Mɔdɛŋ Ni Abɔɔ Kɛtaoɔ Akɛ Nyɔŋmɔ Teŋ Wekukpãa

YESU wie yɛ e-Gɔŋ nɔ shiɛmɔ ni ale waa lɛ mli akɛ: “Mɛi ni hiɛ yɔɔ amɛmumɔŋ hiamɔ nii anɔ lɛ yɛ miishɛɛ.” (Mateo 5:3, NW) Ekolɛ okpɛlɛɔ wiemɔ nɛɛ nɔ. Gbɔmɛi ni yɔɔ he fɛɛ he lɛ kpɛlɛɔ nɔ akɛ ehe miihia ni amɛná amɛkɛ Nyɔŋmɔ teŋ wekukpãa, ni amɛsusuɔ akɛ kɛ́ amɛná wekukpãa nɛɛ, no baaha amɛná miishɛɛ. Shi kɛ́ akɛɛ mɔ ko kɛ Nyɔŋmɔ yɛ wekukpãa lɛ, mɛni no tsɔɔ?

Wiemɔ komekomei ashishitsɔɔmɔ wolo ko tsɔɔ akɛ “mɔ ni hiɔ shi yɛ Nyɔŋmɔjamɔŋ he jeŋba mlai anaa” ji mɔ ni wekukpaa yɔɔ ekɛ Nyɔŋmɔ teŋ loo eji mumɔŋ gbɔmɔ. No hewɔ lɛ kɛ́ akɛɛ mɔ ko ji mumɔŋ gbɔmɔ lɛ, etsɔɔ akɛ wekukpãa kpakpa yɛ ekɛ Nyɔŋmɔ teŋ.

Belɛ te mɔ aaafee tɛŋŋ ená ekɛ Nyɔŋmɔ teŋ wekukpãa kpakpa lɛ? Eyɛ mli akɛ jamɔi lɛ fã kpotoo kɛɔ akɛ amɛle bɔ ni mɔ aaafee ená ekɛ Nyɔŋmɔ teŋ wekukpãa kpakpa moŋ, shi gbɛtsɔɔmɔi ni amɛkɛhaa lɛ fa tamɔ bɔ ni jamɔi ebu lɛ. Protestantnyo kɛɔ akɛ ahere eyiwala beni etee henaabuamɔ ni akɛwajeɔ wekukpãa ni kã ekɛ Nyɔŋmɔ teŋ lɛ shishi lɛ. Katoliknyo bɔɔ mɔdɛŋ ni ekɛ Nyɔŋmɔ ashara kɛ́ etee Mass. Buddhanyo jwɛŋɔ nii anɔ kɛtaoɔ nilee ni haŋ ena heloo mli akɔnɔ. Hindunyo kwaa ehe koni kɛ́ egbo lɛ akafɔ́ lɛ ekoŋŋ. Ani nifeemɔi nɛɛ fɛɛ haa mɔ náa ekɛ Nyɔŋmɔ teŋ wekukpãa kpakpa? Ani amɛteŋ eko haa mɔ náa ekɛ Nyɔŋmɔ teŋ wekukpãa kpakpa?

Mɛi pii baaha sanebimɔi nɛɛ ahetoo akɛ dabi. Amɛkɛɔ akɛ amɛbaanyɛ amɛná amɛkɛ Nyɔŋmɔ teŋ wekukpãa kpakpa kɛ́ amɛkɛ amɛhe ebɔɔɔ jamɔ ko he po. Mɛi komɛi hu susuɔ akɛ ehe ehiaaa kwraa ni mɛi ni miibɔ mɔdɛŋ ni amɛná mligbɛ toiŋjɔlɛ ni amɛnu nɔ hewɔ ni ayɔɔ shihilɛ mli lɛ shishi lɛ aná amɛkɛ Nyɔŋmɔ teŋ wekukpãa loo amɛkɛ amɛhe adɔmɔ jamɔ ko, shi moŋ ehe miihia ni amɛha amɛhiɛ ahi amɛtsuii, ni ji bɔ ni amɛnuɔ nii ahe amɛhaa yɛ amɛmligbɛ tɔ̃ɔ lɛ nɔ. Beni niŋmalɔ ko wieɔ gbɛ ni tamɔ nɛkɛ ni atsɔɔ nɔ anuɔ nɔ hewɔ ni ayɔɔ shihilɛ mli shishi jogbaŋŋ lɛ he lɛ, ekɛɛ akɛ: “Bɔ ni mɔ ko ji yɛ emligbɛ tɔɔ lɛ ni tsɔɔ kɛji akɛ eji mumɔŋ gbɔmɔ. Enɛ tsɔɔ bɔ ni mɔ lɛ jieɔ suɔmɔ kpo etsɔɔ je lɛ kɛ mɛi ni bɛŋkɛ lɛ, kɛ bɔ ni ekpɛlɛɔ amɛnɔ ni ekɛ amɛ yeɔ ehaa lɛ. Anyɛŋ atsɔ jamɔ ko loo hemɔkɛyeli pɔtɛɛ ko nɔ aná enɛ.”

Ekã shi faŋŋ akɛ mɛi hiɛ susumɔi srɔtoi yɛ nɔ ni tsɔɔ akɛ mɔ ko kɛ Nyɔŋmɔ yɛ wekukpãa lɛ he. Aŋmala woji akpei abɔ kɛtsɔɔ bɔ ni aaafee abɛŋkɛ Nyɔŋmɔ lɛ mli, shi bei pii lɛ mɛi ni kaneɔ lɛ anine nyɛɔ shi ni amɛyiŋ futuɔ amɛ. Shi wolo ko yɛ ni kɛ nibii ni kɔɔ Nyɔŋmɔ he lɛ ahe ŋaawoo kpakpa haa. No ji wolo ni haa anaa akɛ ajɛ Nyɔŋmɔ mumɔ lɛŋ aŋma lɛ. (2 Timoteo 3:16) Nyɛhaa wɔkwɛa nɔ ni wolo nɛɛ ni ji Biblia lɛ kɛɔ yɛ gbɔmɔ kɛ Nyɔŋmɔ teŋ wekukpãa, kɛ sɛɛnamɔ ni yɔɔ he lɛ he.

 [He ni Mfoniri ni yɔɔ baafa 2 lɛ Jɛ]

WOLO LƐ HIƐ: Faa kɛ enaa tsei: © Mark Hamblin/age fotostock