Ku Lavisisa Timhaka Ta Moya

EKA Dyondzo yakwe ya le Ntshaveni leyi dumeke, Yesu u te: “Va tsaka lava khathalaka hi xilaveko xa vona xa moya.” (Matewu 5:3) A swi kanakanisi leswaku na wena u pfumelelana ni marito lawa. Kun’wana ni kun’wana vanhu va swi lemuka leswaku va lava timhaka ta moya evuton’wini bya vona naswona va ehleketa leswaku loko se va ti kumile ti ta va tisela ntsako. Kambe, ku hisekela swilo swa moya swi vula yini?

Xihlamusela-marito xin’wana xi ri i “ku hisekela timhaka ta vukhongeri kumbe ku ti namarhela.” Leswaku u swi twisisa kahle, anakanya hi xifananiso lexi: Munhu loyi a nga ni ntokoto eka swa timali u vuriwa n’watinkota. Hilaha ku fanaka, munhu loyi a ti xiximaka swinene timhaka ta moya kumbe ta vukhongeri u vuriwa munhu wa moya.

Kutani u nga swi kotisa ku yini ku va munhu la hisekelaka swilo swa moya? Hambileswi vukhongeri byo tala byi vulaka leswaku byi tiva ndlela leyi munhu a nga xi enerisaka ha yona xilaveko xakwe xa moya, tinhlamuselo ta kona ta hambana hi ku ya hi vukhongeri bya kona. Hi xikombiso, Muprotestente a nga vula leswaku u ponisiwe hi ku ya eminhlanganweni ya kereke leyi endlaka leswaku a titwa a ri emoyeni. Mukhatoliki a nga lava ku va ni ntwanano ni Xikwembu hi ku tirhisa ku dya xilalelo xa Rhoma Khatoliki lexi vuriwaka Masa. Mubudha a nga lava tinhlamulo hi ku anakanyisisa kunene. Muhindu u titsona swilo leswaku a nga ngheni eka nxaxamelo wa ku tlhela a velekiwa a va nchumu wun’wana. Xana swilo leswi hinkwaswo swi nga endla leswaku munhu a enerisa xilaveko xakwe xa moya? Kumbe, xana xin’wana xa swona xi nga swi kota ku endla tano?

Vo tala a va pfumelelani na swona. Va vula leswaku leswi lavekaka i ku pfumela eka xikwembu handle ko va xirho xa kereke. Van’wana va ehleketa leswaku ku rhandza timhaka ta moya a swi fambisani ni vukhongeri, kambe i ku navela ku va ni ku rhula ka mianakanyo ni ku va ni xikongomelo evuton’wini. Va vula leswaku lava lavisisaka timhaka ta moya a swi bohi leswaku va ya ekerekeni. Ematshan’weni ya sweswo, va fanele va kambisisa timbilu ta vona. Mutsari un’wana u ri: “Ku hisekela swilo swa moya i nchumu lowu kumiwaka embilwini ya munhu. I ndlela leyi u rhandzaka vanhu ni ku va amukela ha yona, ni ndlela leyi u tirhisanaka na vona ha yona. A swi kumiwi hi ku va xirho xa kereke yo karhi kumbe hi ku pfumela eka tidyondzo to karhi ta vukhongeri.”

Swi le rivaleni leswaku vanhu va ni mianakanyo leyi hambaneke swinene malunghana ni ku hisekela swilo swa moya. Tibuku ta magidi ti vula leswaku ti voningela vanhu ndlela yo enerisa xilaveko xa moya, kambe hakanyingi vahlayi va sala va ha ri ni torha naswona va pfilunganyekile. Hambiswiritano, ku ni buku leyi nga ni nkongomiso wo tshembeka etimhakeni ta moya. I buku leyi nga ni vumbhoni bya leswaku yi huhuteriwe hi Xikwembu. (2 Timotiya 3:16) A hi voneni leswi buku yoleyo, ku nga Bibele, yi swi vulaka malunghana ni leswi ku hisekela swilo swa moya swi vulaka swona ni leswaku ha yini swi ri swa nkoka.

 [Laha Xifaniso Xi Humaka Kona eka tluka 2]

COVER: Background: © Mark Hamblin/​age fotostock