Kimi Anga i te Turanga Pae Vaerua

I ROTO i tana Tuatua rongonui i runga i te Maunga, kua akakite a Iesu e: “E mataora to te aronga tei manako i to ratou anoano i te pae vaerua.” (Mataio 5:3, NW) Penei ka akatika rai koe ki taua tuatua ra. Te kite ra te tangata i te au ngai ravarai e ka anoanoia te turanga pae vaerua i roto i to ratou oraanga e te manako ra e, me rauka mai ana, ka apai mai te reira i te mataora no ratou. Eaa ra oki, te aiteanga o te tuatua e “turanga pae vaerua”?

Te akataka maira tetai tikitinari i te turanga pae vaerua ei “kite me kore ei pirianga ki te au tu puapinga o te irinakianga akonoanga” e e “tu me kore e turanga manako i te pae vaerua.” No reira ko te au tuatua mei te “turanga pae vaerua,” te “akono i ta te vaerua,” me kore te “manako i te au mea pae vaerua” te manakoia ra e e aiteite ua to ratou pirianga. Ei akataka meitaki atu i taua tuatua ra, e akamanako ana i teia akaaiteiteanga: E karangaia ana te tangata karape i te au angaanga o te pae puapinga e e tangata manako i te au mea pae pitiniti. Mei te reira katoa, te tangata tei akaperepere i te au mea pae vaerua e te pae akonoanga, e karangaia ana aia e e tangata manako i te au mea pae vaerua.

Akapeea i reira, e rauka ai te turanga pae vaerua mou tikai? Noatu te karanga nei vaitata rai te au akonoanga katoatoa e kua kite ratou i te mataara e rauka ai te turanga pae vaerua, kareka te au aratakianga i orongaia mai, mei te au akonoanga rai te maata. Tetai Porotetani e karanga ra e kua akaoraia aia i ko i te uipaanga akaora akaouanga. Te umuumu ra tetai Katorika kia rauka te akaau anga ki te Atua i ko i te kai anga Oroa. Te aruaru ra tetai Buda kia rauka te marama na roto i te akamanakonako oonu anga. Te tauta ra tetai Initu kia matara mai mei roto i te turanga o te anau akaou anga na te akangere anga iaia uaorai. Tei runga pouroa ainei teia aronga i te arataa e rauka ai te turanga pae vaerua mou tikai? Te taki ra ainei tetai ua atu o teia au mataara ki te turanga pae vaerua?

No te maataanga, ko te pauanga ki taua au uianga ra e kare. Karanga oki ratou e ko te aiteanga o te turanga pae vaerua koia oki kia “irinaki ua ma te kore e riro atu,” koia oki, kia irinaki i roto i tetai atua ma te kore e piri atu ki tetai akonoanga. Ko etai, te manako ra ratou e te tou ra te turanga pae vaerua, kare ki tetai mea i tupu i roto i te akonoanga, mari ra ki te anoano kia rauka te ngakau au e te aiteanga tikai o te oraanga. Te karanga nei ratou e kare te aronga e kimi ra i te turanga pae vaerua e anoano i te akonoanga. Mari ra ka anoano uaia ratou kia akara oonu ki roto i to ratou uaorai ngakau. Kua karanga tetai tangata tata e: “Ka kite oonuia te turanga pae vaerua mou tikai ki roto ia taua uaorai. Ko te mataara tera e aroa ana koe, e ariki ana e e akapiri atu ana ki teia ao e ki te tangata ravarai. Kare te reira e kiteaia i roto i tetai akonoanga me kore, na roto i tetai tu irinakianga.”

Te taka meitaki ua ra e, e tuke maata tikai to rotopu i te au manako o te tangata no runga i te turanga pae vaerua. E tauatini ua atu te au puka e karanga nei e te akaari ra ratou i te mataara ki te tu oraanga pae vaerua, inara e maata ua atu te taime e tupu ana te tu mareka kore e te oripu ua ki te aronga tatau. Inara e tai ia puka tei roto te aratakianga tau kia irinakiia no runga i te au mea pae vaerua. Ko te puka ia e akaari maira i te akapapuanga e e mea akauruia te reira e te Atua. (2 Timoteo 3:16) Ka akara ana ra tatou e eaa ta tera puka, ta te Pipiria, e akakite maira no runga i te aiteanga o te turanga pae vaerua e te puapinga tikai o te reira.

 [Akameitakianga no te Tutu i te kapi 2]

COVER: Background: © Mark Hamblin/​age fotostock