Desinyo nga Wala sing Desinyador?

MGA 150 ka tuig na ang nagligad sugod sang ginpaathag ni Charles Darwin nga ang ebolusyon amo ang gintunaan sang masibod kag nanuhaytuhay nga buhi nga mga butang. Apang, ang iya teoriya sang ebolusyon kag ang iban pa nga teoriya nga kaanggid sini, ginpamatukan karon sang mga nagapati nga ang buhi nga mga organismo hungod gid nga gindesinyo bangod sang pagkasibu sang pagkahuman sini. Madamo sang kilala nga mga sientipiko ang wala nagapati nga ang ebolusyon amo ang gintunaan sang nanuhaytuhay nga mga espesyi nga makita naton karon sa duta.

Nagrason ang pila sa sining mga sientipiko nga ang gintunaan sang pagkananuhaytuhay sang mga espesyi amo ang intelihente nga desinyo, ukon ID. Nagasiling sila nga ginasakdag gid sang biolohiya, matematika, kag sentido kumon nga ang mga tinuga may desinyo. Ginatinguhaan man nila nga itudlo ini sa mga eskwelahan. Mainit ang mga pagbaisay tuhoy sa ebolusyon ilabi na sa Estados Unidos, apang ginreport nga ginadebatihan man ini sa Inglaterra, Netherlands, Pakistan, Serbia, kag Turkey.

Makalilibog nga Ginhipsan

Apang, maathag nga may ginhipsan tuhoy sa intelihente nga desinyo. Wala ini nagasambit tuhoy sa isa ka desinyador. Sa banta mo, posible bala ang desinyo nga wala sing isa ka desinyador? Ang mga nagasakdag sa intelihente nga desinyo “wala nagsambit tuhoy sa kon sin-o ukon ano ayhan ining desinyador,” report sang The New York Times Magazine. Nagsiling ang manunulat nga si Claudia Wallis nga ang mga nagasakdag sa intelihente nga desinyo “nagahalong gid nga indi masambit ang Dios.” Kag nagkomento ang magasin nga Newsweek nga ang “I.D. [Intelihente nga Desinyo] wala nagsambit tuhoy sa pagluntad kag sa identidad sang desinyador.”

Apang, nahibaluan mo nga wala kita sing pasingadtuan kon likawan naton ang pagbinagbinag tuhoy sa desinyador. Paano mapaathag sing bug-os ang desinyo sa uniberso kag sa kabuhi mismo kon ang pagluntad kag identidad sang desinyador ginahipsan ukon ginalikawan pa gani?

Sa kasangkaron, ang pagbaisay kon bala ilakip ang isa ka desinyador ukon indi nagadalahig sang mga pamangkot subong sang: Kon patihan naton nga nagaluntad ang isa ka gamhanan nga desinyador, magaupang bala ini sa pagpauswag sang siensia kag kaalam? Mapati lang bala kita nga may intelihente nga desinyador kon wala na sing liwan pa nga paathag? Kag rasonable bala maghinakop nga sa likod sang desinyo may isa gid ka desinyador? Ang masunod nga artikulo magasabat sining mga pamangkot.

[Mga Piktyur sa pahina 3]

Nagpati si Charles Darwin nga ang ebolusyon amo ang gintunaan sang masibod nga kabuhi

[Credit Line]

Darwin: From a photograph by Mrs. J. M. Cameron/U.S. National Archives photo