e: “Kua pati ke ana te tuaero. Ka rauka iaku i te taui i toku manako. A! ka mataora akaou ainei au i te noo i roto i teianei ao i muri ake i toku uuna anga i to tatou Atu? Papu e kare rava! Inara kia papu ia korua e te akaruke nei au i teianei ao ma te mataora e te au.” Kare e ekoko e e turuturu ana a Iehova i tona au tavini tiratiratu.

Ka Rauka ia Koe i te Akakoromaki!

22, 23. Eaa te ka papu ia koe, ia koe e tapapa atura i to Iehova ra ma te akakoromaki?

²² Penei kare koe e aro atu i te au akaaoanga ta tatou i akamanako ake nei. Inara, kua tano rai a Iobu e tangata mataku i te Atua i tona tuatua anga e: “Ko te tangata ta te vaine e anau nei, e iti ua ona puke rā, e te ki oki i te pekapeka.” (Iobu 14:1) Penei e metua koe te angaanga pakari ra i te oronga ki taau tamariki i te aratakianga pae vaerua. E akakoromaki ana ratou i te au timataanga i te apii, inara mei teaa rai toou mataora me rauka ia ratou i te aru i te tu tiratiratu no Iehova e tana au kaveinga tuatua tika! Penei te kite maira koe i te au akaaoanga e te au timataanga i roto i te ngai angaanga. Inara, ka rauka teia au turanga e tetai atu i te akakoromakiia, no te mea te ‘apai ra [a Iehova] i te apainga na kotou i te au ra takitai.’​—Salamo 68:19, NW.

²³ Penei e akamanako ana koe ia koe uaorai ei tangata noa ua, inara e akamanako ana e kare rava e ngaropoina ia Iehova taau angaanga e te aroa taau i akaari no tona ingoa tapu. (Ebera 6:10) Ma tana tauturu, ka rauka ia koe i te akakoromaki i te au timataanga no te akarongo. E no reira e akamaara ua i roto i taau au pure e taau parani i te rave anga i te anoano o te Atua. Ka papu ia koe i reira te akameitakianga e te turuturuanga tu-Atua noou ia koe e tapapa atura i to Iehova ra ma te akakoromaki.

Akapeea Koe me Pau?

• Eaa te au Kerititiano ka anoano ei te akakoromakianga?

• Eaa te ka tauturu ia tatou i te akakoromaki i te maki e te mamae ngakau?

• Akapeea te pure i te tauturu anga ia tatou i te akakoromaki i te au timataanga?

• Eaa ka rauka ai i te tapapa atu i te ra o Iehova ma te akakoromaki?

[Au Uianga Apii]

[Tutu i te kapi 29]

Te irinakianga ia Iehova e tauturu ana ia tatou i te akakoromaki i te mamae ngakau

[Tutu i te kapi 31]

E tauturu ana te pure ngakau tae ia tatou kia akakoromaki i te au timataanga no te akarongo