Ku Rindzela Siku Ra Yehovha Hi Ku Tiyisela
Ku Rindzela Siku Ra Yehovha Hi Ku Tiyisela
“Eripfumelweni ra n’wina engetelani . . . ku tiyisela.”—2 PETRO 1:5, 6.
1, 2. I yini ku tiyisela, naswona ha yini Vakreste va fanele va va ni mfanelo leyi?
SIKU lerikulu ra Yehovha ri tshinele ngopfu. (Yuwele 1:15; Sofaniya 1:14) Tanihi Vakreste lava tiyimiseleke ku tshama va tshembekile eka Xikwembu, hi wu rindzele hi mahlo-ngati nkarhi lowu vuhosi bya Yehovha byi nga ta lweriwa. Sweswi, ha vengiwa, hi sandziwa, hi xanisiwa ni ku dlayiwa hikwalaho ka ripfumelo ra hina. (Matewu 5:10-12; 10:22; Nhlavutelo 2:10) Leswi swi lava leswaku hi tiyisela—leswi vulaka ku yima hi tiyile loko hi langutane ni maxangu. Muapostola Petro wa hi khutaza: “Eripfumelweni ra n’wina engetelani . . . ku tiyisela.” (2 Petro 1:5, 6) Hi fanele hi tiyisela, hikuva Yesu u te: “Loyi a tiyiseleke ku fika emakumu hi yena la nga ta ponisiwa.”—Matewu 24:13.
2 Nakambe hi karhatiwa hi mavabyi, ku feriwa ni miringo yin’wana. Sathana a a ta tsaka hakunene loko ho heleriwa hi ripfumelo! (Luka 22:31, 32) Nseketelo wa Yehovha wu nga hi pfuna ku tiyisela miringo yo hambana-hambana. (1 Petro 5:6-11) Xiya mintokoto ya xiviri leyi kombisaka leswaku hi nga rindzela siku ra Yehovha hi ku tiyisela na hi ripfumelo leri tiyeke.
Mavabyi A Ma Va Sivelanga
3, 4. Nyika xikombiso lexi kombisaka leswaku hi nga tirhela Yehovha hi ku tshembeka hambiloko hi vabya.
3 Xikwembu a xi hi tshunguli hi singita sweswi, kambe xi hi nyika matimba ya ku tiyisela vuvabyi. (Pisalema 41:1-3) Sharon u te: “Swi tikomba ndzi nga si tshama ndzi hambana ni xitulu xa lava lamaleke. Ku sukela loko ndzi velekiwile, ku vaviseka ka byongo bya mina ku ndzi tsone ntsako.” Ku dyondza hi Yehovha na hi switshembiso swa yena swa rihanyo leri hetisekeke swi endle leswaku Sharon a va ni ntshembo. Hambileswi swi n’wi tikelaka ku vulavula ni ku famba, u kuma ntsako evutirhelini bya Vukreste. Kwalomu ka malembe ya 15 lama hundzeke, u te: “Rihanyo ra mina ri nga ha hambeta ri hohloka, kambe ku tshemba ka mina Xikwembu ni vuxaka bya mina na xona hi swona swi ndzi tiyisaka. Ndza tsaka swinene ku va exikarhi ka vanhu va Yehovha ni leswi a ndzi seketelaka nkarhi hinkwawo!”
4 Muapostola Pawulo u khutaze Vakreste va le Tesalonika leswaku va “[vulavula] hi ku chavelela eka mimoya-xiviri leyi karhatekeke.” (1 Vatesalonika 5:14) Swilo swo tanihi ku hela matimba swi nga vanga ntshikilelo. Hi 1993, Sharon u tsarile: “Leswi a ndzi tivona ndzi ri munhu la nga kotiki nchumu, ndzi . . . khomiwe hi ntshikilelo lowukulu ku ringana malembe manharhu. . . . Vakulu va ndzi chavelerile va tlhela va ndzi nyika ndzayo. . . . Hi ku tirhisa Xihondzo xo Rindza, Yehovha u hi dyondzise hi musa malunghana ni ntshikilelo lowukulu. Ina, wa va khathalela vanhu va yena naswona u twisisa ndlela leyi hi titwaka ha yona.” (1 Petro 5:6, 7) Sharon wa ha tirhela Xikwembu hi ku tshembeka loko a ha rindzele siku lerikulu ra Yehovha.
5. Hi byihi vumbhoni lebyi nga kona bya leswaku Vakreste va nga tiyisela ntshikilelo lowukulu?
5 Vakreste van’wana va khomiwa hi ntshikilelo lowukulu hikwalaho ka swilo leswi hundzeke leswi va swi voneke evuton’wini. Harley u vone madzolonga lama chavisaka swinene eka Nyimpi ya Vumbirhi ya Misava naswona a a lorha swilo swo chavisa malunghana ni nyimpi. Loko a etlele, a a ta huwelela a ku: “Tivoneleni! Tivoneleni!” Loko a pfuka, a a ta va a tsakamile hi nyuku. Hambiswiritano, u swi kotile ku hanya vutomi lebyi kongomisiwaka hi Xikwembu, naswona hi ku famba ka nkarhi, milorho yoleyo yi hungutekile.
6. Mukreste un’wana u langutane njhani ni swipfukela?
6 Mukreste un’wana loyi a a ri ni swipfukela a swi n’wi tikela swinene ku chumayela hi yindlu ni yindlu. Hambiswiritano, u phikelerile hikuva a a swi xiya leswaku vutirheli a byi vula vutomi eka yena ni le ka lava va n’wi yingisaka. (1 Timotiya 4:16) Minkarhi yin’wana a swi n’wi tikela ni ku gongondza, kambe u te: “Endzhaku ka nkarhi a ndzi swi kota ku lawula ndlela leyi ndzi titwaka ha yona, kutani ndzi ya endlwini leyi landzelaka, ndzi tlhela ndzi ringeta. Hi ku hambeta ndzi hlanganyela evutirhelini, ndzi tshame ndzi hanyile hi tlhelo ra moya.” Ku ya eminhlanganweni na swona a ku ri ntlhontlho, kambe makwerhu loyi a a swi tiva leswaku ku hlengeletana ni vamakwavo i swa nkoka. Hikwalaho, u ringete hilaha a nga kotaka hakona leswaku a va kona.—Vaheveru 10:24, 25.
7. Hambileswi van’wana va chavaka ku vulavula emahlweni ka vanhu kumbe ku ya enhlanganweni, va ku kombisa njhani ku tiyisela?
7 Vakreste van’wana va chava swiyimo swo karhi kumbe swilo swo karhi ku tlula mpimo. Hi xikombiso, va nga ha chava ku vulavula emahlweni ka vanhu kumbe hambi ku ri ku ya enhlanganweni. Wa nga anakanya ndlela leyi swi va tikelaka ha yona ku hlamula eminhlanganweni ya Vukreste kumbe ku nyikela nkulumo eXikolweni Xa Vutirheli Bya Le Tilweni! Kambe va tiyisela, naswona hi khutaziwa swinene hi ku va kona ka vona ni ku hlanganyela ka vona.
8. I yini lexi pfunaka swinene loko u langutane ni swiphiqo swa ndlela leyi u titwaka ha yona?
8 Ku va ni nkarhi lowu engetelekeke wa ku wisa ni wa ku etlela swi nga pfuna munhu ku tiyisela swiphiqo swa ndlela leyi a titwaka ha yona. Ku nga ha laveka mpfuno wa swa vutshunguri. Hambiswiritano, lexi tirhaka swinene i ku titshega hi Xikwembu hi xikhongelo. Pisalema 55:22 yi ri: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” Kutani, “tshemba Yehovha hi mbilu ya wena hinkwayo” hilaha u nga kotaka hakona.—Swivuriso 3:5, 6.
Ku Tiyiselela Ku Feriwa
9-11. (a) I yini lexi nga hi pfunaka ku tiyisela nhlomulo loko hi feriwa hi loyi hi n’wi rhandzaka? (b) Xikombiso xa Ana xi nga hi pfuna njhani leswaku hi tiyisela nhlomulo?
9 Loko hi feriwa hi swirho swa ndyangu, ku lahlekeriwa koloko lokukulu ku nga vanga nhlomulo lowukulu. Abrahama u ririle loko a feriwe hi nsati wa yena la n’wi rhandzaka Sara. (Genesa 23:2) Na Yesu, wanuna la hetisekeke u “humes[e] mihloti” loko munghana wa yena Lazaro a file. (Yohane 11:35) Hikwalaho i swa ntumbuluko ku hlunama loko hi feriwe hi loyi hi n’wi rhandzaka. Hambiswiritano, Vakreste va swi tiva leswaku ku ta va ni ku pfuxiwa ka vafi. (Mintirho 24:15) Hikwalaho, a va “vi na mbitsi hilaha hinkwavo lava nga riki na ntshembo va endlaka hakona.”—1 Vatesalonika 4:13.
10 Hi nga langutana njhani ni ku feriwa? Kumbexana xifaniso xi nga pfuna. Hi ntolovelo a hi hlunami nkarhi wo leha loko munghana wa hina a teke riendzo hikuva hi rindzele ku tlhela hi n’wi vona loko a vuya. Loko hi teka rifu ra Mukreste la tshembekeke hi ndlela leyi fanaka swi nga ha hunguta nhlomulo wa hina hikuva ha swi tiva leswaku u ta pfuxiwa.—Eklesiasta 7:1.
11 Ku titshega hi ku helela hi “Xikwembu xa nchavelelo hinkwawo” swi ta hi pfuna leswaku hi tiyisela ku feriwa. (2 Vakorinto 1:3, 4) Xin’wana lexi nga hi pfunaka i ku anakanyisisa hi leswi endliweke hi Ana, loyi a a ri noni hi lembe-xidzana ro sungula. U feriwe hi nuna va ri ni malembe ya nkombo ntsena va tekanile. Kambe loko a ri ni malembe ya 84 hi vukhale, a ha endlela Yehovha ntirho wo kwetsima etempeleni. (Luka 2:36-38) Ku hanya vutomi byo tano byo tinyiketela handle ko kanakana swi n’wi pfunile leswaku a kota ku langutana ni nhlomulo ni xivundza. Ku hlanganyela nkarhi na nkarhi emintirhweni ya Vukreste, ku katsa ni ntirho wo chumayela hi Mfumo, swi nga hi pfuna ku tiyisela nhlomulo lowu vangiwaka hi ku feriwa hi loyi hi n’wi rhandzaka.
Ku Langutana Ni Miringo Yo Hambana-hambana
12. Vakreste van’wana va tiyisele ndzingo wihi lowu fambisanaka ni vutomi bya ndyangu?
12 Vakreste van’wana va fanele va tiyisela miringo leyi fambisanaka ni vutomi bya ndyangu. Hi xikombiso, loko munghana wa vukati a endla vuoswi, sweswo swi nga vangela ndyangu ntshikilelo lowukulu hakunene! Hikwalaho ka ku tsemeka nhlana ni gome, munghana wa vukati la kanganyisiweke swi nga ha n’wi tikela ku etlela naswona a nga ha rila hi xiviti. Ku endla mintirho yo olova swi nga ha n’wi tshikilela swinene lerova a nga ha endla swihoxo kumbe ku humelela timhangu. A nga ha tsandzeka ku dya, a nga ha ondza, naswona a nga ha karhateka emoyeni. Swi nga ha n’wi tikela ku endla mintirho ya Vukreste. Vana na vona va nga ha khumbeka swinene!
13, 14. (a) I xikhutazo xihi lexi u xi kumaka exikhongelweni xa Solomoni loko a khangula tempele? (b) Ha yini hi khongelela moya lowo kwetsima?
13 Loko hi weriwa hi miringo yo tano, Yehovha u hi nyika mpfuno lowu hi wu lavaka. (Pisalema 94:19) Xikwembu xa swi yingisa swikhongelo swa vanhu va xona, hilaha swi kombisiweke hakona exikhongelweni xa Hosi Solomoni loko a khangula tempele ya Yehovha. Solomoni u khongele eka Xikwembu a ku: “Xikhongelo xin’wana ni xin’wana, xikombelo xin’wana ni xin’wana xa ku kombela tintswalo lexi xi nga endliwaka hi munhu wihi ni wihi kumbe hi vanhu va wena hinkwavo, ku nga Israyele, hikuva un’wana ni un’wana u tiva khombo ra mbilu yakwe, kunene va tlakusela swandla swa vona endlwini leyi, onge wena u nga swi twa u ri ematilweni, ndhawu ya wena yo tshama eka yona, u ta rivalela u tlhela u teka goza, u nyika un’wana ni un’wana hi ku ya hi tindlela takwe hinkwato, hikuva u tiva mbilu yakwe (hikuva wena u ri wexe u yi tiva kahle mbilu ya vana va vanhu); ku endlela leswaku va ku chava masiku hinkwawo loko va ha hanya evuandlalweni bya misava leyi u yi nyikeke vatata wa hina.”—1 Tihosi 8:38-40.
14 Swi nga pfuna swinene ku hambeta hi khongelela moya lowo kwetsima. (Matewu 7:7-11) Mihandzu ya moya yi katsa timfanelo to tanihi ntsako ni ku rhula. (Vagalatiya 5:22, 23) Hi titwa hi ntshunxekile loko Tata wa hina wa le tilweni a hlamula swikhongelo swa hina—ntsako wu siva gome, naswona ku rhula ku siva ku karhateka!
15. I matsalwa wahi lama nga hi pfunaka ku hunguta ku vilela ka hina?
15 Hi nga karhateka hi ndlela yo karhi loko hi fanele hi tiyisela ntshikilelo lowukulu. Kambe ku karhateka kun’wana ku nga ha hungutiwa loko hi tsundzuka marito lawa ya Yesu: “Tshikani ku vilela hi mimoya-xiviri ya n’wina malunghana ni leswi mi nga ta swi dya kumbe leswi mi nga ta swi nwa, kumbe ku vilela hi mimiri ya n’wina hi leswi mi nga ta swi ambala. . . . Kutani, hambetani mi lava mfumo ni ku lulama ka [Xikwembu] ku sungula, xisweswo swilo leswin’wana hinkwaswo mi ta engeteleriwa swona.” (Matewu 6:25, 33, 34) Muapostola Petro u hi khutaza leswaku hi ‘lahlela ku vilela hinkwako ka hina eka Xikwembu, hikuva xa hi khathalela.’ (1 Petro 5:6, 7) Swi fanerile ku endla matshalatshala leswaku hi tlhantlha xiphiqo. Hambiswiritano, loko hi endle leswi hi nga swi kotaka, ku vilela a ku nge hi pfuni kambe hi nga pfuniwa hi ku khongela hi mhaka leyi. Mupisalema u yimbelerile: “Andlala ndlela ya wena eka Yehovha, u n’wi tshemba, yena u ta teka goza.”—Pisalema 37:5.
16, 17. (a) Ha yini hi pfa hi karhateka? (b) Hi ta va na yini loko hi tirhisa Vafilipiya 4:6, 7?
16 Pawulo u tsarile: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” (Vafilipiya 4:6, 7) Hi ntumbuluko, vatukulu lava nga hetisekangiki va Adamu va ta tshama va ri karhi va karhateka. (Varhoma 5:12) Vavasati va Esawu lava a va ri Vaheti “a va dyisa mbitsi emoyeni” wa Isaka na Raveka, vatswari va Esawu lava a va chava Xikwembu. (Genesa 26:34, 35) Vakreste vo tanihi Timotiya na Trofimo a va karhateka hikwalaho ka vuvabyi. (1 Timotiya 5:23; 2 Timotiya 4:20) Pawulo a a vilela hi vapfumeri-kulobye. (2 Vakorinto 11:28) Kambe “Mutwi wa xikhongelo” minkarhi hinkwayo wa va pfuna lava n’wi rhandzaka.—Pisalema 65:2.
17 Loko ha ha rindzele siku ra Yehovha, hi ni nseketelo ni nchavelelo lowu humaka eka “Xikwembu xa ku rhula.” (Vafilipiya 4:9) Yehovha u ni “tintswalo ni nsovo,” u “lunghekele ku rivalela” naswona “wa tsundzuka leswaku hi ntshuri.” (Eksoda 34:6; Pisalema 86:5; 103:13, 14) Hikwalaho a hi ‘n’wi tiviseni swikombelo swa hina,’ hikuva sweswo swi ta endla leswaku hi va ni “ku rhula ka Xikwembu”—ku rhula loku munhu a nga ta ka a nga ku twisisi.
18. Hilaha swi vuriweke hakona eka Yobo 42:5, hi nga swi kotisa ku yini ku “vona” Xikwembu?
18 Loko swikhongelo swa hina swi hlamuriwa, ha swi tiva leswaku Xikwembu xi na hina. Endzhaku ka loko Yobo a tiyisele miringo, u te: “Ndzi twe ha wena [Yehovha] hi mahungundlela, kambe sweswi tihlo ra mina ra ku vona.” (Yobo 42:5) Hi tihlo ra ku twisisa, ripfumelo ni ku tlangela, hi nga anakanyisisa hi ndlela leyi Xikwembu xi tirhisanaka na hina ha yona naswona hi nga xi “vona” ku antswa ku tlula rini na rini. Hakunene ku va ni vuxaka byo tano lebyikulu swi hi tisela ku rhula ka mbilu ni ka mianakanyo!
19. Ku ta humelela yini loko hi ‘lahlela ku vilela ka hina hinkwako eka Yehovha’?
19 Loko hi ‘lahlela ku vilela ka hina hinkwako eka Yehovha,’ hi nga tiyisela miringo hi ri ni ku rhula loku rindzaka timbilu ta hina ni matimba ya hina yo anakanya. Le ndzeni-ndzeni ka mbilu ya hina yo fanekisela, a hi nge he karhateki naswona a hi nge he chavi. Mianakanyo ya hina yi nge karhatiwi hi ku pfilunganyeka kumbe ku vilela.
20, 21. (a) Mhaka ya Stefano yi swi kombisa njhani leswaku hi nga va ni ku rhula loko hi xanisiwa? (b) Boxa xikombiso xa manguva lawa xa leswaku swa koteka ku va ni ku rhula loko u xanisiwa.
20 Mudyondzisiwa Stefano a a rhurile loko a tiyisela ndzingo lowukulu wa ripfumelo ra yena. Loko a nga si nyikela vumbhoni byo hetelela, hinkwavo lava a va ri eSanedri “va [vone] xikandza xakwe xi fana ni xikandza xa ntsumi.” (Mintirho 6:15) Xikandza xa yena a xi rhurile—ku fana ni xa ntsumi, murhumiwa wa Xikwembu. Endzhaku ka loko Stefano a paluxe nandzu wa vaavanyisi wa ku dlaya Yesu, va “tlhavek[e] etimbilwini ta vona va sungula ku n’wi getserisela meno.” ‘Leswi Stefano a a tele moya lowo kwetsima, u langute etilweni kutani a vona ku vangama ka Xikwembu na Yesu a yime evokweni ra xinene ra Xikwembu.’ Hi ku tiyisiwa hi xivono xexo, Stefano u tshembeke ku fikela a fa. (Mintirho 7:52-60) Hambileswi hi nga voniki swivono, hi nga va ni ku rhula loku humaka eka Xikwembu loko hi xanisiwa.
21 Xiya marito ya Vakreste van’wana lava dlayiweke hi Manazi eNyimpini ya Vumbirhi ya Misava. Loko a hlamusela leswi humeleleke eka yena, un’wana u te: “Ndzi gweveriwe rifu. Ndzi yingiserile, kutani endzhaku ka loko ndzi vule marito lama nge, ‘U tshembeka ku fikela eku feni,’ ni marito man’wana ma nga ri mangani ya Hosi ya hina, hinkwaswo se a swi hundzile. . . . Kambe mi nga ehleketi hi sweswo sweswi. Hikuva ndzi ni ku rhula lokukulu, loku nga hlamuselekiki!” Mukreste loyi a ha ri muntshwa loyi a a ta dlayiwa hi ku tsemiwa nhloko u tsalele vatswari va yena a ku: “Se i matakuxa. Ndza ha ri na nkarhi wa ku cinca mianakanyo ya mina. Xana a ndzi ta tlhela ndzi tsaka emisaveni leyi endzhaku ka ku va ndzi landzule Hosi ya hina? Nikatsongo! Kambe sweswi ma tiyiseka leswaku ndzi siya misava leyi ndzi tsakile naswona ndzi ri ni ku rhula.” A swi kanakanisi leswaku Yehovha u seketela malandza ya yena yo tshembeka.
U Nga Tiyisela!
22, 23. U nga tiyiseka hi yini loko wa ha rindzele siku ra Yehovha hi ku tiyisela?
22 Swi nga ha endleka u nga langutani ni mintlhontlho leyi hi vulavuleke ha yona. Kambe, Yobo la chavaka Xikwembu a a tiyisile loko a ku: “Munhu la velekiweke hi wansati, u hanya nkarhi wo koma naswona u taleriwe hi ku karhateka.” (Yobo 14:1) Kumbexana u mutswari la tikarhatelaka ku kongomisa vana va wena hi ku ya hi Bibele. Va fanele va tiyisela miringo exikolweni, kambe wa tsaka swinene loko va yima na Yehovha ni misinya ya milawu ya yena leyinene! Kumbexana u langutana ni maxangu ni miringo entirhweni. Hambiswiritano, u nga swi tiyisela swiyimo leswi ni swin’wana hikuva ‘Yehovha u ku rhwalela mpingu siku ni siku.’—Pisalema 68:19.
23 U nga ha ti teka u ri munhu la tolovelekeke, kambe tsundzuka leswaku Yehovha a nge wu rivali ntirho wa wena ni rirhandzu leri u ri kombisaka hikwalaho ka vito ra yena ro kwetsima. (Vaheveru 6:10) Hi ku pfuniwa hi yena u nga tiyisela miringo ya ripfumelo. Hikwalaho loko u khongela na loko u endla makungu ya wena, katsa ku endla ku rhandza ka Xikwembu. Kutani u nga tiyiseka leswaku Yehovha u ta ku katekisa a tlhela a ku seketela loko wa ha rindzele siku ra yena hi ku tiyisela.
A Wu Ta Hlamurisa Ku Yini?
• Ha yini Vakreste va fanele va tiyisela?
• I yini lexi nga hi pfunaka ku tiyisela vuvabyi ni ku feriwa?
• Xikhongelo xi hi pfuna njhani leswaku hi tiyisela miringo?
• Ha yini swi koteka ku rindza siku ra Yehovha hi ku tiyisela?
[Swivutiso Swa Dyondzo]
[Xifaniso lexi nga eka tluka 29]
Ku titshega hi Yehovha swi hi endla hi kota ku tiyisela ku feriwa
[Xifaniso lexi nga eka tluka 31]
Xikhongelo lexi humaka embilwini xi hi pfuna ku tiyisela miringo ya ripfumelo