Ho Letela Letsatsi la Jehova ka Mamello
Ho Letela Letsatsi la Jehova ka Mamello
“Tumelong ea lōna le eketse . . . mamello.”—2 PETROSE 1:5, 6.
1, 2. Mamello ke eng, hona ke hobane’ng ha ho hlokahala hore Bakreste ba be le eona?
LETSATSI le leholo la Jehova le haufi haholo. (Joele 1:15; Sofonia 1:14) Joaloka Bakreste ba entseng qeto ea ho lula re tšepahala ho Molimo, re letetse ka tabatabelo nako eo ka eona ho tla tlosoa qoso bobusing ba Jehova. Khabareng, re hloiloe, rea nyelisoa, rea hlorisoa ebile re bolaeloa tumelo ea rōna. (Matheu 5:10-12; 10:22; Tšenolo 2:10) Maemo ao a hloka hore re be le mamello—e leng matla a ho tiisetsa mathata. Ha moapostola Petrose a bua le rōna o re: “Tumelong ea lōna le eketse . . . mamello.” (2 Petrose 1:5, 6) Ho hlokahala hore re be le mamello hobane Jesu o itse: “Ea mameletseng ho isa bofelong ke eena ea tla pholoha.”—Matheu 24:13.
2 Re boetse rea kula, rea shoeloa ’me re hlaheloa ke liteko tse ling. Satane o ne a tla thaba hakaakang haeba re ne re ka felloa ke tumelo! (Luka 22:31, 32) Ha re tšehelitsoe ke Jehova, re ka mamella liteko tsa mefuta-futa. (1 Petrose 5:6-11) Ak’u nahane ka liphihlelo tse ling tse etsahetseng bophelong tse bontšang hore re ka letela letsatsi la Jehova ka mamello le ka tumelo e sa thekeseleng.
Bokuli ha Boa ka ba ba Thibela
3, 4. Fana ka mohlala o bontšang hore re ka sebeletsa Jehova ka botšepehi ho sa tsotellehe ho kula.
3 Hona joale Molimo ha a re folise ka mohlolo, empa o re fa matla a ho mamella ho kula. (Pesaleme ea 41:1-3) Sharon o ile a re: “Ho ea kamoo ke hopolang kateng, ke phetse ka setulo sa liqhoala bophelo bohle ba ka. Kaha ke hlahile ke holofetse bokong, sena se ile sa etsa hore ke se ke ka thabela menyaka ea bongoana.” Sharon o ile a ba le tšepo ha a ithuta ka Jehova le ka litšepiso tsa hae tsa bophelo bo phethahetseng. Le hoja a e-na le bothata ba ho bua le ba ho tsamaea, o thabela tšebeletso ea Bokreste. Lilemong tse 15 tse fetileng, o ile a re: “Leha bophelo ba ka bo ka ’na ba tsoela pele ho fokola, empa seikokotlelo sa ka ke ho tšepa Molimo le ho ba le kamano e ntle le eena. Ka sebele ke thabela ho ba e mong oa batho ba Jehova le hore ebe o ntšehetsa ka botšepehi!”
4 Moapostola Pauluse o ile a khothalletsa Bakreste ba Thesalonika hore ba “bue ka mokhoa o tšelisang le meea e tepeletseng maikutlo.” (1 Bathesalonika 5:14) Maemo a kang ho nyahama habohloko a ka tetebetsa motho maikutlo. Ka 1993, Sharon o ile a ngola a re: “Kaha ke ne ke ikutloa ke se na thuso ka ho feletseng, ke ile ka . . . qeta lilemo tse tharo ke tetebetse maikutlo. . . . Baholo ba ile ba nkhothatsa le ho nkeletsa. . . . Ka lerato Jehova o ile a sebelisa Molula-Qhooa ho re hlaha leseling mabapi le ho tetebela maikutlo. E, o tsotella batho ba hae ’me o utloisisa kamoo re ikutloang kateng.” (1 Petrose 5:6, 7) Sharon o sa ntse a sebeletsa Molimo ka botšepehi ha a ntse a lebeletse letsatsi la Jehova le leholo.
5. Ke eng e bontšang hore Bakreste ba ka mamella khatello e khōlō ea maikutlo?
5 Bakreste ba bang ba na le khatello e khōlō ea maikutlo ka lebaka la lintho tse ba hlahetseng bophelong. Harley o ile a bona ntoa e mahlo-mafubelu nakong ea Ntoa ea II ea Lefatše ’me o ne a phofa lintho tse amanang le ntoa. O ne a ka tloha a hoeletsa a robetse, a re: “Bona! Itlhokomele!” ’Me ha a re hlasi! a be a re tee! ke mofufutso. Leha ho le joalo, o ile a khona ho latela tataiso ea Molimo bophelong, ’me ka mor’a nako o ne a se a sa lore litoro tse mpe hakaalo ebile a se a sa li lore khafetsa.
6. Mokreste e mong o ile a sebetsana joang le bothata ba khatello ea maikutlo?
6 Mokreste e mong ea ileng a tšoaroa ke lefu la ho loantšana ha maikutlo ho ferekanyang kelello o ile a fumana ho le thata haholo ho bolela ka ntlo le ntlo. Leha ho le joalo, o ile a mamella hobane a elelloa hore bophelo ba hae le ba batho ba amohelang molaetsa bo itšetlehile ka tšebeletso eo. (1 Timothea 4:16) Ka linako tse ling ho ne ho e-ba thata le hore a kokote monyako feela, empa o ile a re: “Ka mor’a nakoana, ke ne ke khona ho laola maikutlo a ka, ke ntan’o ea ntlong e latelang, ebe ke leka hape. Ke ile ka lula ke le matlanyana moeeng ka lebaka la ho tsoela pele ke kopanela tšebeletsong.” Ho ea libokeng e ne e le phephetso, empa mora enoa oabo rōna o ne a kholisehile hore ke habohlokoa hore a kopanele le barab’abo ba moea. Kahoo, o ile a etsa boiteko bo hlokahalang ba ho ba teng libokeng.—Baheberu 10:24, 25.
7. Le hoja ba bang ba tšaba ho bua phatlalatsa kapa ho ea sebokeng, ba bontša mamello joang?
7 Bakreste ba bang ba tšaba maemo le lintho tse itseng ka ho feteletseng. Ka mohlala, ba ka ’na ba tšaba ho bua phatlalatsa esita le ho ea sebokeng. Ak’u inahanele hore na ho thata hakaakang hore ba arabe libokeng tsa Bokreste kapa ba fane ka puo Sekolong sa Tšebeletso sa Puso ea Molimo! Leha ho le joalo, ba mameletse, ’me re ikutloa re khothetse haholo ha ba le teng ebile ba kopanela ho tsona.
8. Ke eng e sebetsang hamolemo ha motho a e-na le khatello ea maikutlo?
8 Ho ka ’na ha hlokahala hore motho a phomole ’me a robale haleletsana e le hore a mamelle khatello ea maikutlo. Ho ka ’na ha e-ba molemo hore a batle thuso ea lingaka. Leha ho le joalo, ntho e sebetsang hamolemo ke ho itšetleha ka Molimo ka thapelo. Pesaleme ea 55:22 e re: “Lahlela moroalo oa hao ho Jehova, o tla u tšehetsa. Le ka mohla a ke ke a lumella ea lokileng hore a therekele.” Kahoo, “tšepa Jehova ka pelo ea hao eohle.”—Liproverbia 3:5, 6.
Ho Mamella ha re Shoetsoe
9-11. (a) Ke eng e ka re thusang ho mamella ho sareloa ha re shoetsoe? (b) Mohlala oa Anna o ka re thusa joang ho mamella ha re shoetsoe?
9 Ha litho tsa lelapa li arohanngoa ke lefu, tahlehelo e khōlō joalo e ka baka masoabi a maholo. Abrahama o ile a llela mosali oa hae eo a neng a mo rata, Sara, ha a e-shoa. (Genese 23:2) Esita le motho ea phethahetseng Jesu o ile “a ntša meokho” ka mor’a hore Lazaro motsoalle oa hae a shoe. (Johanne 11:35) Kahoo, ke ha tlhaho hore u utloe bohloko ha u shoeloa ke morutuoa oa hao. Leha ho le joalo, Bakreste baa tseba hore ho tla ba le tsoho. (Liketso 24:15) Kahoo, ha ba ‘sareloe feela joalokaha ba bang kaofela ba se nang tšepo le bona ba sareloa.’—1 Bathesalonika 4:13.
10 Re ka sebetsana joang le ho shoeloa? Mohlomong mohlala ona o ka ba molemo. Hangata ha re hloname ka nako e telele ha motsoalle oa rōna a nka leeto, hobane re lebeletse ho boela re mo bona ha a khutla. Ho talima lefu la Mokreste ea tšepahalang ka tsela eo ho ka ’na ha etsa hore re se ise lipelo mafisa hobane rea tseba hore o tla tsoha.—Moeklesia 7:1.
11 Ho itšetleha ka ho feletseng ka “Molimo oa matšeliso ’ohle” ho tla re thusa ho mamella ha re shoetsoe. (2 Bakorinthe 1:3, 4) Ntho e ’ngoe e tla re thusa ke ho nahana ka se ileng sa etsoa ke mohlolohali oa lekholong la pele la lilemo ea bitsoang Anna. E ile ea e-ba mohlolohali lilemo tse supileng feela ka mor’a hore a nyaloe. Empa ha a le lilemo li 84, o ne a ntse a etsetsa Jehova tšebeletso e halalelang tempeleng. (Luka 2:36-38) Ha ho pelaelo hore bophelo boo ba boinehelo bo ile ba mo thusa hore a sebetsane le ho siama le bolutu. Ho kopanela mesebetsing ea Bokreste kamehla hammoho le mosebetsing oa ho bolela ka ’Muso, ho ka re thusa ho mamella liphello tsa ho shoeloa.
Ho Sebetsana le Liteko Tse sa Tšoaneng
12. Bakreste ba bang ba mameletse teko ea mofuta ofe e amanang le bophelo ba lelapa?
12 Bakreste ba bang ba lokela ho mamella liteko tse amanang le bophelo ba lelapa. Ka mohlala, haeba molekane a feba, ka sebele seo se ka ama lelapa habohloko. Ka lebaka la ho sithabela le ho sareloa, molekane ea tsoiloeng tlaase a ka ’na a hlobaela ’me a bokolla habohloko. A ka ’na a thatafalloa ke ho etsa mesebetsi e bonolo hoo a ka etsang liphoso kapa a baka likotsi. Molekane ea se nang molato a ka ’na a felloa ke takatso ea lijo, a theoha ’meleng ’me a ba le khatello ea maikutlo. A ka ’na a thatafalloa ho etsa mesebetsi ea Bokreste. ’Me ruri seo se ka ama bana ba bona haholo!
13, 14. (a) Thapelo eo Solomone a ileng a e etsa ha ho khakoloa tempele e u khothatsa joang? (b) Ke hobane’ng ha re rapella moea o halalelang?
13 Ha re thulana le liteko tsa mofuta ona, Jehova o re fa thuso eo re e hlokang. (Pesaleme ea 94:19) Molimo o utloa lithapelo tsa batho ba hae, joalokaha thapelo eo Morena Solomone a ileng a e etsa ha ho khakoloa tempele ea Jehova e bontša seo. Solomone o ile a rapela Molimo, a re: “Thapelo leha e le efe, kōpo leha e le efe ea mohau e ka etsoang ke motho leha e le ofe kapa sechaba sohle sa hao sa Iseraele, kahobane e mong le e mong o tseba lefu la pelo ea hae, ’me a otlollela liatla ntlong ena, joale e se eka u ka utloa u le maholimong, sebaka sa hao se tiisitsoeng sa bolulo, ’me u tšoarele le ho nka bohato ’me u fe e mong le e mong ho ea ka litsela tsohle tsa hae, hobane u tseba pelo ea hae (etsoe ke uena feela ea tsebang hantle lipelo tsa bara bohle ba moloko oa batho); e le hore ba ka u tšaba ka matsatsi ’ohle ao ba phelang ka ’ona naheng eo u e fileng baholo-holo ba rōna.”—1 Marena 8:38-40.
14 Ho ka ba molemo ka ho khetheha hore re ’ne re rapelle moea o halalelang. (Matheu 7:7-11) Tholoana ea moea e akarelletsa litšobotsi tse kang thabo le khotso. (Bagalata 5:22, 23) Re ikutloa re imolohile hakaakang ha Ntate oa rōna oa leholimo a araba lithapelo tsa rōna! Thabo e nkela ho sareloa sebaka, ’me khotso e nkela matšoenyeho sebaka.
15. Ke mangolo afe a ka re thusang hore re khobe matšoafo?
15 Re ka lebella matšoenyeho a itseng ha re tlameha ho mamella khatello e khōlō ea maikutlo. Empa bonyane re ka khoba matšoafo ho ea bohōleng bo itseng haeba re hopola mantsoe ana a Jesu: “Khaotsang ho tšoenyeha ka meea ea lōna hore na le tla ja’ng kapa le tla noa’ng, kapa ka ’mele ea lōna hore na le tla apara’ng. . . . Joale, le ’ne le batle ’muso pele le ho loka ha [Molimo], ’me lintho tsena tse ling tsohle le tla li ekeletsoa.” (Matheu 6:25, 33, 34) Moapostola Petrose o re khothalletsa hore re ‘lahlele matšoenyeho ’ohle a rōna ho Molimo, hobane oa re tsotella.’ (1 Petrose 5:6, 7) Ho nepahetse hore re etse boiteko ba ho rarolla bothata. Leha ho le joalo, ha re se re entse seo re ka se khonang, re lokela ho rapela ho e-na le ho tšoenyeha. Mantsoe a pina ea mopesaleme a re: “Rōlela tsela ea hao ho Jehova, u itšetlehe ka eena, ’me o tla nka bohato.”—Pesaleme ea 37:5.
16, 17. (a) Ke hobane’ng ha re ke ke ra lokoloha ka ho feletseng matšoenyehong? (b) Haeba re sebelisa keletso ea Bafilipi 4:6, 7 re tla ba le eng?
16 Pauluse o ile a ngola a re: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” (Bafilipi 4:6, 7) Bonneteng, litloholo tse sa phethahalang tsa Adama li ke ke tsa lokoloha ka ho feletseng matšoenyehong. (Baroma 5:12) Basali ba Esau ba Bahethe ba ne “ba utloisa moea oa Isaka le Rebeka bohloko,” e leng batsoali ba Esau ba neng ba tšaba Molimo. (Genese 26:34, 35) E tlameha ebe bokuli bo ne bo bakela Bakreste ba kang Timothea le Trofimase matšoenyeho. (1 Timothea 5:23; 2 Timothea 4:20) Pauluse o ne a tšoenyehile ka balumeli-’moho le eena. (2 Bakorinthe 11:28) Empa ka linako tsohle “Ea Utloang thapelo” o haufi le ba mo ratang.—Pesaleme ea 65:2.
17 Ha re ntse re letetse letsatsi la Jehova, “Molimo oa khotso” oa re tšehetsa ebile oa re tšelisa. (Bafilipi 4:9) Jehova o ‘mohau ebile o mosa,’ o ‘molemo ’me o itokiselitse ho tšoarela’ ebile “oa hopola hore re lerōle.” (Exoda 34:6; Pesaleme ea 86:5; 103:13, 14) Kahoo a re ‘mo tsebiseng likōpo tsa rōna tse matla,’ kaha sena se tla etsa hore re be le “khotso ea Molimo”—e leng khutso e fetang kutloisiso ea motho.
18. Ke joang re ka khonang ho “bona” Molimo ho latela se boletsoeng ho Jobo 42:5?
18 Ha lithapelo tsa rōna li arajoa, rea tseba hore Molimo o na le rōna. Ka mor’a hore Jobo a mamelle liteko, o ile a re: “Ke utloile ka uena [Jehova] ka monyenyetsi, empa joale leihlo la ka lea u bona.” (Jobo 42:5) Ka leihlo la kelello, ka tumelo le ka teboho, re ka nahanisisa ka tsela eo Molimo a sebelisanang le rōna ka eona ’me ra mo “bona” ka tsela eo ho seng mohla re kileng ra mo bona ka eona. Ka sebele kamano e haufi joalo e etsa hore lipelo le likelello tsa rōna li be le khotso.
19. Ho tla etsahala’ng haeba re ‘lahlela matšoenyeho ’ohle a rōna ho Jehova’?
19 Haeba re ‘lahlela matšoenyeho ’ohle a rōna ho Jehova,’ re ka mamella liteko re e-na le khutso ea kelello e lebelang lipelo le matla a rōna a ho nahana. Botebong ba lipelo tsa rōna tsa tšoantšetso, re ke ke ra tšoenyeha, ra tšoha kapa ra ferekana. Likelello tsa rōna li ke ke tsa khathatseha ka lebaka la ho tsieleha kapa ho tšoenyeha.
20, 21. (a) Taba ea Setefane e fana ka bopaki bofe mabapi le khutso eo re bang le eona nakong ea mahloriso? (b) Fana ka mohlala oa mehleng ena oa ba ileng ba mamella liteko ba e-na le khutso.
20 Morutuoa Setefane o ile a bonahala a khutsitse ha a ntse a mameletse teko e sehlōhō ea tumelo. Pele a fana ka bopaki ba ho qetela, bohle ba neng ba le ka har’a Sanhedrine ba ile ba “bona hore sefahleho sa hae se ne se le joaloka sefahleho sa lengeloi.” (Liketso 6:15) Sefahleho sa hae se ne se elile—joaloka sa lengeloi, moromuoa oa Molimo. Ka mor’a hore Setefane a bontše hore baahloli bana ba ne ba le molato ka ho bolaea Jesu, ba ile “ba ikutloa ba hlabehile lipelo ’me ba qala ho mo tsikitlanyetsa meno.” “A tletse moea o halalelang,” Setefane o ile “a talima leholimong ’me a re heli! eaba o bona khanya ea Molimo le ea Jesu a eme ka letsohong le letona la Molimo.” Ka lebaka la ho matlafatsoa ke pono eo, Setefane o ile a tšepahala ho fihlela lefung. (Liketso 7:52-60) Le hoja re sa bone lipono, ha re hlorisoa re ka ba le khutso eo Molimo a fanang ka eona.
21 Ak’u nahane ka mantsoe a Bakreste ba bang ba ileng ba bolaoa ke Manazi nakong ea Ntoa ea II ea Lefatše. E mong o ile a bua tjena ka se mo etsahaletseng ha a le lekhotleng: “Ke ahloletsoe lefu. Ke ile ka mamela, ’me ka mor’a hore ke bue mantsoe a reng ‘U tšepahale ho isa lefung,’ le mantsoe a mang a seng makae a Morena oa rōna, eaba ke phetho. . . . Empa le se ke la tšoenyeha ka hoo. Ke na le khotso le khutso eo ho leng thata hore le ka e utloisisa!” Mocha e mong oa Mokreste ea neng a tlil’o khaoloa hlooho o ile a ngolla batsoali ba hae mantsoe ana: “E se e le ka morao ho khitla. Ke sa ntsane ke e-na le nako ea ho hlanohela maikutlo a ka. Na nka boetse ka thaba lefatšeng lee ka mor’a hore ke latole Morena oa rōna? Le hanyenyane! Empa joale le ka kholiseha hore ke siea lefatše lena ka thabo le khotso.” Ha ho potang hore Jehova o tšehetsa bahlanka ba hae ba tšepahalang.
U ka Mamella!
22, 23. Ke eng eo u ka kholisehang ka eona ha u ntse u letetse letsatsi la Jehova ka mamello?
22 U ka ’na ua se ke ua tobana le mathata ao re buileng ka ’ona. Leha ho le joalo, Jobo ea tšabang Molimo o ne a nepile ha a re: “Motho, ea tsoetsoeng ke mosali, o phela hakhutšoanyane ’me o khotše likhathatso.” (Jobo 14:1) Mohlomong u motsoali ea sebetsang ka thata hore u tataise bana ba hao linthong tsa moea. Ba lokela ho mamella liteko sekolong, empa ruri ua thaba ha ba emela Jehova le ho tšehetsa litekanyetso tsa hae tse lokileng ka tieo! Ho ka etsahala hore u tobana le mathata le liteko mosebetsing. Leha ho le joalo, u ka mamella maemo ana le a mang, hobane ‘letsatsi le leng le le leng Jehova o u jarela mojaro.’—Pesaleme ea 68:19.
23 U ka ’na ua nka hore u motho feela ea pala, empa hopola hore le ka mohla Jehova a ke ke a lebala mosebetsi oa hao le lerato leo u le bontšang bakeng sa lebitso la hae le halalelang. (Baheberu 6:10) Ka thuso ea hae, u ka mamella liteko tsa tumelo. Kahoo, kenyelletsa taba ea ho etsa thato ea Molimo lithapelong tsa hao le mererong ea hao. Joale u ka kholiseha hore Molimo o tla u hlohonolofatsa le ho u tšehetsa ha u ntse u letetse letsatsi la Jehova ka mamello.
U ka Araba Joang?
• Ke hobane’ng ha ho hlokahala hore Bakreste ba mamelle?
• Ke eng e ka re thusang ho mamella bokuli le ho shoeloa?
• Thapelo e re thusa joang hore re mamelle liteko?
• Ke hobane’ng ha ho khoneha ho letela letsatsi la Jehova ka mamello?
[Lipotso Tsa Sehlooho se Ithutoang]
[Setšoantšo se leqepheng la 29]
Ho itšetleha ka Jehova ho re thusa ho mamella ha re shoetsoe
[Setšoantšo se leqepheng la 31]
Thapelo e tsoang botebong ba pelo e re thusa hore re mamelle liteko tsa tumelo